شانۆگه‌رییا
ژنا بهێزتر
نڤیسین: ئوگست سترنبێرگ
وه‌رگێران: سه‌رحان ئه‌حمه‌د سه‌رحان

كه‌سایه‌تی:
خانم X: لیستكڤانه‌، شویكریه‌
كچ Y: لیسكڤانه‌، شوینه‌كریه‌
گه‌رسوون

كوژیێ قه‌هوه‌خانه‌كا ژنانه‌، دوو مێزێن بچویكێن ئاسنی، قه‌نه‌فه‌ك ژقه‌دیفی، چه‌ند كورسیكه‌ك، خانم X ب ژۆر دكه‌ڤیت، هنده‌ك جلكێن زڤستانی ل به‌رن، سه‌لكه‌كا بچویك ب ده‌ستێن خۆ هه‌لگرتیه‌، ئه‌ڤ سه‌لكه‌ یا چینیه‌.
و به‌رامبه‌ر خانما Y قوتیكه‌كا نیڤییا بیرێ هه‌یه‌. رۆژنامه‌كا وێنه‌ی دخوینیت، ل دویڤدا ب ئێكا دی دگوهۆڕیت.
خانما X: شه‌ڤ باش ئێمیلیا، شه‌ڤا كریسماسێیه‌ و تۆ ب تنێ یا ل ڤێرێ روینشتی، وه‌كو كچه‌كا خۆلیسه‌را نه‌ شویكریی!
خانما Y: (به‌رێ خۆ دده‌تێ و سه‌رێ خۆ دهه‌ژینیت، ل دویڤدا به‌رده‌وامیێ دده‌ته‌ خواندنێ)
خانما X: راستی بۆ ته‌، بۆ من یا نه‌خۆشه‌ ته‌ ب تنێ ببینم و ب ڤێ ره‌وشێ و ل ڤێ قه‌هوه‌خانێ و دڤێ شه‌ڤا كریسماسێدا ، تۆ بیرا من ل شه‌هیانه‌كێ دئینی من ل پاریس دیتبوو، ل وی ده‌می بویكێ مه‌لیل رۆژنامه‌كا وێنه‌ی دخواند، زاڤای ژی بیلیارد دگه‌ل ئاماده‌بوویا دكر، هه‌، ئانكو من ئه‌ڤ بابه‌ته‌ ڤه‌كر، دێ چ ل پشت بیت و دێ دویماهییا وێ یا چه‌وا بیت؟ بلیارد دشه‌ڤا شه‌هیانا خۆ دكر! (خانما Y خۆ ژبۆ گۆتنا تشته‌كێ ئاماده‌ دكه‌ت) مه‌ره‌ما من ئه‌وه‌ كۆ وێ رۆژناما چیرۆكێن وێنه‌ی دخواند! باشه‌، دوه‌كهه‌ڤ نینن.
(گه‌رسوون ب ژۆر دكه‌ڤیت، كوپه‌كێ (جاكلیت)ێ ددانته‌ به‌رامبه‌ر خانما X و ل دویڤدا ده‌ردكه‌ڤیت)
خانما X: ئێمیلیا، ب دیتنا من ته‌ یا باشتركر ده‌ما ته‌ بۆ خۆ هلگرتی، بیرا ته‌ دهێت؟ ئه‌ز ئێكه‌م كه‌س بووم من گۆتی لێ ببوره‌، بیرا ته‌ دهێت؟ دا نوكه‌ یا شویكریبی و دا خودان مال بی، بیرا ته‌ دهێت ده‌مێ ئه‌ز و تۆ چووینه‌ سه‌ره‌دانا بابێ ده‌زگرتیێ ته‌ ل گوندی؟ وی ده‌مێ ته‌ خۆ ب ژیانا مالێ مه‌زندكر، تۆ گه‌له‌ك یا گه‌رم بووی، خۆ تۆ یا به‌رهه‌ڤ بووی ده‌ستا ژ شانۆیێ ژی به‌رده‌یی بۆ هه‌تا هه‌تایێ؟ به‌لێ ئه‌ی خوشتڤییا من ئێمیلیا، مال گرنگرتین تشته‌، ل دویڤدا شانۆ دهێت و زارۆك دهێن، باشه‌، تۆ ل ڤی تشتی ناگه‌هی.
(خانما Y ب چاڤێن كێم به‌رێ خۆ دده‌تێ)
خانما X: (پشتی كۆ كه‌فچكا خۆ كرییه‌ دكۆپیدا، ئه‌وا دمینته‌ ب كه‌فچكێڤه‌ دئالیست، ل دویڤدا ده‌ست ب ڤه‌كرنا سه‌لكا خۆ دكه‌ت، دیاریێن خۆ یێن جه‌ژنێ نیشا دده‌ت) ئه‌ز دێ نیشا ته‌ ده‌م كا من چ بۆ لێپكی و گێز كرییه‌ (بویكه‌كێ دئینته‌ ده‌ر) به‌رێ خۆ بدێ، ئه‌ڤه‌ بۆ لیزایه‌! ها، به‌رێ خۆ بدێ چه‌وا چاڤێن و سه‌رێ خۆ دقولپینیت، ها؟ ئه‌ڤه‌ ژی تفه‌نگا ته‌قینێیه‌. (مێكویكا وێ دزڤڕینیت و ته‌قدكه‌ته‌ خانما Y)
( خانما Y ب لڤینه‌كا ب له‌ز سه‌رێ خۆ دبه‌ته‌ لایه‌كێ)
خانما X: تۆ ترسیایی؟ ته‌ هزركر كۆ من دڤێت ته‌ ته‌قه‌كه‌م؟ ئه‌ز باوه‌رناكه‌م ته‌ ئه‌و هزره‌ كربیت! ئه‌گه‌ر ته‌ ل من دابا ئه‌ز مه‌نده‌هۆش نه‌دبووم، چونكی ئه‌ز یا ل ده‌ف ته‌ و ئه‌ز یا پشتراستم كۆ تۆ ڤێ چه‌ندێ چ جاران ژبیر ناكه‌ی. هه‌ر چه‌نده‌ ئه‌ز ب چ تشتا یا تاوانبار نینم. هه‌تا نوكه‌ تۆ هزر دكه‌ی كۆ من پیلان دانا بوو و من تۆ ژ شانۆیا تۆرا ده‌رئێخستی، ئه‌ز نینم و من چ نه‌كرییه‌، هه‌ر چه‌نده‌ تۆ باوه‌ر ناكه‌ی! دێ باشه‌، ئه‌ڤ تشته‌ چ ناگوهۆڕیت، یا من دڤێت بێژم كۆ هه‌تا نوكه‌ تۆ هزر دكه‌ی من ئه‌ڤ چه‌نده‌ كرییه‌. (دوو شمكا دئینته‌ ده‌ر، ئه‌و شمكه‌ ب ده‌رزی یێن هاتین نه‌خشكرن) ئه‌ڤه‌ ژی بۆ نیڤا منا باشترینه‌، من بخۆ نه‌خشاندینه‌، ئه‌ز حه‌ز ژ گولێن (تیولیب)ێ ناكه‌م، لێ ئه‌وی ئه‌ڤ گوله‌ دهه‌می تشتادا دڤێت.
(خانما Y ب ترانه‌ و مایتێكرن به‌رێ خۆ دده‌تێ)
خانما X: (ده‌ستێ خۆ دانیته‌ سه‌ر شمكا) به‌رێ خۆ بدێ پێن بوبی چه‌ند دبچویكن، گه‌له‌ك یێ جوانه‌ ده‌مێ برێڤه‌ دچیت، ته‌ خۆ بۆ جاره‌كێ ژی نه‌دیتیه‌ ده‌مێ شمك ل به‌ر بن مانه‌. (خانما Y ب ده‌نگه‌كێ بلند دكه‌ته‌ كه‌نی) به‌رێ خۆ بدێ! (وه‌دكه‌ت كۆ ئه‌ڤ شمكه‌ ل سه‌ر مێزێ ب رێڤه‌ بچن، ئه‌ڤجا خانما Y ب ده‌نگه‌كێ بلندتر دكه‌نیت) و ده‌مێ تۆره‌ بیت پێ خۆ ب ڤی شێوه‌ی ل ئه‌ردی دده‌ت؛”نه‌فره‌ت بن، ئه‌ڤان خزمه‌تكارا هه‌تا نوكه‌ خۆ فێری چێكرنا قه‌هوێ نه‌كرییه‌، ئه‌ڤ بوونه‌وه‌ره‌ نزانن په‌تیلا چرایی ژی دروست هه‌لبكه‌ن” ل دویڤدا هه‌ست ب بایه‌كێ ئه‌ردی دكه‌ت ئه‌ڤجا پێن وی سار دبن، “ئوه، ئه‌ڤه‌ چ سه‌رمایه‌، وان بێ مێشكا، ئاگر نه‌هێلایه‌ هه‌لكری”. (شمكا ب ئێك دپه‌رخینیت ئێك ل دویڤ یێ دی)
(خانما Y: ده‌ست ب كه‌نیێ دكه‌ت)
خانما X: پشتی كۆ دهێته‌ مالێ ژی ل شمكا خۆ دگه‌ریت، ئه‌وا مێری دانایه‌ ل بن عومبارێ ـ ئوه، راستی ژی نابیت ژن ب ڤی شێوه‌ی بروینیت و تڕانا ب هه‌ڤژینێ خۆ یێ بچویك و دل ساخ بكه‌ت، پێدڤییه‌ ته‌ زه‌لامێ خۆ هه‌بیت ئیمیلیا، تۆ ب چ دكه‌نی؟ چییه‌، چییه‌؟ تۆ باش دزانی كۆ ئه‌ڤ چه‌نده‌ یا راسته‌، ئه‌ز ژڤێ چه‌ندێ پشتراستم، چونكی وی ب خۆ ئه‌ڤ چه‌نده‌ گۆتیه‌ من. تۆ ب چ دكه‌نی؟ پشتی وێ گه‌رینا مه‌یا نه‌روێج برازێن فرێدریكا هات و پێكۆل كرن وی سه‌رداببه‌ت، هزا خر بكه‌ چه‌ند تشته‌كێ پیسه‌، (بێده‌نگ دبیت) من پێكۆل دكر وی ژ پێشچاڤێن وێ ببه‌م ده‌ما دهاته‌ ده‌ف مه‌ و ئه‌ز ل مال بام، (جاره‌كا دی بێده‌نگ دبیت) تۆ باوه‌ردكه‌ی؟ نه‌ ب تنێ فرێدریكا یێ چه‌نده‌ دكر! ئه‌ز نزانم بۆچی؟ ژنك دینێن هه‌ڤژینێ منن، بێگومان ئه‌و هزر دكه‌ن كۆ ئه‌وی كارتێكرنا خۆ یا تایبه‌ت ب پێشكێشكرنا وان بۆ شانۆیێ هه‌یه‌، ژبه‌ر وان په‌یوه‌ندیێن بهێز یێن وی دگه‌ل ده‌وله‌تێ هه‌ی. دبیت تۆ ژی دویڤ وێ كه‌فتبی، من هند باوه‌ری بته‌ نه‌بوو، لێ نوكه‌ ئه‌ز دزانم كۆ ئه‌و خۆ ب هزرێن ته‌ ڤه‌ مژویل ناكه‌ت، وه‌كو دیار پتریا جاران ته‌نه‌ڤیانه‌ك به‌رامیه‌ری وی هه‌یه‌. (پشتی چه‌نده‌ك ژ بێده‌نگیێ، هه‌ر دوو ب ترسڤه‌ ته‌ماشه‌ی ئێك و دوو دكه‌ن)
خانما X: ئێمیلیا، ئه‌ڤ شه‌ڤه‌ وه‌ره‌ ده‌ف مه‌ شیڤێ، دا تۆ بۆ وی دوپاتكه‌ی كۆ تۆ ژێ تۆره‌ی نه‌بوویه‌، یان ژی ژمن تۆره‌ نه‌بوویه‌، ئه‌ز نزانم، لێ ئه‌ز یا ئارام نابم ئه‌گه‌ر ته‌ بۆ خۆ وه‌ك دوژمن بدانم، ئه‌و ژی چونكی هه‌تا نوكه‌ ئه‌ز یا ل رێزا ته‌. (ب شێوه‌كێ گران ـ سلو) یان ژی، ئه‌ز دروست نزانم بۆچی؟!
(بێده‌نگی، خانما 1 ب گرنگیپێدان ته‌ماشه‌ی ناڤچاڤێن خۆ دكه‌ت)
خانما X: (دچیته‌ دهزرا دا) نیاسینا مه‌ وه‌كی هه‌ر نیاسینه‌كا دی نه‌بوو، ب شێوه‌یه‌كێ سه‌یر ب رێڤه‌چوو، ژ ئێكه‌م جارا چاڤێن من ب ته‌ كه‌فتی ئه‌ز ژته‌ ترسیام، ترسه‌كا وه‌سا كۆ وه‌ل منكر ئه‌ز به‌رێ خۆ ژته‌ نه‌كێشم، نه‌یا گرنگه‌ كا چه‌وا و كه‌نگی، لێ من هه‌ر خۆ ژ ته‌ نێزیك ددیت و من ئه‌و وێره‌كییه‌ نه‌بوو ته‌ بكه‌مه‌ دوژمنا خۆ، ژبه‌ر هندێ ئه‌ز بۆ مه‌ هه‌ڤالا ته‌، هندی من ل بیره‌ هاتنا ته‌ ژی بۆ مالا مه‌ ئه‌گه‌رێ لێككه‌فتنێ بوو دناڤبه‌را مه‌دا، چونكی هه‌ڤژینێ خۆ ل به‌ر هه‌بوونا ته‌ نه‌دگرت، هه‌می تشت بۆ من دشێلی بوون، وه‌كی وی یێ كراسێ نه‌ساخیێ بكه‌ته‌ به‌رخۆ، من گه‌له‌ك پێكۆل كرن دا وه‌لێ بكه‌م دگه‌ل ته‌ بگونجیت، لێ ئه‌ز سه‌رنه‌دكه‌فتم، هه‌تا خازگینیێن ته‌ هاتین، ئه‌ڤجا هه‌ڤالینیا دناڤبه‌را هه‌وه‌ دا توندتر لێ هات، هه‌ر وه‌كو هه‌می تشت خۆ ژ ده‌ستپێكێ درۆن و ئاشكه‌را بوون، هه‌ڤركییا هه‌ستێن خۆ یێن راستی دكر، ب تنێ ده‌ما هین دپاراستی بن ـ ل دویڤدا، لدویڤدا چ؟ ئه‌ڤ چه‌نده‌ نه‌بوو جهێ چاڤپێنه‌اربوونا من (غیره‌) .. سه‌یره‌ ئه‌ز دانپێدانا ب ڤان تشتا دكه‌م؟! ده‌مێ ل ئاڤاهی، ل وی ده‌می ئه‌ز (عرابه‌) بووم، من داخوازكر ته‌ ماچی بكه‌ت، ئه‌ڤ چه‌نده‌كر، هه‌تا تێكچوونه‌ك ل سه‌ر رویێ ته‌ دیاردكر، ئه‌ڤ چه‌نده‌ چێبوو و من پێنه‌ینا ده‌ر، هه‌تا تشته‌كێ هۆسا نه‌هاته‌ هزرا من ژی، هه‌ر من هزر تێدا نه‌كر، نوكه‌دا! (ژنیشكه‌كێڤه‌ رادبیت) بۆچی تۆیا بێده‌نگی؟ هه‌تا نوكه‌ ته‌ ئێك په‌یڤ ژی نه‌گۆتیه‌ و ئه‌ز ب تنێ یا دئاخڤم! ل جهێ یا روینشتی، به‌رێ چاڤێن ته‌ ژی هه‌ر یێ ل من، وه‌كی (عژرا‌و)ئه‌كێ دناڤ شه‌رنه‌قا خۆ یا ئارمیشی. هزرن، هنده‌ك هزرێن (مكشوش)ن، كا بێژه‌ من بۆچی خازگینیێت ته‌ كێچوون؟ بۆچی ئێدی هاتنا ته‌ بۆ مال مه‌ هاته‌ برین؟ بۆچی ته‌ نه‌ڤێت تۆ ئه‌ڤ شه‌ڤه‌ بهێیه‌ مالا مه‌؟ (خانما 1 وه‌سا لێ دیار دبیت هه‌ر دێ ده‌ست ب ئاخفتنێ كه‌ت)
خانما X: هش، ئه‌ز پێدڤی ب چ ئاخفتنێن ته‌ نینم، ئه‌ز تێگه‌هشتم، ئه‌ڤه‌ ژبه‌ر ئه‌گه‌ره‌كێ و ئێكی دییه‌، به‌لێ به‌لێ! نوكه‌ تۆ ل پێش چاڤێن من ژ شه‌رشوره‌كێ (عار) زێده‌تر چ نینی، خۆ من نه‌ڤێت ئه‌ز و تۆ ل سه‌ر ئێك مێز دروینشتی بن (تشتێن خۆ دبه‌ته‌ مێزه‌كا دی) ژبه‌ر هندێ بوو من گۆلێن (تولیب) ل سه‌ر شمكێن وی نه‌خشاندین، ئه‌ڤ گولێن كه‌ربێن من ژێ ڤه‌دبن. (وان شمكا دهاڤێژته‌ ئه‌ردی) ئه‌ڤ وه‌رزێ هاڤینێ چووینه‌ گه‌شته‌كێ بۆ ده‌ریاچا مولرن چونكی تۆ حه‌ز ژ ئاڤا سویر ناكه‌ی، ئه‌گه‌رێ ناڤكرنا مه‌ بۆ كورێ مه‌ ئیكسل بۆ هندێ دزڤڕیت چونكی ناڤێ بابێ ته‌یه‌، ئه‌ڤه‌ هه‌مان ئه‌گه‌ره‌ یێ كۆ ژبه‌ر جلكێن من وه‌كی ره‌نگێ جلكێن ته‌نه‌، من به‌رهه‌مێن وان نڤیسه‌را خواند یێن تۆ حه‌ز ژێ دكه‌ی، و هه‌مان خوارنێن تۆ حه‌ز ژێ دكه‌ی، ئه‌ز هه‌مان ڤه‌خوارنا ته‌ ڤه‌دخوم “جاكلێت ئه‌وا زوی دهێته‌ چێكرن”، به‌ر هندێ بوو ـ ئوه، وه‌ی خودێ، چه‌ند نه‌خۆشه‌ ده‌ما هزرێن خۆ تێدا دكه‌م، هه‌می تشت ژ دلێ ته‌ به‌ره‌ف من ڤه‌ هاتن، هه‌تا هه‌ستێن ته‌ ژی، روحا ته‌ ب نهێنیڤه‌ هاته‌ دناڤ روحا مندا، وه‌كی مێشه‌مورا سێڤێ، دخوت و دخوت، درزینیت و درزینیت، هه‌تا وه‌لێ بكه‌ت چ دناڤدا نه‌مینیت ژبلی تلڤی و هنده‌ك تۆزێ. من دڤێت ژ ته‌ بره‌ڤم، لێ ئه‌ز نه‌شێم، تۆ یا خۆجه بووی وه‌كی ماره‌كێ چاڤ ره‌ش. ئه‌ز هه‌ست ب ڤێ چه‌ندێ دكه‌م ده‌ما چه‌نگێن من، من به‌ره‌ف خوارێ دبه‌ن، ب پێن گرێدایڤه‌ دكه‌ڤمه‌ دناڤ ئاڤێدا و ب هه‌می هێزا خۆ پێكۆلێ دكه‌م ژ كویراتییا ب ده‌ركه‌ڤم، ب تنێ، هێدی هێدی بۆ بنیتر دچم، هه‌تا كویراتی من ب خه‌ندقینیت، ئه‌ڤجا ته‌ دبینم، تۆ وه‌كی كێڤژاله‌كا مه‌زن، من ب (كلالیب)ێن خۆ دبه‌ن، ل وی ده‌مێ ل وێرێ دبشكڤم.
كه‌ربێن من ژته‌ ڤه‌دبن، حه‌ز ژته‌ ناكه‌م، حه‌ز ژته‌ ناكه‌م! تۆ ژی بێده‌نگ یا روینشتی، بێده‌نگی بهای دده‌ته‌، هه‌بوونا هه‌یڤه‌كا گه‌ش یان هه‌یڤه‌كا خه‌مۆك ل ده‌ف ته‌ نینه‌، رۆژبوون یان سه‌رێ ساله‌كا نوییه‌، كه‌یف و خه‌م هه‌مان تشته‌ ل ده‌ف ته‌، ته‌ شیان نینن نه‌ حه‌زژێكرنێ بكه‌ی و نه‌ژی تۆره‌ بی، ئارامی وه‌كی له‌گله‌گێ ل به‌رامبه‌ر مشكی. تۆ نه‌شێی بێهنا نێچیرا خۆ خۆشبكه‌ی ژنوی هێرشێ لێ بكه‌ی، به‌لێ تۆ دشێی ژبه‌ر وێ بمینیه‌ هشیار، تۆ دناڤ كوژیێن قه‌هوه‌خانێن هۆسا دا دروینی، تۆ دزانی ئه‌و دبێژنێ (خه‌فكا مشكا) ژبه‌ر ته‌؟ به‌رێ خۆ بده‌ رۆژناما خۆ دا بزانی ئه‌رێ بێشه‌نسیه‌كێ خۆ ل كه‌سه‌كێ دا، یان ژی هنده‌ك تێبینیێن شانۆیی بۆ كه‌سه‌كێ فرێبكه‌، دبیت تۆ برینی نێچیریێن خۆ یێن بهێت بهژمێری، یان ژی دێ چه‌وا ده‌رفه‌تێن خۆ به‌ده‌رڤه‌كه‌ی، وه‌كی رێنیشانده‌ره‌كێ بۆ گه‌شتیه‌كا روخاندی. خۆلیسه‌رێ ئێمیلیا، ل سه‌ر هندَرا دلێ من دمیته‌ ب ته‌ڤه‌، چونكی ئه‌ز دزانم ته‌ كه‌یف خۆشیا خۆ ژده‌ستدا، ته‌ ژده‌ستدا و تۆ وه‌كی كه‌سه‌كێ بریندار لێ هاتی، تۆ یا تۆره‌ی چونكی تۆ یا برینداری، و ئه‌ز ژته‌ نه‌سل نینم و ئه‌ز نه‌شێم خۆ ژ ته‌ تۆره‌بكه‌م، وه‌كی خۆ بمینه‌، چونكی تۆ لاوازترین كه‌سێ من دیتی.
به‌لێ، و هه‌ر تشتێ من دگه‌ل بوبیكر من نائارینیت، ل دویماهیێ بۆ من دبیته‌ چ؟ ما چ جیاوازییا خۆ هه‌یه‌ كۆ ئه‌ز فێری ڤه‌خوارنا جلكینێ ل سه‌ر ده‌ستێ ته‌ بم یان كه‌سه‌كێ دی، (ب كه‌فچكێ خۆ فره‌كێ ل كوپی دده‌ت) زێده‌باری هندێ جاكلین بۆ ساخله‌میێ یێ باشه‌، خۆ ئه‌گه‌ر ته‌ نیشا من دا بیت ئه‌ز چه‌وا “تانت میو”ی بكه‌مه‌ به‌ر خۆ، وه‌كرییه‌ ئه‌ز سه‌ره‌نجراكێشتربم ل ده‌ف هه‌ڤژینێ خۆ، ب ڤی شێوه‌ی ئه‌ز سه‌ركه‌فتم و تۆ شكه‌ستی. باشه‌، دا به‌رێ خۆ بده‌ینێ كا مه‌ چه‌ند ب ده‌ست خۆ ڤه‌ئینایه‌، ب دیتنا من تۆ هه‌ر ژ ده‌ستپێكێ یا شكه‌ستی بووی، چونكی پێۆلا ته‌ ژبۆ هندێ بوو ئه‌ز بهێلم ـ هه‌ر وه‌كی ته‌ دگه‌ل ده‌زگرتیێ خۆ كری، و گه‌له‌ك په‌شیمان بم وه‌كی ته‌ و نوكه‌، لێ وه‌كی ته‌ دیتی، من وه‌نه‌كر. من رێكا خۆ ب ئارامی بجه ئینا، و من حه‌زا وان كه‌سێن گرنگیا خۆ ل ده‌ف من نه‌ی بجه نه‌ئینا!
دبیت ئه‌ڤێ چه‌ندێ گه‌له‌ك ژ من ستاندبیت، لێ دڤێ ساتێ دا ئه‌ز بهێزترم، چونكی ته‌ چ ژمن كێمنه‌كر، لێ من گه‌له‌ك ژته‌ ستاند، نوكه‌ ئه‌ز وه‌كی دزیكه‌ریمه‌ ژده‌مێ تۆ ژخه‌و رابووی ته‌ دیت كۆ ئه‌و تشتێ ژته‌ كێم بووی یێ فمن. یا پێدڤی بوو ئه‌ڤه‌ بهێته‌ رویدان، ژ ده‌مێ هه‌می تشتا بهایێ خۆ لده‌ف ته‌ ژده‌ستدای و خرش بوون دناڤ ده‌ستین ته‌دا، چونكه‌ تۆ نه‌شێی ئه‌ڤینا زه‌لامه‌كێ ب گۆلێن (تیولیب) و هه‌ستا ب پارێزی ـ لێ ئه‌ز دشێم، و تۆ نه‌شێی وه‌كی من فێری ژیانێ بی ب په‌رتووكێن خۆ .. خۆ ئه‌گه‌ر ئیكسل ناڤێ بابێ ته‌بیت، هه‌ر ته‌ ئیسكلێ بچویك نابیت دا چاڤێ خۆ بده‌یێ .. من هه‌ر ژخۆ دپرسی ئه‌رێ تۆ بۆچی دمینیه‌ بێده‌نگ؟ خۆ پیته‌كێ ژی نابێژی؟ من هزركر كۆ ئه‌ڤه‌ هێزه‌كه‌ ژته‌، لێ بۆ من دیاربوو كۆ ته‌ چ نینه‌ تۆ بێژی، چونكی تۆ هزر دچ تشتا دا ناكه‌ی. (ۆادبیت، شمكێ رادكه‌ت) نوكه‌ دێ چمه‌ مالێ و دێ (تولیب)ێ ژی دگه‌ل خۆ به‌م، (تولیب)ا ته‌! ته‌ ئه‌و شیان نینن ژ خه‌لكی فێربی، چونكی تۆ رازی نابی خۆ بچه‌مینی، له‌وما تۆ وه‌كی (سویق)ه‌كێ هشك شكه‌ستی، لێ ئه‌ز نه‌خێر!
سوپاس بۆ ته‌ ئێمیلیا، سوپاس بۆ وان هه‌می وانێن بكێرهاتی، سوپاس بۆ ته‌ چونكی ته‌ نیشا هه‌ڤژینێ مندا چه‌وا حه‌ز ژێكرن و ئه‌شقێ بكه‌ت، نوكه‌ ژی ئه‌ز دێ چمه‌ مالا خۆ دا ڤیانا خۆ پێشكێشی وی بكه‌م. (ده‌ردكه‌ڤیت)

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *