شانۆگه‌رییا: خودانا په‌نجێن موخمه‌ڵی.
نڤیسین: بییر فیراری
وه‌رگێران: سه‌رحان ئه‌حمه‌د سه‌رحان
كه‌سایه‌تی:
زه‌لام
هه‌ڤژین
خزمه‌تكار
زه‌لامێ بیانی
گه‌نج
خانم
دیمه‌ن:
ماله‌كا جوان، زه‌لام دگه‌ل هه‌ڤژینا خۆ ب ژۆر دكه‌ڤن، یێ ژ هه‌یڤا هنگڤینی زڤڕین، خزمه‌تكار دكه‌ڤیته به‌ر سنگێ وان.
خزمه‌تكار: هیڤیا من ئه‌وه هه‌وه ده‌مێن خۆش بۆراندبن.
زه‌لام: بێگومان.
خزمه‌تكار: ئه‌رێ، مانێ هه‌یڤا هنگڤینییه!
هه‌ڤژین: هه‌ره هاریكارییا شۆفێری بكه، وان چه‌نتا بینه خوار.
خزمه‌تكار: نوكه دێ ڤێ چه‌ندێ كه‌م خانما من .. من ژۆرا پێشوازییا ب گۆل و ریحانا خه‌ملاندییه، و من شیڤه‌كا گه‌له‌ك خۆش ئاماده‌كرییه و شیشه‌كا شه‌مپانییایێ دگه‌له .. ئاه، هه‌یڤا هنگڤینی چه‌ندا خۆشه.
هه‌ڤژین: هه‌ره و به‌س باخڤه.
زه‌لام: كا بێژه من، چ چێنه‌بوویه دنه‌ئاماده‌بوونا مه؟
خزمه‌تكار: به‌لێ، رۆژانه دوو زه‌لام و ژنه‌ك دهاتن و پرسیارا ته دكرن.
زه‌لام: رۆژانه؟
خزمه‌تكار: ئه‌رێ و دگۆتن كۆ كارێ وان یێ فه‌ره، بێگومان دێ ئه‌ڤرۆ هێنه‌ڤه.
هه‌ڤژین: باشه، باشه، هه‌ره خوار، چونكی شۆفێر ل به‌ندا ته‌یه. (خزمه‌تكار ده‌ردكه‌ڤیت) كا بێژه من، تۆ دبێژی ئه‌ڤا چ ژ ته ڤێت؟
زه‌لام: گاڤه‌كا دی ئه‌م دێ هه‌می تشتا زانین، مه نوكه شۆله ژێ نینه .. ئاه خۆشتڤییا من، چه‌ند خۆشه مرۆڤ بزڤڕیته ژیانا خۆ یا جوان. خوزی تۆ ب زانی چه‌ند كه‌یفا من هاتیه چونكی من هه‌ڤژینی دگه‌ل ته گرێدا، تایبه‌ت ده‌ما دهێته بیرا من كۆ زه‌لامه‌كێ ئاسای و بازرگانه‌كێ بچویكێ وه‌كی من شیایه هه‌ڤژینیێ دگه‌ل رۆژنامه‌ڤانه‌كا ب ناڤوده‌نگا وه‌كی ته پێكبینیت، خودانا ره‌خنا ترانه‌كه‌ر، یا به‌رنیاس ب خودانا په‌نجێن موخمه‌ڵی.
هه‌ڤژین: تۆ من ل شه‌رمێ دده‌ی.
زه‌لام: رۆژنامه‌ڤانا زیره‌ك، یا كۆ ب گۆتارێن خۆ یێن جڤاكی و هونه‌ری پاریس هه‌می هه‌ژاندی.
هه‌ڤژین: ئاه زێده‌نه‌كه.
زه‌لام: تۆ بخودێ، ما هه‌لبژارتنا مه بۆ بۆراندنا هه‌یڤا هنگڤینی ل باژێرێ ڤێنێس یێ سه‌ركه‌فتی نه‌بوو؟
هه‌ڤژین: بێگومان، ده‌رفه‌ته‌كا مه‌زن بوو، مه بینه‌رییا فیسته‌ڤالا سالانه‌یا فیلما ل وێرێ كر، من هنده‌ك گۆتار یێن نڤیسین، باوه‌رم دێ كه‌یفا ته پێ هێت.
هه‌ڤژین: وه‌دیاره، ته دڤێت تۆ هێرشێ ل ئیتالییا بكه‌ی، پشتی كۆ ته هێرشا خۆ یا فه‌ره‌نسا ب دویماهی ئینای.
خزمه‌تكار: (ب ژۆر دكه‌ڤیت) به‌رێزێ من، كه‌سه‌ك ل به‌ر ده‌رگه‌هی هه‌یه، دڤێت ته ببینیت.
هه‌ڤژین: ئه‌و ئێك ژوان هه‌ر دوو زه‌لامایه؟
خزمه‌تكار: به‌لێ.
هه‌ڤژین: بلا ب هێته ژۆر.
زه‌لامێ بیانی: ( ب ژۆر دكه‌ڤیت) ئه‌رێ تۆ به‌رێز پینوویی؟
زه‌لام: به‌لێ.
زه‌لامێ بیانی: ئه‌رێ ته هه‌ڤژینی دگه‌ل خودانا په‌نجێن موخمه‌ڵی پێكئینا؟
زه‌لام: به‌لێ.
هه‌ڤژین: ئه‌زم خودانا په‌نجێن موخمه‌ڵی.
زه‌لامێ بیانی: ئه‌ز ڤێ چه‌ندێ باش دزانم ….
زه‌لام: ته چ دڤێت به‌رێز؟ ئه‌رێ تۆ خودانێ رۆژنامه‌كێی؟
زه‌لامێ بیانی: نه‌خێر، ئه‌ز شانۆنڤیسم، خودانا په‌نجێن موخمه‌ڵی گۆتاره‌ك ل سه‌ر من نڤیسا بوو و تێدا ب خرابی به‌حسا په‌یوه‌ندییا دناڤبه‌را من و ئه‌ڤیندارا من كربوو، ئه‌ڤ چه‌نده بۆ ئه‌گه‌رێ به‌ردانا هه‌ڤژینا من.
هه‌ڤژین: ئه‌گه‌ر هۆسا بیت، پێدڤییه تۆ سوپاسییا من بكه‌ی.
زه‌لامێ بیانی: خانم، گۆتارا ته ئه‌ز كرمه دره‌وشه‌كا بێ سه‌روبه‌ر دا، من نه دشیا ئه‌ز تشته‌كێ دگه‌ل ژنه‌كێ بكه‌م، ئێكسه‌ر دا بمه جهێ ترانه‌پێكرنێ. به‌لێ پا، خوزی تۆ ب زانی چه‌ند كه‌یفا من ب هه‌ڤژینیا هه‌وه هات، نوكه كه‌سه‌ك هه‌یه به‌رپرسیاره‌تییا كریارێن ته بكه‌ت .. كریارێن بۆری!
زه‌لام: به‌لێ پا …
زه‌لامێ بیانی: و ئه‌گه‌ر ته ڤیا ئه‌م زورانبازیێ بكه‌ین، باش بزانه كۆ ئه‌ز ناهێلم چ هه‌لكه‌فت ل سه‌ر ته ده‌رباز ببن ئه‌گه‌ر ته ب ره‌وشت نه‌ئێخم، من تۆ گرتی نوكه دێ كیڤه چی .. ئه‌ز قاره‌مانه‌كێ بوكسینگێمه، دێ ل به‌ندا ته بم، تۆ و خودانا په‌نجێن موخمه‌ڵی، ل گۆره‌پانا شه‌ری! (ده‌ردكه‌ڤیت)
هه‌ڤژین: ئوی خۆشتڤێ من، تۆ یێ نه‌چاری زورانبازیێ بكه‌ی ژبۆ من؟!
زه‌لام: به‌لێ
هه‌ڤژین: تۆ ناترسی؟
زه‌لام: نه‌خێر، لێ ئه‌ڤ چه‌نده گه‌له‌ك یا مه‌ترسیداره!
(ده‌نگێ قه‌ره‌بالغه‌كێ ژ ده‌رڤه‌ی ژۆرێ دهێت، پشتی چه‌نده‌كێ ده‌رگه‌ه ب تۆندی دهێته ڤه‌كرن، گه‌نجه‌ك دنیڤا ژیێ خۆدا ب ژۆر دكه‌یڤت)
گه‌نج: ئه‌ڤه تۆی خودانا په‌نجێن موخمه‌ڵی؟ تۆ زڤڕی؟!
هه‌ڤژین: به‌لێ به‌رێز (به‌ره‌ف هه‌ڤژینێ خۆڤه دچیت و دگوهێ ویدا دبێژتێ) ئه‌ڤه ئه‌كته‌رێ ب ناڤوده‌نگ ژان جوزێ سیرسویه.
گه‌نج: (های ژ ده‌نگێ وێ دبیت) به‌لێ، به‌لێ ئه‌وه. ته نڤیسیبوو كۆ ئه‌ز یێ لاواز و بێشیانم و ئه‌ز نه‌شێم به‌رسڤا چ زێده‌گاڤییا بده‌م و ته گۆتبوو كۆ ئه‌ز بكێر رولێ هرقلی ناهێم!
هه‌ڤژین: به‌لێ پا …
گه‌نج: ل وی ده‌می، من نه‌دشیا ته ب ره‌وشت بێخم چونكی تۆ ژنی، لێ نوكه ته هه‌ڤژینه‌ك هه‌یه به‌رپرساره‌تییا ته بكه‌ت!
زه‌لام: ئه‌ز هه‌ڤژینێ وێمه، سنورێن خۆ بزانه و بێرێزیێ به‌رامبه‌ر وێ نه‌كه‌ی (گه‌نج خۆ دهاڤێژته زه‌لامی و تێر كولم و پێهنا لێدده‌ت)
گه‌نج: (ده‌مێ ده‌ردكه‌ڤیت) ئه‌ز یێ لاوازم و بكێر چ ناهێم و نه‌شێم به‌رسڤا زێده‌گاڤییا بده‌م، مانه؟!
زه‌لام: ئه‌ڤه چ دڕه‌نده‌یه.
هه‌ڤژین: تۆ ئێشاندی.
زه‌لام: (دنالیت ژ ئێشانێ) ئه‌ز هه‌ست پێدكه‌م كۆ دێ چاڤێن من ژ ئێشانێ ژ جهێ خۆ ده‌ركه‌ڤن، هه‌ست پێ دكه‌م كۆ دێ مه‌عیدێ من پرت پرت بیت، دترسم هنده‌كێن دی بهێن.
هه‌ڤژین: ئه‌ز دێ برینێن ته پێچم خۆشتڤیێ من.
خزمه‌تكار: (ب ژۆر دكه‌ڤیت) خانمه‌ك ل به‌ر ده‌رگه‌هی هه‌یه، دخوازیت هه‌وه ببینیت.
زه‌لام: تۆ یا پشتراستی كۆ ژنه؟
خزمه‌تكار: یا ژ منڤه ژنه، چونكی فیستان ل به‌ره.
زه‌لام: (دلێ وی ئارام دبیت) بلا ب هێته ژۆر.
(خانمه‌ك پێنجی سال ب ژۆر دكه‌ڤیت، گه‌له‌ك مه‌كیاج ل سه‌روچاڤێن خۆ دایه)
هه‌ڤژین: ئه‌ڤه لوكریس دورگییایه!
خانم: ئه‌ڤه ئه‌و بخۆیه، ئه‌ی خودانا په‌نجێن موخمه‌ڵی. ته به‌حسی من نڤیسا بوو، ته گۆتبوو كۆ چ حه‌زێن سكسی ل سه‌ر من نه‌ماینه، ته گۆتبوو كۆ ئه‌ز گول بووم و نوكه چرمسیم، ته گۆتبوو كۆ پێدڤییه ئه‌ز رولێن كچێن ئاشق نه‌گێرم، چونكی ئه‌ز نه‌شێم چاڤێن زه‌لاما بكێشمه خۆ. نوكه تۆ یا ب هه‌ڤژینی، ته هه‌ڤژینه‌ك هه‌یه به‌رپرسیاره‌تییا ته بكه‌ت …
زه‌لام: تۆ داخوازا زورانبازیێ ژ من ناكه‌ی، مانه؟
خانم: نه‌خێر!
زه‌لام: تۆ من ناقوتی ژی؟
خانم: نه‌خێر، نه‌ترسه. (ده‌مانجه‌كێ ژ چانتا خۆ دئینته ده‌ر و به‌رێ وێ دده‌ته زه‌لامی).
زه‌لام: ب راوه‌سته، ب راوه‌سته.
خانم: نه‌ترسه، نه‌ترسه .. ئه‌ز چ گوللا ل ته ناده‌م (ئاماژه ب ده‌رگه‌هی دده‌ت) ئه‌ڤه ژۆرا ته یا نڤستنێیه؟
هه‌ڤژین: به‌لێ، به‌لێ.
خانم: دێ دا بچین، هه‌ره ژۆر و جلكێن خۆ بێخه و ل سه‌ر ته‌ختی پالده هه‌تا ئه‌ز دهێم!
زه‌لام: به‌لێ پا …
خانم: گوهدارییا من بكه یان دێ ده‌مانجێ بكارئینم. (دبێژته خودانا په‌نجێن موخمه‌ڵی) دێ بینی كا زه‌لام حه‌ز ژ من دكه‌ن یان نه! دێ هه‌ڤژینێ ته بێژته ته كا یا چه‌وامه، ئه‌ی خودانا په‌نجێن موخمه‌ڵی!
(زه‌لام دچیته دژۆرا نڤستنێدا، خانم ل دویڤ وی دچیت و به‌رێ ده‌مانجێ دده‌ته وی)
په‌رده.
شانۆگەرییا (خودانا پەنجێن موخمەڵی)
