تو ژى دویڤکەتییێ والیی؟

دەمەکێ درێژە، چ د ناڤ تۆرێن جڤاکیدا یان ب ئاوایەکێ ڕاستەوخۆ، پەیڤا “والى” بۆ پارێزگەر و سەرپەرشتێن ئیدارەیێن سەربخوە، ب ئاوایەکێ نەفەرمى ل سەرانسەرى هەرێما کوردستانێ بکارهێت. ئەگەر ئەڤ بکارهینانە، ب زانابوون و شارەزایى بیت، مالخرابکرنە! ژ خوە ئەگەر ژ نەزانین و پڤدانێ بیت، ئەو عوزرا ژ قەبحەتێ مەزنترە!
ل گۆره‌ى چاڤکانییان و ب تایبەتى مالپەرێ “ویب طب” یێ شڕۆڤەیا پەیڤان و زانیارییێن جودا. وەها، ل سەر پەیڤا والی شڕۆڤەیەك پێشکێشکرییە. “والی”: پەیڤەکا عەرەبییە، واتایا ئەمیر یان حاکمێ ویلایەتێ ددەت. دیسان، ناڤەکێ مێرانە و دەلالەتا مەزناهى و دەستهەلاتێ ددەت.
ل دویڤ دەمى و وەرارا پەیڤان، هێدى هێدى پەیڤا والى، جهێ خوە د ناڤ فەرهەنگا زمانێ تورکیدا کرییە و ژ والى بوویه‌ Vali! ئێدى تورکان، ئەڤ پەیڤە بۆ میر و حاکمێن خوە ل سەرانسەرى ئیمپراتۆرییا ئۆسمانییان بکاردهینا و بوویە پشکەک ژ فەرهەنگ و کەلتوورێ ئەوان. ب قام و پێڤاژۆیا دەمى، ئیمپراتۆرییا ئۆسمانییان شیا دەستهەلاتا خوە بەرفرەهـ بکەت و بگەهیتە کوردستانێ و چێکرنا ویلایەت و سنجەقان. ئێدى ناڤ یان ناسناڤێ “والى” ل دەستهەلاتدارێن ویلایەتێن خوە کرن و ب فەرمى ب والى ب ناڤکرن.
ئەو نامەیا ئەز حەزدکەم کو د ئەڤێ نڤیسینێدا بگەهینم، ئەڤەیە: هێژاینۆ، نوکە مە ئاخ و هەرێما خوە یا یاسایى و سەربخوە هەیە. وەلاتێ مە ئازادە و چ دەستهەلاتدارێن تورك و عەرەب، ب ڕاستەوخۆیى دەستهەلاتێ و گڤاشتنان ل مە ناکەن. ئەم ب حوکم و دەستهەلاتەکا کوردى و د ئاخا کوردستانێدا دژین. لەوڕا، پێدڤییە ئەقلێ خوە ژى، ژ گەمار و بەرمایکێن داگیرکارێن هۆڤ ڕزگار بکەین و ل “زمان، چاند، فەرهەنگ و بهایێن خوە” ب خودان دەربکەڤین. هەر دیسان، ب باشى بزانین چاوا هزر دکەین. چ دبێژین و چ دکەین. ژبەر کو، هەر تشت ل سەر هزر و کەسایەتییا مرۆڤى وەکو تاك و پاشى کۆم و مللەت هژمارە. هەروەکو، بکارهینانا پەیڤا والى، بێى کو بزانین چ بوورییەکێ خوینەلۆيى و داگیرکارى ل پشت هه‌یه‌.
ب دیتنا مە، حکومەتا هەرێما کوردستانێ، ژبەر زانینا بوورییێ خوینەلۆ یێ پەیڤێن “والى و ویلایه‌تان” په‌یڤێن پارێزگەر و پارێزگەهـ یان سەرپەرشت بکارهینایە. لەوڕا، دویڤکەتییێن پەیڤا والى و عەقلیەتا ئۆسمانییان، هوین ژى پێداچوونەکێ د هزر و هۆشێ خوەدا بکەن. بەلکو، دوو یان سێ لاپەرێن دیرۆکێ بخوینن و ل خوە موکر بهێن.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *