نڤیسین: مەهدى حەسەن عەلی
ئەز باوەرم بەهرا پتریا مە ل ڤى سەردەمى، مەرەما من مە کوردا، ب تایبەت پشتى کۆرۆنایێ، گوهـ ل دەستەواژە/پەیڤا (وێبینار) بوویە، و دبت گەلەک ژ مە پسیارکربت ئەرێ واتەیا ئەڤێ پەیڤێ چییە و ژێدەرێ وێ ژ کیڤە هاتییە. لەوا؛ ب کورتى دێ چەند ڕێزکەکا ل سەر نڤیسم داکو هەمى هەڤال، ب تایبەت یێن پێزانین ل سەر نە هەى، ژێدەرێ ڤێ پەیڤێ بزانن.
ئەگەر مە بڤێت بەحسێ ڤێ پەیڤێ بکن، ئەم نەچارن بەحسێ ئێک ژ پشک/چەقێن زمانزانیێ بکن، ئەوژى مورفۆلۆجییە. مورفۆلۆجى Morphology زانستێ دورستکرن و چێکرنا پەیڤانە، هەلبەت د مورفۆلۆجیێدا مە (Word Formation) ئانکو؛ دورستکرنا پەیڤان هەیە، و پەیڤ ب گەلەک رێکان دورست دبن و دئێنە د ناڤ زمانیدا. د زمانێ ئنگلیزیدا، نێزیکى (١٢) رێکان هەنە بۆ دورستکرنا پەیڤێن نوى، ل ڤێرێ ئەم دێ بتنێ بەحسێ ئێک رێکێ کن، ئەو ژى یاکو (وێبینار) بەرهەم ئیناى، دبێژنێ (Blending)ـە، ئانکو تێکهەلکرن.
د مورفۆلۆجیێدا، تێکهەلکرن(Blending) ئێکە ژ وان پشکان یێن کو پەیڤێن نوى ب ڕێکا وێ د ناڤ زمانیدا زێدە دبن، تێکهەلکرن ب خوە چییە؟ تێکهەلکرن (Blending)؛ تێکهەلکرنا دو یان پتر ژ دو پەیڤانە د گەل ئێک داکو پەیڤەکا نوى بەرهەم بێت، بەهرا پتریا جاران تیپێن دەستپێکێ یێن پەیڤا ئێکێ دگەل تیپێن دوماهیکێ یێن پەیڤا دوێ تێکهەلدکەن و پەیڤەکا نوى ژ وێ تێکهەلکرنێ بەرهەم دئێت.
بۆ نمۆنە:
ـ تێکهەلکرنا Brunch = Lunch + Breakfast، تێکهەلکرنا دو تیپێن (Breakfast = Br ) دگەل دوماهیک تیپێن (Lunch = unch) پەیڤەکا نوى بەرهەم هات (Brunch). ئەڤ پەیڤە چ واتەیێ ددت؟ (Breakfast) تێشتە و (Lunch) فراڤینە، ل دەمێ ئەڤ هەردوو پەیڤە هاتینە تێکهەلکرن و بوویە (Brunch) واتەیەکا نوى دا، ئەوژى خوارنەکا سڤک دناڤبەرا (تێشت و فراڤێنێدا).
ب ڤى رەنگێ، ئەگەر ئەم بەحسێ وێ پەیڤێ بکن یا مە ڤیاى بۆ وە ب دەنە دیارکرن (وێبینار) چییە، و ژ چ هاتییە؟ هەلبەت ئەڤەژى وەکو نمۆنەیا ئێکێ ژ تێکهەلکرنا دو پەیڤان هاتییە، ئەوژى:
ـ Seminar +Web، تیپێن پەیڤا (Web) ب دورستى هاتینە بکارئینان، و هاتینە تێکهەلکرن دگەل دوماهیک تیپێن (Seminar = inar) و ب ڤێ تێکهەلکرنێ پەیڤەکا نوى بەرهەمات ئەوژى (Webinar)، ئەرێ ئەڤ پەیڤ چ واتەیێ ددت؟ (Web) ل ڤێرێ بۆ تۆڕا ئەنتەرنێتێ دئێت و (Seminar) هەر ب کوردیژى ئەم دبێژنێ (سمینار)، ل دەمێ ئەڤ هەردوو پەیڤە هاتینە تێکهەلکرن و بوویە (وێبینار) واتەیا وان بوو (پێشکێشکرنا سمینارێ ب ڕێکا تۆڕا ئەنتەرنێتێ).
هەلبەت ئەڤ پەیڤ و دەستەواژە ل وەلاتێن پێشکەتى کەڤنە و هەر ژ مێژا هەم وەکو پەیڤ هەمژى وەکو وەزیفێ پەیڤێ (سمینار ب رێکا ئونلاین/ئەنتەرنێتێ) بکارهاتییە، بەلێ د ناڤ مەدا پتر پشتى سەرهلدانا کورۆنایێ هاتییە بکارئینان، ژبەر نەمانا سمینارێن تەقلیدى و مفا وەرگرتن ژ ئەنتەرنێتێ ژبۆ پێشکێشکرنا سمینارێ.
دەرئەنجام؛ (وێبینار) ژ تێکهەلکرنا دو پەیڤان هاتییە، (وێب) ئانکو تۆڕا ئەنتەرنێتێ دگەل دوماهیک تیپێن پەیڤا(سمینار) و (وێبینار) هاتییە بەرهەمئینان، و واتەیا (وێبینار) ئەوە: پێشکێشکرنا سمینارێ ب رێکا توڕا ئەنتەرنێتێ.
ـ ئەگەر دەرفەت هەبت، دێ بەحسێ ڕێکێن دیژی کم، د بابەتێن جوداجودا دا.