هەیکەلێ سیاسی
وەک ئافریدەیا فەلسەفا پەروەردێ !

نڤیسین: بژار هادی

سیستەمێ پەروەردێ و پڕۆسەیا فێربوونێ د هەمی بوارێن ژیانا تاکی و کۆمەلگەهێ دا ڕۆلەکێ گرنگ و کاریگەر هەیە، چێدبیت جڤاکی بەرەڤ کامەڕای و خوەشگۆزەرانیێ ڤە ببەت، ڕەنگە ژی بەرەڤ نە یەکسانی و نە دادپەروەری و گەندەلیێ ڤە ببەت، ئەوا گرێدان ب بنیاتێ پەروەردێ ڤە هەی فەلسەفا پەروەردێ یە کا مرۆڤدوستی و ژیاندوستیێ یان تۆندۆتیژیێ د ناخێ تاکێن جڤاکی دا بچینیت.
فەلسەفا پەروەردێ دەرهاڤێژا فەلسەفە و سیستەمێ سیاسیە و ژ ئێک ناهێنە جوداکرن، نابیت سیستەمەکێ دیمۆکرات هەبیت و ل بەرامبەر وێ پەروەردەیەکا چارچۆڤەکری و کپ کری هەبیت، بەروڤاژی وێ ژی نابیت سیستەمەکێ سیاسی یێ سەپێنەر و گرتی هەبیت، ل بەرامبەر وێ پەروەردەیەکا مۆدرن و پێشکەفتی هەبیت!
گۆهۆرین و لڤینێن د پرۆسەیا پەروەردێ دا گەشەدکن و خۆێندکارێن وێ ب شێوەیەکێ ئازاد و عەقلانی و ڕەخنەگرانە هزردکن د هەمی سەردەمان دا هەرەشەیە لسەر مانا دەسهەلاتێ، میتۆدا ئەرگۆمێنتی: کۆ ئێک ژ ڕێکێن هەرە چالاکە د گەشەکرن و بەرزکرنا ئاستێ زانینێ و شیانێن هەستی و هزری ل دەڤ فێرخوازی کۆ ب شێوەیەک لەز د بویەر و ڕۆیدانێن دەردورا خوە بگەهیت و ب بەلگە و ب پرسیارێن عەقلانی ل چارەسەریان بگەریت و سنور و بەربەستێن جڤاکی و سیاسی بشکێنیت، نڤشەک ل ڤێرێ ڕادبیت کۆ ب شێوەیەکێ کویر د بابەتان بگەهیت و نەبیتە کەسەکێ خوەش باوەر، ئەڤ یاری کرن ب هەستێن خواندەڤانان دەرئەنجاما سیستەمێ کلاسیکێ پەروەردا مەیە، پەروەردەیەک ژ هەمی ئالییان چارچوڤەکری و داخستی، پەروەردەیەک تژی ژ سادیزم و ماشۆسیزم و تژی فوبیا.
ئەگەر سیستەمێ پەروەردێ مۆدرن و عەقلانی با شێخ و مەلا و ئاخایا ب بێ شەرمانە بەحسێ ب ئێک ئینانا جڤاکی و خوەشگوزەرانیێ و دێ چێبت و بێژە (الحمداللە) نەدکر و د دەمەکێ دا زمانێ وان ژ یەکسانی و دادپەروەری و مافێ مرۆڤی نا ڕاوەستیت و خوە ب سەرکردە و پەرلەمانتار و بەرپرسێن حزبێن دیمۆکرات و سۆسیال دیمۆکرات و پێشکەفتن خواز نە ددان ناسکرن.
ئەگەر فەلسەفەیەکا پەروەردەی هەبا زاڕۆکەکێ دەھ سالی پەنا بۆ کۆپی(خش) نە د بر و خیانەت نە د چوو د مێشکێ وی دا، و ل دیڤ دا هزر د کۆچکرن و خوە کۆژی و دزی و تالانا مللەتی نە دبر و تاک تاکێن جڤاکی ب هەمی تەخ و چینان ڤە(مامۆستا، دۆکتۆر، پارێزەر، ڕێڤەبەر، خۆێندکار… هتد) دا د ئێکگرتی بن و ئەو ڕێژا کێم یا کەسانێن نەدادپەروەر و نەڕاست دکارێ خوەدا سزا دن و هەر ئێک بێ جیاوازی مافێ خوە وەرگریت.
ل گەل پەیدا بوونا فەلسەفەیا پەروەردەی یا مۆدرن ئێدی چ داب و نەریت و چ دیوار و چ دەسهەلات نەشێن تاکێ جڤاکی ب کێم ب بینن مافێن وان یێن سەرەکی و لاوەکی بۆ دابی نەکن، لەورا ساخلەمیا پەروەردێ گرێدای فەلسەفا سیاسیا وێ جوگرافیایێ یە کا تا چ ڕادە دخوازت پەروەردە و تاک گەشەیێ بکەت و خوە د گەل هەمی چەمکێن ژیانێ بگۆنجینیت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *