نڤیسین: سه‌رحان ئه‌حمه‌د سه‌رحان

كه‌سایه‌تی:
كارمه‌ند
كچ
دوو هه‌ڤژین (ژن ـ زه‌لام)
سه‌رباز
دوو په‌رستیار

ب تنێ ئێك دیوار هه‌یه‌، ئه‌و ژی یێ پاشیێیه‌، ڕه‌نگێ وی یێ ئه‌سمانییه‌، ل ڕاستا بلند نڤیسینگه‌هه‌كا بچویك هه‌یه‌، كورسیكه‌ك ب ره‌خڤه‌یه‌، لاپتۆپه‌ك ل سه‌ر مێزێیه‌، كورسیكه‌كا دی یا بچویك، بێ پشتگیر ل چه‌پا نزمه‌ هه‌یه‌. ڕۆناهی گشتییه‌.
كارمه‌ند: (ب ژۆر دكه‌ڤیت، قاته‌ك ل به‌ره‌، ساكویه‌ك ڕه‌ش ل سه‌ر قاتێ كرییه‌ به‌ر خۆ، كۆلاڤه‌ك گرۆڤر ل سه‌رێ وییه‌، چانته‌كا بچویك یا تایبه‌ت ب كاروبارێن كاری هه‌لگرتییه‌. به‌ره‌ف نڤیسینگه‌هێڤه‌ دچیت، ب لڤینه‌كێ د ڕوینیت، چانتێ دانته‌ به‌ر پێن خۆ، پشتا خۆ ڕاست دكه‌ت، لاپتۆپێ ڤه‌دكه‌ت، ده‌ستێن خۆ بلند دكه‌ت ب مه‌ره‌ما ده‌ستپێككرنێ، هه‌ناسه‌كا كویر، ب شێوه‌یه‌كێ ب له‌ز ده‌ستێ خۆ دهینته‌ خوار دگه‌ل هندێ ب شێوه‌یه‌كێ ب له‌ز ده‌ست ب نڤیسینێ دكه‌ت، پشتی ده‌مه‌كێ كورت، به‌رده‌وام ل سه‌ر كارێ نڤیسینێ، به‌رێ خۆ دده‌ته‌ بینه‌ری، كه‌نیه‌كا بچویك، ل دویڤدا به‌رێ خۆ دزڤڕینته‌ لاپتۆپی، ژ نیشكه‌كێڤه‌ رادوه‌ستیت، لاپتۆپێ دگریت، چانتێ ژ به‌ر پێن خۆ ڕادكه‌ت، ڕادبیته‌ ژ پێیاڤه‌، چه‌نتێ ڕادكه‌ت، دوباره‌ چه‌نتێ دانیت، د ڕوینته‌ سه‌ر كورسیكا خۆ، لاپتۆپێ ڤه‌دكه‌ت، هه‌مان یاریی .. بێ هیچ ده‌ربرین به‌رێ خۆ دده‌ته‌ بینه‌ری، ل دویڤدا به‌رێ خۆ دزڤڕینته‌ لاپتۆپی، ژ نیشكه‌كێڤه‌ ڕادوه‌ستیت، لاپتۆپێ دگریت، چانتێ ژ به‌ر پێن خۆ ڕادكه‌ت، رادبیته‌ ژ پێیاڤه‌، چه‌نتێ ڕادكه‌ت، دوباره‌ چه‌نتێ دانیت، د ڕوینته‌ سه‌ر كورسیكا خۆ، لاپتۆپێ ڤه‌دكه‌ت، هه‌مان یاریی .. به‌رێ خۆ دده‌ته‌ بینه‌ری، بێزارییه‌ك ل سه‌ر رویێ وی دیار دكه‌ت، ل دویڤدا به‌رێ خۆ دزڤڕینته‌ لاپتۆپی، ژ نیشكه‌كێڤه‌ رادوه‌ستیت، تۆره‌ییه‌كا مه‌زن ل سه‌ر ڕویێ وی دیار دكه‌ت، لاپتۆپی ب هه‌می هێزا خۆ دگریت، ڕادبیته‌ ژ پێیاڤه‌، هه‌ناسه‌كا كویر دهه‌لكێشیت، چانتێ خۆ دانته‌ سه‌ر نڤیسینگه‌هێ، ڤه‌دكه‌ت، وه‌ریسه‌كێ دئینته‌ ده‌ر ئه‌ڤ وه‌ریسه‌ به‌ری هینگێ یێ هاتیه‌ ئاماده‌كرن بۆ خۆ خنكاندنێ، به‌رێ خۆ دده‌ته‌ بینه‌ری، ب له‌ز سه‌رێ وه‌ریسی ب پێپكێ كورسیكێڤه‌ گرێدده‌ت، ل دویڤدا دئێخته‌ ستویێ خۆ و پاش خۆ درێژ دكه‌ت، ڕاوه‌ستیانه‌كا كورت، پاش هه‌ر وه‌كو كورسیك ژبن پێن خۆ هاڤێتی و یێ دهێته‌ خنكاندن هه‌تا هه‌ناسه‌ دناڤدا نه‌مینیت، هشك دمینته‌ جهێ خۆ).
كچ: (ده‌نگێ سترینێ ژ دویرڤه‌ دهێت) .. لا .. لا .. لا .. لا .. (هێدی هێدی ئه‌ڤ ده‌نگه‌ نێزیكتر دبیت، هه‌تا كچه‌ك ب ژۆر دكه‌ڤیت، پرچه‌كا كورت، لێڤێن سۆر و مه‌زن، فیستانه‌كێ سۆر و پستاله‌كێ جه‌نگی ل به‌ره‌، مكیاجه‌كێ گران ل سه‌روچاڤێن خۆ دایه‌، خۆ وه‌كی زارۆكا دهلاڤێژت، دگه‌هیته‌ لایێ نڤیسینگه‌هێ، چاڤێن وێ ب زه‌لامی دكه‌ڤن، پاش به‌رێ خۆ دده‌ته‌ چانتێ وی، ده‌مانجه‌كێ دئینته‌ ده‌ر، كه‌یفا وێ پێ دهێت، به‌رێ وێ دده‌ته‌ بینه‌ری، پاش دچیت و ب سترین دروینته‌ سه‌ر كورسیكا بێ پشتگیر ل چه‌پا نزم، پێكۆلا سترینێ دكه‌ت، تۆنا ده‌نگێ وێ وه‌كی یا زه‌لامه‌كێ ژی مه‌زنه‌) لا .. لا .. لا .. لا (مه‌نده‌هۆش دبیت، سه‌رێ خۆ دخورینیت، دووباره‌ پێكۆلێ دكه‌ت، تۆنا ده‌نگێ وێ وه‌كی یا سۆزانییه‌كێیه‌) لا .. لا .. لا .. لا (هه‌مان ده‌ربرین، هه‌مان لڤین، دووباره‌ پێكۆلێ دكه‌ت، ده‌نگێ زارۆكه‌كێ) لا .. لا .. لا .. لا (هه‌مان ده‌ربرین، هه‌مان لڤین، دووباره‌ پێكۆلێ دكه‌ت، ده‌نگێ ژنه‌كا تۆره‌) لا .. لا .. لا .. لا (ب هه‌می هێزا خۆ ده‌ستێ خۆ دانته‌ سه‌ر ده‌ڤێ خۆ، هه‌ست ب شه‌رمێ دكه‌ت، زوی ده‌مانجێ دئینته‌ ده‌ر و دكه‌ته‌ دناڤ ده‌ڤێ خۆ دا و له‌بله‌بكێ وێ دشدینیت، دگه‌لدا ده‌نگێ بهێز یێ گولله‌یێ دهێت، كچ  ب كورسیكڤه‌ دكه‌ڤیته‌ ئه‌ردی)
(ساته‌ك ژ بێده‌نگیێ)
(ژ نیشكه‌كێڤه‌ ژنه‌ك و زه‌لامه‌ك ب ژۆر دكه‌ڤن، هه‌ر ئێك ژ لایه‌كێ، دكه‌ڤنه‌ به‌ر سنگێ ئێك و دو، ژن ده‌ستێ خۆ بۆ زه‌لامی درێژ دكه‌ت ب واته‌یا گرتنا ده‌ستی، زه‌لام دگریت، ژ دویرڤه‌ كچ لێڤا خۆ موچ دكه‌ت ب واته‌یا ماچی كرنێ، خوه ئه‌نیا زه‌لامی دگریت، ب شه‌رم به‌رێ خۆ دده‌ته‌ بینه‌ری، بو بینه‌ری ئاماژه‌ ب گرتنا چاڤا دده‌ته‌، دزڤڕیت و ب له‌ز ژ دویرڤه‌ ماچه‌كێ ل ژنێ دده‌ت و دگه‌لدا به‌رێ خۆ دزڤڕیته‌ بینه‌ری و ملێ خۆ دهه‌ژینیت، ژن چاڤێن خۆ ڤه‌دكه‌ت زه‌لامی هه‌مبێز دكه‌ت، ده‌نگێ ماچا ژ هه‌ر دویان دهێت، لێ ب تنێ وه‌ك ده‌نگ، جاره‌كێ ل دۆر ته‌وه‌رێ خۆ دزڤڕن، ل دویڤدا دزڤڕنه‌ هه‌مان راوه‌ستیانا ده‌سپێكێ، ژن چاڤێن خۆ ل ده‌وروبه‌را دگێریت، زه‌لام لێڤێن خۆ موچ دكه‌ت، ده‌ما چاڤێن ژنێ ب وی دكه‌ڤن شه‌قه‌كێ ل بن گوها دده‌ت، زه‌لام دمینته‌ مه‌نده‌هۆش و مچ مچه‌ك ژ ده‌ڤێ وی دهێت، هه‌ر وه‌كو ب ماچا دئاخڤیت، ئاماژه‌ ب تبلا هه‌له‌قێ دده‌ت و هه‌ر وه‌كو دڤێت بێژتێ كۆ ئه‌م هه‌ڤژینن، وه‌سا ل ژنێ دیار دكه‌ت هه‌ر وه‌كو ژنوی هاتییه‌ بیرا وێ،  ئاماژه‌ ب دوباره‌ بوونێ دكه‌ت، لێ زه‌لام یێ تۆره‌یه‌، پشتا خۆ دده‌تێ، ژن پێكۆلێ دكه‌ت وی ئاش بكه‌ت، لێ زه‌لام دزڤڕیت و هه‌ر وه‌كو یێ شه‌ری دگه‌ل دكه‌ت هێدی هێدی ئه‌ڤ جڕ و شه‌رێ وان هه‌ر دویان بهێز دبیت هه‌تا وه‌لێ دهێت زه‌لام شه‌قه‌كێ ل ژنێ بده‌ت، بێده‌نگی، پشتی چه‌نده‌كێ ژن لاپه‌ره‌كێ ژ به‌رویكا خۆ دئینته‌ ده‌ر و بلند دكه‌ت و زه‌لام ژی (مه‌كینا ئاگری) دئینته‌ ده‌ر و ل جهێ خۆ ئاگری به‌ردده‌ته‌ وی لاپه‌ری، زه‌لام و ژن به‌رێ دده‌ته‌ ئێك، ژ نیشكه‌كێڤه‌ هه‌ر دو دچن و ل دۆر ژۆرێ دزڤڕن ل دویماهیێ دگه‌هنه‌ ئێك و ب ئێك دكه‌ڤن و دگه‌لدا هه‌ر دو دكه‌ڤن و دمینه‌ درێژكریی ل سه‌ر ئه‌ردی)
سه‌رباز: (ئێكسه‌ر سه‌ربازه‌ك ب ژۆر دكه‌ڤیت، جل و به‌رگێن جه‌نگی ل به‌رن، كۆلاڤ، پستال، چاكیت … هتد، دیسان دو گوهێن كه‌را ژی ب سه‌رێ كولاڤێ ویڤه‌نه‌، تفه‌نگه‌ك هه‌لگرتییه‌، ژ لڤین و سیمایێن وی دیار دبیت كو یێ ترسنۆكه‌، به‌رێ چه‌كێ خۆ ل ده‌ستپێكێ دده‌ته‌ كرامه‌ندی، ل دویڤدا هه‌ر دو هه‌ڤژینا، هه‌تا ل دویماهیێ دگه‌هیته‌ كچێ، چاڤێن وی زیق دمینه‌ ب پستالێ كچێ، لیك ژ ده‌ڤێ وی دئینته‌ خوار، پشكنین دكه‌ت كا كچ یا ساخه‌ یان نه‌، پێ خۆ ل زكێ وێ دده‌ت، ده‌ما پشتراست دبیت كو هیچ لڤینه‌ك ژ وێ كچێ نینه‌، ب هه‌می هێزا خۆ چه‌ندین پێهنا لێدده‌ت، ل دویڤدا ب شێوه‌یه‌كێ ب له‌ز دچیت قه‌یتانكێن پستالا وێ ڤه‌دكه‌ت و پێلاڤێ ژبه‌ر دكه‌ت، كه‌له‌خێ كچێ دهاڤێژته‌ كوژیێ چه‌پا نزم، پستالێ دبه‌ت و دانته‌ نیڤا نزم، دگه‌ل پێ خۆ هه‌ڤبه‌ر دكه‌ت، سه‌رێ خۆ بلند دكه‌ت و ب كه‌نیڤه‌ به‌رێ خۆ دده‌ته‌ بینه‌ری، دروینته‌ خوار، پێكۆلێ دكه‌ت پستالا خۆ ژ پێ خۆ بكه‌ت، دئێخیت و دانته‌ ب ره‌خ یێ كچێڤه‌، ژ نیشكه‌كێڤه‌ ده‌نگێ فرۆكێن شه‌ری دهێت، به‌رێ چه‌كێ خۆ دده‌ته‌ ئه‌سمانی، شانۆ تاری دبیت لێ ده‌نگێ فرۆكا به‌رده‌وامه‌، دگه‌لدا ده‌نگێ بومبه‌ بارانكرنه‌كا تۆند دهێت، پشتی چه‌نده‌كا كورت، دگه‌ل لاواز بوونا ده‌نگێ بومبا رۆناهی هه‌لدبیت، سه‌رباز ل پشت هه‌ر دو پستالا یێ كه‌فتیه‌ ئه‌ردی، ده‌نگێ پێنگاڤێن دو په‌رستیارا دهێت، پێكڤه‌ ئێك ده‌م پێن خۆ ل ئه‌ردی دده‌ن، ب ژۆر دكه‌ڤن، ساكویێن نۆژدارا ل به‌رن، پێلاڤێن ئاسایی ل به‌رن، ڕه‌نگێ پێلاڤا پیڤازییه‌، هه‌ر ئێكی ژ لایه‌كێ سادیی (عه‌ره‌بانا هه‌لكرتنا نه‌خۆشا) هه‌لگرتییه‌، ژ دویرڤه‌ به‌رێ خۆ دده‌نه‌ هه‌می ته‌رما، فیتكه‌كا مه‌نده‌هۆشیێ ژ وان دهێت، به‌رێ وان ب هه‌ر دوو پستالا دكه‌ڤت، به‌ره‌ف وانڤه‌ دچن، سادیێ دانه‌ سه‌ر ته‌رمێ سه‌ربازی، پێلاڤێن خۆ دئێخن، هه‌ر دو پستالا دكه‌نه‌ به‌ر خۆ، پشكنین دكه‌ن، كه‌یف خۆش به‌رێ خۆ دده‌نێ، سه‌ر شانۆیێ ب سه‌رفه‌رازیی دهێن و دچن، پاش خۆ رژد دكه‌ن، به‌ره‌ف سادییا خۆڤه‌ دچن، ل به‌ر وێ رادوه‌ستن، به‌رێ خۆ دده‌نه‌ پێلاڤا، پێكڤه‌ پێلاڤێن خۆ دانه‌ سه‌ر سادیێ و بلند دكه‌ن و ده‌ردكه‌ڤن)
په‌رده‌
17/7/2020
سلێمانی

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *