نڤیسین: ئاواز ئیبراهیم

پەرتووکا (علکێ ئەجنەی) یا نڤیسەر (ئەحمەد جاسم)یە، ژ (١٥) کورتە چیرۆکان و (٤) کورتیلە چیرۆکان پێکدهێت و د ناڤا (٩٣) لایێن پەڕا هاتینە نڤیسین، چاپا ئێکێ (٢٠٢٠).
(١) ئەڤ پەرتووکە ژ کومەکا (کورتە چیڕۆکان) پێکدهێت، بابەتێن جوراوجور ب خوەڤە دگریت، بەهرا پتریا بابەتێن وێ (کەتواری)نە، ئانکو جڤاک هێڤێنی دروستبوونا ئەڤان کورتە چیرۆکانە.
(٢) ئەگەر ئەم ڕاوەستین ل سەر پەرتووکێ دێ بینین، بۆ خواندنا پەرتووکێ ژ سەرڤە ئەگەر خواندەڤانەکێ ئاسایی ژی بیت، دشێت ب ئاسانی نڤیسینا د ئەڤێ پەرتووکێدا بخوینیت، سەبارەت ناڤەڕۆکا وێ، بۆ پتر تێگەهشتن و مەرەما نڤیسەری دبیت جارەک یان دوو، چیرۆک ب باشی بهێتە خواندن، ژبەرکو بابەتێن بهێز و هەستیار دناڤا لاپەڕاندا هەنە، بابەتێن وێ باس ل ئەوان دیاردەیێن جڤاکی دکەت، ئەوێن ڕۆژانە ب سەدان نموونە د مەمللەکەتیدا دوبارە دبن و ب کێمی باس لێ دهێنە کرن.
(٣) دارشتنا ئەڤان کورتە چیرۆکان ب شێوەیەکێ ڕێکوپێکە، نڤیسەری ب شێوێ ڤەگێران (ڕۆیدان، جەـ، دەم، کارەکتەر)ێن خۆ د ناڤبەرا دیالوک و مەنەلوگ و وەسفکرنێدا دیارکرینە، هەروەسا شیایە د (خەیال و کەتوار و یاخیبوون)ێدا بمینیت و خو نە دەتە دەست ڕەسەنایەتیا خۆ، چنکو ڕەسەنایەتیا نڤیسەری ئەگەر گەلەکا زاڵ بیت لسەر نڤیسینا ئەوی، دێ لایەنێن (هونەر، تەکنیک)یێن چیرۆکی بهایێ خوە ژ دەستدەن و هێنە پشت گوهـ هاڤێتن، د ئەڤان کورتە چیرۆکاندا تشتێ (ئاشکرا – ڤەشارتی) هەیە، ب هەر ئەگەرێ هەی نڤیسەری ل هندەک جهان تشتێ ڤیایی ب ئاشکرایی بێژیت یا گوتی، هەڕوەسا تشتێ نەڤیایی بێژیت ب هندەک ڕەمز و نیشانا ب ڤەشارتی هێلاینە.
(٤) ئایدۆلۆژیا وەکو چەمکەکێ هونەری، ڕۆلەکێ گرنگ د دروستبوونا ئەڤان کورتە چیرۆکاندا دبینیت، نڤیسەری هندەک ژ ئایدۆلۆژیا خوە و دگەل یا کارەکتەرێن خوە د نڤیسینێن خوەدا دیارکریە، ژبەرکو نابیت د نڤیسینێدا ئایدۆلۆژیا نڤیسەری بتنێ بیت د نڤیسینێ، بەلکو نڤیسەر مافی ب دەتە کارەکتەرێن خوە، ئەو ژی ب ئازادی ئایدۆلۆژیا خوە د نڤیسینێدا بەرجەستە بکەن.
(٥) ژ کورتە چیرۆکەکا ڤێ پەرتووکێ” باس ل ئەوێ چەندێ دکەت، دەمێ (سەردار)ی خوە ئێخستیە د تەنگاڤیەکێدا ژبەر (خودانا تێستێ) و (خودانا تێستێ) ژبەر وێ تەنگاڤیا (سەرداری) خوە کریە تێدا، ئەو دچیت د بەرفرەهیەکێدا” نڤیسەری د ئەڤێ کورتە چیرۆکێدا، ل گورەی تێگەهشتنا من وەسا گوتیە (ئێدی نە دەمێ هندێیە ژیانا خوە ب فروشی، بۆ هندێ کەسەک ژیانەکا خۆش ب ژیانا تە بۆ خوە ب کڕیت، ئێدی دەمێ هندێیە تو بۆ خوە بژی، چنکو کەسێ ئاگەهـ ژتە نینە).
” خواندنا ئەڤان کورتە چیرۆکان مفا و خۆەشیەک تێدا هەیە”

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *