ھیلاری کلینتن، وەزیرا پێشتر یا دەرڤەیا ئەمریکا دخوازت پەرتووكا “کچێن کۆبانێ: راپەڕین، وێرەکی و دادپەروەری” بکەتە فلم کۆ بەحس ل چیرۆکا شەرێ یەکینەیا پاراستنا ژنێ ل بەرامبەر داعشێ دکەت.
ھیلاری کلینتن و کچا خوە ل کانوونا ئێکێ یا ساڵا ٢٠٢٠ کۆمپانیا (ھیدن لایتیان) بۆ بەرھەم ئینا فلمان دروستکر، و ل دەستپێکا کارێ کۆمپانیێ وان خواستیە دەستیریێ ژ نڤیسەرێ پەرتووکا “کچێن کۆبانێ: راپەڕین، وێرەکی و دادپەروەری” وەرگرن بۆ بەرھەم ئینانا زنجیرە فلمەکێ.
ھیلاری کلینتۆن دبێژیت: “مە ئەڤ کۆمپانییە دروستکریە بۆ ھندێ کۆ ئاھەنگێ بۆ وان پاڵەوانان بگێرین یێن ھەتا نھا گرنگی پێ نەھاتینە دان، و چ تشتەك ژ ڤی بەرھەمی کاریگەرتر نینە داکۆ پێشانی ھەموو جیھانێ بدەین.” ھیلاری کلینتن ئەوێ یەکێ ژی دووپاتدکەت، ئەو پەرتووكە ئێکە ژ پەرتووكێن “ھەری باش” بۆ دەرخستنا ئازایەتی و وێرەکیا وان کچان یێن شەری ژ بۆ دادپەروەری و یەکسانیێ دکەن.”
ڕۆمانا “کچێن کۆبانێ، چیرۆکا ڕاپەرین، وێرەکی و دادپەروەری” ژ لایێ نڤیسەرەکێ ئەمریکی ب ناڤێ “گەیل تزماج لێمۆن” ھاتیە نڤێسین، و ل دویڤ گۆڤارا نیویۆرك تایمز یا ئەمریکی ھەتا نۆکە دوو پەرتووکێن ئەڤی نڤیسەری ب ناڤێن (The Dressmaker of Khair Khana) و (Ashley’s War) بووینە پڕ فرۆشترین پەرتووک.
گەیل د پەرتووكا خوە دا دەربارەی “کچێن کۆبانێ” بەحس ل چیرۆکا شەرێ یەکینەیا ژنێن کورد دکەت، ب ناڤێ یەکینەیا پاراستنا ژن (یەپەژە) دەمێ ل کۆبانێ رووبەرووی چەکدارێن داعشێ بووین. ئەڤ نڤیسەرە پشتی سەدان دەمژمێران ژ چاڤپێکەفتن و ڕاپۆرتێن مەیدانی ل سەر چاوانیا شەرکرنا یەکینەیا پاراستنا ژنێ بەرامبەر داعشێ، ئەڤ پەرتووك نڤێسیە. ئەو وێ چەندێ دیاردکەت، “یەکەیەکا سەربازی تایبەت ب ژنان پێنگاڤەکە نە بتنێ بۆ شکەستنا داعشێ، بەلکۆ بەرفرھەکرنا ھزرەکێ یە بۆ (یەکسانیا رەگەزی) ل ڕۆژھەلاتا ناڤەڕاست.”
ئەگەر ئەڤ فلمە بھێتە دروستکرن، دێ بیتە دووەم فلم کۆ ل سەر یەکینەیا پاراستنا ژنێ بھێت دروستکرن، کۆ پێشتر ل ساڵا ٢٠١٨ فلمێ کچێن خۆر، ژ لایێ دەرھێنەرەکا فرەنسی یا ژن ب ناڤێ (ئێڤا ئوسۆ) ھاتبوو دروستکرن، و ئەو فلمە ل (فیستەڤاڵا فلمان) د ھەڤڕکیێ دا بوو ژبۆ وەرگرتنا خەلاتێ چلە دارخورمەیا زێڕین.