شانۆگه‌رییا بێده‌نگ
سیتافكا زه‌لامێ مری
نڤیسین: سه‌باح ئه‌نباری
وه‌رگێران: سه‌رحان ئه‌حمه‌د سه‌رحان

“دیاری بۆ شاعر زهێر به‌ردی”
(شانۆ تارییه‌، دوێ تاریێدا رۆناهییه‌ك ل ئه‌ردی دیار دبیت، ل سه‌ر زه‌لامه‌كێیه‌ یێ به‌ره‌ڤ ئاسۆیێن دویر دچیت، بۆ بینه‌ری دیار دبیت كۆ یێ بێ روه‌ستیان دچیت)
بێده‌نگییا ئێكێ
زه‌لام به‌ره‌ڤ ئاسۆیێن دویر دچیت، ل دویڤ سیتافكا خۆ یا درێژ كه‌فتییه‌ … رۆناهی كێم و زێده‌ دبیت، دڤی ده‌میدا زه‌لام هێشتا یێ دویڤ سیتافكا خۆ یا درێژ دكه‌ڤیت (چه‌نده‌كا كێم) رۆناهی كێم و زێده‌ دبیت، زه‌لام هێشتا یێ به‌ره‌ڤ ئاسۆیێن دویر دچیت و به‌ره‌ڤ سیتافكا خۆ یا درێژ ل لایێ چه‌رپێ (چه‌نده‌كا دیتر) رۆناهی كێم و زێده‌ دبیت بۆ دویماهیك جار و هێشتا زه‌لام یێ به‌ره‌ڤ سیتافكا خۆ یا ل لایێ راستێ دچیت .. رادوه‌ستیت .. به‌رێ خۆ دده‌ته‌ ئاسۆیێن دویر.
(مۆزیكه‌كا ئارام. ڕه‌نگێ سایكۆدرامایێ دهێته‌ گوهۆڕین بۆ ڕه‌نگێ سۆرێ خوینێ، ده‌نگێ مۆزیكێ ب ده‌نگێ په‌قینه‌كا ب هێز و تۆند دهێته‌ برین. په‌قین دووباره‌ دبیت، زه‌لام ژی ب چاڤێن خۆ خۆ دبینیت ده‌مێ ب له‌شه‌كێ تژی خوین و برین ب ئه‌ردی كه‌ڤتی)
ل لایه‌كێ شێوه‌ی زه‌لامی دناڤ رۆناهییه‌كا لاواز دیار دبیت، به‌رێ خۆ دده‌ته‌ خۆ یان ژی دشێین بێژین كۆ یێ به‌رێ خۆ دده‌ته‌ ته‌رمێ درێژكری ل سه‌ر ئه‌ردی .. ب گرانی به‌ره‌ڤ سیتافكا خۆ دچیت .. ل هنداڤ پێین خۆ رادوه‌ستیت به‌رێ خۆ دده‌تێ هه‌روه‌كو بوونه‌وه‌ره‌كێ دینه‌ و سیتافكا بوونه‌وه‌ره‌كێ دییه‌ .. ب گرانی خۆ ژبۆ سیتافكا خۆ دچه‌مینیت .. ده‌ستێ خۆ بۆ درێژ دكه‌ت داكۆ ژ خه‌وا خۆ هشیار ببیت .. سیتافك رادبیته‌ ژ پێیاڤه‌ .. به‌رامبه‌ر ئێك رادوه‌ستن و ل دویڤدا ده‌ست ب رێڤه‌چوونێ دكه‌ن هه‌ر وه‌كو ب ئێك و دوڤه‌ هاتینه‌ گرێدان … به‌رده‌وامیێ دده‌نه‌ رێڤه‌چوونا خۆ هه‌تا ل خاله‌كا گه‌له‌ك دویر ل ئاسۆیان رادوه‌ستن و هه‌ر ل وێرێ به‌رزه‌ دبن.
دوو زه‌لام ل هه‌مان جهێ سیتافك و خودانێ وێ به‌رزه‌ بووی دیار دبن، داربه‌سته‌ك هه‌لگرتینه‌، وه‌كهه‌ڤییه‌كا مه‌زن دناڤبه‌را وان و زه‌لامیدا هه‌یه‌ … ژ ته‌رمێ زه‌لامێ مری نێزیك دبن .. ته‌رمی دانه‌ سه‌ر داربه‌ستێ، به‌ره‌ڤ ئاسۆیانڤه‌ دچن .. ل نیڤا رێكێ دكه‌ڤنه‌ به‌رسینگێ زه‌لامی … ب پڕس و دوودلی به‌رێ خۆ دده‌نه‌ وی، ئه‌و ژی ب ساری به‌رێ خۆ دده‌ته‌ جه‌نازێ خۆ … داربه‌ستێ دانه‌ ئه‌ردی .. سه‌رێ وێ ڤه‌دكه‌ن … زه‌لام ژ ته‌رمێ داپۆشی ب په‌رووكه‌كێ سپی نێزیك دبیت .. په‌رووكێ رادكه‌ت و مه‌نده‌هۆش دبیت ژ به‌ر وێ وه‌كهه‌ڤییا دناڤ وی و ته‌رمیدا … به‌رێ خۆ دده‌ته‌ زه‌لامان … هه‌ردوو زه‌لام ئاماژه‌ ب وێ یه‌كێ دده‌ن كۆ خۆ ب ڕه‌خ ته‌رمێ خۆڤه‌ درێژ بكه‌ت … ژ ڤێ داخوازیێ دمینته‌ مه‌نده‌هۆش ئه‌ڤجا ب ترس خۆ ژ وان دویر دكه‌ت … دگرنژن و دگه‌ل ڤێ گرنژینێ داربه‌ستێ دهه‌لگرن و دویر دچنه‌ ئاسۆیان هه‌تا به‌رزه‌ دبن … ب نێرینێن خۆ یێن ڕك دگه‌ل وان دچیت هه‌تا به‌رزه‌ دبن و ل دویڤدا بێ گرنگیپێدان به‌رده‌وامیێ دده‌ته‌ رێكا خۆ بۆ لایێ هه‌ڤدژ … هێشتا نیشانێن مه‌نده‌هۆشێ ل سه‌ر زه‌لامی دیارن و ژ نیشكه‌كێڤه‌ ده‌نگێ قێرییه‌كا بلند ژ لایێ راستێ دهێت … ژ هه‌مان لا كاروانه‌كێ ژنێن ب تازی و شینی یێ نه‌دیار ب ژۆر دكه‌ڤیت، كۆ ژ كۆمه‌كا ژنێن خه‌مگین ب لێدانێن تۆند ئاله‌ك و سنگێ خۆ دئێشینن … ب تنێ ده‌نگێ نالینێن وان دهێت (حا حا حا) كاروان ل دۆر خۆ دزڤڕیت … كاروان به‌رده‌وامیێ دده‌ته‌ مه‌راسیمێن زڤڕین ل دۆر ته‌وه‌رێ خۆ … به‌رده‌وامیێ دده‌نه‌ زڤڕینا خۆ و ژ لایێ هه‌ڤدژ ده‌ردكه‌ڤن … به‌رێ خۆ دگه‌ل وان دبه‌ت هه‌تا هێدی هێدی نالینێن وان به‌رزه‌ دبن … بۆ چه‌نده‌كێ ل جهێ خۆ دمینته‌ راوه‌ستیای و پاش ب ڕه‌نگه‌كێ وه‌كو بینه‌ران دبیته‌ تیقلیقا وی.
(ده‌نگێ په‌قینێن به‌رده‌وام تیقلیقێ دبریت و دگه‌ل ڤان په‌قینان دویكێل ب شێوه‌یه‌كێ ستوینی رادبیت. ده‌نگێ گولله‌یان ل ده‌وروبه‌ران به‌لاڤه‌دبیت)
تفه‌نگه‌كا دده‌ستێ زه‌لامیدا و پێ دبه‌زیته‌ ئاسۆیان. ژ ئه‌گه‌رێ په‌قینێ دهلنگڤیت و دكه‌ڤیت ژ دده‌مه‌كێ بۆ ده‌مه‌كێ دی، به‌رێ تفه‌نگێ ل ئاسۆیانه‌ و به‌رده‌وام ته‌قینێ دكه‌ت هه‌ر وه‌كو ژ راستا كه‌سه‌ك ل وێرێ هه‌یه‌ … پڕیشك و گولله‌ ل سه‌ر سه‌رێ وی دهێنه‌ هاڤێت و ژبه‌ر ڤێ یه‌كێ خۆ زك و زك ل ئه‌ردی دده‌ت … زوی ل سه‌ر ئه‌ردی دچیت هه‌ر وه‌كو سه‌ربازه‌كێ ب پیشه‌وه‌ره‌ … ده‌نگێ گۆلله‌یان رادوه‌ستیت، ده‌نگێ په‌قینان ژی رادوه‌ستیت و بێده‌نگیه‌كا كویر په‌یدا دبیت … زه‌لام ب راوه‌ستیانێن جه‌نگی بۆ پێش دهێت … كۆمه‌كا پستالان (پێلاڤێن سه‌ربازیێ) دبینیت، هه‌می ل سه‌ر ئێك و دوو كۆمكرینه‌ … وێنه‌یه‌ك ل سه‌ر سایكۆدرامایێ دیار دبیت دروست كه‌سایه‌تی ده‌ستنیشانكری نینه‌ لێ دبیت هۆلاكۆ یان كه‌سه‌كێ دی بیت … كتا پێلاڤه‌كێ دهه‌لبژێریت … ب هشیار بلند دكه‌ت، هه‌روه‌كو قه‌فده‌كێ گۆلان، ب ره‌سه‌نی ژ وێنه‌ی نێزیك دبیت، پستالێ دانته‌ ل بن وێنه‌ی … پشتا خۆ دده‌ته‌ وێنه‌ی و ڤه‌دگه‌ریته‌ پێلاڤان … وێنه‌ دهێته‌ گوهۆڕین و دچیته‌ هێتله‌ری یان كه‌سه‌كێ دی … زه‌لام ژ وێنه‌ی نێزیك دبیت و رێڤه‌چوونا وییا به‌هی و شینیێن سه‌ركرده‌كێنه‌، پێلاڤه‌كا سۆر دانته‌ بن وی وێنه‌ی … وێنه‌ بۆ فرانكووی دهێته‌ گوهۆڕین یان كه‌سه‌كێ دی … كتا پێلاڤه‌كا سۆر دانته‌ ل بن وێنه‌ی وی به‌ری كۆ بدانیت وێنه‌ دهێته‌ گوهۆڕین و پستاله‌كا مه‌زن یا سۆر ل سه‌ر دیار دبیت … وێ كۆما پێلاڤان رادكه‌ت و كت كت دانته‌ بن وێنه‌ی دهه‌مان ده‌مدا ده‌نگێ مارشالا له‌شكه‌ری بلند دبیت … ئه‌و پستاله‌ دمینه‌ جهێ خۆ ل ئاسۆیان دگه‌ل وێنه‌ی پێلاڤا مه‌زن هه‌تا تاریبوونه‌كا ته‌مام شانۆیێ دگریت.

بێده‌نگییا دوویێ
( ل سه‌ر هه‌ما رێك ژنه‌ك دیار دبیت سیبه‌را وێ یا درێژ ل پێشییا وێیه‌، سه‌لكه‌كا بازاری ب ده‌ستێ خۆ هه‌لگرتییه‌)
ژن رادوه‌ستیت و ئاماژه‌یه‌كێ بۆ دویر دكه‌ت … سایكودراما ڤه‌دبیت و وێنێ سویكه‌كا خواركێن جواروجور دیار دبیت … ژن ب پێنگاڤێن گران ژ سویكێ نێزیك دبیت … به‌رامبه‌ر وێنێ ئێكێ رادوه‌ستیت … سه‌لكا خۆ ڤه‌دكه‌ت … ده‌ستێ خۆ درێژ دكه‌ت داكو هنده‌ك فێقیان ب هه‌لگریت، وێنه‌ به‌رزه‌ دبیت … ژ وێنێ دوویێ نێزیك دبیت … پێكۆلی َدكه‌ت هنده‌ك كه‌سكاتییان ب هه‌لگیت، وێنه‌ به‌رزه‌ دبیت … دهێلیت و به‌ره‌ڤه‌ یێ سیێ و چوارێڤه‌ دچیت لێ ئه‌و ژی به‌رزه‌ دبن … ئه‌ڤجا ب دله‌كێ شكه‌ستی و سه‌لكه‌كا ڤالا دڤه‌گه‌ریت … زه‌لام ب له‌ز ژ نك وێ دبۆریت هه‌ر گرنگیێ ب هه‌بوونا وێ ناده‌ت، جلوبه‌رگێن سه‌ربازیێ ل به‌رن و تفه‌نگه‌ك هه‌لگرتییه‌، ئێكێ دی ژی ژ لایێ دی ده‌رباز دبیت و هه‌ر گرنگیێ پێ نادده‌ت … ده‌هان سه‌رباز ژ نك وێ دبۆرن و خۆ ئێك گرنگیێ پێ ناده‌ت … به‌رێ خۆ دده‌ته‌ هه‌میان هه‌تا هه‌می دناڤ ئاسۆیان دا به‌رزه‌ دبن … زه‌لامه‌ك ل دویماهییان وان ب هشیاری خۆ ژێ نێزیك دكه‌ت داكۆ وی نه‌بینیت، ده‌مێ ژن دزڤڕیت داكۆ به‌رده‌وامیێ بده‌ته‌ رێكا خۆ وی دبینت و دڤه‌جنقیت ئه‌ڤجا ب هێز خۆ دهاڤێژیت .. ب شێوه‌یه‌كێ گرۆڤر دزڤڕن و دوێ زڤڕینێدا به‌رێ خۆ دده‌نه‌ ئێك و دوو .. زه‌لام چه‌ند پاره‌یان دئینته‌ ده‌ر و دانته‌ ل پێش چاڤێن وێ .. ژن ژی به‌رێ خۆ ده‌به‌ته‌ لایه‌كێ دی .. زه‌لام جاره‌كا دی دچیته‌ پێش یا وێ و وان پاره‌یان دئینته‌ پێش چاڤێن وێ لێ ئه‌و ژن دووباره‌ به‌رێ خۆ دبه‌ته‌ لایه‌كێ دی .. بێ گرنگیدان وان هه‌می پاران دهاڤێته‌ ئه‌ردی .. پێكۆلێ دكه‌ت ۆ ژنێب گریت لێ ئه‌و ژن دره‌ڤیته‌ ئاسۆیێن دویر .. ب ڕك و له‌ز دویڤ وێ دكه‌ڤیت .. ل دویرترین خالا ئاسۆیان به‌رزه‌ دبن و ل دویڤدا سیبه‌را وێ دیار دبیت ده‌مێ پێكۆلێ دكه‌ت ژ سیبه‌را ده‌ستێ وی بره‌ڤیت .. ب ڕكی دویڤ وێ دكه‌ڤیت .. وێ دگریت .. وێ ب تۆندی دشدینته‌ هه‌مێزا خۆ .. ژن خۆ ژێ ده‌رڤینیت .. دووباره‌ وێ دگریت .. وێ دئێخته‌ ئه‌ردی و له‌شێ خۆ دهاڤێته‌ سه‌ر وێ .. زورانبازیێ دكه‌ن .. ب تۆندی پێكۆلێ دكه‌ت جلكێن وێ ژبه‌ر بكه‌ت .. ژن وی ژ سه‌ر خۆ رادكه‌ت لێ زه‌لام دووباره‌ دهێت و وێ دگریت و به‌رده‌وامیێ دده‌ته‌ وی تشتێ هاتی ژێ بستینیت .. ژن پێكۆلێ دكه‌ت ب تۆند به‌ره‌ڤانیێ ژخۆ بكه‌ت لێ زه‌لام ب هه‌می هێزا خۆ بۆكسه‌كێ لێ دده‌ت و ب ڤێ چه‌ندێ دلێ ژنێ دهێته‌ گرتن .. سیبه‌را وی خۆ ل سه‌ر سیبه‌را وێ دڕێژ دكه‌ت هه‌تا ژێ ب دویماهیك بهێت .. سیبه‌را زه‌لامێ ئێكێ دیار دبیت و به‌رێ سه‌رێ تفه‌نگا خۆ دده‌ته‌ سه‌رێ وی زه‌لامێ ده‌ستدرێژی كری … گولله‌یه‌كێ ل سه‌ر وی دده‌ت ئه‌ڤجا سیه‌را وی به‌رزه‌ دبیت، زه‌لامێ ئێكێ ژی به‌رده‌وامیێ دده‌ته‌ رێكا خۆ هه‌تا دگه‌هیته‌ ئاسۆیان (ژن ب تنێیه‌، گرییه‌كا بهێز ژێ دهێت) سیبه‌را وێ یا بگری ژێ دویر دكه‌ڤیت و هه‌ر ل وارا دهێت و دچیت هه‌تا دكه‌ڤیت و بێ لڤین دمینیت دڤان ده‌مان دا گرییا ژنێ هێشتا یا به‌رده‌وامه‌، نالینا وێ دگه‌ل ده‌نگێ گرییا زارۆكه‌كێ ژدویر ژتێكه‌ل دبیت … ئه‌ڤ گری و ناڵین هه‌تا دویماهییا بێده‌نگییا دوویێ به‌رده‌وامه‌.

بێده‌نگییا سیێ
زه‌لام ب تنێ ب پێیه‌كێ دیار دبیت .. گۆپاله‌كێ دده‌ستێ ویدا و ل سه‌ر هه‌مان رێك دچیت .. ب كته‌كا پێلاڤه‌كێ ژبیركری ل سه‌ر وێ رێكێ دهلنگڤیت .. رادكه‌ت و دكه‌ته‌ به‌ر وی پێی بریندار .. رێڤه‌چوونا خۆ ته‌مام دكه‌ت هه‌تا ل به‌رامبه‌ر كۆمه‌كا په‌لێن بچویك رادوه‌ستیت .. هزرێن خۆ دكه‌ت .. بریارێ دده‌ت بۆ پێش بچیت .. دچیته‌ سه‌ر په‌لێن بچویك .. پشتی كۆ ژ نیڤا رێكێ ده‌رباز بووی پێلاڤا وی پیچه‌كێ دسۆژیت .. به‌رده‌وامیێ دده‌ته‌ وێ رێكێ لێ ـ ل دویماهییا رێكا په‌لان ـ دلگرتی دكه‌ڤیت .. سیبه‌را وی ب گرانی رادبیت لێ هێشتا له‌شێ وی یێ درێژكرییه‌ ل سه‌ر ئه‌ردی .. به‌رێ خۆ دده‌ته‌ راست و چه‌پێ خۆ، ل دویڤدا به‌ره‌ڤ ئاسۆیان دره‌ڤیت .. هێشتا له‌شێ زه‌لامی یێ درێژكرییه‌ ..زه‌لامه‌كێ نابین ب ژۆر دكه‌ڤیت و رێكا خۆ ب گۆپالێ خۆ دزانیت .. ب گوهێ خۆ ده‌وروبه‌ران پشكنین دكه‌ت .. خۆ ژ وی زه‌لامێ ل سه‌ر ئه‌ردی نێزیك دكه‌ت .. پێكۆلێ دكه‌ت گوه ل نه‌فه‌سێن وی بیت .. پتر خۆ نێزیك دكه‌ت هه‌تا گوه ل نه‌فه‌سێن زه‌لامی دبیت ل دویڤدا ب لڤینه‌كا سڤك خۆ ژێ دویر دكه‌ت .. ب رێكا گوهدانێ پێكۆلێ دكه‌ت خۆ ژ وان تشتێن ل ده‌وروبه‌ێن خۆ دبه‌رزه‌ بكه‌ت هه‌ر چه‌نده‌ چ تشت ل واران نینه‌ .. پێگاڤان به‌ره‌ڤ ئاسۆیان دهاڤێت .. دگه‌هیته‌ وی جهێ ل نك رۆژا ل نێزیك دێ هه‌لایت .. ل چه‌پ و راستێن خۆ دنێریت داكۆ ژ نه‌بوونا كه‌سێ پشت راست بیت .. ده‌ستێ خۆ بۆ رۆژێ درێژ دكه‌ت .. دگریت و دكێشته خۆ .. ل بن جلكێن خۆ دڤه‌شێریت ئه‌ڤجا ده‌وروبه‌ر تاری دبن و ب شێوه‌یه‌كێ ب له‌ز و سڤك پێنگاڤان دهاڤێت هه‌تا ل ئاسۆیێن دویر به‌رزه‌ دبیت .. هشێن زه‌لامی لێ دڤه‌گه‌رن .. لڤینێن گران .. به‌رێ خۆ دده‌ته‌ ده‌وروبه‌ران دبینیت كۆ رۆژ یا هاتیه‌ دزین و ژڤێ چه‌ندێ مه‌نده‌هۆش لێ دیار دبیت .. رادبیته‌ ژ پێیاڤه‌ .. ب هشیار به‌ره‌ڤ جهێ وێڤه‌ دچیت ژ ترسێن هه‌ر تشتێ نێزیك یان دویر .. هنده‌ك مێشێن ب رۆناهی وی دۆرپێچ دكه‌ت و ڤه‌دجنقینه‌ك لێ دیار دبیت ژ ڤێ چه‌ندێ .. چه‌نده‌كێ دۆر وی دزڤڕن و ئه‌وژی دگه‌ل وان دزڤڕیت، پشتی چه‌نده‌كێ خۆ ژێ دویر دكه‌ن و دچنه‌ ده‌رڤه‌ی جهی .. سه‌رێ خۆ ب هێز دگریت .. پێكۆلێ دكه‌ت ته‌كه‌زێ ل سه‌ر وان تشتێن نه‌په‌نی بكه‌ت ژبه‌ر نه‌بوونا رۆناهیێ ..بێ راوه‌ستیان دناڤ كۆلانه‌كا ته‌نگرا دچیت .. بیرا وی دهێت كۆ چرایه‌كێ رۆناهیێ (گلۆپا ده‌ستی) هه‌لگرتییه‌ .. چرایی دئینته‌ ده‌ر .. به‌رێ وێ دده‌ته‌ دیواران و وان تشتێن ل سه‌ر نڤیسی ژ بیرهاتن و گۆتنان دخوینیت … جاران ل هنده‌ك جهان رادوه‌ستیت و هزرێن خۆ تێدا دكه‌ت وه‌كو:
زه‌لامه‌كێ ئێكانه‌
ژ خالا بائا جه‌نگی ده‌ردكه‌ڤیت
ساخ ده‌ردكه‌ڤیت و ئازادییا جه‌نگی هه‌لگرتی

گرنگیێ ب یێن دی ناده‌ت ..ل دویماهییا كۆلانێ به‌رزه‌ دبیت .. سیبه‌را وی دیار دبیت و ده‌ست ب ژێربرنا وان نڤیسینا دكه‌ت یان ژی بویاغه‌كا ڕه‌نگان لێ دده‌ت .. سیبه‌را ل دویماهییا وێ كۆلانكێ به‌رزه‌ دبیت .. شانۆ ب ته‌مامی تاری دبیت.

بێده‌نگیا چوارێ
(چه‌ندین په‌قینێن هستیری ل ڤێرێ و وێرێ، ده‌نگێ وان په‌قینێن بهێز دگه‌ل ده‌نگێن یاریێن ئاگری ل پاشیا شانۆیێ گۆ دبیته‌ ئه‌گه‌رێ تێكه‌ل بوونا ده‌نگێ ئازار و ده‌نگێ وێ كه‌نیا ژ كویر هاتی، تلیلی ب قێریێن هاریكاریێ یێن ب هێز تێكه‌ل دبن)
زه‌لام ب زه‌حمه‌تیه‌كا مه‌زن نێزیكی ئاسۆیێن دویر دبیت … تووشی چه‌ندین رێگریێن نه‌كۆژه‌ك دبیت … دكه‌ڤیته‌ ئه‌ردی .. دووباره‌ رادبیته‌ ژ پێیاڤه‌ … رادوه‌ستیت .. ب مجدی به‌رێ خۆ دده‌ته‌ ئاسۆیێن دویر … چه‌ند پێنگاڤه‌كا دهاڤێت لێ دووباره‌ دكه‌ڤیت … رادبیته‌ ژ پێایڤه‌ .. مجد به‌ره‌ڤ ئاسۆیان دچیت … وه‌ستیانه‌كا مه‌زن ل سه‌ر دیار دبیت ده‌مێ دگه‌هیته‌ ئاسۆیان … ل پشت ئاسۆیان به‌رزه‌ دبیت لێ ده‌مێ دڤه‌گه‌ریت ته‌پا رۆژێ یا هاتیه‌ دزین دناڤ ده‌ستێن ویدایه‌ .. پێكۆلێ دكه‌ت بلند بكه‌ته‌ ئه‌سمانان لێ نه‌شێت چونكی گه‌له‌ك یا گرانه‌ .. دگه‌ل وێ دكه‌ڤینه‌ ئه‌ردی .. دگه‌ل وێ دگۆلۆلكیت.. دووباره‌ رادبیته‌ ژ پێیاڤه‌ … رادبیته‌ ڤه‌ … ل هنداڤ جهێ وێ رادوه‌ستیت … دهه‌لگریت لێ ب وه‌ستیانه‌كا مه‌زن … دگه‌هینته‌ جهێ وێ سه‌ركه‌فتنێ ددانانا وێ ل جهێ وێ یێ دروست نائینیت … دڤه‌كییت ژ وه‌ستیان و خۆینبه‌ربوونا به‌رده‌وام … چه‌نده‌كێ ژ پێكۆلێ رادوه‌ستیت … هنده‌ك برینێن خۆ دپێچیت … دووباره‌ پێكۆلا خۆ دكه‌ت .. ل فه‌زایێ گولله‌ دبرسقن … ب وه‌ستیانه‌كا مه‌زن رۆژێ بلند دكه‌ت … ب مجدییه‌كا مه‌زن بلند دكه‌ت و هه‌ر ده‌مێ رۆژ بكه‌ڤیته‌ جهێ خۆ ئێكسه‌ر چه‌ندین گۆلله‌ ب وی دكه‌ڤن ژ چه‌ندین ئاراسته‌یان .. ب خوینبه‌ربوونه‌كا بهێز دكه‌ڤیت … پێكۆلێ دكه‌ت كۆ رابیته‌ ژ پێیاڤه‌ خۆ بگریته‌ ڤه‌ لێ ئه‌ڤ چه‌نده‌ یا بێ مفایه‌ و هه‌ناسه‌یێن خۆ یێن دویماهیێ ده‌ردهاڤێت لێ رۆژ دووباره‌ جهێ خۆ دگریت و دبرسقیت دگه‌ل مۆزیكه‌كێ هه‌تا ده‌نگێ گولله‌یان دهێته‌ برین و رۆناهیا رۆژێ یا ب هێز شانۆیێ هه‌میێ تژی دكه‌ت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *