ژ ئەدەبێ ڕۆسی
نڤێسین: ئەنتۆن چیخۆف
کوردیکرن: مەهدی حەسەن عەلی

بەری دو خۆلەکان ئەز مرم، من خوە دیت بتنێ لڤێرێ دگەل کۆمەکا فریشتەیان، و هندەک بۆنەوەرێن دی نوزانم ئەو چ تشتن، من هیڤی ژوان کر کو من بزڤڕیننە ژیانێ، ژبەر هەڤژینا من یا هێشتا گەنج و وی زاڕۆکێ من یێ هێشتا ڕۆناهی نەدیتی، هەڤژینا من یا ب دوگیان بوو، د هەیڤا خوە یا سیێ دا بوو، چەند خۆلەکەکێن دی دەربازبوون، فریشتەیەک هات و ئالاڤەک د دەستاندا یە وەکو سکرینەکێ/شاشەیەکێ یە، گۆتە من، دەم دناڤبەرا دونیایێ و ئاخرەتێ دا گەلەک ژێک جودایە، خۆلەک ل ڤێرێ بەرانبەر گەلەک ڕۆژانە ل وێرێ ” تو دشێی ژ خێزانا خوە پشتڕاست بی و ل ڤێرێ بزانی ئەو چ دکن “
ئەو سکرین دا کاری، ئێکسەر هەڤژینا من دیاربوو و زاڕۆکەکێ بچویک یێ دناڤ دەستاندا!
وێنە گەلەک بلەز دبۆرین و دەربازدبوون، دەم هەر خۆلەکەکێ دهاتە گوهۆڕین، کۆڕێ من بەردەوام مەزن دبوو، و هەر تشت دهاتە گوهۆڕین، هەڤژینا من ناڤمالی گۆهاڕت، شیا مۆچەیێ من یێ خانەنشینییێ ب دەستخوەڤە بینت، کۆڕێ من چوو قوتابخانەیێ، خوشک و برایێن من ئێکێ ل دویڤ ئێکێ ژیانا هەڤژینیێ پێکئینا، هەر کەسەکێ ژوان ژیانا خوە یا تایبەت دەستپێکر، گەلەک ڕویدان دەربازبوون، د قەرەبالغییا هاتنوچوون و لڤینێ دا و وی وێنێ نەروون، من تێبینییا تشتەکێ نەلڤ و نەگهۆرکر ل پشتا دیمەنی، هەر وەکو سیبەرەکا ڕەش بوو، گەلەک خۆلەک دەربازبوون، و هەمان سیبەر د هەمی وێنەیاندا دیارە، ل وێرێ ساڵ دەربازبوون، سیبەر هەر بچویک دبوو، و لاواز دبوو، من گازی فریشتەیەکێ کر، من هیڤی ژێکرن کو وێ سیبەرێ نیزیک بکت هەتا کو باش ببینم، فریشتەیەکێ دلنەرم بوو، نە بتنێ وێنە نێزیک کر، بەلکو ئەو دیمەن ل دویڤ دەمێ ئەردی بۆ من دانا سەر شاشێ، ئەز هێشتا ژ جهێ خوە نەلڤیمە، ئەڤە پازدە ساڵە، ئەز دبینم ئەڤ سیبەرە یا دکەتە گری و ئەز ژی دگەل دکەمە گری، ئەڤ سیبەرە ” دەیکا من بوو ” .

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *