نڤیسین: برتولت برێشت
وه‌رگێران: سه‌رحان ئه‌حمه‌د سه‌رحان

كه‌سایه‌تی:
باب
ده‌یك
كوڕ
خزمه‌تكار

كولونیا ل سالا (1935) ڕۆژا ئێك شه‌مبێ، پشتی دانێ نیڤرۆ، باران د باریت، باب و ده‌یك و كوڕ ژ ژۆرا خوارنێ ده‌ردكه‌ڤن، خزمه‌تكار ب ژۆر دكه‌ڤیت.
خزمه‌تكار: هێژایێ كلێمچ و هه‌ڤژینا خۆ یێ پرسیار دكه‌ن كا هێژایێ من و خانم ل مالن یان نه‌.
باب: نه‌خێر
(خزمه‌تكار ده‌ردكه‌ڤیت)
ده‌یك: یا پێدڤی بوو ته‌ ب خۆ به‌رسڤا ته‌له‌فونێ دابا، چونكی ئه‌و باش دزانن كۆ ئه‌م نه‌شێین ب ده‌ركه‌ڤین.
باب: بۆچی ئه‌م نه‌شێن ب ده‌ركه‌ڤین؟
ده‌یك: چونكی بارانا دباریت.
باب: ئه‌ڤه‌ نابیته‌ ڕێگر.
ده‌یك: تۆ كیڤه‌ چوویی؟ ئه‌ڤه‌ ئێكه‌م پرسیاره‌ ژته‌ دهێته‌ كرن!
باب: گه‌له‌ك جهـ یێن هه‌ین مرۆڤ بچیتێ.
ده‌یك: پا ئه‌و چییه‌ دبیته‌ ڕێگر بۆ ده‌ركه‌ڤتنا مه‌؟
باب: كیڤه‌ بچین؟
ده‌یك: خوزی باران نه‌باری با.
باب: ما ئه‌گه‌ر باران نه‌باری با، دا كیڤه‌ چین؟
ده‌یك: هه‌ر چ نه‌بیت ئه‌م د شیاین بچین سه‌ره‌دانا ڤی و وێ بكه‌ین (ساته‌ك ژ بێده‌نگیێ) ته‌ خه‌له‌تی كر چونكی ته‌ ب خۆ به‌رسڤا ته‌له‌فونێ نه‌دا، نوكه‌ وانا زانییه‌ كۆ مه‌ نه‌ڤێت ئه‌م پێشوازییا وان دمالا خۆدا بكه‌ین!
باب: ما دێ چ چێبیت ئه‌گه‌ر ئه‌و بزانن؟
ده‌یك: نه‌ ئاقلدارییه‌ ئه‌م په‌یوه‌ندییا خۆ ب وان ب بڕین، ما تۆ نابین خه‌لك چه‌وا په‌یوه‌ندیێن خۆ دگه‌ل وان خۆش دكه‌ن؟
باب: مه‌ په‌یوه‌ندیا خۆ ب وان نه‌بڕییه‌.
ده‌یك: پا بوچ ئه‌م ده‌رگه‌هێ خۆ بۆ وان ناڤه‌كه‌ین؟
باب: چونكی ئه‌ڤ كلێمچێ هه‌، بۆ من دبیته‌ جهێ دلته‌نگیێ.
ده‌یك: به‌لێ پا به‌رێ وی دلته‌نگی په‌یدا نه‌دكر!
باب: به‌رێ! من ب وێ په‌یڤا خۆ تۆره‌ نه‌كه‌، گۆتی به‌رێ!
ده‌یك: ده‌مێ پشكنینا قوتابخانا ژنوی په‌یوه‌ندیێن خۆ پی د بڕی!؟ ئه‌ها به‌رێ ته‌ ئه‌ڤ چه‌نده‌ دگه‌ل وی نه‌دكر، دێ هه‌ما خۆ چه‌وا بیت ژبیركه‌!
باب: مه‌ره‌ما ته‌ پێ ئه‌وه‌ ئه‌ز یێ ترسنۆكم؟ (ساته‌ك ژ بێده‌نگیێ) كا ڕابه‌ و داخوازییا وان بكه‌ بلا بهێن، بێژێ ئه‌م ژبه‌ر بارانێ زڤڕین.
ده‌یك: ( ڕۆینشتی، خۆ گیروو دكه‌ت) داخوازێ ژ مالا “كلێمچی” بكه‌ین دا كۆ بهێنه‌ ڤێرێ؟
باب: ئه‌ ئه‌… دا دوباره‌ هاندان و گه‌رمكرنا مه‌ نه‌رێنییێ بۆ به‌ڕه‌ڤانیێ ب سه‌لمینن.
ده‌یك: (بۆ كوڕی) هێنری، ده‌ستێ خۆ نه‌كه‌ ئامیرێ ڕادیویێ!
(زارۆك به‌ره‌ڤ ڕۆژنامێ دچیت)
باب: ئه‌ڤ بارانه‌ كاره‌ساته‌، هه‌ر وه‌ڵاتێ باران لێ باریت كاره‌ساته‌، چونكی ژبه‌ر وێ ژیان رادوه‌ستیت.
ده‌یك: ئه‌ز بێژم یا باش نینه‌ تۆ هزرێن خۆ ب ده‌نگه‌كێ بلند بكه‌ی، ما تۆ ژی وه‌نابێژی؟
باب: ژبه‌ر كۆ ئه‌زێ دناڤبه‌را هه‌ر چوار دیوارێن مالا خۆ، دێ ل سه‌ر وی تشتی ئاخڤم یێ من بڤێت و ئه‌ز ڕازی نابم من دمالا مندا بێده‌نگ بكه‌ن …
(ژ نیشكه‌كێڤه‌ بێده‌نگ دبیت: خزمه‌تكار ب ژۆر دكه‌ڤیت و دوو فنجانێن قه‌هوێ هه‌لگرتینه‌، بێده‌نگی به‌رده‌وام دبیت هه‌تا خزمه‌تكار ده‌ردكه‌ڤیت)
باب: ما چێدبیت ئه‌م بهێلن خزمه‌تكاره‌كا هۆسا ل ده‌ف مه‌ كار بكه‌ت؟ بابێ وێ زێره‌ڤانێ ئاڤاهییه‌كێیه‌!
ده‌یك : ئه‌ز بێژم ئه‌م گه‌له‌ك ل سه‌ر هندێ ئاخفتین و ته‌ ب خۆ ل دویماهیێ گۆت كۆ ئه‌ڤ چه‌نده‌ دبه‌رژه‌وه‌ندییا مه‌دایه‌.
باب : هه‌ما ئه‌ز بێژم تۆ دوباره‌ بكه‌… هه‌ره‌ به‌ر گوهێن ده‌یكا خۆ ژی بێژم ل دویڤدا به‌رێ خۆ بدێ كا ئه‌م دێ كه‌ڤینه‌ دچ ئاریشه‌دا.
ده‌یك : یا دشیانێن من دایه‌ بێژم ئه‌وه‌ كۆ…
(خزمه‌تكار ب ژۆر دكه‌ڤیت و قه‌هوه‌ یا ده‌ستێدا)
ده‌یك: ئێرنا، بدانه‌ وێرێ، تۆ دشێی بچی، ئه‌ز ب خۆ دێ ب ڤێ چه‌ندێ ڕابم.
خزمه‌تكار: سوپاس، خانما من.
(خزمه‌تكار ده‌ردكه‌ڤیت)
كوڕ: (ئاماژه‌ ب گۆتاره‌كا ڕۆژنامێ دده‌ت) باب، ئه‌رێ هه‌می زه‌ڵامێن دێرێ ب ڤان كریارا ڕادبن؟
باب: چه‌وا؟
كوڕ: ل ڤێرێ هاتیه‌ باسكرن!
باب: ئه‌ڤه‌ تۆ چ دخوینی؟
(ڕۆژنامێ ژ ده‌ستێن وی د كێشیت)
كوڕ: نێ سه‌رۆكێ كۆمه‌لا مه‌ گۆت ئه‌م هه‌می دشێن ڤێ ڕۆژنامێ بخوینن.
باب: ما كێ گۆتیه‌ ته‌ ئه‌ز بهایه‌كێ بۆ ئاخڤتنا سه‌رۆكێ كۆمه‌لا ته‌ دانم، ئه‌ز بریارێ دده‌م كا چ تشت یێ پێدڤییه‌ تۆ بخوینی و چ تشت نه‌!
ده‌ك: هێنری ، ڤان ده‌ه بفنكا وه‌ربگره‌، هه‌ره‌ بۆ خۆ تشته‌كێ بكره‌.
كوڕ: نێ تۆ یا دبینی كۆ باران یا دباریت! (ب خه‌مگینی سه‌رێ خۆ دانته‌ به‌ر په‌نجه‌رێ)
باب: ئه‌گه‌ر ئه‌ڤ گۆتارێن دۆزێن كاهنا نه‌راوه‌ستاندن، ئه‌ز دێ پشكدارییا خۆ ژ كارئێخم.
ده‌یك: دێ به‌ژداریێ د كیژ ڕۆژنامێدا كه‌ی؟ هه‌می ڕۆژنامه‌ ب ڤێ چه‌ندێ د ئاخڤن.
باب: ئه‌گه‌ر هه‌می ڕۆژنامه‌ ڤان بێخێریا به‌ڵاڤ بكه‌ن، نه‌ ئاریشه‌یه‌، ژ ئه‌ڤرۆ وێڤه‌ ئه‌ز چ ژ وان ناخوینم، زانیاریێن من سه‌باره‌ت ڕۆیدانێن جیهانێ كێم نابیت.
ده‌یك: لێ كریارا پاقژكرنێ هند د خراپ نینن.
باب: پاقژكرن، دۆز هه‌می یا سیاسییه‌.
ده‌یك: مه‌ شۆله‌ ژ ڤێ چه‌ندێ نینه‌، هه‌ر چه‌وا بیت، ئه‌م ڕیشالین و ل دویماهیێ ئینجیلینه‌ .
باب: ئه‌ڤ پێویستییه‌ بۆ ملله‌تی دگرنگ، ئێدی مرۆڤ نه‌شێت وان خزمه‌تكارێن ژبیركری بینته‌ بیرا خۆ، بێكۆ هزر د وان تشتا دا بكه‌ت یێن ژ توخیبێ ده‌ربازبووین.
ده‌یك: ما چ دشیانێن وان دایه‌ بكه‌م، هندی ئه‌ڤ تشتێن هۆسا روی بده‌ن!؟
باب : چ دشیانێن وان دایه‌ بكه‌ن؟ هه‌ما به‌ر ده‌رگه‌هێ خۆ پاقژبكه‌ن. ره‌وش ل مالا قه‌هوائیی نه‌ هند یا پاقژه‌ .. ل دویڤ وێ یا هاتیه‌ گۆتن!
ده‌یك : باشه‌ مه‌به‌ستا ته‌ چییه‌ چارل؟ ته‌ دڤێت ب سه‌لمینی كۆ ئه‌و چاره‌سه‌ریێن ساخله‌میێ یێن بۆ ملله‌تی دهێنه‌ كرن ب مفانه‌؟!
باب : ساخله‌می؟ چه‌ند یا ب ساخله‌مییه‌ ! ئه‌گه‌ر ساخله‌مییا هۆسا بیت ئه‌ز حه‌ز دكه‌م یێ نه‌ساخبم.
ده‌یك: تۆ ئه‌ڤرۆ یێ تۆره‌ی، ئه‌رێ تشته‌ك دقوتابخانێدا چێبوویه‌؟
باب: ما دێ چ چێبیت؟ هیڤی ژ ته‌ دكه‌م هه‌ر بێهن نه‌بێژه‌ من تۆ یێ تۆره‌ی، چونكی تۆ یا من هاندده‌ی ئه‌ز هنده‌ك كریارێن نه‌چاڤه‌ڕێكری بكه‌م ب وێ تۆره‌یێ!
ده‌یك: ئه‌م نه‌شێن هه‌ر لێكبكه‌ڤین، چونكی به‌رێ …
باب: به‌رێ .. من پێشبینیا ڤێ چه‌ندێ دكر، به‌لێ پا ئه‌ز حه‌ز ناكه‌م ئه‌و چ جاران مێشكێ كوڕێ من ژی ژه‌هر بكه‌ن!
ده‌یك: باشه‌، ئه‌و یێ چوویه‌ كیڤه‌؟
باب: ئه‌ز ژی نزانم ل كیڤه‌یه‌؟
ده‌یك: ته‌ دیت ده‌ما ده‌ركه‌فتی؟
باب: نه‌!
ده‌یك: نزا چوویه‌ كیڤه‌؟ (گازی دكه‌ت) هێنری! ( ب له‌ز ده‌ردكه‌ڤیت و دكه‌ته‌ گازی، پشتی هینگێ دزڤڕیت) یێ ده‌ركه‌فتی!
باب: و بۆچی ده‌رنه‌كه‌ڤیت؟
ده‌یك: بارانه‌كا بهێز یا دباریت!
باب: تۆ بۆچی هۆسا تێكچووی؟ خۆ ئه‌گه‌ر ده‌ركه‌فتبیت واته‌ چ؟
ده‌یك: ئه‌وا مه‌ گۆتی؟
باب: وێ چ په‌یوه‌ندی ب ده‌ركه‌فتنا وی هه‌یه‌؟
ده‌یك: ڤان دویماهییا تۆ كونترۆلێ ل سه‌ر تۆره‌ییا خۆ ناكه‌ی!
باب : دڤا دویماهییادا من دروست كۆنترۆل ل سه‌ر خۆ كریه‌، لێ خۆ ئه‌گه‌ر من كۆنترول ل سه‌ر خۆ نه‌كربیت، ڤێ چه‌ندێ چ په‌یوه‌ندی ب ده‌ركه‌فتنا زارۆكی هه‌یه‌؟
ده‌یك: نێ تۆ باش دزانی كۆ خه‌ما زارۆكی یا به‌رده‌وام. ما تۆ نزانی كۆ گوهدارییا هه‌ر تشتێ ل ده‌وروبه‌رێن خۆ دكه‌ت!
باب: ئێ ڤێجا چ؟
ده‌یك: ڤێجا چ! پا ئه‌گه‌ر چوو و ئه‌ڤ چه‌نده‌ بۆ ده‌وروبه‌رێن خۆ گۆت؟ نێ تۆ باش دزانی كا ئه‌و چه‌ند ئاخفتنێن شێلوبێل دبێژنه‌ گه‌نجێن هیتله‌ری، ئه‌و وانا پالدده‌ن دا هه‌می تشتا بۆ بێژن، راستی ژی گه‌له‌ك یا سه‌یره‌ ئه‌و هۆسا ب نهێنی ب ده‌ركه‌ڤیت!
باب: ئه‌ڤه‌ چ ئاخفتنێن بێ رامانن!
ده‌یك: ته‌ های ژێ هه‌بوو ده‌ما ده‌ركه‌فتی!؟
باب: ده‌مه‌كێ خۆش ما و دفنا وی ب په‌نجه‌رێڤه‌ بوو.
ده‌یك: خوزی من زانی با وی چ ژ ئاخفتنێن مه‌ گوهلێ بوو.
باب: لێ ئه‌و دزانیت كا دێ چ شینوار مینه‌ ل سه‌ر وی ئه‌گه‌ر هات و وی فه‌سادییا خه‌لكی كر!
ده‌یك: ما دێ ژبیر كه‌ی ئه‌وا بنه‌مالا شمولكا بۆ مه‌ به‌حس ژێكری! بێ گومان كۆ هێشتا بابێ وی یێ ل له‌شكه‌رگه‌ها ده‌سته‌سه‌ركرنێدا. خوزی به‌س مه‌ زانیبا كا كه‌نگی ده‌ركه‌فتیه‌.
باب : تشتێ بێ بها و بێ مه‌به‌ست.
(ده‌یك ب له‌ز دژۆرێن دی دگه‌ریت و گازی دكه‌ته‌ كوڕی)
ده‌یك: ئه‌ز باوه‌رناكه‌م كۆ هێنری ژ مال ب ده‌ركه‌فتبیت بێكۆ په‌یڤه‌كێ بێژیت، چونكی ئه‌ڤه‌ نه‌ ره‌فتارێن وینه‌.
باب: به‌لكی قه‌ستا هه‌ڤاله‌كێ خۆ یێ قوتابخانێ كر بیت؟
ده‌یك: دڤی ده‌میدا، به‌لكی ل ده‌ف مومێرمان بیت، دێ په‌یوه‌ندیێ ب وان كه‌م.
(په‌یوه‌ندیێ ب تله‌فونێ دكه‌ت)
باب: نه‌ ئه‌ڤه‌ ب تنێ، ئه‌ز بێژم ئه‌ڤه‌ ژ ئاگه‌هدارییه‌كێ مه‌زنتره‌!
ده‌یك: (دگه‌ل ته‌له‌فونێ) ئه‌ز خانم فۆركا مه‌، هه‌ڤژینا مامۆستا فوركا. رۆژ باش، خانم مومرمان، ئه‌رێ هێنری ل ده‌ف هه‌وه‌یه‌؟ نه‌خێر؟ ـ ئه‌ز نزانم دێ ل كیڤه‌ بینم، خانم ئه‌رێ تۆ دزانی كا له‌شكه‌رگه‌ها گه‌نجان ئێك شه‌مبییا پشتی نیڤرۆ ده‌رگه‌هێن خۆ ڤه‌دكه‌ت یان نه‌؟ به‌لێ؟ گه‌له‌ك سوپاس ئه‌ز دێ پرسیاركه‌م.
( ته‌له‌فونێ دانیت، هه‌ر دوو دروینن و بۆ ده‌مه‌كێ بێده‌نگ دمینن)
باب: ئه‌وی گوهدارییا چ كر؟
ده‌یك: ته‌ ل سه‌ر رۆژنامێ ئاخفت، به‌لێ پا ته‌ به‌حسی مالا قه‌هوائی كر .. یا پێدڤی بوو ته‌ رێك نه‌دا با خۆ ڤێ ئاخفتنێ به‌رامبه‌ر وی بێژی، چونكی ئه‌و یێ نشتیمان په‌روه‌ره‌.
باب: من چ سه‌باره‌ت مالا قه‌هوائی گوتییه‌؟
ده‌یك: بینه‌ بیرا خۆ! ته‌ گۆت: نه‌ هه‌ر تشتێ دناڤدا یێ پاقژه‌.
باب : دشیانێن وی نینه‌ ڤێ چه‌ندێ وه‌ك هێرش شڕۆڤه‌ بكه‌ت، رستا “نه‌ هه‌ر تشتێ دناڤ دا یێ پاقژه‌” مه‌ره‌م پێ سڤككرن، واتایا وێ: “نه‌هه‌ر تشتێ دوێنه‌ی وێدا یێ پاقژه‌” چونكی ڤی شێوازی جوداهییه‌كا هه‌ی و ئه‌ڤ جوداهییه‌ گه‌له‌كا مه‌زن، ئه‌ڤ گۆتنه‌ ب تنێ تێبینیه‌كه‌ ل سه‌ر شێوازێ ئاخفتنێ، زێده‌تر ژ هندێ نینه‌، رامانا وێ یێ دروست ئه‌وه‌ كۆ: هه‌تا ل وێرێ، به‌لكی هنده‌ك تشت، ل هه‌می ده‌ما نه‌ دگونجایی بن و كاودانێ وان ژی هه‌ر وه‌سا، دگه‌ل وێ رێكا ئاشكه‌را یا كۆ سه‌ركێشی دڤێت. من دڤیا ب مه‌به‌ست ده‌بڕین ژ هزره‌كا نێزیك بكه‌م، ژبۆ ڤه‌كولینا، دهێته‌ بیرا من ده‌ما من ئه‌ڤ چه‌نده‌ گۆتی: ل وێرێ ژی نه‌ یا پێدڤییه‌ هه‌می تشت دپاقژبن و ب شێوه‌یه‌كێ دروست بن، بشێوه‌یه‌كێ دروست ئانكو ب رامانا سڤككرنێ ـ من گۆت نه‌یا پێدڤییه‌ بیت و من نه‌گۆتییه‌: نه‌، ئه‌و ب خۆ ئه‌ز نه‌شێم بێژم كۆ تشته‌ك هه‌یه‌ ل وێرێ نه‌یێ پاقژه‌، چونكی من چ به‌ڵگه‌ ل سه‌ر ڤێ چه‌ندێ نینن، لێ ل هه‌ر جهێ خه‌لك لێ بیت دێ كێماسی هه‌بن و من چ مه‌ره‌مێن دی نه‌بوون ژبلی ڤێ چه‌ندێ و من ئه‌ڤ چه‌نده‌ ب شێوازه‌كێ گه‌له‌ك خۆش گۆت، هه‌ر چه‌نده‌ سه‌ركێش ژ ره‌خنێن هۆسا ده‌ربازبوویه‌، لێب رێكه‌كا تۆندتر، ئه‌ڤ رێكه‌ ژی ناهێته‌ پیڤان.
ده‌یك: ئه‌ز تێناگه‌هم، مایا پێدڤیبوو تۆ ب ڤی شێوازی دگه‌ل من باخڤی؟
باب : من ژی حه‌ز دكر ئه‌ز پێدڤی ب ڤێ چه‌ندێ نه‌بم! به‌لێ پا ئه‌ز نه‌یێ ئارامم و یا پێشبینكرییه‌ كۆ دێ كه‌ڤییه‌ دپێشانگه‌ها دانوستاندنێدا، ئه‌ڤجا دێ به‌رسڤا گوهدارێن نێزیك و دویر ده‌ی، هه‌ر تشتێ ئه‌م دمالا خۆ دا بێژین دناڤبه‌را هه‌ر چوار دیوارێن مالا مه‌ دانوستاندنێن مه‌ یێن تایبه‌تن، ئه‌ز هیڤی دكه‌م تۆ باش ل من بگه‌هی .. ئه‌ز ته‌ ته‌وانبار ناكه‌م كۆ ئاخفتنا سه‌باره‌ت هه‌ڤژینێ خۆ ب شاشی به‌لاڤه‌ بكه‌ی و ژبلی ڤێ چه‌ندێ راستی ئه‌ز باوه‌رناكه‌م كۆ كوڕێ من ئاخفتنێن وه‌سا بێژیت كۆ زیانێ پێ بگه‌هنه‌ بابێ خۆ، به‌لێ پا ل ڤێرێ و ب مخابنیڤه‌ جوداهییه‌كا مه‌زن هه‌یه‌ دناڤبه‌را وی یێ دئێشیت و وی یێ وه‌سفا ئێشانێ دكه‌ت.
ده‌یك: یا باشتر ئه‌وه‌ ته‌ های ژ ئه‌زمانێ خۆ هه‌بیت، ئه‌ز وه‌ستیام هندی یا پێكۆلێن بیرئینانێ دكه‌م، كا تۆ ژی پیچه‌كێ هزرا خۆ بكه‌ .. كا ته‌ به‌ری مالا قه‌هوائی یان پشتی وێ، ئاماژه‌ ب هندێ دایه‌ كۆ مرۆڤی ئێدی ئه‌و هێزه‌ نه‌ما دئه‌لمانیا هێتله‌ریدا بژیت ئان نه‌!؟
باب: نه‌ نه‌ من ئه‌ڤ چه‌نده‌ نه‌گۆتییه‌!
ده‌یك: تۆ یێ وه‌سا ره‌فتارێ دگه‌ل من دكه‌ی هه‌ر وه‌كو ئه‌ز پۆلیسم! ئه‌گه‌ر ته‌ دیت ئه‌ز یا هزرێن خۆ دكه‌م بزانه‌ ژبۆ هندێیه‌ دا بزانم كا زارۆكی های ژ چ بوو.
باب: ئه‌ڤ هه‌ردوو په‌یڤێن “ئه‌لمانیا هێتله‌ری” ل سه‌ر ئه‌زمانێ من ناهێنه‌ گۆتن.
ده‌یك: و یا ته‌ سه‌باره‌ت زێره‌ڤانێ ئاڤاهیێ گۆتی و رۆژنامێن تژی دره‌وا و به‌ره‌ڤانییا نه‌رێنی. نه‌ هه‌ر تشتێ زارۆكی ل ڤێرێ گوهدارییا وی كری یێ ئه‌رێنییه‌! تشته‌ك ساخله‌م بۆ ده‌روونێ زارۆكی نینه‌، ئه‌ڤ چه‌نده‌ دێ بژاله‌بوونێ بۆ په‌یدا كه‌ت. ژبیرا سه‌ركێشی دچیت كۆ ئه‌ڤ زارۆك و گه‌نجێن هه‌ پاشه‌رۆژا ئه‌لمانیانه‌، كوڕێ مه‌ ژی یێ هۆسا نینه‌ ئه‌ز باوه‌رناكه‌م كۆ ئه‌و ب چ شێوه‌یان فه‌سسادیێ بكه‌ت. ئه‌ز بۆ ره‌وشا وی یا نها دئێشم.
باب: ئه‌و یێ ب كه‌رب و كینه‌!
ده‌یك: و دێ تۆلا خۆ ژ كی ڤه‌كه‌ت؟
باب: به‌س خودێ دزانیت، دێ هه‌ر ئه‌گه‌ره‌ك هه‌بیت .. دبیت چونكی من به‌قا وی یا كه‌سه‌ك ژێ ستاند بیت!؟
ده‌یك: حه‌فتیه‌ك ل سه‌ر ڤێ چه‌ندێ بۆریه‌!
باب: ئه‌و وه‌كی منه‌، تشتێن هۆسا ژبیرناكه‌ت!
ده‌یك: ته‌ بۆچی ژێ ستاند!
باب: چونكی وی مێش بۆ نه‌دئینان و پشتگوه هاڤێت بوو، چ نه‌بوو دا ژ برسادا مریت.
ده‌یك: یێ ده‌ست گرانه‌ بۆ كارێن هۆسا.
باب: به‌س وێ به‌قێ چ گونه‌ها خۆ نه‌بوو.
ده‌یك: به‌س وی ئاماژه‌ ب ڤی بابه‌تی نه‌دایه‌ و من ژی ده‌ه بفنك دانێ، هه‌ر تشتێ وی بڤێت یێ ل ده‌ف وی هه‌ی.
باب: راسته‌ ، مه‌ به‌رتیل دایێ.
ده‌یك: تۆ ئاماژه‌ ب چ دده‌ی؟
باب: ئه‌و دێ ئێكسه‌ر بێژن كۆ مه‌ ب به‌رتیلێ پیچكر دا كۆ ئه‌زمانێ خۆ پارێزیت.
ده‌یك : ب بوچوونا ته‌ دێ چ ل ته‌ كه‌ن؟
باب : هه‌می تشت! چونكی ئێدی سنۆر نه‌مان! خودایێ من، ل سه‌ر من یا پێدڤییه‌ ئه‌ز ماموستا ژی بم، ئه‌ز یێ رابویم ب په‌روه‌رده‌كرنا بچویكا! لێ ئه‌ڤ بچویكه‌ یێ ده‌رونی تژی ترس دكه‌ن!
ده‌یك : لێ وان چ گرتی ل ده‌ف ته‌ نه‌دیتینه‌؟
باب : وان ل دژی هه‌مییا تشته‌كێ هه‌یه‌، چونكی هه‌می كه‌س میناككرینه‌ و چونكی میناككرن یا هه‌ی ئه‌و هه‌می تشتێن من میناككرین.
ده‌یك : به‌لێ پا كوڕك نه‌ دیده‌ڤانه‌كێ باوه‌ر پێكرییه‌ ، چونكی نزانیت ته‌ڤایێ راستییا هه‌می تشتا بێژیت.
باب : ئه‌ڤه‌ نه‌ ئاخفتنه‌، ما ژ كه‌نگی وه‌ره‌ ئه‌و پێدڤی ب دیده‌ڤانانه‌؟
ده‌یك : ما دشیاندا نینه‌ ئه‌م رێككه‌ڤین كا مه‌ره‌ما ته‌ چ بوو ده‌مێ ته‌ تێبینیا خۆ دیاركری؟ مه‌ره‌ما من پێ ئه‌وه‌ كۆ ل وی ده‌می خه‌له‌ت ل ته‌ گه‌هشت.
باب : چ دشیانێن مندا یه‌ ئه‌ز بێژم؟ خۆ ئێدی من هێز نینه‌ ئه‌ز تشتی ل بیرا خۆ بینم. لێ ئه‌ڤ بارانا نه‌فره‌تی ئه‌گه‌رێ په‌یدا بوونا ڤان هه‌می تشتایه‌، چونكی ئه‌و وه‌دكه‌ت خوشییا مروڤی تێكبچیت، ل دویماهیێ ئه‌ز دویماهیك كه‌سم هزر دئاراسته‌كرنا ره‌خنێ دكه‌م بۆ وێ ده‌رچوونا روحیی یا كۆ ئه‌ڤرۆ هه‌ستێن ملله‌تێ ئه‌لمانی دهه‌ژینیت، به‌روڤاژی وێ یا من ل دویماهییا سالێن 1932 پێشبینی دكر.
ده‌یك : چارل. مه‌ ده‌م نینه‌ ئه‌م دانوستاندنێ ل سه‌ر ڤی تشتی بكه‌ین، چونكی یا پێدڤییه‌ ئه‌م ب شێوه‌یه‌كێ تایبه‌ت و دروست رێككه‌ڤین، و ب له‌ز! چونكی مه‌ ده‌م نینه‌ خۆ ئه‌م ئێك خوله‌ك ژی به‌رزه‌ بكه‌ین .
باب : من نه‌ڤێت ئه‌ز باوه‌ر بكه‌م كۆ تشته‌كێ هۆسا ژ هێنری دیار بیت.
ده‌یك : ل ده‌سپێكێ مالا قه‌هوائی و بێخێری.
باب : من ب ئێك جاری به‌حسی بێخێرییا نه‌كرییه‌.
ده‌یك : ته‌ گوت كۆ رۆژنامه‌ یا پره‌ ژ بێخێریا و تۆ دێ پشكدارییا خۆ ژ كارئێخی.
باب : رۆژنامه‌ به‌لێ! لێ نه‌ مالا قه‌هوائی !
ده‌یك : بۆ نموونه‌ ئه‌م دشێین بێژین كۆ ته‌ گوتییه‌ ، كۆ تۆ خه‌مگین بووی بۆ وێ بێخێرییا د دویڤچوونێن دێرێدا؟ ل دویڤ بۆچوونا ته‌، هنده‌ك مرۆڤ دوو روینه‌ و یێ دره‌وا ل به‌رامبه‌ر دادپه‌روه‌ریێ دكه‌ن و ب گۆتنێن خۆ یێن كرێت یێ بهایێ مالا قه‌هوائی كێم دكه‌ن، دبێژن كۆ هه‌ر تشتێ دناڤدا یێ پاقژ نینه‌؟ ته‌ دڤیا بێژییه‌ زارۆكی كۆ ئه‌و نه‌ رۆژنامێ و نه‌ ژی رادیۆیێ بكاربینیت! چونكی ل دویڤ بوچوونا ته‌ ل سه‌ر نازیێ ئه‌لمانی پێدڤییه‌ ئه‌و چاڤێن خۆ ڤه‌كه‌ت و ببینیت كا چ ل ده‌وروبه‌رێن وی دهێته‌ رویدان!
باب : ئه‌ڤه‌ هه‌می یا بێ مفایه‌ .
ده‌یك : چارل هشیاربی نه‌ كه‌ڤی و نه‌هێیه‌ روخاندن ! یێ بهێز به‌، وه‌ك كۆ سه‌ركێش دبێژیت …
باب : لێ ئه‌ز نه‌شێم، سه‌راره‌ی ڤێ هه‌میێ دره‌وا ل به‌رامبه‌ر دادگه‌هێ بكه‌م، هزرا خۆ بكه‌، ئه‌وێ ژ خوینا من ل دادگه‌هێ ل دژی من راوه‌ستاییه‌.
ده‌یك : ب ڤی شێوه‌ی به‌رێ خۆ نه‌دێ.
باب : تێكه‌لییا مه‌ دگه‌ل بنه‌مالا “كلێمچ” كه‌فتنه‌كا مه‌زنه‌.
ده‌یك : هه‌ر چه‌نده‌ چ زیان ب”كلێمچ”ی نه‌كه‌فتینه‌.
باب : راسته‌ لێ ئه‌و هێش یێ د دویڤچوونێدا.
ده‌یك : باشه‌ ئه‌گه‌ر هات و ئه‌وێن د دویڤچوونێدا هه‌مییا خۆ راده‌ستكرن و بێ هیڤی بوون؟
باب : تۆ بێژی زێره‌ڤانێ ئاڤاهیێ تشته‌ك ژمه‌ هه‌لگرتبیت؟
ده‌یك : مه‌ره‌ما ته‌ پێ ل ده‌مێ دویڤچوونا؟ ل ده‌سپێكێ سندۆقه‌كا جگارا ب هه‌لكه‌فتا رۆژبوونا خۆ وه‌رگرت، ب هه‌لكه‌فتا سالا نووی هنده‌ك دیاریێن شاها وه‌رگرت.
باب : بنه‌مالا “گوف” ژی ئڤێن ل ده‌ف مه‌ ئاگنجی پازده‌ مارك دانێ.
ده‌یك : ژبیر نه‌كه‌ كۆ ل 32 هێشتا وان “فوفیست” دخواند و د مه‌ها خزیرانا 33 وانان هێش هنده‌ك ئالێن ڕه‌ش و سۆر و سپی بۆ جوانیێ بلند دكرن.
(زه‌نگا ته‌له‌فۆنێ دهێته‌ لێدان)
باب : ته‌له‌فۆنه‌!
ده‌یك : به‌رسڤێ بده‌م؟
باب : ئه‌ز نزانم.
ده‌یك : ئه‌ڤه‌ دێ كی بیت؟
باب : چاڤه‌رێ به‌، ئه‌گه‌ر زه‌نگ دووباره‌ لێدا ، به‌رسڤێ بده‌ .
( چاڤه‌رێ دبن، زه‌نگ لێناده‌ت)
باب : ئه‌ڤه‌ نه‌ ژیانه‌.
ده‌یك : چارل!
باب : ئه‌ڤ زارۆكێ من بووی ئه‌ڤه‌یه‌! ل وێراهه‌ روینت، ل سه‌ر مێزا خوارنێ ده‌مێ ئافكا خۆ دخۆت گوهدارییا هه‌می تشتا دكه‌ت، هه‌ر ده‌ما ئه‌م پشتا خۆ بده‌ینێ هه‌میێ تۆمار دكه‌ت!
ده‌یك : ئه‌ز رازی نابم تۆ ب ڤی شێوه‌ی به‌حسی وی بكه‌ی! (ده‌مه‌كێ كورت) ئه‌رێ تۆ بێژی ئه‌م خۆ ئاماده‌ بكه‌ین و ب شێوه‌یه‌كێ ژی خۆ به‌رهه‌ڤ بكه‌ین؟
باب : تۆ دبێژی دگه‌ل وی ب زڤڕن؟
ده‌یك : سه‌راره‌ی هه‌می تشتا، دبیت بهێن!
باب : ئه‌ز وه‌سا دبینم كۆ یا پێدڤییه‌ خاچا ئاسنی ب هلاویسم؟
ده‌یك : چارل ئه‌ڤه‌ یا پێدڤییه‌!
(خاچێ دئینیت و ب دوو ده‌ستێن له‌رزی دكه‌ته‌ به‌ر خۆ)
ده‌یك : و ل قوتابخانێ وان چ ل سه‌ر ته‌ نینه‌؟
باب : ئه‌ز دێ چه‌وا زانم؟ ئه‌ز یێ به‌رهه‌ڤم هه‌ر چ تشتێ وان بڤێت دێ نیشا ده‌م، لێ نزانم كا وانا چ دڤێت؟ خوزی من زانیبا! ئه‌ز چ ژ وێ رێكێ دزانم یا “بسمارك” پێشكێش دكه‌ت؟ ده‌مه‌كێ مه‌زن دده‌ركرنا ڤان په‌رتووكێن هه‌ ده‌ر دكه‌ن! ده‌ه ماركێن زێده‌ بده‌ خزمه‌تكارێ، بۆ ده‌مێن درێژ ل پشت ڤان دیوارا گوهدارییا مه‌ دكه‌ت.
ده‌یك : (سه‌رێ خۆ د هه‌ژینیت ب رامانا رازی بوونێ) وێنێ هیتله‌ری ـ دێ یا باش بیت ئه‌گه‌ر ئه‌م وێنێ وی ل سه‌ر نڤیسینگه‌هێ ب هه‌لاویسن؟ ئه‌ڤه‌ دێ وێنێ مه‌ ل به‌ر چاڤێن وان سپی كه‌ت.
باب : ئه‌رێ، دێ وه‌بكه‌ زوی (ده‌یك وێنه‌یی دهه‌لاویسیت) پا ئه‌گه‌ر زارۆكی گۆت كۆ مه‌ ب ئه‌گه‌ر ئه‌ڤ چه‌نده‌ گۆهارتییه‌؟ دێ هزره‌كا دی ژمه‌ كه‌ن.
(ده‌یك وێنه‌یی دزڤڕینته‌ جهێ وێ)
باب : كی ده‌رگه‌ه ڤه‌كر؟
ده‌یك : چ ده‌نگ نه‌هاتنه‌ گوهێن من!
باب : به‌لێ.
ده‌یك : چارل!
(ده‌یك زه‌لامی هه‌مبێز دكه‌ت)
باب : بۆ من تویركه‌كێ ژ جل و به‌رگێن ناڤخۆی ئاماده‌ بكه‌.
(ده‌نگێ ڤه‌كرنا ده‌رگه‌هی دهێت، ده‌یك و باب ب مه‌نده‌هۆشی رادوه‌ستن، زارۆك ب ژۆر دكه‌ڤیت و كیسكه‌كێ بچوویك ب ده‌ستێن خۆ هلگرتینه‌. ده‌مه‌ك دبۆریت)
كوڕ : هه‌وه‌ خێره‌؟
ده‌یك : تۆ ل كیڤه‌ بووی؟
(زارۆك كیسكێ بچوویك یێ شریناهییا نیشا وان دده‌ت)
ده‌یك : ته‌ ب تنێ شریناهی كرین؟
كوڕ : ما دێ چ كه‌م؟ به‌لێ، من ب تنێ وه‌كر.
(دگه‌ل خوارنا شریناهییا دچیته‌ لایێ دی یێ ژۆرێ، ده‌یك و بابێن وی ل دویڤ وی چاڤێن وان ژ وی نارابن)
باب : ئه‌رێ تۆ دبێژی كۆ ئه‌و یێ راستیێ دبێژیت؟
(ده‌یك هه‌ردوو ملێن خۆ دلڤینیت)
دویماهیك

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *