نڤیسین: دیان جەمیل

مەژى کرە هەوار: بۆ من حەبکەکا ژانکوژ “مسکن ڤێ سەرئێشانێ ئەز کوشتم.
ئاشکى بەرسڤا وی دا: هێژایێ من، هیڤی دکەم ڤی کارى نەکە، چونکى ئەڤ حەبکە من گەلەک بێزار دکەن.
مەژى: ئەى بیژنا پڕبێژ، تە دڤێت ئەز خۆ ل بەر ڤێ ئێشانێ هەمیێ بگرم بەس دا تو بێزار نەبی!

گولچیسکێ مایێ خوە د سحبەتێ کر و گوت: ئاشک یێ مافدارە.
مەژى: ئەڤە ژ کەنگی وەرە دەزگەهێ ئاڤ و سولینان ژى بوویە خودان بوچوون!!!
گولچیسکێ ب تۆرەبوون ڤە گوت: باشە حەبکەکا ژانکوژ بخۆ و هەڕە بۆ خۆ ل دەزگەهەکێ دى بگەڕە کو ژەهرێن خوینێ و میزێ بهاڤێژیتە ژ دەرڤەى لەشى، چونکى ئەڤ حەبکە چوار دەمژمێران کارێ من دڕاوەستینن و هێدی هێدی من تووشى نەخوشیا “ژکارکەفتنا گولچیسکان” دکەن.

مێلاکا پیر ل دویڤ دەنگێ وان هات و گوت: قێژقێژا خۆ بڕاوەستینن. تو ئەى گولچیسک، نابیت تو قەت کارێ خۆ بڕاوەستینی، چونکى ژەهرێن ژ ئاشکى دهێن بارێ من گەلەک گران دکەن و توژى خەمێن خۆ نەهاڤێژە سەر پاتکا من. نەفرەت ل سەر خودانێ ڤی لەشى بن یێ کو نزانیت خوارنا خۆ ڕێکبێخیت.

مەژى دوبارە هاتە دناڤ سحبەتێ دا: هیڤی دکەم دلوڤانیێ ب من ببەن. من ب تنێ ژانکوژەک دڤێت، چونکى ئەڤە سپێدێ وەرە ئەز کار دکەم و گەلەک یێ واستیای مە.

دل نەشیا زێدەتر خۆ بێدەنگ بکەت و گوت: ئەڤە ژ ئافراندنا ڤی لەشێ بێخیرەت وەرە ئەز یێ خۆ دقوتم بێ کو گازندەکێ بکەم. هیڤییە بەس تەماشەى درامایێن بێ ڕامان بکەى و قەهرێن خۆ بۆ مە بێژى. نوکە من کومبوونەک یا دگەل ڤەڕێژا پەریزادێ “غدة الدرقية” هەى، لێ هوین من تۆڕە بکەن ئەز ئێدی خوینی پاڵنادەم و پاشى کا دێ کى ئوکسجینی گەهینتە هەوە.

ڤەڕێژا پەریزادێ: ئەو کیە دلێ من تۆڕە دکەت؟
پەنکریاس ژى هاتە دناڤ بابەتى دا و پرسیار کر: ئەرێ ئەڤ گەنگەشا هەوە پەیوەندی ب شەکرێ ڤە هەیە؟
ڤەڕێژا پەریزادێ: نەخێر، تو هەڕە بۆ خۆ بنڤە، من شەکر و زیندەچالاکی یێن لەشى یێن کونترۆلکرین.

مەژى: ئەى هەوار. هەر ئێکی بەس ئاگەهـ ژ بەرژەوەندیا خۆ هەیە. باشە ئەز دێ کارەبێ “پۆتاسیومی” ژ زەڤلەکێن لەشى بڕم، چونکى ئەز ژى دێ چم بۆ خۆ نڤم و من چ چارەسەریێن دی نەمان.

هەردوو سیهان گوت: باشە خوشتڤیێ من هەڕە بۆ خۆ بنڤە، لێ سەروچاڤێن خۆ وەکو هەرجار نەنخاڤە، چونکى ئەز پێدڤێ ب ئوکسجینێ پاقژم و دەمێ تو سەروچاڤێن خۆ ب تەمامى دنخێڤێ، ئوکسجین تێرا من ناگەهیت.

مەژى بەردەوامى دا ئاخفتنا خۆ: دێ لەشى ژ کارکرنێ ڕاوەستینم و فەرمانێ ب نڤستنێ کەم. هەروەسا دێ رۆناهیا بێئاگەهیێ ژى هێلمە هل ئەگەر ئێک ژ هەوە پێدڤی ب تشتەکی بوو.

پشتى دەمژمێرەکێ ژ نڤستنێ، پیستى مەژى هشیار کر و گوت: پلا گەرماتیا من بلند بوو، هیڤی دکەم ئێرکوندشنێ “ڕێکخستنا پلا گەرماتیێ” بدە شولى.

مەژى ب تۆڕەیی ڤە گوت: هەما بەس تو یێ ژ من کێمبووی،، دێ هەڕە بنڤە و خوريانێ بڕاوەستینە.
…………………………………………………

تیبینی:
دەرمان ژ ماددەیێن کیمیای هاتینە دروستکرن و کا مفایێ وان چەندە، زیانێن وان کێمتر نینن، لەورا پێکولێ بکە هندی ژ تە بهێت خوارنا دەرمانان کێم بکە و لەشێ خۆ بپارێزە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *