ئارام تیگران ھونەرمەندەکی ئەرمەنییە کۆ ب کوردی و ئەرمەنی ستران گوتینە، د سالا (١٩٣٤) دا ل باژارێ قامشلۆ (بنخەتێ) ھاتیە دونیایێ، د ڕۆژا (٨)ێ تەباخا (٢٠٠٩)دا ل ئاسینایێ پایتەختا یۆنانێ وەغەرا داویێ کر.

ئارام کورێ تیگران مەلیکیان د ساڵا (١٩٣٤) ل قامیشلۆ د ناڤا مالباتەکا ھەژار ھاتیە دونیایێ. کارێ خوەیێ ھونەری ب ئەڤینەک تژی جۆش و خۆەشی ژ تەمەنێ (١٨) سالیێ د ناڤا دەوات و شاھیێن کورد و ئەرمەنیان دا دەستپێکر، بابێ وی د کارێ ستران گۆتنێ دا پڕ ئەو ھانددا کۆ ڕێیا ھونەرێ بدۆمینە. ساڵا (١٩٦٦) ب مالباتا خوەڕا چووینە ئەرمەنستانێ و ھەیا ساڵا (١٩٨٥) د ڕادیویا ئێریڤانێ دە مینا خەباتکارەکێ خەبتی.

ئارام تیگران، ساڵا (١٩٦٦) ب ھەڤکاریا خەلیل مورادۆڤ کۆ بەرپرسیارێن پارا کوردییا رادیۆیێ بوون، ب ئاوایەکی بەرفرەھ دەست ب کارێ خوەیێ سترانبێژیێ کر، ئارام ئەڤیندارێ ستران و ئاوازێن کوردی ب ھەڤکاریا جەمیلا جەلیل و کەرەمێ سەیاد بوو و کەتە ناڤا دەریایا سترانێن کوردی و ب مەلەڤانتیا د ناڤا ڤێ دەریایا بێبن دەبوو ھۆستا و شەھرەزایەکێ پسپۆر.

ئاواز و ھەلبەستێن وی ژ ناڤا دلێ جڤاتا کوردان دەرکەتنە، مینا سترانا “بلبلۆ، کەچێ ژ بۆنا تە ئەز دینم، ھەی لۆلۆ دەلال، شەڤ چوو، چیایێ گابارێ، زیلان، دچم-دچم، ب ھەسرەتا ئێریڤانێ، چل-چل کەزی، ئەی وەلاتۆ ئەم ھەلیان، ئەلماسا من ژ دەرسێ تێ، ئاخ دێ و باڤێ مە” ب دەھان سترانێن دن ب ڕێیاا ئارام تیگران کەتن سەر زمانێ گەل و ژ کوردان ڕا بوون سامانەک نەتەوی کۆ د ناڤا ڕووپەلێن دیرۆکا ھونەرێدا نایێن وەندا کرن.

د ساڵا (١٩٩٠)دا وەک پەنابەر بۆ ئەورۆپایێ چوو. د ڕۆژا (٨)ێ تەباخا (٢٠٠٩)دا ل ئاسینایێ پایتەختا یۆنانێ وەغەرا داویێ کر.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *