نڤیسین: سەرحان ئەحمەد سەرحان

دیمەن: شانۆ ژۆرەکا بچویکا نڤستنێیە، ل لایەکێ سبلێتەکا مەزنا سپی یا ستوینی هەیە، ل لایێ دی تەختێ نڤستنا زارۆکەکا کچا بچویک، ل نیڤێ دەرگەهێ هاتنا ژۆرە

(کچ یا ل سەر تەختێ خۆ رازایی، بابێ وێ ب رەخ سەرێ وێڤەیە، یێ دەستێ خۆ ب سەرێ وێ دئینیت و دبەت)

باب
ب ڤی شێوەی چیرۆک ب دویماهیک دهێت

کچ
تۆ رۆژانە هەمان چیرۆک بۆ من دوبارە دکەی، ب تنێ ناڤ و شێوەی کەسایەتییا دگوهۆڕی.

باب
جارا بهێت دێ چیرۆکەکا جیاواز بۆتە بێژم

کچ
تە بەترا پێر گۆت بوو دێ چیرۆکەکا جیاواز بێژم، لێ تە دوهی هەمان چیرۆک گۆت، و دەمێ من ئەڤ چەندا نوکە گۆتی دوبارە کر، تە گۆت سوباهی ئانکو ئەڤرۆ دێ ئێکا جیاواز بێژم، لێ تەیا دوهی دوبارە کر، ئەرێ ما چێدبیت?!

باب
کچا من، مێشکێ خۆ نەوەستینە، دێ سوباهی ئێکا دویڤ دلێ تە بێژم

کچ
سوز?

باب
سوزێ ددەمە تە، نوکە شەڤا تە بمینیت خۆش (ماچەکێ ل ئەنیا وێ ددەت)

کچ
نەچە

باب
بۆچی?

کچ
ئەز دترسم

باب
دوبارە کچا من?! مە دوهی ل سەر ڤێ چەندێ ئاخفت، مە چارە ژی کر

کچ
لێ دوهی هەمان دەنگ ژێ هات

باب
گۆهێ خۆ بگرە!

کچ
نابیت گوهێ بگرم و ئەو یێ دگەل من دئاخڤیت

باب
کچا من، ئەڤە ئاریشەکا دینامیکییە، نەزێدەتر

کچ
ئەو پرسیارا ژ من دکەت

باب
پرسیار? وەکی چ

کچ
نزانم

باب
پا چەوا تۆ دزانی پرسیارا ژ تە دکەت?

کچ
ژمن دکەت چونکی ئەز ب تنێ دژۆرێمە، و چونکی ئەز بەرسڤێ نادەم، ئەو هەر دەم هەمان پڕسیار دوبارە دکەت

باب
بۆچی بەرسڤێ نادەی و بابەتی بگری

کچ
چونکی دەم یێ کورتە و بەرسڤ پێدڤی ب دەمەکێیە

باب
دی پێکۆلا کورت کرنێ بدە

کچ
هێشتا من پەیڤەک نەگۆتی هەمان پرسیار دوبارە دکەت

باب
کچا من ئاشۆپا تە گەلەک یا بەرفرەهە . . .

کچ
ئەو تشتێ تۆ ب ئاشۆپ ناڤ دکەی رۆژانە دگەل من روی ددەت

باب
بۆچی ل وی دەمی روی نادەت دەمێ ئەز ل ڤێرێ

کچ
هەر دەم تۆ یێ مژویلی ب تنێ ب شەڤ بۆ گۆتنا چیرۆکێ سەرەدانا من دکەی، هەر دەما بۆتە بەحسی ئەڤێ چەندێ ژی بکەم، تۆ زوی پشتا خۆ ددەیە من

باب
کچا من تۆ بۆچی وەدبێژی

کچ
چونکی ب تنێ دادێ ل دەف تە گرنگە، ئەز نەیا گرنگم، هەمی دەما تۆ گوهدارییا وێ دکەی، لێ من ناکەی.

باب
(هەمبێز دکەت) تۆ بۆمن گەلەک یا گرنگی وەنەبێژە کچا من

کچ
باب ناڤێ من چییە?

باب
ناڤ? ماتۆ ناڤێ خۆ نزانم کچا من

کچ
ئەز ناڤێ خۆ دزانم لێ تە ناڤێ من ژبیرکرییە

باب
(کەنییەکا بچویک) نەخێر، تۆ چ جاران ژبیرا من ناچی

کچ
پا تۆ بۆچی دچی?

باب
ژبیرا تە دچم?

کچ
نەخێر ژ ژۆرا من

باب
چونکی ژۆرا تەیە و ئەوا ل وێراهە ژی ژۆرا من و دایکا تەیە.

کچ
دایکا من?! ئەو نوکە ل بەر خودیکێ خۆ جوان دکەت، یا دینە، کی ل بەری بنڤیت خۆ جوان دکەت، ئەو دترسیت رابیت و کرێتییا وێ دیار ببیت

باب
(تۆرە) لیسا ! نابیت تۆ ب ئەڤی شێوەی پەسنا دایکا خۆ بکەی، ئەڤە دایکا تەیە! هیڤیە ئەڤ چەندە دوبارە نەبیت (بەرەف دەرگەهێ دچیت، ل بەر دەرگەهی) شەڤا تە بمینیت خۆش (دەردکەڤیت)

کچ
(سەر خۆ دکەتە ل بن لحێفکا تەختی. چەندەک ژ بێدەنگیێ. سەرێ خۆ دئینتە دەر، بەر خۆ ددەتە لایێ سبلێتێ، ب ئارامی لحێفکا خۆ دگەل خۆ دبەت و دچیتە بن تەختی. چەندەک ژ بێدەنگیێ .. دەنگێ بەردانا هەوای ب شێوەیەکێ بهێز ژ سبلێتێ دهێت. ئێکسەر کچ دناڤ لحێفێڤە بەرزە دبیت، دەنگ دوبارە دهێت، سەرێ کچێ دیار دبیت، دوبارە دەنگێ دهێت، کچ ب لەز ژ بن تەختی رادبیت و بەرەف لایێ سبێلتێ دچیت، بەرامبەر رادوەستیت، دەنگێ سبلێتێ)

ببۆرە لێ

(دەنگ)

ئەز

(دەنگ)

مانێ خۆ

(دەنگ)

(کچ پێکۆلێ دکەت ب شێوەیەکێ بهێز پەیڤا خۆ تەمام بکەت، دگەل هەر جارەکا دوبارە بوونا دەنگی، کچ پتر تۆرە دبیت و دهەمان دەمدا نیشانێن ترسێ ل لێ دیار دبن)

مانێ خۆ ئەو ژی

(دەنگ)

مانێ خۆ ئەو ژی دزانیت کۆ

(دەنگ)

کۆ ئەز ژ

(دەنگ)

حەزەکا

(دەنگ)

(قێژییەکا بهێز ژ کچێ دهێت و دگەل ب دویماهی هاتنا قێژیێ وەکی دلگرتییەکێ دکەڤیتە ئەردی. بۆ چەندەکێ دەنگێ سبلێتێ بەردەوام دمینیت، ل دویڤدا رادوەستیت، دەرگەه‍ دهێتە ڤەکرن، سەرێ زەلامی دیار دبیت)

زەلام
(ب دەنگەکێ نەرم) کچا من?! لیسا ?!

(پێنگاڤەکێ دهێتە ژۆر، دبینیت کۆ تەخت یێ ڤالایە)

(ب ترس) لیسا?! لیسا?! (دگەل دوبارەکرنا ناڤێ وێ ل وێ دگەریت ل سەر تەختی و بن تەختی)

کچ
(رادبیتە ژ پێیاڤە و هێشتا بابێ وێ ل وێ دگەریت، ژنیشکەکێڤە)

باب، ئەز یا ل پشت گوهێ تە.

(چاڤێ بابی ب وێ دکەڤیت، هشک دمینتە جهێ خۆ)

تاری بوون

18\9\20
سێمێل

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *