نڤیسین: دلێر کەمال

نامەیەک ژ بۆ سەرنڤیسەر و دەستەیا نڤیسەران ڕۆژنامە، گۆڤار و مالپەران

ـ خواندەڤان ژ ڕاستنڤیسا مە پەروەردە و فێردبیت، لەوڕا پێدڤییە ئاگەهدارییا مە ژ دارژتنا پیت و پەیڤان هەبیت.

ب درێژاهییا پرۆسێسا خواندن و دویڤچوونا مە ژ بۆ (زمان و ئاستێن زمانى)، وەها ئاشکەرابوویە کو چ زمانێن دونیایێ نینن، کو ئاریشە و ئاستەنگێن خوە د ئاستێن جودا یێن زمانیدا نەبن. هەلبەت ئەڤ چەندە ژى ژ زمانەکێ بۆ ئێکى دى جودایە، هێدى هێدى و ل گۆرەى سروشتێ زمانى و بکارهینان و جھگرتنێ، هندەک ژ ئاریشەیان چارەسەر و هندەکێن دیتر ژى هەلاویستى دمینن.
مەبەستا سەرەکییا ئەڤێ نامە و کورتەنڤیسینێ ئەڤەیە، کو ئەم وەک ڕۆناهییا ڕۆژێ دبینن، کريارا نڤیسینێ چ ل سەر تۆرێن جڤاکى یان ژى ل سەر مالپەر و ڕووپەلێن ڕۆژنامە و گۆڤاران بەر ب دیاردەبوونێڤە دچیت، باشى یان خرابییێن ئەڤێ دیاردەیێ بابەتەکێ دیترە. لێ بەلێ یا ئەز دخوازم ببێژم ئەڤ چەند گۆتنێن ل خوارێ دارژتینە:
داخوازێ ژ سەرنڤیسەر و دەستەیا نڤیسەران ل (مالپەر، ڕۆژنامە، گۆڤار، دەستگەهـ، پەرتووکخانە، …هتد) دکەم، کو ب هەستێ بەرپرسیاریێ و ب ئەمانەت سەرەدەریێ ل گەل زمانێ کوردى بکەن، ژبەرکو د دەمێ نوکەدا بەرەلایى و فەوزا د كريارا نڤیسینێدا ب زەڵالى دهێتەدیتن. لەوڕا ل جهێ خزمەت و نیشاندانا قەلەم و نفشەکێ نوى، هوینێن ڕێزدار زیانێن مەزن و دژوار ب زمانێ کوردى د هەمى ئاستێن زمانیدا دگەهینن. ژبەر ئەڤێ چەندێ هەر چ نەبیت بیاڤێ (ڕاستنڤیسین، فۆرمێن پەیڤان و چاوانییا دارژتنێ) بپارێزن. بۆ نموونە هوین دکارن شێوەرمەندیێ ب کەسێن (بسپۆر، ئەکادیمى و شارەزا) د بیاڤێ زمانیدا بکەن و هەولا دانانا ڕێبەرەکێ ژ بۆ ڕاستنڤیسا سازییا خوە بدەن، ب ئەڤێ چەندێ هوینێن بەڕێز دێ خزمەتا خوە ب باشى و ڕێکخستى پێشکێش بکەن.
پاشان د قۆناغێن لدویڤدا و ب ڕێککەڤتن ل گەل هەمى سازیێن نڤیسین و چاپ و بەڵاڤکرنێ، هوین دشێن ڕاستنڤیسەک ئێکگرتى بۆ خوە ب هەلبژێرن و بەردەوامییێ ب خەباتا خوە بدەن. ب ئەڤێ چەندێ زمانێ کوردى دێ دویرى زەڕەر و زیانێ بیت و ژ ئاریشەیا دارژتن و فۆرمێن جوداجودا یێن نڤیسینێ ڕزگاربیت.

9 تیرمەها 2020

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *