نڤیسین: هارۆلد پێنته‌ر
وه‌رگێران: سه‌رحان ئه‌حمه‌د سه‌رحان

كه‌سایه‌تی:
زه‌لام: ژیێ وی نێزیكی 40 ـ 50 سالیێیه‌
ژن: ژیێ وێ نێزیكی 40 ـ 50 سالیێیه‌
جه: حه‌وشا خانی، هه‌ر دوو یێ قه‌هوه‌كێ ڤه‌دخون.
ده‌م: شه‌ڤ

زه‌لام: ئه‌ز به‌حسی وێ شه‌ڤبێریێ دكه‌م، ئه‌وا ل نك رویباری.
ژن: كیژ شه‌ڤبێری
زه‌لام: ئێكه‌م شه‌ڤبێرییا مه‌، ئێكه‌م دیتنا مه‌، ل سه‌ر پرێ
(راوه‌ستیانه‌ك)
ژن: ناهێته‌ بیرا من.
زه‌لام: ده‌مێ ئه‌م سه‌ر پرێ راوه‌ستیاین و مه‌ به‌رێ خۆ دا خواربوونا رویباری. هنگێ شه‌ڤ بوو، چونكی هنده‌ك چرا هه‌بوون ب رێكا وان به‌نده‌ر رۆهن دبوو، ل وی به‌نده‌ری گه‌می رادوه‌ستیان. ئه‌م ب تنێ بووین، به‌رێ مه‌ ل دویماهییا رویباری بوو، ده‌ستێ من ل دۆر ناڤته‌نگا ته‌یا زه‌عیف بوو. ما بیرا ته‌ نه‌هات؟ ل وی ده‌می من ده‌سته‌كێ خۆ دناڤ ساكۆیێ ته‌دا ڤه‌شارت بوو.
(راوه‌ستیانه‌ك)
ژن: ئه‌رێ ل وی ده‌می زڤستان بوو؟
زه‌لام: هه‌لبه‌تزڤستان بوو، ئێكه‌م دیدارا مه‌بوو، مه‌ پێكڤه‌ په‌یاسه‌ دكرن، ئه‌و ئێكه‌م سه‌یرانا مه‌بوو. پێدڤییه‌ بیرا ته‌ لێ بهێت.
ژن: بیرا من ل وێ سه‌یرانێ دهێت، بیرا من دهێت ده‌مێ مه‌ پێكڤه‌ په‌یاسه‌ دكرن.
زه‌لام: ئێكه‌م شه‌ڤبێرییا مه‌؟ ئێكه‌م سه‌یرانا مه‌؟
ژن: هه‌لبه‌ت بیرا من ل ئه‌ڤێ دهێت.
(راوه‌ستیانه‌ك)
ئه‌م ژ رێكێ دویر بووین و ب سه‌ر وی ناڤبڕێ ئاسنی یێ سۆر كه‌فیت و به‌ره‌ف زه‌ڤیێڤه‌ چووین، ئه‌م به‌ره‌ف ڕه‌خێن زه‌ڤیێ چووین، ئه‌م ل نێزیك لێڤێن وی ناڤبڕی روینشتین.
زه‌لام: نه‌خێر، ئه‌م ل ده‌ف پڕێ راوه‌ستیان.
(راوه‌ستیانه‌ك)
ژن: بیرا من ناهێت، دبیت تۆ دگه‌ل كچه‌كا دی بی.
زه‌لام: دره‌وه‌.
ژن: به‌لێ. تۆ دگه‌ل كچه‌كا دی بووی.
زه‌لام: ئه‌ڤه‌ ژ مێژه‌ بوو، بیرا من ناهێت.
(راوه‌ستیانه‌ك)
بیرا من ل ڕه‌نگڤه‌دانا رۆناهیێ ب وی رویباری دهێت.
ژن: ده‌می ئه‌م ل نێزیك وی ناڤبڕی راوه‌ستیای بووین ته‌ ده‌ستێ خۆ هاڤێته‌ روویێ من. تۆ دترسیایی، لێ دهه‌مان ده‌مدا ته‌ ب نه‌رمی ده‌ستێ خۆ پێڤه‌دبر. چاڤێن ته‌ ب پشكنینكرنا سه‌روچاڤێن منڤه‌ مژویل بوون، ل وی ده‌می من ژخۆ پڕسی: تۆ كی دبینی؟ تۆ هزرێن چ دكه‌ی؟ ته‌ دڤێت تۆ چ بكه‌ی؟
زه‌لام: ئه‌رێ ته‌ دیدارا مه‌ دوێ ئاهه‌نگێ ژی ژبیركر؟
ژن: كیژ ئاهه‌نگ؟
زه‌لام: چه‌وا؟
ژن: یا ژ منڤه‌ من های ژ گریا زارۆكه‌كێ بوو!
زه‌لام: من های ژ چ ده‌نگان نه‌بوویه‌.
ژن: من هرزكر كۆ زارۆكه‌كه‌ یێ ژ خه‌و هشیاربووی و دكه‌ته‌ گری.
زه‌لام: كه‌س ژبلی مه‌ ل ڤێرێ نینه‌.
(راوه‌ستیانه‌ك)
(باوه‌شكه‌كێ ڤه‌دده‌ت، به‌رێ خۆ دده‌ته‌ ده‌مژمێرا خۆ)
ئۆه، ده‌م گیرو بوو و هێشتا ئه‌م یێ ل ڤێرێ روینشتین. ده‌مێ نڤستنێیه‌، پێدڤییه‌ ئه‌ز سپێدێ زوی ژخه‌و رابم، من گه‌له‌ك كار هه‌نه‌ پێدڤییه‌ ئه‌ز سوباهی ئه‌نجام بده‌م، تۆ بۆچی شه‌ڕه‌ده‌ڤێ دكه‌ی؟
ژن: من چ شه‌ڕه‌ده‌ڤ نه‌كرینه‌، من ژی دڤێت ئه‌ز بنڤم، پێدڤییه‌ ئه‌ز زوی ژخه‌و هشیار ببم، چونكی من گه‌له‌ك كار هه‌نه‌ ئه‌نجام بده‌م.
(راوه‌ستیانه‌ك)
زه‌لام: بیرا ته‌ ل وی زه‌لامی دهێت ئه‌وێ ئاهه‌نگ چێكری. ناڤێ وی داووتی بوو، ته‌ ئه‌و دنیاسی، من ژی پاش ئه‌و نیاسی، ل پێشیێ من هه‌ڤژینا وی دنیاسی، من ل وێرێ تۆ دیتی، تۆ نێزیك په‌نجه‌رێ بووی، من بۆ ته‌ كره‌ كه‌نی و چونكی تۆ ژی ب من داخبار بووی، ته‌ ژی كه‌نییه‌كا شرین ل من زڤڕاند. ئه‌ز مه‌نده‌هۆش بووم، ئه‌ز یێ سه‌رنجراكێش و جوان بووم، ته‌ پشتی وی ده‌می گۆته‌ من كۆ تۆ داخباری چاڤێن من بووی.
ژن: تۆ داخبارێ چاڤێن من بووی.
(راوه‌ستیانه‌ك)
ته‌ ده‌ستێ من گرت، ته‌ پڕسیارا من كر كا ئه‌ز كیمه‌، من هه‌ست ب ده‌ستكرنێن ته‌ دكر، ده‌مێ ته‌ ده‌ستێ خۆ ب ده‌ستێ منڤه‌ دئینا و دبر و جاران ته‌ تبلێن خۆ دكرنه‌ دناڤ تبلێن مندا.
زه‌لام: نه‌خێر، ئه‌م ل سه‌ر پرێ بووین، ئه‌ز ل پشت ته‌ بووم، من ده‌ستێ خۆ كربوو ل بن ساكۆیێ ته‌، من ل دۆر ناڤته‌نگا ته‌ ئالاندبوو، ته‌ ژی هه‌ست ب ده‌ستێ من دكر ده‌مێ ب ته‌ دكه‌فت.
(راوه‌ستیانه‌ك)
ژن: ئه‌م ل ئاهه‌نگێ بوون، ل مالا داووتی و هه‌ڤژینا وی. شه‌وقه‌ك ژ چاڤێن وێ دهات ده‌مێ به‌رێ خۆ دداته‌، هه‌ر وه‌كو تۆ نێزیكی دلێ وێ بووی، هه‌ر وه‌كو ئاشقا ته‌بوو، لێ ئه‌ز “نه‌خێر”. هێشتا من تۆ نه‌نیاسی بووی، وانا خانییه‌كێ جوان هه‌بوو ل نێزیك رویباری، ئه‌ز چووم دا ساكۆیێ خۆ بكه‌مه‌ به‌ر خۆ و من تۆ هێلایه‌ ل به‌ندا خۆ، ته‌ داخواز ژمن كر بوو كۆ دگه‌ل ته‌ بهێم، یا ژ منڤه‌ تۆ ل وی ده‌می گه‌له‌ك یێ نه‌رم و جوان بوو، تۆ گه‌له‌ك یێ هه‌ستدا بووی، ره‌فتارێن ته‌ دجوان بوون و تۆ یێ ژێ هشیار بووی. من زوی ساكۆیێ خۆ كره‌ به‌ر خۆ، ل دویڤدا چاڤێ من ب په‌نجه‌رێ كه‌فت، من دزانی كۆ تۆ ل به‌ندا من بووی، من به‌رێ خۆ دا باغچه‌ی و ل دویڤدا رویباری، رۆناهییا چراییان ژی ل رویباری ڕه‌نگڤه‌دابوو. ل دویڤدا ئه‌ز هاتمه‌ ده‌ف ته‌ و ئه‌م ب رێككه‌فتین، به‌ره‌ف ناڤبڕا ئاسنی و پاش چووینه‌ دناڤ زه‌ڤیێ، گۆره‌پانه‌كا راوه‌ستیانا ترۆمبێلان ل وێرێ هه‌بوو، هه‌تا مه‌ ترۆمبێلا ته‌ دیتی ل مه‌ بوو دڕه‌نگ، ل دویڤدا ئه‌م پێكڤه‌ چووین.
(راوه‌ستیانه‌ك)
زه‌لام: من مه‌مكێن ته‌ گرتن.
ژژن: ل كیڤه‌؟
زه‌لام: ل سه‌ر پرێ، من ده‌ستێن خۆ پێڤه‌دئینان.
ژن: ژ راستا؟
زه‌لام: و ئه‌ز ژ پشتێڤه‌ ب ته‌ڤه‌ گرێدای بووم.
ژن: له‌وما من پڕسیارا خۆ دكر كا ته‌ چ دڤیا . .
زه‌لام: به‌لێ.
ژن: وێره‌كییا ته‌ ئه‌ز مه‌نده‌هۆش كرم .. یا ژ منڤه‌ ته‌ دڤیا . . .
زه‌لام: من ده‌ستێ خۆ كره‌ دناڤ قه‌میسێ ته‌دا و سوخمه‌ی ته‌ ڤه‌كر، پاش ده‌ستێ خۆ كره‌ مه‌مكێن ته‌.
ژن: دبیت ئه‌ڤه‌ شه‌ڤه‌كا دی دبیت، تۆ دگه‌ل ژنه‌كا دی بووی.
زه‌لام: نه‌خێر، بیرا من دهێت من تبلێن خۆ ب له‌شێ ته‌ڤه‌ دئینانه‌ خوار.
ژن: ئه‌رێ مه‌مكێن من دناڤ ده‌ستێن ته‌دا بوون؟ ده‌ستێن ته‌دا !؟
زه‌لام: و من تبلێن خۆ ب له‌شێ ته‌ڤه‌ دئینان، بیرا ته‌ ناهێت؟
(راوه‌ستیانه‌ك)
ژن: و ل پشت من بووی !؟
زه‌لام: به‌لێ.
ژن: لێ من پشتا خۆ دابوو وی ناڤبڕی و بیرا من دهێت من هه‌ست ب وی ئاسنی دكر ده‌مێ ب پشتا من دكه‌فت، ته‌ به‌رێ خۆ ددا سه‌روچاڤێن من و من ژی به‌رێ خۆ ددا چاڤێن ته‌، ده‌م گیرو بووبوو و سه‌قا یێ سار بوو.
زه‌لام: من قولپێكن ساكۆیێ ته‌ ڤه‌كرن،
ژن: ساكۆیێ من یێ گرتی بوو چونكی سه‌قا یێ سار بوو.
زه‌لام: ل دویڤدا ئه‌م ژ پرێ دویر بووین و به‌ره‌ف رێكا ل هه‌مبه‌ر رویباری چووین، ل وێرێ گه‌می راوه‌ستیای بوون، ئه‌م هه‌تا كۆگه‌ها گلێشی چووین.
ژن: ته‌ ئه‌ز هه‌مبێزكرم و دگوهێ مندا ب ده‌نگه‌كێ نزم گۆت “حه‌ز ژ ته‌ دكه‌م”. ته‌ گۆته‌ من كۆ ده‌نگێ من، چاڤێن من، پێن من، مه‌مكێن من، چ تشت وه‌كی وان نینن، و ته‌ گۆته‌ من كۆ تۆ دێ هه‌تا هه‌تایێ په‌رستنا من كه‌ی.
زه‌لام: به‌لێ، من وه‌گۆت.
ژن: تۆ دێ هه‌تا هه‌تایێ په‌رستنا من كه‌ی.
زه‌لام: به‌لێ، دێ هه‌تا هه‌تایێ په‌رستنا ته‌ كه‌م.
ژن: ل دویڤدا مه‌ زارۆكه‌ك بوو و ئه‌م پێكڤه‌ دروینشتین و مه‌ دئاخفت، بیرا ته‌ ل ژنێن ته‌ یێن نێزیك پر و جاده‌ و به‌نده‌ر و كۆگه‌هێن گلێشی دهێت.
زه‌لام: بیرا ته‌ ژی ل بێشیانیا ته‌ ل سه‌ر ناڤبرێ ئاسنی دهێت، هنده‌ك ده‌ستێن ته‌ دگرن و هنده‌ك به‌رێ خۆ دده‌نه‌ چاڤێن ته‌.
ژن: و ب جوانی دگه‌ل من دئاخڤن.
زه‌لام: ده‌نگێ ته‌ یێ نه‌رم دچوو ددلێ وان هه‌میاندا.
ژن: هه‌میان ژی دگۆته‌ من دێ هه‌تا هه‌تایێ په‌رستنا ته‌ كه‌ین.
زه‌لام: و ئه‌ز هه‌تا نوكه‌ ژی ڤێ چه‌ندێ دبێژمه‌ ته‌. دێ بۆ هه‌تا هه‌تایێ ته‌ په‌رێسم.
(دویماهی)

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *