نڤیسین: جاسم صبری

گەنج گەنجینە و بربرا پێشکەفتن و پێشڤەچوونا هە روەلاتەکێ یە ، مخابن هەر وەرز ئەمێ ب لێشاوی کوچێن گەنجان دبینن ژڤی وەلاتی باردکەن و بەرەبەرە ئەمێ ڤێ گەنجینا پر بها ژدەست ددەین ، جاران بەرپرسێن ڤی وەلاتی ئەڤی بابەتی بەحس ناکەن و جاران دێ بەرپرسەکێ نەژهەژی جهێ خوە داخویانیەکا نەلایق لسەر ڤی بابەتی دەت و ئەگەرێ کوچا گەنجان دێ کەتە زەوق و دلخوازیا گەنجان بێکو دەستێ خوە دەینت سەر برینێ و ئەگەرێ راستە قینەیێ ڤێ دیاردێ دیاربکەت، ئەز باوەرم  چجاران جادە و کولانێن ئەورۆپا بۆ پەناهندەکێ بێ مال و حال نەبووینە بهەشتەکا ئەبەدی، باوەرناکم چ گەنج ئامادەبن دیتنا دێمێ دەیکا خوە بگهورن ب هەمی جوانیێن کولانێن ئەورۆپا، دبت ئەڤ گوتگوتکێن هوسا ل دیوانێن وان سیاسیا هەبن ئەڤێن دئێک رونشتنا شەڤێن خوەدا تێرا شەهیانا دەهـ گەنجێن ڤی وەلاتی پارا دمەزێخن، د هاتن و چوونا ئێک سەفەراخوە دا تێرا ئاڤاکرنا پێنج خانیێن کرێدارێن ڤی وەلاتی خەونا پێڤەدبینن تێڤە بژین پارا بهەدەر بدەن.
ب دیتنا من ئەو تشتێ دبت ئەگەر گەنجێن ڤی وەلاتی خوەشیێ ژ 12دەمژمێرێن ئامان شوشتنا دخارنگەهەکا ئەورۆپاڤە ببینن، نەبوونا دادپەروەریێ یە، هەبوونا گەندەلیێ یە، ئازارا بێ هیڤیێ یه، ئاستەنگکرنا گەهشتنا ئارمانجێ یە، برینا بێ دەرمان یا بێکاریێ یە، ترسا نەبوونا پاشەرۆژێ یە، ئەڤ نشتیمانە پرە ژوان ناز و نیعمەتێن چجاران هەژارێن ڤی وەلاتی تێهنا خوە پێ نەشکاندی، چ جاران وەسا هزرنەکن گەنجێن ڤی وەلاتی حەش ئەڤێ ئاخێ ناکەن نەخێر، ئەڤ نشتیمانە دبنەرەتدا بومە هەمیان دەیکە دەیک، لێ مخابن هەردەم مە وەک گەنج وەسا یا لێ هەست پێکری ئەم یێ دمالا بێ سەمیانا ڤە دژین .

بۆ راوەستاندنا ئەڤان کوچێن گەنجان یێن ب کومەل فەرە حکومەت ئاورەکا جدی ل تەخا گەنجا بدەت وپێداچوون و لێکولینێن جدی بکەت کا ئایا بوچی گەنج ئەڤی وەلاتی بجهـ دهێلن ، ئەو چ تشتن وەدکەن گەنج ژ ئەڤی وەلاتی بڕەڤن و قەستا کولانێن غەریبیێ دکەن ئەڤە ددەمەکێ دایە سالانە چەندین چیرۆک و رویدانێن دلتەزین یێن ئەڤان گەنجا لسەر سنوران ئەم دبینن کو جانێ خوە ژدەست ددەن و توشی چەندین ئاستەنگی و دەردەسەریان دبن .

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *