كورته‌ شانۆگه‌رییا (ئێشه‌ك كوژه‌ك)

نڤیسین:
سه‌رحان ئه‌حمه‌د سه‌رحان

كه‌سایه‌تی:
1. ئالفرێد
2. بیر
3. ماكس
4. گه‌رسون
5. سترانبێژ

(ڕۆیدان د مه‌یخانه‌كێنه‌، ل ڕاستا بلند ستێجه‌ك بچویك هاتیه‌ دانان، ل سه‌ر سترانبێژه‌ك هه‌یه‌، گیاتاره‌ك یا د ده‌ستێ ویدا، ل لایێ دی ل نیڤا چه‌پێ مێزه‌ك هاتیه‌ دانان، سێ كه‌سایه‌تی ل سه‌ر وێ مێزێ د ڕۆینشتینه‌، ئالفرێد و بیر و ماكسن .. هه‌رسێ خه‌مگین دیار دكه‌ن)
(سترانبێژ د ستریت، لێ هێدی هێدی ئه‌و ژی بێزار دبیت و ڕادوه‌ستیت)
بیر: هه‌وه‌ زانی، دبێژن كۆ ئه‌و ئێشا كوژه‌ك یا ل باژێری هه‌میێ به‌لاڤه‌بووی!
ئالفرێد: ئه‌رێ و دبێژن كۆ ئه‌ڤێ ئێشێ ژ هه‌مییا گرت.
ماكس: ده‌یكا لویزی ژی تووشی ڤێ ئێشێبوو، ئه‌ز د ئەوێ باوه‌ریێدا مه‌، كۆ دێ ئه‌ڤ جاره‌ به‌دی سه‌ركه‌ڤیت …
ئالفرێد: یا گرنگ ئه‌وه‌ كۆ ئه‌م تووش نه‌بین مه‌ های ژ خۆ هه‌بیت …
(دڤێ ساتێدا گه‌رسون ب ژۆر دكه‌ڤیت و سێنیكه‌كا مه‌ی یا د ده‌ستێ ویدا)
گه‌رسون: (شاد) هاتم گه‌لی هه‌ڤالا، من بۆ هه‌وه‌ تشته‌كێ جیاواز هینایه‌.
ماكس: ژه‌هربا دا باشتر بیت، هه‌ر چ نه‌بیت دا مه‌ ژ ئەوێ ئێشا كوژه‌ك دویركه‌ت و مه‌ به‌ره‌ف ئه‌سمانێ ساهیڤه‌ به‌ت.
گه‌رسون: به‌ری چه‌نده‌كێ ده‌نگوباس بۆ من هاتن، یێ دبێژن كۆ ئه‌ڤ ئێشه‌ یا نێزیك دبیت و خه‌لك ژی پیچ پیچه‌ یێ د ڕه‌ڤیت، ئه‌ز باوه‌رم دێ ئه‌ڤه‌ ڕۆینشتنا هه‌وه‌ یا دویماهیێ بیت.
ئالفرێد: خه‌ما مه‌یا ژ هه‌میێ مه‌زنتر ژی ئه‌وه‌، ترسم ئه‌م ژی تووش ببین.
بیر: ئه‌م ژ هندێ بهێزترین.
ماكس: (په‌رداغا خۆ بلند دكه‌ت) ب پێكڤه‌بوونا مه‌ (هه‌می پێكڤه‌ گلاسێ بلند دكه‌ن و ڤه‌دخوون)
گه‌رسون: دێ ب ستره‌ سترانبێژێ باژێری، بۆ مه‌ قركه‌ سترانه‌كێ …
(سترانبێژ سترانه‌كا خه‌مگین دستریت، گه‌رسون ب سه‌ما ده‌ردكه‌ڤیت… پشتی چه‌ند ساته‌كا ژ سترینێ)
سترانبێژ: ئێدی خۆ په‌یڤ ژی ژ گه‌ورییا من ده‌رناكه‌ڤن.
ئالفرێد: ئه‌ڤه‌ هه‌می ژ ئه‌گه‌رێ نه‌گوهدانا مه‌یا بۆ خودێ.
بیر: كا هشبه‌، هه‌ر هینن ئه‌گه‌رێ ڤان ئێشا، هه‌وه‌ وه‌كر خودێ مه‌ خه‌فس بكه‌ت.
ئالفرێد: ئه‌م! هینن… ئه‌و هینن، كا ل دیرۆكێ بزڤڕه‌، دا بزانی!
بیر: دیرۆكێ د ئەڤی كاودانی دا چ مفایێ خۆ نینه‌.
ئالفرێد: چونكه‌ چ ده‌ستكه‌فتا نا دانته‌ به‌ر ده‌ستێن هه‌وه‌.
بیر: وه‌دیاره‌ كۆ ته‌ ژبیركر كۆ ئه‌و جهێ هین دكه‌نه‌ ئه‌ردێ خۆ، مه‌ ئه‌و ڕێك دا هه‌وه‌!
ئالفرێد: ئه‌زمانێ خۆ درێژ نه‌كه‌، وه‌نه‌كه‌ ئه‌ز وێ بكه‌م یا نه‌ ب دلێ ته‌.
ماكس: (تۆره‌) به‌سه‌! هه‌وه‌ هاژ خۆ هه‌یه‌؟ ئه‌م یێ ژ ڤێ ئێشێ د ڕه‌ڤین ژنوی هین دێ مه‌ تووش كه‌نێ؟ شه‌رم ژ خۆ بكه‌ین شه‌رم ژ ڤێ ئاخا پیرۆز بكه‌ن (بۆ سترانبێژی) ب ستره‌ و سه‌قایێ مه‌ بگوهۆڕه‌.
(سترانبێژ دستریت)
(ژ نیشكه‌كێڤه‌ گه‌رسوون ب ژۆر دكه‌ڤیت و بێهنا وی یا ته‌نگه‌ بووی، ئێكسه‌ر موزیك ژه‌ن دراوه‌ستیت)
گه‌رسوون: (دكه‌ته‌ هه‌وار) دویماهیك ده‌نگوباس، دویماهیك ده‌نگوباس… مه‌زنتر ئێش ل جیهانێ یا نێزیك دبیت، ب ڕه‌ڤا خۆرا بگه‌هن ب ڕه‌ڤا خۆرا بگه‌هن چ نه‌مایه‌ ئه‌م هه‌می دێ ژناڤچین ئێدی مرۆڤ نامینن!
بیر: كی یێ باژێری تووش بوویه‌؟
گه‌رسوون: هه‌می، هه‌می یێن تووش بووین چ نه‌مایه‌ ئه‌م دێ مرین كه‌س نامینیت ئه‌م هه‌می دێ مرین! (دگه‌ل ڤان دیالۆكا ده‌ردكه‌ڤیت).
ماكس: من دزانی كۆ ئه‌م هه‌می دێ تووش بین و ژناڤچین.
سترانبێژ: دبێژن كۆ چ ڤه‌كۆله‌ر و زانایا نه‌شیا ڤێ ئێشا كوژه‌ك چاره‌ بكه‌ن.
ئالفرێد: باشه‌ ئه‌گه‌ر ئه‌ڤ ئێشه‌ به‌ربه‌لاڤبوو، دێ خوارنه‌ك هه‌بیت ئه‌م بخوین؟
بیر: خه‌ما ڤی ژی ب چ ناچیت.
ئالفرێد: تۆ بێژی مرۆڤ مرۆڤا بخون؟
ماكس: بێ گومان، نه‌شه‌رته‌ هه‌تا ل ڕۆحێن ئێك بگه‌رن و وان ژی نێچیر بكه‌ن.
ئالفرێد: سوزێ ب ده‌نه‌ من كۆ هین من نه‌خون!
بیر: (وی دترسینیت) ئه‌زێ برسیمه‌… دلێ من یێ دچیته‌ گوشتێ ته‌… كا وه‌ره‌ خۆ نێزیك بكه‌. (الفرێد د ڕه‌ڤیت)
ماكس: ئه‌ز هیڤی ژ هه‌وه‌ دكه‌م به‌سه‌، ده‌راڤێ مه‌ یێ به‌رته‌نگه‌ پێدڤییه‌ ئه‌م چاره‌سه‌ریه‌كێ ببینن نه‌ یاری و تڕانا بكه‌ین!
سترانبێژ: من قه‌ت باوه‌ر نه‌دكر ڕۆژه‌كێ بگه‌هیته‌ ڤی ئاستی.
ماكس: ژیان گه‌له‌ك یا تۆنده‌، دلۆڤانیێ ب كه‌سێ نابه‌ت!
بیر: ما مه‌ دلۆڤانی پێ بر دا ئه‌و ب مه‌ ببه‌ت؟
ئالفرێد: خوزی ئه‌م هه‌می زاڕۆك باین، نه‌ مه‌ های ژ نه‌ژادپه‌رێسیێ هه‌با و نه‌ ژی ئول و ئاینان، وه‌ك فریشتان باین.
سترانبێژ: ده‌مه‌كێ ئه‌م هه‌می د پاکژ بووین، لێ وانا ئه‌و هزرێن پیس د كرنە دناڤ سه‌رێ مه‌دا.
بیر: ئه‌ها ئه‌ڤه‌یه‌ تاوانا مه‌زن!
ماكس: خرابترین ئێشا ڤه‌گر ئه‌ڤه‌یه‌، ده‌ما ئاین و ئول و هوز و نفش مه‌ ژ مرۆڤایه‌تییا مه‌ دویر بكه‌ن، پێدڤییه‌ ئه‌م بهێزتر بین و زاڕۆكێن خۆ فێربكه‌ین كۆ گرنگترین تشت ل ڤێرێ مرۆڤایه‌تی و پێكڤه‌ ژیانه‌!
(سترانبێژ سترانه‌كا خه‌مگین دستریت)
(ژ نیشكه‌كێڤه‌ گه‌رسوون ب ژۆر دكه‌ڤیت)
گه‌رسوون: (رۆژنامه‌ك یا ده‌ستاندا و به‌ڵاڤه‌ دكه‌ت) دویماهیك ده‌نگوباس دویماهیك ده‌نگوباس.
(بیر رۆژنامه‌كێ دبه‌ت و دخوینیت .. مه‌نده‌هۆش دمینیت، ماكس ژ ده‌ستێ وی دئینیته‌ ده‌ر و دخوینیت هه‌مان تشت، ئه‌ڤجا ئالفرێد دهێت و دبه‌ت دبێژیت)
ئالفرێد: ئه‌ز نزانم بخوینم، بۆچی وێنه‌ ل سه‌ر نینن؟
بیر: مرۆڤ تێنه‌گه‌هشتن!
ماكس: كۆ ژیان پێكڤه‌ یا خۆشه‌!
بیر: بێهنا وان نه‌هات هه‌تا مرۆڤایه‌تی نه‌هێلاین!
ماكس: ئه‌م كرین دڕنده‌!
(بیر دچیت رۆژنامێ دانته‌ سه‌ر مێزێ و رۆژنامێ ل سه‌ر دسۆژیت… هێدی هێدی ڕۆناهی كێم دبیت هه‌تا نه‌مینیت و ب تنێ ڕۆناهییا سوتنا ڕۆژنامێ دمینیت و دگه‌ل نه‌مانا ئاگرێ وێ شانۆ ب دویماهی دهێت)

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *