نڤیسین: برتولت برێش
وەرگێران: سەرحان ئەحمەد سەرحان
ئه‌وێ گۆتی به‌لێ
كه‌سایه‌تی: مامۆستا ـ كوڕ ـ دایك ـ كورسێ مه‌زن.
1
كورسێ مه‌زن: یا گرنگه به‌ری هه‌ر تشتی ئه‌م فێری قائیل كرنێ ببین، قائیل كرن ب وی تشتێ مه باوه‌ریی پێ هه‌ی. گه‌له‌گ كه‌س هه‌نه دبێژن به‌لێ، لێ دگه‌ل به‌رسڤێ نه‌دگونجایه و گه‌له‌ك كه‌س هه‌نه پرسیار ژی ژێ ناهێته كرن و گه‌له‌ك كه‌س یێن هه‌ین ل سه‌ر خه‌له‌تیێ رازی دبن. ئه‌ڤجا یا گرنگه به‌ری هه‌ر تشتی ئه‌م فێری قائل كرنێ ببین.
(مامۆستا یێ ل جهێ 1، ده‌یك و كوڕێ وێ یێ ل جهێ 2)
مامۆستا: ئه‌ز مامۆستایێ قوتابخانه‌كێمه، من قوتابیه‌كێ ئێتیم هه‌یه، دایكا وی كاروبارێن وی ب رێڤه‌دبه‌ت. ئه‌ز یێ هاتیم خاترا خۆ ژ وان ب خوازم، چونكی ئه‌ز یێ نه‌چارم بچمه لایێ دی یێ چیای، چونكی په‌ژیكه‌ك ب سه‌ر ده‌ڤه‌را مه هاتیه و مه نه ده‌رمان و نه ژی نۆژدار هه‌نه .. هه‌می ل لایێ دی یێ چیای ئاكنجینه. (ده‌رگه‌هی دقوتیت) روخسه‌ته بهێمه ژۆر؟
(كوڕ ژ جهێ 2 به‌ره‌ف 1 دچیت)
كوڕ: كییه ده‌رگه‌هی دقوتیت؟ ئه‌ها، ئه‌ڤه تۆ یی مامۆستا! تۆ هاتی سه‌ره‌دانا مه بكه‌ی؟
مامۆستا: ئه‌ڤه ده‌مه‌كێ درێژه تۆ ل قوتابخانی ئاماده نابی، بۆچی؟
كوڕ: من نه‌شیا ئه‌ز بهێم چونكی دایكا من یا نه‌ساخه.
مامۆستا: من نه‌دزانی ئه‌و یا نه‌ساخه، نوكه ئه‌گه‌ر زه‌حمه‌ت نه‌بیت .. بێژێ ئه‌ز یێ ل ڤێرێ.
(كوڕ بۆ لایێ 2 گازی دكه‌ت)
كوڕ: دادێ .. مامۆستا ل ڤێرێیه.
(دایك یا ل لایێ 2 روینشتی)
دایك: بلا كه‌ره‌مكه‌ت و بهێته ژۆر.
كوڕ: كه‌ره‌مكه مامۆستا.
(هه‌ر دوو دچنه لایێ 2)
مامۆستا: ئه‌ڤه ده‌مه‌كێ درێژه من سه‌ردانا هه‌وه نه‌كرییه .. كوڕێ ته یێ دبێژیت كۆ تۆ یا تووشی په‌ژیكێ بووی.
دایك: ب مخابنیڤه، ئه‌ز هه‌ست ب ره‌وشه‌كا باش ناكه‌م، چونكی هێشتا چ ده‌رمان بۆ ڤێ په‌ژیكێ نه‌هاتیه دیتن.
مامۆستا: پێدڤییه ئه‌م ل چاره‌سه‌رییه‌كێ بگه‌رن، ئه‌ز یێ هاتیم خاترا خۆ ژ هه‌وه ب خوازم، چونكی ئه‌ز دێ چمه لایێ دی یێ چیای دا ل ده‌رمانه‌كێ بگه‌رم، ل وێرێ گه‌له‌ك نۆژدارێن ناڤدار دژین.
دایك: من گوهلێ بوو كۆ ئه‌و رێكه گه‌له‌ك یا مه‌ترسیداره .. تۆ حه‌ز دكه‌ی كوڕێ من دگه‌ل ته بهێت؟
مامۆستا: گه‌شته‌كا ب زه‌حمه‌ته .. كوڕه‌كێ وه‌كی وی نه‌شێت خۆ ل به‌ر بگریت.
دایك: هیڤیا من ئه‌وه هین ب سه‌ركه‌فتیانه ڤێ گه‌شتێ ته‌مام بكه‌ن.
مامۆستا: نوكه پێدڤییه ئه‌ز بچم .. بخاترا هه‌وه.
(مامۆستا به‌ره‌ف لایێ دی دچیت، كوڕ ل دویڤ وی دچیته وێرێ)
كوڕ: مامۆستا من دڤێت ئه‌ز تشته‌كێ بێژمه ته.
(دایك ل لایێ 2 گوهداریێ دكه‌ت)
مامۆستا: ته دڤێت تۆ چ بێژی؟
كوڕ: من دڤێت دگه‌ل ته بهێمه لایێ دی یێ چیای.
مامۆستا: وه‌كی من بۆ دایكا ته گۆتی، گه‌شته‌كا ب زه‌حمه‌ت و مه‌ترسیداره، تۆ نه‌شێی دگه‌ل مه بهێی، زێده‌باریی وێ ژی دایكا ته یا نه‌خۆشه، دێ چه‌وا وێ ب تنێ هێلییه ڤێرێ؟ ب مینه ڤێرێ، نابیت تۆ بهێیه دگه‌ل مه.
كوڕ: تۆ راست دبێژی، چونكی دایكا من یا نه‌خۆشه پێدڤییه ئه‌ز بچمه لایێ دی یێ چیایدا ده‌رمانێ وێ دگه‌ل خۆ بینم.
مامۆستا: لێ پێدڤییه ئه‌ز ڤێ چه‌ندێ بگه‌هینمه دایكا ته.
(مامۆستا دزڤڕیته لایێ 2، كوڕ ل جهێ خۆ)
مامۆستا: ئه‌ز زڤڕیم، چونكی كوڕێ ته یێ دبێژیت ئه‌ز دێ دگه‌ل ته هێم، من گۆتێ كۆ نابیت ته ب هێلته ب تنێ چونكی تۆ یا نه‌خۆشی، زێده‌بارێ زه‌حمه‌ت و مه‌ترسییا گه‌شتێ، ئه‌ڤجا ئه‌ز نه‌شێم وی ببه‌م، لێ ئه‌و یێ رژده و دڤێت بهێت داكۆ ده‌رمانی بۆ ته بینیت.
دایك: من های ژێ هه‌بوو، ئه‌ز دزانم ئه‌و ژ دل ساخییا خۆ ڤێ چه‌ندێ دكه‌ت، وه‌ره كوڕێ من. (كوڕ دهێت) ژ وێ رۆژا بابێ ته چووی و من كه‌س ژ بلی ته نه‌مایه .. نه تۆ ژ پێش چاڤێن من و نه‌ژی هزرا من دچووی، من خوارن داته و جلكێن ته دروین و پاره دابین كرن.
كوڕ: هه‌ر تشتێ تۆ دبێژیی یێ راسته .. لێ ئه‌ز ژ بریارا خۆ لێڤه نابم.
كوڕ، دایك، مامۆستا: دێ د وێ رێكا ب زه‌حمه‌ترا چم، دا ده‌رمانی بۆ بینم، ژ لایێ دی یێ چیای. (دچیت)
كورسێ مه‌زن: بۆچی نه دایكێ و نه‌ژی مامۆستایی هێجه‌ته‌كا ب كێرهاتی نه‌دیت وی ژ بریارا وی لێڤه‌بكه‌ن، ب ئێك ده‌نگ گۆتن:
مامۆستا، دایك: گه‌له‌ك هه‌نه ل سه‌ر خه‌له‌تیێ رازی دبن، لێ ئه‌و ل سه‌ر نه‌خۆشیێ رازی نه‌بوو، به‌لكو ل سه‌ر چاره‌سه‌رییا نه‌خۆشیێ …
كورسێ مه‌زن: دایكێ ل سه‌ر زێده‌كر و گۆت:
دایك: ئه‌ز نه‌شێم خۆ زێده‌تر بگرم، ئه‌گه‌ر تۆ یێ رژد بی دگه‌ل مامۆستایێ خۆ هه‌ره، لێ زوی ب زڤڕه.
2
كورسێ مه‌زن: ئه‌و كۆمه‌لا كۆ مامۆستیه‌ك و چه‌ند قوتابی ب خۆ ڤه‌دگرت ب رێككه‌فتن، لێ ئه‌وی كوڕی هێزا وان زه‌حمه‌تیا نه‌بوو، حه‌زا زڤڕینێ دناڤ دلێ وی دا هه‌رده‌م یا رۆهن بوو، ل سپێدێ ده‌مێ نێزیكی لێڤا چیای بوون، ئه‌وی كوڕ گه‌له‌ك وه‌ستیا و ب زه‌حمه‌ت پێن خۆ ب دویڤ خۆ دكێشان.
(مامۆستا دگه‌ل هه‌ر سێ قوتابیان ب ژۆر دكه‌ڤن .. كوڕ یێ ل پشت وان .. به‌ره‌ف وی جهی)
مامۆستا: ئه‌م زوی ب سه‌ر چیای كه‌فتین، ل وێراهه ل نێزیك وی كۆلكی، ئه‌م دێ بێهنا خۆ ڤه‌ده‌ین.
هه‌ر سێ قوتابی: ته‌مامه مامۆستا.
(هه‌ر سێ قوتابی دچنه وی جهی، سه‌ر ب تشته‌كێ بلند دكه‌ڤن، لێ كوڕ پێكۆلێ دكه‌ت مامۆستای بهێلته ده‌ف خۆ)
كوڕ: من دڤێت تشته‌كێ بێژم.
مامۆستا: ته دڤێت تۆ چ بێژی؟
كوڕ: ئه‌ز یێ هه‌ست پێدكه‌م كۆ ئه‌ز یێ ساخله‌م نینم.
مامۆستا: بێده‌نگ به، ئه‌ڤ تشتێن هۆسا دگه‌شتێن هۆسا دا ناهێنه گۆتن، دبیت تۆ یێ وه‌ستیای بی چونكی تۆ فێری سه‌ركه‌تنا چیای نه‌بووی .. پیچه‌كێ بێهنا خۆ ڤه‌ده)
(دچیته لایێ 2)
هه‌ر سێ قوتابی: وه‌دیاره ئه‌ڤ كوڕه یێ وه‌ستای، دێ پرسیارا مامۆستای كه‌ین.
كورسێ مه‌زن: به‌لێ پڕسیارا وی بكه‌ن …
هه‌ر سێ قوتابی: (بۆ مامۆستایی) وه‌دیاره ئه‌و كوڕه یێ ژ سه‌ركه‌تنێ وه‌ستای، وی خێره؟ تۆ یێ دترسی نه‌كو تشته‌ك ب سه‌ری بهێت؟
مامۆستا: یێ هه‌ست پێ دكه‌م كۆ ساخله‌میا وی یا باش نینه، لێ ئه‌ز هه‌ست پێ كه‌م كۆ ژبه‌ر سه‌ركه‌تنا چیای یێ وه‌ستیای.
هه‌ر سێ قوتابی: تۆ ناترسی؟
(بێده‌نگییه‌كا درێژ)
هه‌ر سێ قوتابی: (دناڤبه‌ینا ئێك و دوو) گوهداریێ بكه‌ن .. مامۆستای گۆت كۆ ئه‌و یێ ژ سه‌ركه‌تنا چیایی وه‌ستیایی، لێ وه‌سا دیار ناكه‌ت، چه‌نده‌كا دی ئه‌م دێ ژ كۆلكی بۆرین و به‌ره‌ف لێڤا ته‌نگ چین، پێدڤی ئه‌م ل وێرێ هه‌ردوو ده‌ستێن خۆ بدانه دیواری، ئه‌گه‌ر ئه‌و یێ نه‌خۆش بیت، ئه‌م دێ نه‌چاربین وی بهێلین. (گازی دكه‌نه كوڕی ل لایێ 1) ئه‌رێ تۆ یێ نه‌خۆشی؟ به‌رسڤێ ناده‌ت .. دا ئه‌م پرسیارا مامۆستای بكه‌ین. (بۆ مامۆستای) ده‌مێ مه پرسیارا ته سه‌باره‌ت كوڕی كری، ته گۆت یێ وه‌ستیای، لێ ئه‌و كێم خۆ دیار دكه‌ت، یێ خۆ ڤه‌ده‌ر دكه‌ت ..
مامۆستا: وه‌دیار یێ نه‌خۆشه، دا پێكۆلێ بكه‌ین وی هه‌تا لێڤا ته‌نگ ب هه‌لگرین.
هه‌ر سێ قوتابی: دا پێكۆلێ بكه‌ین.
(هه‌ر سێ قوتابی پێكۆلێ دكه‌ن وی به‌ره‌ف لێڤا ته‌نگ ببه‌ن، ئه‌و لێڤا ژ كۆری و وه‌ریسا پێكدهێت .. لێ نه‌شێن ده‌رباز ببن) ئه‌م نه‌شێن وی بهه‌لگرین و ده‌رباز ببن، ئه‌م نه‌شێن ل ڤێرێ ژی بین، چونكی هه‌می خه‌لكێ باژێرێ مه یێ ل هیڤیا مه داكو ئه‌م ده‌رمانی بۆ بینن، ئه‌م نه‌شێن وی قورتال بكه‌ین، ئه‌ڤجا ئه‌گه‌ر نه‌شێت به‌رده‌وامیێ بده‌ته ئه‌م نه‌چارین وی بهێلنه ل ڤێرێ و به‌رده‌وامیێ بده‌نه رێكا خۆ.
مامۆستا: راسته، ئه‌ز بێژم ئه‌م دێ نه‌چار بین وه‌كه‌ین، لێ یا باشتره ئه‌وه ئه‌م پڕسیارا كوڕی بكه‌ین ئه‌رێ وی ب زڤڕینه مالا وی یان به‌رده‌وامیێ بده‌ینه رێكێ بێ وی، ئه‌ز دێ نوكه ب ئارامی به‌ره‌ف ویڤه چم و وی ژبۆ چاره‌نڤیسی ئاماه كه‌م.
هه‌ر سێ قوتابی: هیڤیه تۆ ڤێ چه‌ندێ بكه‌ی.
(هه‌ر سێ قوتابی به‌رامبه‌ر رادوه‌ستن)
هه‌ر سێ قوتابی دگه‌ل كورسی: مه دڤێت ئه‌م پرسیارا ته بكه‌ین، ئه‌رێ ته دڤێت ئه‌م ژبه‌ر ته بزڤڕین؟ خۆ ئه‌گه‌ر ته ئه‌ڤ چه‌نده ب ڤێت ئه‌م نه‌شێن ب زڤڕین، دێ ته رازایی هێلنه ڤێرێ و دێ به‌رده‌وامیێ ده‌نه رێكا خۆ.
مامۆستا: (به‌ره‌ف لایێ 1 دچیت، ئه‌و جهێ كوڕ لێ) گوهێ خۆ باش بده من، تۆ یێ نه‌خۆشی و ئه‌م نه‌چارین ته بهێلنه ڤێرێ، لێ یا باشتر ئه‌وه ئه‌م پرسیارا ته بكه‌ین ئه‌رێ ته دڤێن ئه‌م ژبه‌ر ته ب زڤڕین .. سه‌ره‌رای هندێ كۆ ره‌وشت و تیتال دبێژن كۆ ئه‌گه‌ر كه‌سه‌ك دره‌وشه‌كا وه‌كی یا ته‌یا نوكه ئه‌ڤ پرسیاره ژێ بهێته كرن، پێدڤییه بێژیت به‌رده‌وامیێ بده‌نه رێكا خۆ.
كوڕ: ئه‌ز تێدگه‌هم.
مامۆستا: ئه‌رێ ژبه‌ر ته ب زڤڕین؟
كوڕ: نه‌خێر .. پێدڤییه هین نه‌زڤڕن.
مامۆستا: ئانكو تۆ یێ رازی ئه‌م ته بهێلنه ڤێرێ.
كوڕ: دا هزرێن خۆ بكه‌م (بۆچه‌نده‌كێ هزرێن خۆ دكه‌ت) به‌لێ .. ئه‌ز یێ رازی مه.
مامۆستا: (ژ لایێ 1 گازی دكه‌ته لایێ 2) ل دویڤ ره‌وشت و تیتالا به‌رسڤدا، وه‌كی یا پێدڤی.
كورس و هه‌ر سێ قوتابی: (به‌ره‌ف لایێ 1 دچن) گۆت، به‌لێ، دا به‌رده‌وامیێ بده‌نه رێكێ.
(كورسێ مه‌زن دچیت، هه‌ر سێ قوتابی دمینن)
مامۆستا: دێ نوكه به‌رده‌وامیێ بده‌نه رێكێ، هه‌وه ئه‌ڤ بریاره دابوو.
(هه‌ر سێ قوتابی ژ جه نالڤن)
كوڕ: من دڤێت ئه‌ز تشته‌كێ بێژمه هه‌وه، ئه‌ز هیڤی دكه‌م من نه‌هێلن، به‌لكو من بهاڤێژنه نهالێ، چونكی ئه‌ز دترسم ب تنێ بمرم.
هه‌ر سێ قوتابی: ئه‌م نه‌شێن ڤێ چه‌ندێ بكه‌ین.
كوڕ: ئه‌ز یێ ڤێ داخوازێ ژ هه‌وه دكه‌م.
مامۆستا: هه‌وه بریاردا هین به‌رده‌وام بن و وی بهێلنه ڤێرێ، ئه‌ڤجا یێ ئازاده كا چه‌وا چاره‌نڤیسێ خۆ ب هه‌لبژێریت، لێ بجه ئینانا تشته‌كی َهۆسا ب زه‌حمه‌ته، ئه‌رێ هین ئاماده‌نه ڤێ چه‌ندێ بكه‌ن؟
هه‌ر سێ قوتابی: به‌لێ
(هه‌ر سێ قوتابی كوڕی ژ لایێ 1 دبه‌نه 2)
سه‌رێ خۆ بدانه سه‌ر ملێ مه، خۆ سست بكه، ئه‌م دێ ته ب هشیاری هه‌لگرین ..
(كوڕی دبه‌نه پشت وی جهێ بلند و به‌ری كوڕی بهاڤێژمن دبێژیت)
كوڕ: من دزانی كۆ ئه‌ز دێ ژیانا خۆ دڤێ گه‌شتێدا ژ ده‌ستده‌م، لێ هزرێن دایكا من ئه‌ز هاندام ڤێ چه‌ندێ بكه‌م .. جه‌ركا من ژی دگه‌ل خۆ ببه‌ن، ئه‌گه‌ر هات و هه‌وه ده‌رمان ب ده‌ست خۆڤه ئینا بۆ دایكا من ژی بینن.
كورسێ مه‌زن: هۆسا، هه‌ر سێ قوتابیا كوڕ هاڤێته دنهالێدا و دگه‌ل ڤێ چه‌ندێ وانا گازنده ژ نه‌خۆشی و زه‌حمه‌تییا ژیانێ دكر، هه‌ر سێ به‌ر لێڤا نهالێ راوه‌ستیان و چاڤێن خۆگرت دا كه‌س ژكه‌سێ زێده‌تر هه‌ست ب گونه‌هباریێ نه‌كه‌ت، ل دویڤدا ئاخ وبه‌ر ب سه‌ر نخافتن.
ئه‌وێ گۆتی نه‌خێر
كه‌سایه‌تی: مامۆستا، كوڕ، دایكا، هه‌ر سێ قوتابی، كورسێ مه‌زن
1
كورسێ مه‌زن: یا گرنگه به‌ری هه‌ر تشتی ئه‌م فێری قائیل كرنێ ببین، قائیل كرن ب وی تشتێ مه باوه‌ریی پێ هه‌ی. گه‌له‌گ كه‌س هه‌نه دبێژن به‌لێ، لێ دگه‌ل به‌رسڤێ نه‌دگونجایه و گه‌له‌ك كه‌س هه‌نه پرسیار ژی ژێ ناهێته كرن و گه‌له‌ك كه‌س یێن هه‌ین ل سه‌ر خه‌له‌تیێ رازی دبن. ئه‌ڤجا یا گرنگه به‌ری هه‌ر تشتی ئه‌م فێری قائل كرنێ ببین.
(مامۆستا یێ ل جهێ 1، ده‌یك و كوڕێ وێ یێ ل جهێ 2)
مامۆستا: ئه‌ز مامۆستایێ قوتابخانه‌كێمه، من قوتابیه‌كێ ئێتیم هه‌یه، دایكا وی كاروبارێن وی ب رێڤه‌دبه‌ت. ئه‌ز یێ هاتیم خاترا خۆ ژ وان ب خوازم، چونكی ئه‌ز یێ نه‌چارم بچمه لایێ دی یێ چیای، چونكی په‌ژیكه‌ك ب سه‌ر ده‌ڤه‌را مه هاتیه و مه نه ده‌رمان و نه ژی نۆژدار هه‌نه .. هه‌می ل لایێ دی یێ چیای ئاكنجینه. (ده‌رگه‌هی دقوتیت) روخسه‌ته بهێمه ژۆر؟
(كوڕ ژ جهێ 2 به‌ره‌ف 1 دچیت)
كوڕ: كییه ده‌رگه‌هی دقوتیت؟ ئه‌ها، ئه‌ڤه تۆ یی مامۆستا! تۆ هاتی سه‌ره‌دانا مه بكه‌ی؟
مامۆستا: ئه‌ڤه ده‌مه‌كێ درێژه تۆ ل قوتابخانی ئاماده نابی، بۆچی؟
كوڕ: من نه‌شیا ئه‌ز بهێم چونكی دایكا من یا نه‌ساخه.
مامۆستا: من نه‌دزانی ئه‌و یا نه‌ساخه، نوكه ئه‌گه‌ر زه‌حمه‌ت نه‌بیت .. بێژێ ئه‌ز یێ ل ڤێرێ.
(كوڕ بۆ لایێ 2 گازی دكه‌ت)
كوڕ: دادێ .. مامۆستا ل ڤێرێیه.
(دایك یا ل لایێ 2 روینشتی)
دایك: بلا كه‌ره‌مكه‌ت و بهێته ژۆر.
كوڕ: كه‌ره‌مكه مامۆستا.
(هه‌ر دوو دچنه لایێ 2)
مامۆستا: ئه‌ڤه ده‌مه‌كێ درێژه من سه‌ردانا هه‌وه نه‌كرییه .. كوڕێ ته یێ دبێژیت كۆ تۆ یا تووشی په‌ژیكێ بووی.
دایك: ب مخابنیڤه، ئه‌ز هه‌ست ب ره‌وشه‌كا باش ناكه‌م، چونكی هێشتا چ ده‌رمان بۆ ڤێ په‌ژیكێ نه‌هاتیه دیتن.
مامۆستا: پێدڤییه ئه‌م ل چاره‌سه‌رییه‌كێ بگه‌رن، ئه‌ز یێ هاتیم خاترا خۆ ژ هه‌وه ب خوازم، چونكی ئه‌ز دێ چمه لایێ دی یێ چیای دا ل ده‌رمانه‌كێ بگه‌رم، ل وێرێ گه‌له‌ك نۆژدارێن ناڤدار دژین.
دایك: من گوهلێ بوو كۆ ئه‌و رێكه گه‌له‌ك یا مه‌ترسیداره .. تۆ حه‌ز دكه‌ی كوڕێ من دگه‌ل ته بهێت؟
مامۆستا: گه‌شته‌كا ب زه‌حمه‌ته .. كوڕه‌كێ وه‌كی وی نه‌شێت خۆ ل به‌ر بگریت.
دایك: هیڤیا من ئه‌وه هین ب سه‌ركه‌فتیانه ڤێ گه‌شتێ ته‌مام بكه‌ن.
مامۆستا: نوكه پێدڤییه ئه‌ز بچم .. بخاترا هه‌وه.
(مامۆستا به‌ره‌ف لایێ دی دچیت، كوڕ ل دویڤ وی دچیته وێرێ)
كوڕ: مامۆستا من دڤێت ئه‌ز تشته‌كێ بێژمه ته.
(دایك ل لایێ 2 گوهداریێ دكه‌ت)
مامۆستا: ته دڤێت تۆ چ بێژی؟
كوڕ: من دڤێت دگه‌ل ته بهێمه لایێ دی یێ چیای.
مامۆستا: وه‌كی من بۆ دایكا ته گۆتی، گه‌شته‌كا ب زه‌حمه‌ت و مه‌ترسیداره، تۆ نه‌شێی دگه‌ل مه بهێی، زێده‌باریی وێ ژی دایكا ته یا نه‌خۆشه، دێ چه‌وا وێ ب تنێ هێلییه ڤێرێ؟ ب مینه ڤێرێ، نابیت تۆ بهێیه دگه‌ل مه.
كوڕ: تۆ راست دبێژی، چونكی دایكا من یا نه‌خۆشه پێدڤییه ئه‌ز بچمه لایێ دی یێ چیایدا ده‌رمانێ وێ دگه‌ل خۆ بینم.
مامۆستا: لێ پێدڤییه ئه‌ز ڤێ چه‌ندێ بگه‌هینمه دایكا ته.
(مامۆستا دزڤڕیته لایێ 2، كوڕ ل جهێ خۆ)
مامۆستا: ئه‌ز زڤڕیم، چونكی كوڕێ ته یێ دبێژیت ئه‌ز دێ دگه‌ل ته هێم، من گۆتێ كۆ نابیت ته ب هێلته ب تنێ چونكی تۆ یا نه‌خۆشی، زێده‌بارێ زه‌حمه‌ت و مه‌ترسییا گه‌شتێ، ئه‌ڤجا ئه‌ز نه‌شێم وی ببه‌م، لێ ئه‌و یێ رژده و دڤێت بهێت داكۆ ده‌رمانی بۆ ته بینیت.
دایك: من های ژێ هه‌بوو، ئه‌ز دزانم ئه‌و ژ دل ساخییا خۆ ڤێ چه‌ندێ دكه‌ت، وه‌ره كوڕێ من. (كوڕ دهێت) ژ وێ رۆژا بابێ ته چووی و من كه‌س ژ بلی ته نه‌مایه .. نه تۆ ژ پێش چاڤێن من و نه‌ژی هزرا من دچووی، من خوارن داته و جلكێن ته دروین و پاره دابین كرن.
كوڕ: هه‌ر تشتێ تۆ دبێژیی یێ راسته .. لێ ئه‌ز ژ بریارا خۆ لێڤه نابم.
كوڕ، دایك، مامۆستا: دێ د وێ رێكا ب زه‌حمه‌ترا چم، دا ده‌رمانی بۆ بینم، ژ لایێ دی یێ چیای. (دچیت)
كورسێ مه‌زن: بۆچی نه دایكێ و نه‌ژی مامۆستایی هێجه‌ته‌كا ب كێرهاتی نه‌دیت وی ژ بریارا وی لێڤه‌بكه‌ن، ب ئێك ده‌نگ گۆتن:
مامۆستا، دایك: گه‌له‌ك هه‌نه ل سه‌ر خه‌له‌تیێ رازی دبن، لێ ئه‌و ل سه‌ر نه‌خۆشیێ رازی نه‌بوو، به‌لكو ل سه‌ر چاره‌سه‌رییا نه‌خۆشیێ …
كورسێ مه‌زن: دایكێ ل سه‌ر زێده‌كر و گۆت:
دایك: ئه‌ز نه‌شێم خۆ زێده‌تر بگرم، ئه‌گه‌ر تۆ یێ رژد بی دگه‌ل مامۆستایێ خۆ هه‌ره، لێ زوی ب زڤڕه.
2
كورسێ مه‌زن: ئه‌و كۆمه‌لا كۆ مامۆستیه‌ك و چه‌ند قوتابی ب خۆ ڤه‌دگرت ب رێككه‌فتن، لێ ئه‌وی كوڕی هێزا وان زه‌حمه‌تیا نه‌بوو، حه‌زا زڤڕینێ دناڤ دلێ وی دا هه‌رده‌م یا رۆهن بوو، ل سپێدێ ده‌مێ نێزیكی لێڤا چیای بوون، ئه‌وی كوڕ گه‌له‌ك وه‌ستیا و ب زه‌حمه‌ت پێن خۆ ب دویڤ خۆ دكێشان.
(مامۆستا دگه‌ل هه‌ر سێ قوتابیان ب ژۆر دكه‌ڤن .. كوڕ یێ ل پشت وان .. به‌ره‌ف وی جهی)
مامۆستا: ئه‌م زوی ب سه‌ر چیای كه‌فتین، ل وێراهه ل نێزیك وی كۆلكی، ئه‌م دێ بێهنا خۆ ڤه‌ده‌ین.
هه‌ر سێ قوتابی: ته‌مامه مامۆستا.
(هه‌ر سێ قوتابی دچنه وی جهی، سه‌ر ب تشته‌كێ بلند دكه‌ڤن، لێ كوڕ پێكۆلێ دكه‌ت مامۆستای بهێلته ده‌ف خۆ)
كوڕ: من دڤێت تشته‌كێ بێژم.
مامۆستا: ته دڤێت تۆ چ بێژی؟
كوڕ: ئه‌ز یێ هه‌ست پێدكه‌م كۆ ئه‌ز یێ ساخله‌م نینم.
مامۆستا: بێده‌نگ به، ئه‌ڤ تشتێن هۆسا دگه‌شتێن هۆسا دا ناهێنه گۆتن، دبیت تۆ یێ وه‌ستیای بی چونكی تۆ فێری سه‌ركه‌تنا چیای نه‌بووی .. پیچه‌كێ بێهنا خۆ ڤه‌ده)
(دچیته لایێ 2)
هه‌ر سێ قوتابی: وه‌دیاره ئه‌ڤ كوڕه یێ وه‌ستای، دێ پرسیارا مامۆستای كه‌ین.
كورسێ مه‌زن: به‌لێ پڕسیارا وی بكه‌ن …
هه‌ر سێ قوتابی: (بۆ مامۆستایی) وه‌دیاره ئه‌و كوڕه یێ ژ سه‌ركه‌تنێ وه‌ستای، وی خێره؟ تۆ یێ دترسی نه‌كو تشته‌ك ب سه‌ری بهێت؟
مامۆستا: یێ هه‌ست پێ دكه‌م كۆ ساخله‌میا وی یا باش نینه، لێ ئه‌ز هه‌ست پێ كه‌م كۆ ژبه‌ر سه‌ركه‌تنا چیای یێ وه‌ستیای.
هه‌ر سێ قوتابی: تۆ ناترسی؟
(بێده‌نگییه‌كا درێژ)
هه‌ر سێ قوتابی: (دناڤبه‌ینا ئێك و دوو) گوهداریێ بكه‌ن .. مامۆستایی گۆت كۆ ئه‌و یێ ژ سه‌ركه‌تنا چیایی وه‌ستیای، لێ وه‌سا دیار ناكه‌ت، چه‌نده‌كا دی ئه‌م دێ ژ كۆلكی بۆرین و به‌ره‌ف لێڤا ته‌نگ چیت، پێدڤی ئه‌م ل وێرێ هه‌ردوو ده‌ستێن خۆ بدانه دیواری. هیڤیه یێ نه‌خۆش نه‌بیت، چونكی ئه‌م نه‌شێن وی ب هه‌لگرین ..لێ ئه‌رێ یا پێدڤییه ئه‌م دویڤ په‌ندێ پیرۆز بچین؟ (گازی دكه‌نه كوڕی، ئه‌و ل لایێ 1 یه) ئه‌رێ تۆ یێ نه‌خۆشی؟
كوڕ: نه‌خێر، هین یێ دبینن ئه‌ز یێ ژ پێیاڤه، ما ئه‌گه‌ر ئه‌ز یێ نه‌خۆش بام دا چه‌وا راوه‌ستم.
(ده‌مه‌ك ژ بێده‌نگیی، كوڕ دروینیت، مامۆستا دچیته لایێ 1 جهێ كوڕ لێ روینشتی)
مامۆستا: گوهێ خۆ بده من .. ژ كه‌ڤن وه‌ره ره‌وشت و تیتال هه‌یه ئه‌م ل سه‌ر برێڤه‌دچین، ئه‌و ژی: ئه‌گه‌ر كه‌سه‌ك دگه‌شتێدا نه‌خۆش بی پێدڤییه ئه‌م بهاڤێژنه نهالێ ئانكو ئێكسه‌ر بمریت، لێ دڤی ره‌وشت و تیتالیدا پێدڤییه ئه‌م پڕسیار ژ نه‌خۆشی بكه‌ین ئه‌رێ ژبه‌ر وی بزڤڕین .. ل ڤێرێ ئه‌ڤ ره‌وشت و تیتاله ل سه‌ر وی كه‌سێ نه‌خۆش فه‌رز دكه‌ت ئه‌و ب “نه‌خێر، ژبه‌ر من نه‌زڤڕن” به‌رسڤێ دده‌ت. ئه‌گه‌ر ئه‌ز ل جهێ ته‌بام، ئه‌ز دا ب كه‌یف خۆشی ل سه‌ر چاره‌نڤیسێ مرنێ رازی بم.
كوڕ: ئه‌ز یتێگه‌هشتم.
مامۆستا: ئه‌رێ ته دڤێت ئه‌م ژبه‌ر ته ب زڤڕین؟ یان تۆ یێ رازی ل دویڤ ره‌وشت و تیتالێن پیرۆز ته ب هاڤێژنه نهالێ؟
كوڕ: (بۆ چه‌نده‌كێ هزرێن خۆ دگه‌ت) نه‌خێر، ئه‌ز نه‌یێ رازی مه.
مامۆستا: (به‌ره ف لایێ 2 گازی دكه‌ت) وه‌رن .. ئه‌و ل دویڤ ره‌وشت و تیتالێن پیرۆز به‌رسڤێ ناده‌ت.
هه‌ر سێ قوتابی: به‌رسڤا وی نه‌خێر بوو! (بۆ كوڕی) بۆچی ته وه‌كو ره‌وشت و تیتالێن پیرۆز به‌رسڤ نه‌دا؟ یێ بێژیت ( أ ) پێدڤییه ( ب ) ژی بێژیت، تۆ ژی، ل ده‌مێ پسیار ژته كرن ئه‌رێ تۆ یێ رازی چ ب سه‌رێ ته بهێت دگه‌شتێدا ته گۆتی به‌لێ.
كوڕ: ئه‌و به‌رسڤا من به‌ری هینگێ گۆت یا خه‌له‌ت بوو .. یێ بێژیت ( أ ) نه‌یا فه‌ره ( ب )ێ ژی بێژیت ئه‌گه‌ر بزانیت كۆ ( أ ) یا خه‌له‌ت بوو، ئه‌ز یێ دگه‌ل هه‌وه هاتیم دا ده‌رمانی ژبۆ دایكا خۆ بینم، لێ نوكه ئه‌ز نه‌شێم بینم چونكی ئه‌ز یێ نه‌خۆشم. ئه‌ڤجا دشیانێن من دا نینه ئه‌ز به‌رده‌وامیێ بده‌مه گه‌شتێ .. ئه‌ڤجا ئه‌ز هیڤی دكه‌م هین من بهه‌لگرن و ببه‌نه مال .. ئه‌ڤ ره‌وشت و تیتالێن هه‌وه دشێن خۆ بگرن، چونكی ئه‌گه‌ر زانینه‌ك پێدڤییه بهێته نیشاندان ئه‌وه، كۆ دووپاتیێ ل سه‌ر زڤڕاندنا من بكه‌ت دره‌وشه‌كا هۆسا دا .. سه‌باره‌ت ڤان ره‌وشت و تیتالێن كه‌ڤن ب دیتنا من چ تشتێ به‌ر ئاقل تێدا نینه، ئه‌م پێدڤی ب په‌نده‌كێ نویمه، په‌نده‌ك نوی ل به‌رسڤێن نوی بگه‌ریت.
هه‌ر سێ قوتابی: (بۆ مامۆستای) ئه‌م چ بكه‌ین؟ ئه‌ڤ تشتێ ئه‌ڤ كۆڕه دبێژیت یێ راسته، هه‌ر چه‌نده یێ مه‌زن نینه.
مامۆستا: دێ بریارێ بۆ هه‌وه هێلم، لێ من دڤێت هه‌وه ئاگه‌هدار بكه‌م كۆ ئه‌گه‌ر ئه‌م زڤڕین دێ خه‌لك تڕانێن خۆ بمه كه‌ن.
هه‌ر سێ قوتابی: ئه‌رێ بێ نامووسیه ئه‌ڤ كوڕه به‌رگیریێ ژ خۆ بكه‌ت؟
مامۆستا: نه‌خێر، ئه‌و وه‌سا نابینم.
هه‌ر سێ قوتابی: ئه‌ڤجا دێ زڤڕین، هه‌ر كی چ بكه‌ت بلا بكه‌ت، چونكی ئه‌ڤ تشتێ ئه‌م دكه‌ن یێ به‌رئالقه، چ ره‌وشت و تیتال و عه‌ده‌تێن كه‌ڤن رێكێ ل بكارئینانا هزرا دروست ناگرن، سه‌رێ خۆ بدانه سه‌ر ملێ مه .. دێ ته ب هشیاری هه‌لگرین.
كورسێ مه‌زن: ئه‌ڤجا ب ڤێ رێكێ وانا هه‌ڤالێ خۆ هه‌لگرت، په‌نده‌كێ نوی دامه‌زراندن، هه‌ڤالێ برنه مال، پێكڤه ده‌ست ب ده‌ست، ب چاڤێن ڤه‌كری به‌ر سنگێ تڕانه و فهێتیێن خه‌لكی راوه‌ستیان، وه‌كی قاره‌مانان.