کاژین نزار:

ل ژێر ناڤێ (کوردەك ل ئێڤرێست) گەنجەکێ باژێرێ دهۆکێ بەرەڤ وەڵاتێ نیپال ب ڕێکەڤت بۆ هندێ کۆ ئاڵایێ کوردستانێ بگەهینیتە گۆبیتکا چیایێ ئێڤرێست کۆ بلندترین چیایە ل جیهانێ.

ڕەنج عومەر، گەنجێ باژێرێ دهۆکێ و خوەدیێ ئەڤی پڕۆژەیی تایبەت بۆ مالپەرێ خەدەنگ دیارکر: ” ل دەستپێکێ ئەز وەك ڕەنج حەز ژ سەرکێشیێ دکەم من دڤێت کارێن مەزن یێن نێڤدەولەتی ئەنجامبدەم، لەوما هزرا ئەڤی پڕۆژەی ل ساڵا ٢٠١٧ بۆ من دروستبوو کۆ پشتی من لێگەریانەك ل سەر کری کۆ هێشتا چ کوردەك نەگەهشتیە ئەڤێ گۆپیتکێ، من ژی گەلەك باوەری دا خۆ کۆ ئەز ئێکەمین کوردبم خۆ بگەهینمە ئەڤێ گۆبیتکێ و پشتی (٩) مەهێن ڕاهێنانان من خوە نیاسی و من گۆت ئەز دێ شێم ئەڤێ سەرکێشیێ ئەنجامدەم، من ناڤێ پڕۆژەی کر (کوردەك ل ئێڤرێست)”. هەروەسا دیارکر: کۆ ئارمانج ژ ئەڤی کاری ئەوە وەکۆ هەر کوردەکێ دەما کارەکێ مەزن بکەت ناڤێ کوردبوونا خۆ دانیتە پێشیا ناڤێ خۆ، و ئەم کورد چیا دوستین و مرۆڤێن چیایی نە و چیا هەر تشتێ مە بوویە لەوما من دڤیت ئاڵایێ کوردستانێ بگەهینمە بلندترین چیا.

ڕەنجی خوەیا ژی کر، ” ل ساڵا ٢٠١٩ جەنابێ سەرۆك بارزانی گەلەك ب کەیفخۆشی پێشوازی ل ئەڤی پڕۆژەی کریە و ب دەستێن خۆ ئاڵایێ کوردستانێ ڕادەستی من کر، ب راستی ئەڤ ئاڵا بۆ من ئەمانەتەکێ مەزنە و هەڤدەم ژی هێزەکا مەزنە و بێگۆمان ژ وێ هێزێ مەزنتر نینە کۆ مللەتەکێ مەزن ڕادەستی تە بهێتە کرن بۆ کارەکێ پیرۆز. هەروەها بارزانی مەترسیا چیایی دزانی لەوما د دەما گەنگەشێ دا دگەل من گەلەك پشتراستی ل وێ چەندێ کر کۆ ئەز یێ ب سڵامەتبم گیانێ کوردەکێ بۆ وی ژ هەر تشتەکی گرنگترە و سەربلندی و شانازیا خۆ ب گەنجێن نها دشێن داهێنان بکەن دیارکر.

هەروەسا نێچیرڤان بارزانی، سەرۆکێ هەرێما کوردستانی ژی گەلەك ب گەرمی پێشوازی ل ڤی پڕۆژەی کر و گەلەك کەیفخۆشبوو، شانازی دکر کۆ گەنج بشێن ڤان بڕیارێن مەزن و وێرەك بدەن و نێچیرڤان بارزانی هەمی هاریکاریێن ماددی یێن ڤی پڕۆژەی ب ستۆیێ خوەڤە گرتن”.

ل دوماهیکێ رەنج عومەرێ ٣٤ ساڵی بۆ خەدەنگێ دیارکر، وەسا بڕیاربوو ل ساڵا ٢٠٢٠ ئەڤ پڕۆژە بهێتە ئەنجامدان لێ ڤایرۆسی کۆرۆنایی ڕێکنەدا بهێتەکرن، و ئەز ب ڕێ کەڤتیمە بەرەڤ وەڵاتێ نیپال و نها د کەرەنتینێ دامە و پشتی گەهشتنێ دێ دەست ب ڕاهێنانان کەین. هەوەسا پڕۆگڕامێ سەکەڤتنا مە بۆ چیایی ژی دێ ب دوو قوناغان دێ دەست پێکەین، قوناغا ئێکێ ل (١٥ی مەها ٩) یا ئەڤ ساڵ دێ چینە زنجیرەیێن چیایێ هیماڵایا و بۆ ماوەیێ دوو هەیڤ و نیڤان دێ ڕاهێنان کەین، و قوناغا دوویێ ل (١ی مەها ٤) هەتا (١ی مەها٦) یا ساڵا بهێت کەواتە ل دوماهیکا مەها پێنج هەتا دەستپێکا مەها شەش یا ساڵا ٢٠٢٢ دێ ئاڵایێ کوردستانێ گەهینمە گۆبیتکا چیایێ ئێڤرێست.

چیایێ ئێڤرێست دکەڤیتە دناڤبەرا سنوورین وەڵاتێن چینێ و نیپالێدا ژ زنجیرەیێن چیایێ هیماڵایا یە، بۆ ئێکەم جار ل ساڵا (١٨٥٢) وەکۆ بلندترین گۆپیتك هاتیە دەستنیشانکرن. بلندترین چیایە ل سەرانسەری جیهانێ ب بلنداهیا (٨،٨٤٨) مەتران. بۆ ئێکەمین جار ل ڕێکەفتی ٢٩/٥/١٩٥٣ گەشت بۆ هاتیە کرن، و هەتا نها پتر ژ (٣٠٠) کەسان ب ڕێکا سەرکەڤتنا چیایی ڤە گیانێ خوە ژ دەست داینە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *