نڤیسین: ژان تاردیو
وه‌رگێران: سه‌رحان ئه‌حمه‌د سه‌رحان

كه‌سایه‌تی:
زه‌ڵام: روینشتی
ژن: ژ پێیاڤه‌

(ژۆره‌كا ڤالا، تارییه‌، ل راستا نزم زه‌لام یێ روینشتییه‌، رۆناهییه‌كا شین یا ل سه‌ر سه‌رێ وی. ل چه‌پا بلند، په‌رنجه‌ره‌كا مه‌زنا ڤه‌كریی هه‌یه‌، ژ وێ په‌نجه‌رێ شه‌ڤه‌ك پر ستێر دیار دكه‌ت. ل ده‌ف په‌نجه‌رێ ژنه‌كا گه‌له‌ك جوان راوه‌ستیایه‌، ده‌ستێ وێ یێ ب لێڤا په‌نجه‌رێڤه‌، رۆناهی ژ په‌نجه‌رێ دهێت، له‌شێ ژنێ دیاركرییه‌. شێوه‌ی هه‌ڤپه‌یڤینا هه‌ر دوویان وه‌كی سه‌ردابرن و داخباربوونێیه‌. هه‌ر دوو كه‌سایه‌تی هه‌تا دویماهیێ ژ جهێ خۆ نالڤن. به‌رێ زه‌لامی ل بینه‌رییه‌، لێ دگه‌ل ژنێ دئاخڤیت، ژن بۆ وی دیمه‌نێ ده‌رڤه‌ وه‌سف دكه‌ت)

زه‌لام: خۆشتڤییا من، جوانا من، هه‌ره‌ به‌ر په‌نجه‌رێ و بۆ من بێژه‌ كا تۆ چ دبینی؟
ژن: ئه‌ز یا ستێره‌كێ ل ئه‌سمانی دبینم.
زه‌لام: ژ راستا تۆ ژ ستێرا پێڤه‌تر چ نابینی؟
ژن: نوكه‌ من ستێره‌كا دی دیت … نه‌ گه‌له‌ك ستێر … نه‌ كۆمه‌كا ستێرا.
زه‌لام: تۆ چ تشتێ دی ل بن ئه‌سمانی نابینی؟
ژن: چ تشتێ دی نینه‌ هه‌ڤالێ من.
زه‌لام: خۆ تۆ عه‌وره‌كێ بچویك ژی نابینی؟
ژن: خۆ عه‌روه‌كێ بچویك ژی نینه‌.
زه‌لام: خۆ تۆ روحه‌كا به‌دیی ژی نابینی، نیف مرۆڤ نیڤ چه‌كچه‌كیله‌؟
ژن: خۆ روحه‌كا بچویكا به‌دیی ژی نینه‌.
زه‌لام: تۆ چ ل سه‌ر ئه‌ردی ژی نابینی؟
ژن: ئه‌ز یا هنده‌ك تشتێن بچویك دبینم، ده‌زیێن ل سه‌ر دارا، ئاڤ یا ژ سه‌ر تایێن دارێ دهێته‌ خوار، خانی دته‌یسن، رێكه‌كا درێژ ژی هه‌یه‌.
زه‌لام: دڤێ هه‌میێدا چ فارگۆنێن شه‌مه‌نده‌فرا نینن؟ تیپه‌ك، مرۆڤێن ب شاخ، پێن مرۆڤا؟
ژن: چ ژڤان نینه‌ هه‌ڤالۆ: نه‌ فارگۆن، نه‌ تیپ، نه‌ژی مرۆڤ.
زه‌لام: ئه‌گه‌ر هۆسا بیت، ئاشتی ل ئه‌ردی بهێته‌ خوار! ئێ، ته‌ وه‌كی ڤیانا ڤێ رۆناهیێ بۆ ڤی بیستانی حه‌ز ژ من كرییه‌؟
ژن: ئه‌رێ خۆشتڤیێ من.
زه‌لام: به‌رێ خۆ بده‌ ئه‌سمانی! رۆناهییا وێ دده‌نگێ خۆ بده‌ من، دپه‌یڤێن خۆ.
ژن: من های ژێ هه‌یه‌، وه‌كو … من های ژی َهه‌یه‌ …
زه‌لام: ته‌ های ژ چ هه‌یه‌؟
ژن: ده‌نگێ ستێرا، ده‌نگێ هه‌لـمێ، هه‌ناسێن بایی.
زه‌لام: من های ژ دیتنا ته‌ دپه‌یڤێن ته‌ دا هه‌یه‌، پێدڤی ناكه‌ت ئه‌ز دۆر خۆ ب زڤڕم و ببینم. ئه‌ڤ په‌نجه‌ره‌ یا ته‌یه‌، ب رێكا ته‌ ئه‌ز دزانم كا ژ ده‌رڤه‌ چ رویدده‌ت.
ژن: ژ زه‌مانی زێده‌تر چ نینه‌، پۆشایی وی دناڤ خودا دهه‌لگریت و مه‌زن دكه‌ت، ئه‌ز ژی یا ب ده‌ستێن خۆ پێشكێشی ته‌ دكه‌م.
زه‌لام: پێدڤییه‌ ئه‌م ب مینه‌ هشیار، هشیاربین بێ ترس، پێدڤییه‌ ئه‌م ڤێ شه‌ڤێ ب لێڤێن خۆ ئارام بكه‌ین، سه‌رخاترا من جاره‌كا دی چاڤێن خۆ ڤه‌كه‌ ئه‌ی خۆشتڤییا من.
ژن: ئه‌ز دێ ڤه‌كه‌م دا تۆ ببینی خۆشتڤیێ من.
زه‌لام: چاڤێن خۆ بلند بكه‌ خۆشتڤییا من.
ژن: هندی دشیان دا بیت ئه‌ز دێ چاڤێن خۆ بلند كه‌م خۆشتڤیێ من.
زه‌لام: ژ خۆ دویرتر دچیت، ژ ته‌ دویرتر دچیت، به‌لكو هه‌تا ژ هزرێن مه‌ دویر تر دچیت، ژ خه‌ونێن مه‌ دویرتر دچیت.
ژن: ئه‌ز نانڤم، ئه‌ز ل ده‌ف ته‌ دمینمه‌ هشیار.
زه‌لام: تۆ ژ ڤیانا خۆ دمینه‌ هشیار، چاڤێن ته‌ ژی دچنه‌ هنده‌ك جها، تۆ ب خۆ ژی نزانی ئه‌و جهه‌ چنه‌، هندی تۆ ل شه‌ڤێ بنێری دێ ئه‌ڤ چه‌نده‌ ب سه‌رێ ته‌ هێت.
ژن: ئه‌ز یا هه‌ست ب ئارمییه‌كا مه‌زن دچاڤ و ئه‌نییا خۆدا دكه‌م، ئه‌ڤ هه‌ستێ ئارامیێ یێ به‌ره‌ف له‌شێ من دچیت.
زه‌لام: ئه‌ڤه‌ شه‌ڤا پۆشاییه‌، دگه‌ل چاڤێن ته‌ تێكه‌ل دبیت.
ژن: كه‌یف خۆشییه‌ك یا دناڤ دلێ مندا مه‌زن دبیت، لێ ئه‌ز نزانم كا سه‌ده‌ما وێ چییه‌.
زه‌لام: ئه‌ڤه‌ پۆشاییه‌، یێ دچیته‌ دناڤ روحا ته‌ دا، یێ هه‌می په‌نجه‌را ڤه‌دكه‌ت.
ژن: ئێدی نه‌شێت باخڤیت.
زه‌لام: ئه‌ڤه‌ پیرۆزییه‌! (بێده‌نگی، ب ده‌نگه‌كێ نزم) خودا و شه‌یتان ره‌ڤین! تۆ تێكه‌لی شه‌ڤێ بووی، تۆ دگه‌ل ساخی و پاكییا جیهانێ تێكه‌ل بووی. خۆشیێ دگه‌ل ڤێ رۆناهیێ ببه‌، تێر به‌رێ خۆ بدێ .. زارۆكه‌كێ جوان و سپی دگه‌ل خۆ بینه‌، بلا دلێ وی یێ تژی ئه‌ڤین بین، په‌رێن زه‌مه‌نێ پێڤه‌ بن و دگه‌ل زه‌مه‌نی بفڕیت، یێ سڤك بیت من و ته‌ ببه‌ت، وه‌ره‌!
(زه‌لام رادبیته‌ ژ پێاڤه‌، زه‌لام و ژن هێدی هێدی ژ ئێك و دوو نێزیك دبن، ده‌مێ دگه‌هنه‌ نیڤا نیڤێ، ده‌ستێ خۆ دكه‌نه‌ دناڤ ئێكدا و به‌ره‌ف لایێ راستێ دچن)
ژن: ئه‌ز یێ ته‌ به‌ره‌ف رێكه‌كا بێ دویماهی دبه‌م.
زه‌لام: ده‌مێ سپێده‌ دهێته‌ دیداره‌ مه‌، بیرا خۆ بینه‌ كۆ شه‌ڤێ نهێنییا خۆ پێشكێشی مه‌كر!
(به‌رزه‌ دبن)
دویماهی

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *