(دیمەنەکێ بێدەنگ، ب تنێ بۆ دوو ئەکتەران)

نڤیسین: ساموێل بیکێت
وەرگێران: سەرحان ئەحمەد سەرحان

کەسایەتی:
ئەکتەرێ A: لڤینێن وی گرانن، هەردەم یێ گێژە، دەمێ جلکان دکەتە بەر خۆ یان دئێخیت ب شێوەیەکێ بێئاقلانە سەرەدەریێ دگەل دکەت و دبیتە جهێ ترانێ.

ئەکتەرێ B: ب شێوەیەکێ تەمام بەروڤاژی کەسایەتییا ئێکێیە، ب لەز، ژیر، تەکەزێ ل سەر تشتی دکەت.

نیشاندەر: ئاراستەی رۆناهیا بهێز ل سەر کویراتیێیە،ل وێرێ دیکۆر دیار دبیت، کۆ ژ دارەکێ درێژ ، تەنگ، نزم، پێکدهێت (هەر وەکۆ بەردییا ب لێڤا جادەیێ) ئەوا ژ دەپی مایی پێدڤییە تاری بیت.

دیمەن یێ راوەستیای

کیسکێ A و کیسکێ B یێ ل سەر دەپێ داری یێ درێژ (یێ کۆ ل سەر شێوەی بەردییا ب لێڤا جادەیێ)، کیسکێ A یێ ل لایێ راستێ و کیسکێ B یێ ل چەپێ، هندەک جلکێن پاقژ و ب شێوەیەک رێکخستی هاتینە دانان ل سەر ئێک وەکی (ساکۆ، پەنتەرۆن، جزمە، کۆلاڤ) هاتینە دانان.
ژلایێ راستی ئاوزەنگەک ستوینی ب سەرەک ئاسنی یێ تیژ دیار دبیت، پێنگاڤەکێ ژ کیسکێ A دویر رادوەستیت. بۆ پاشڤە دزڤڕیت، ل دویڤدا ب هێز بۆ پێش دهێت و پێنجەکێ ل کیسکێ A ددەت، بێدەنگی و راوەستیان، کیسک ژجه‍ نالڤیت، ئەڤجارە ئاوزەنگ پتر بۆ پاشڤە دزڤڕیت، رادوەستیت، ل دویڤدا ب هێز دهێت و پێنجەکێ ل کیسکێ A ددەت.
A سەرێ خۆ ژ کیسکی دئینتە دەر، قەمیسەک ل بەرە، ژ لڤینێ رادوەستیت، ب ترس و دوو دلی هزرێن خۆ دکەت .. نڤێژێ دکەت، ب ترس و دوو دلی هزرێن خۆ دکەت، رادبیتە ژ پێیاڤە، شویشەیەکا حەبکا ژ بەرویکا قەمیسی دئینتەدەر، حەبکەکێ وەردگریت، ب ترس و دوو دلی هزرێن خۆ دکەت، شویشەی دزڤڕینتە جهێ وێڤە. وان جلکێن رێکخستی دکەتە بەر خۆ، ب ترس و دوو دلی هزرێن خۆ دکەت، گیزەرەکێ ژ بەرویکا ساکۆیی دئینتەدەر، لەقەکا مەزن ژێ وەردگریت، وێ لەقێ دجویت ل دویڤدا ب دارشبۆن ژ دەڤێ خۆ دهاڤێژت، ئەوا ژێ مایی دزڤڕینتە دبەرویکا ساکۆییدا، ب ترس و دوو دلی، هەردوو کیسکان بلند دکەت و دانتە سەر پشتا خۆ یا خوار، وانا ل نیڤا دویراتیا دناڤبەرا وی و لایێ چەپێ ددانیت، ترس و دوو دلی، هەمی جلکێن خۆ دئێخیت ژبلی قەمیسی و ب شێوەیەکێ نە رێکخستی دهاڤێژیت، حەبکەکا دی وەردگریت، ترس و دوو دلی، دکەڤیتە سەرچۆکا، نڤێژێ دکەت، خۆ بۆ لایێ کیسکی دخشینیت هەتا بچیتە تێدا، بێ هیچ لڤەینەک ژێ بهێت. نوکە کیسکێ A یێ ل چەپا کیسێ B.

(بێدەنگی)

ئاوزەنگەک دیار دبیت، یا ل سەر چوارچوڤەکێ بچویک. چەندە پێنگاڤەکا ژ کیسکێ B دویر دبیت .. بێدەنگی .. بۆ پاشڤە دچیت ل دویڤدا رادوەستیت. ل دویڤدا ب لەز بۆ پێش دچیت، پێنجەکێ ل کیسکێ ددەت و پێنگاڤەکێ دزڤڕیتە پشتێ .. بێدەنگی .. کیسک دلڤلڤیت ئاوزەنگەک دەردکەڤیت.
B ب قەمیسێ خۆڤە ژ کیسکی دەردکەڤیت. یێ ژ پێیاڤە، ژ بەرویکا قەمیسێ خۆ مەژمێرەکا مەزن دئینتە دەر، بەرێ خۆ ددەتە دەمی .. دزڤڕینتە جهێ وێڤە .. هندەک لڤینێن وەرزشی ئەنجام ددەت، بەرێ خۆ ددەتە دەمی .. فرچەکێ ددانا ژ بەرویکا قەمیسی دئینتە دەر و دەست ب شووشتنا ددانێن خۆ دکەت.
فرچێ دزڤڕینتە بەرویکا قەمیسێ خۆ، پرچا خۆ ب دژۆرای دتێهوسینیت، شەی ژ بەرویکا قەمیسێ خۆ دئینتە دەر و پرچا خۆ شە دکەت، ل دویڤدا شەی دزڤڕینتە بەرویکا قەمیسی، بەرێ خۆ ددەتە دەمی .. چاڤێ وی ب کۆما جل و بەرگا دکەڤیت، دکەتە بەر خۆ .. بەرێ خۆ ددەتە دەمی، فرچەکێ جلکان.ژ بەرویکا ساکۆیی دئینتە دەر، جلکێن خۆ فرچە دکەت و هەتا دگەهیتە پرچا خۆ ژی، ل دویڤدا دزڤڕینتە جهێ وێڤە .. خودیکەکا بچویک ژ بەرویکا ساکۆیێ خۆ دئینتە دەر، سەروبەرێ خۆ پشکنین دکەت، دزڤڕینتە جهێ وێڤە .. گیزەرەکێ ژ بەرویکا ساکۆیی دئینتە دەر، لەقەکێ لێددەت، ب تام دجویت، دویڤدا دادعویریت، ئەوا ژ گێزەرێ مایی دزڤڕینتە جهێ وێڤە. بەرێ خۆ ددەتە دەمی، نەخشەیەکێ ژ بەرویکا ساکۆی دئینتە دەر، دەست ب لێگەریانێ دکەت، دزڤڕینتە جهێ وێڤە، قیبلەنامەکێ ژ بەرویکا خۆ دئینتەدەر، پشکنین دکەت، ل دویڤدا دزڤڕینتە جهێ وێڤە، بەرێ خۆ ددەتە دەمی، هەردوو کیسکا ب پشتا خۆ یا چەمیای ژ وێرێ دلڤینیت، ململی. دانیتە نێزیکی لایێ چەپێ یێ شانۆیێ، دوو یاردا ژ لایێ چەپێ دویرە، بەرێ خۆ ددەتە دەمی، جلکێن خۆ دئێخیت ژبلی قەمیسی، ب رێکخستن ئێکی دانتە سەر یێ دی، بەرێ خۆ ددەتە دەمی، چەند راهێنانێن وەرزشی ئەنجام ددەت، بەرێ خۆ ددەتە دەمی، سەرێ خۆ دتێهوسینیت، پرچا خۆ شە دکەت، ددانێن خۆ دشوت، بەرێ خۆ ددەتە دەمی، دەمژمێرێ ژ دەستێ خۆ دکەت و دچیتە دناڤ کیسکیدا، بێ لڤین. نوکە کیسکێ B یێ ل چەپا کیسکێ A، ئانکو وەکی دەستپێکا دیمەنی.
ژلایێ راستی ئاوزەنگەک ستوینی ب سەرەک ئاسنی یێ تیژ دیار دبیت، پێنگاڤەکێ ژ کیسکێ A دویر رادوەستیت. بۆ پاشڤە دزڤڕیت، ل دویڤدا ب هێز بۆ پێش دهێت و پێنجەکێ ل کیسکێ A ددەت، بێدەنگی و راوەستیان، کیسک ژجه‍ نالڤیت، ئەڤجارە ئاوزەنگ پتر بۆ پاشڤە دزڤڕیت، رادوەستیت، ل دویڤدا ب هێز دهێت و پێنجەکێ ل کیسکێ A ددەت.
نوکە A سەر خۆ ژ کیسکی دئینتە دەر، قەمیسەک ل بەرە، ژ لڤینێ رادوەستیت . . .

پەردە دهێتە خوار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *