كورته شانۆگه‌رییا (دزیكه‌رێ په‌رتووكێن پیرۆز)
نڤیسین: هشام شبر
وه‌رگێران: سه‌رحان ئه‌حمه‌د سه‌رحان
كه‌سایه‌تی:
تویژه‌ر
گونه‌هبار
نۆژدار
(ل نیڤێ مێزه‌ك و دوو كورسی هه‌نه، رۆناهیی ل سه‌ر وانایه، گونه‌هبار و تویژه‌ر ل سه‌ر كورسیكا دروینشتینه)
تویژه‌ر: ل دویماهیێ تۆ كه‌فتیه دده‌ستێ عداله‌تێدا.
گونه‌هبار: پیرۆزه، ئه‌ڤی ده‌ستكه‌فتی سه‌هما باژێرێ لێ زڤڕاندی.
تویژه‌ر: ئه‌ڤ شێوازێ تۆ پێ دئاخڤی دبه‌رژه‌وه‌ندییا ته‌دا نینه.
گونه‌هبار: من تێرا خۆ تشت ژده‌ست دان، ل خه‌ما ژده‌ستدانه‌كا دی نینم.
تویژه‌ر: های ژ خۆ هه‌به و ترانا نه‌كه.
گونه‌هبار: ئه‌ز ژ گه‌فێن ته ناترسم، تۆ تێگه‌هشتی!
تویژه‌ر: ده‌نگێ خۆ ل من بلند نه‌كه.
گونه‌هبار: من دڤێت بزڤڕمه زیندانا خۆ.
تویژه‌ر: دێ زڤڕی، لێ ل ده‌ستپێكێ پێدڤییه تۆ به‌رسڤا پرسیارێن من بده‌ی.
(تویژه‌ر فایلا ل به‌ر سنگێ خۆ ڤه‌دكه‌ت ل دویڤدا ده‌ست ب خواندنێ دكه‌ت، پاش ئاخفتنا خۆ ئاراسته‌ی گونه‌هباری دكه‌ت)
تویژه‌ر: تۆ بۆچی ل دره‌نگی شه‌ڤێ ل دۆر په‌رستگه‌ها دزڤڕی؟
گونه‌هبار: من دڤیا بچمه ده‌ستنڤێژێ.
تویژه‌ر: نه‌ده‌مێ نڤێژا بوو.
گونه‌هبار: دزییا پێدڤییه ب نڤێژا نینه.
تویژه‌ر: ته دڤێت تۆ چ ژ په‌رسنگه‌ها بدزیی؟ ما تۆ نزانی كۆ تشتێن په‌رستگه‌ها ژبۆ په‌رستێنه؟
گونه‌هبار: په‌رتووكێن پیرۆز.
تویژه‌ر: ئه‌و په‌رتووكه یێن هاتینه چێكرن دا ئه‌م كریارێن راست ژێ بزانین.
گونه‌هبار: من ژی ژبه‌ر هندێ دزیی.
تویژه‌ر: ئه‌رێ ئه‌ڤه ئێكه‌م تاوانه تۆ دكه‌ی؟
گونه‌هبار: نه‌خێر، من په‌رتووكێن پیرۆز ژ مالا ژی دزینه.
تویژه‌ر: ب تنێ په‌رتووكێن پیرۆز؟
گونه‌هبار: ب تنێ په‌رتووكێن پیرۆز!
تویژه‌ر: تشتێ سه‌یر ئه‌وه مه چ سكاله یان گازنده نه‌وه‌رگرتینه.
گونه‌هبار: چونكی كه‌س ناخوینیت.
تویژه‌ر: ته ئێشه‌كا ده‌روونی هه‌یه؟
گونه‌هبار: نه‌خێر.
تویژه‌ر: ته دڤێت تۆلێن خۆ ڤه‌كه‌ی؟
گونه‌هبار: نه‌خێر.
تویژه‌ر: ته‌دڤێت تۆ ترانا بكه‌ی؟
گونه‌هبار: نه‌خێر.
تویژه‌ر: ئێ پا تۆ بۆچی ڤێ ره‌فتارا كرێت ئه‌نجام دده‌ی؟
گونه‌هبار: هه‌ژاریی خۆلیسه‌رییه هێژایێ من.
تویژه‌ر: من پرسیارا ته كر.
گونه‌هبار: من ژی به‌رسڤا گه‌له‌ك تشتا گۆته ته.
تویژه‌ر: ئه‌ز بێژم تۆ ژی ژ پارته‌كا دی.
گونه‌هبار: ئه‌ز ژخۆ مه، ما ئه‌ڤ چه‌نده دبیته پارت؟
تویژه‌ر: ئه‌رێ ته دڤێت سیسته‌مێ ده‌ستهه‌لاتداریێ نه‌هێلی؟
گونه‌هبار: سیسته‌مه‌ك یارییا ب من بكه‌ت، ئه‌ز دێ چه‌وا شێم نه‌هێلم یان بگوهۆڕن؟
تویژه‌ر: ما باوه‌رییا ته ب ده‌ستهه‌لاتێ ناهێت؟
گونه‌هبار: نه‌خێر.
تویژه‌ر: بۆچی؟
گونه‌هبار: چونكی ئه‌و دزانیت ئه‌وێ چ كرییه و دێ چ كه‌ت.
تویژه‌ر: ئه‌ڤێ چه‌ندێ په‌یوه‌ندی ب تاوانێ نینه، ته ئه‌ڤ تاوانه ئه‌نجام داییه.
گونه‌هبار: لێ وانا په‌یوه‌ندی ب وان تاوانا هه‌یه یێن دلێ من ره‌قكریی.
تویژه‌ر: تۆ به‌حسی چ تاون دكه‌ی؟
گونه‌هبار: ئه‌و تاوانێن ده‌نگ نه‌ڤه‌ده‌ن.
تویژه‌ر: ما تاوان هه‌نه ده‌نگ نه‌ڤه‌ده‌ن؟
گونه‌هبار: ئه‌وێن ل دژی كه‌سه‌كێ نه‌دیار.
تویژه‌ر: دشیانێن ته بوو تۆ ئاشكه‌را بكه‌ی.
گونه‌هبار: من هێزا ده‌ستهه‌لاتێ نینه.
تویژه‌ر: تۆ دزیێن خۆ دخوینی؟
گونه‌هبار: نه‌خێر.
تویژه‌ر: دێ بۆچی په‌رتووكه‌كێ دزیی و ته نه‌خواندییه؟
گونه‌هبار: دا ئه‌و كه‌س نه‌مینن، یێن خۆ ل پشت وێ دڤه‌شێرن، ده‌ستهه‌لاتێ ب ناڤێ وان دكه‌ن، حه‌لالی و حه‌رامیێ ل دویڤ زه‌وقێ خۆ ب ناڤێ وان دكه‌ن، دا تشتێ دبه‌رژه‌وه‌ندییا خۆ ب ناڤێ وان بكه‌ن.
تویژه‌ر: تۆ دزانی كۆ تۆ یێ هنده‌كا گونه‌هبار دكه‌ی بێ به‌لگه!
گونه‌هبار: به‌لگه! ئه‌و گورستانێن تژی، ئه‌و زكێن برسی، ئه‌و روحێن تژی ترس، ئه‌وێن دناڤ قه‌سرا دا دژین و ئه‌ێن دناڤ كێماسییا دا دژین، ئه‌ڤه باشترین به‌لگه‌نه.
تویژه‌ر: ئه‌و په‌رتووك دیرۆكن!
گونه‌هبار: دیرۆكه‌كا مومیاكرییه.
تویژه‌ر: چه‌وا؟
گونه‌هبار: وێ دبن یا بكێر وانا بهێت، یا دی ژی ل دویڤ حه‌ز و به‌رژه‌وه‌ندیێن خۆ شڕۆڤه دكه‌ن.
(نۆژدار ب ژۆر دكه‌ڤیت)
نۆژدار: ئه‌ڤی خێره قێژییا ڤه‌دده‌ت.
تویژه‌ر: من دڤێت دانپێدانێ ب گونه‌هێن خۆ بكه‌ت.
گونه‌هبار: ئه‌ز گونه‌هبارم! ب تنێ من دڤیا ئه‌ز وی تشتی نه‌هێلم یێ خه‌له‌تیێن خۆ پێ دڤه‌شێرن.
نۆژدار: ئارام بن، ئارام بن.
تویژه‌ر: تۆكی و كی ده‌رفه‌ت دایه تۆ تویژاندنێ ببری؟
نۆژدار: ئارامبه و هه‌ره سه‌ر ته‌ختێ خۆ دا ده‌رمانی وه‌ربگری.
تویژه‌ر: ئه‌ز نه نساخم، ئه‌ز نه نساخم.
گونه‌هبار: من ژ ده‌ستپێكێ دزانی تۆ یێ نساخی.
نۆژدار: تۆ ژی وه‌ره سه‌ر ته‌ختێ خۆ، نوكه ده‌مێ خه‌وێیه.
( مۆزیكه‌ك دگه‌ل چوونا وان بۆ سه‌ر ته‌ختا)
دویماهی.