ل باژێرێ دھۆکێ  فلمەك سینەمایی ل سەر کچ و ژنێن داعش دئێت بەرھەم ئینان، ئەکتەرا سەرەکیا فلمی کچەكا پۆرتوگالی یە، و ئەکتەر و ستافێ تەکنیکیێ فلمی ژی ژ ھەر چوار پارچەیێن کوردستانێ نە.

جوانا بێرناردۆ کچەكا پۆرتوگالی یا تەمەن ٢٠ ساڵە، ھاتیە دھۆکێ دا بەشداریێ د فلمێ (بووك) دا بکەت، و ڕۆلێ سەرەکی د فلمی دا دگێریت کۆ وەك کچەكا ئەوروپی چوویە ناڤ چەکدارێن داعشێ.

جوانا بێرناردۆ، د داخۆیانیەكا ڕۆژنامەڤانی دا دبێژیت: “دیمەنێ من د ناڤ فلمی دا ئەوە، دڤێت فێری نڤێژێن موسڵمانان ببم کۆ ئەز تێگەھشتم ئەڤە شێوازەکێ جوان یێ نڤێژکرنێ یە، و ئەڤ نڤێژە ژ نڤێژێن کریستیانان جودانە کۆ ئەز ب خوە کریستیانم.”

سێرجیۆ ترافاوت دەرھێنەرێ فلمێ بووکە، د داخۆیانیەكا ڕۆژنامەڤانی دا ڕاگەھاند: “ئەڤ فلمە ل سەر کچ و ژنێن داعشێ یە، و بەحس ل کچەكا ١٦ ساڵی دکەت مالا خوە ب جھ دھێلت و د چیتە د ناڤ چەکدارێن داعشێ دا. ھەروەسا بەحس ل وێ چەندێ دکەت بیر و باوەرا وێ کچێ چاوایە، ئەو چ تشتە وەدکەت ئەو خوە بێخیتە د ڕەوشەکا ب ڤی شێوەی.” 

ئەکتەر و ستافێ تەکنیکیێ فلمێ بووك ژ ھەر چوار پارچەیێن کوردستانێ نە کۆ ٦٠٪‏ ژ دەستەیا فلمی کوردن، ٤٠٪‏ بیانی نە. و بوجەیا فلمی ژ لایێ پەیمانگەھا دروستکرنا فلمان ل پۆرتوگالێ ھاتیە تەرخانکرن، و فلم ٨٠٪‏ ل باژێرێ دھۆكێ یە و ل کەمپا شاریا و کەلھا نزارکێ دھێتە وێنەکرن، و ٢٠٪‏ دێ ل مۆسلێ بیت.

ئەڤ فلمە ژ لایێ کۆمپانیا (میتۆس فلم) و ب ھاریکاریا وەزارەتا ڕەوشەنبیری و لاوان یا حکومەتا ھەرێما کوردستانێ دێ ھێت بەرھەم ئینان، و چیرۆکا وێ بەحس ل کچەكا پۆرتوگالی دکەت کۆ چوویە ناڤ داعشێ و پشتی نەمانا چەکدارێن داعش، دایك و بابێن وێ ژ بۆ دیتنا کچا خوە ژ ئەوروپا دھێنە پارێزگەھا مۆسل. 

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *