ل به‌راهیێ پێدڤیه‌ مرۆڤ هزر د وێ چه‌ندێ دا بكه‌ت كا ئه‌وێن تووشى نه‌خۆشیێن دلى بووین چ لێ قه‌ومایه‌؟ ئه‌رێ تو كه‌سه‌كى د نیاسى كو جگاره‌یان بكێشیت و زێره‌ڤانیا كێشا له‌شێ خۆ نه‌كه‌ت و بێ مننه‌ت هه‌موو تشته‌كى دخۆت؟ ب راستى گه‌له‌ك یا ب زه‌حمه‌ته‌ ئه‌م هه‌لسه‌نگاندنا وان كه‌سان بكه‌ین ئه‌وێن تووشى مه‌ترسیێن ئێشێن دلى دبن، هه‌كه‌ ئه‌م ته‌ماشه‌ى پتریا خه‌لكى ژى بكه‌ین دێ دیاربیت كو گه‌له‌ك كه‌سێن نورمال ژى د مه‌ترسیێ دانه‌ ژوانژى گه‌له‌ك هه‌نه‌ تووشى نه‌خۆشیا شه‌كرێ و بلندبوونا كولیسترولى و فشارا خوینێ بووینه‌ و ل گه‌ل وێ چه‌ندێ جگاركێشن و وه‌رزشێ ژى ئه‌نجام ناده‌ن، راسته‌ كو خوارنا گیزان و ب كارئینانا زه‌یتێ تاراده‌یه‌كى دێ هاریكاریا ڤان كه‌سان كه‌ن بۆ كێمكرنا مه‌ترسیان، به‌لێ چ حه‌ب یان خوارنێن ده‌ستنیشانكرى نینن كو نه‌خۆشى ئێكسه‌ر چاره‌بكه‌ن و هه‌كه‌ نه‌خۆش پارێزا خۆ نه‌كه‌ت دێ مه‌ترسیا به‌رده‌وام ل سه‌ر هه‌بیت.
هنده‌ك په‌یامێن پزیشكى هه‌نه‌ بۆ وان كه‌سێن ل دووڤ شێوازه‌كێ ساخله‌میێ دچن وه‌كو رێڤه‌چوون و مه‌له‌ڤانى كرنێ ، ئه‌وژى ئه‌وه‌ ئه‌ڤ چالاكیه‌ راده‌یه‌كى بۆ مه‌ترسیێن تووشبونێ ب نه‌خوشیێن دلى دادنن و ب رێكا وان دشیاندایه‌ گه‌له‌ك مفایێن ساخله‌میێ بده‌ستڤه‌ بینین وه‌كو كێمكرنا سه‌نگى و ئاستێ كولیسترولى و روینان دخوینێ دا.
سێ كاریگه‌رێن سه‌ره‌كى یێن مه‌ترسیێ هه‌نه‌ ( ئاستێ كولیسترولى و بلندبوونا فشارا خوینێ و جگاره‌كێشان) و هه‌ر ئێك ژوان تێرا خۆ مه‌ترسى هه‌نه‌، هه‌كه‌ ته‌ پتر ژ كاریگه‌ره‌كێ ب مه‌ترسى هه‌بیت هه‌لبه‌ت دێ زه‌نگلا مه‌ترسیێ ژى ل ده‌ڤ ته‌ پتر بیت ژبه‌ركو زیان دێ پتر كومڤه‌بیت، بلندبوونا رێژا كولیسترولى رامان ژێ ئه‌وه‌ كو مه‌ترسیه‌ك یا هه‌ى، و بلندبوونا فشارا خوینێ ل گه‌ل یا كولیسترولى رامان ژێ ئه‌وه‌ كو ئه‌ڤ مه‌ترسیه‌ دوحارا پتر لێ دهێت، به‌لێ بلندبوونا رێژا كولیسترولى و ل گه‌ل یا فشارا خوینێ و جگاره‌كێشانژى دێ ڤێ مه‌ترسیێ چوار جاران پتر لێ كه‌ت.
به‌لێ دشیاندایه‌ راده‌یه‌كى بۆ ڤان مه‌ترسیان بدانین ب دووڤچوونا ڤان هه‌ر چوار ره‌فتاران داكو جوداهیه‌ك بكه‌ڤیته‌ ژیانا مه‌ و بلا ژبیر نه‌كه‌ین كو ژبلى رێنمایێن پزیشكى گه‌له‌ك كار هه‌نه‌ تو بخو دشێى ئه‌نجام بده‌ى، به‌لێ دێ هه‌ر ته‌ پێدڤى ب هاریكاریا وانژى بیت، ره‌نگه‌ نوشدار ده‌رمانان بۆ ته‌ بنڤیسیت و ل گه‌ل دا بێژیته‌ دێ چاوان ب كارئینى و یا ل سه‌ر ته‌ژى پێدڤیه‌ ب شێوازه‌كێ دروستى هه‌موو رێنمایێن گرێداى ته‌ بجهبینى.
نوش نیوز.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *