نڤیسین: وەحید سندی

سەید قەدری ئێک ژ هەلبەستڤانێن کوردێن کورمانجە، خەلکێ باژێرێ جزیری یە و ل سالا (1900) هاتیە سەر دنیایێ و ل سالا (1961) وەغەرکریە.

سەید قەدری ب ئێک ژ وان هەلبەستڤانان دهێتە نیاسین یێن کلاسیکێن چاڤلێکەر یان ژی (کلاسیکێن تەقلیدی)، هەرکەسێ دیوانا قەدریێ جزیری بخوینت، دێ بینت کاریگەریەکا مەزن یا مەلایێ جزیری پێڤە دیارە، بگرە ژ تەخمیسکرن و تەسدیسکرنا ل سەر هەلبەستێن جزیری و دیسان ژ ڕویێ واتایڤە ژی هەمان نەرینێن جزیری ل سەر هزرا وی ڕەنگڤەددەن، ژ وان هزرا ژی مەسەلا نوورێ یە.

نوورا ئیلاهی ئێک ژ مەسەلێن گرنگە د ناڤ هەلبەستا جزیریدا و پاشان ژی هەلبەستڤانێ چاڤلێکەر سەید قەدری، بنەرەتا ڤێ هزرێ ژی بۆ فەلسەفا ئیشراقی یا شێخ (شهاب الدین سهروردی 549ـ587) ڤەدگەرت، د ئەسلدا ئەڤ هزرە بۆ فەیلەسۆفێ یونانی، ئەفلاتوونی ڤەدگەرت. سوهرەوەردی ل وێ باوەرێ بوو: خودێ نوورە و ب نوورا وی هەمی جیهان روون دبت.

سەید قەدری ژی د ناڤ هەلبەستەکا خوەدا ب ناڤێ (گەر چ ئەز سەوداء و دینم) ڤی ڕەنگی هزرا نوورێ دیاردکەت، دەما دبێژت:

“کەنگی خویا بت بەدرا نوور دا ئەم ببن وەکی کووهێ طوور

مەشعەل بکت قەلبێ کەدوور بەر ئەنوەرا پۆر نوور ما

پۆر نوور بکن دیدە و دلان دا ئەم بچین نێڤ سونبولان

دا بهن بکن ڤان سۆرگولان ناڤ بەغچەیە شاهانێ ما”

سەید قەدری ل وێ باوەرێ یە نوور ژ هەیڤێ دهێت و خوە وەکی چیایێ (توور)ی تەشبیهـ دکەت، وی دەمی دلێ وی دێ پۆڕ نوور بت، ژ ئەگەرا ڤێ نوورێ دێ باغچەیێن گەش د دلیدا پەیدابن.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *