نڤێسین: مصدق توڤى
وه‌ك ئه‌م هه‌مى دزانين ئه‌لفبێتكا كوردى ب لاتينى يان تيپێن لاتينى يێن كوردى به‌رهه‌مى هزر و گه‌ريانا مير جه‌لاده‌ت به‌درخانى يه، يه‌كه‌م جار ل 15 گولانا 1932ێ ب به‌لاڤكرنا كۆڤارا (HAWAR)يا شامێ ده‌ست ب به‌لاڤكرنا ڤان تيپان و دانه‌نياسينا وان كريه. برايێ وى يێ بچووكتر مير كاميران به‌درخان ژى رۆله‌ك گرنگ د به‌لاڤكرنا ڤان پيتاندا ل سه‌رانسه‌رى كوردستانێ گێرايه.
مير كاميران به‌درخان ى ل سالا 1938په‌رتووكه‌ك ب ناڤێ (ELFEBEYA KURDÎ) چاپكرييه و ل دووڤ ئاستێ زارۆكان بۆ فێربوونا ڤان تيپان ئه‌ڤ ئه‌لفبێتكه به‌رهه‌ڤكريه و ل چاپخانه‌يه‌كا شامێ (ديمه‌شقێ) چاپكريه.
ل ده‌سپێكا سالێن هه‌فتييان تنێ خه‌مێ من گه‌ريان بوو ل دووڤ چاپكريێن كوردى ب تايبه‌ت يێن كرمانجى كو ل جه‌م مه ژ هژمارا تبلێن ده‌ستان نه‌دبۆرين، رۆژه‌كێ ل سلێمانيێ ل جه‌م په‌رتووكفروشه‌كێ سه‌رجاده‌يان ژ نشكه‌كێڤه په‌رتووكا (ELFEBEYA KURDÎ) به‌رچاڤين من كه‌تين، ده‌مێ من راكرى به‌رێ خوه دده‌مێ ئه‌ڤ چاپا دووێ يا ڤێ په‌رتووكێ يه و سالا 1968 ژ ئاليێ ئه‌نجوومه‌نا زانيارى يا پارتييا ديموكراتا كورد- سوريێ هاتييه‌چاپكرن، من پرسيارا بهايێ په‌رتووكێ ژ په‌رتووكفروشى كر گۆته من په‌نجا فلس ئانكو ده‌رهه‌مه‌كێ وى سه‌رده‌مى، بله‌ز من ده‌رهه‌مێ وى دايێ و دووركه‌تم نه‌كو په‌شيمان بيته‌ڤه، هه‌رچه‌نده ئه‌ز دزانم وى ژى نه دزانى ئه‌و چيه. ب كورتى (ELFEBEYA KURDÎ) ما پاراستى ل ناڤ په‌رتووكخانه‌يا من، هه‌تا سالا 2005ێ مه به‌رهه‌ڤى دكرن بۆ گێرانا دووه‌مين ڤێستيڤالا به‌درخان ل دهۆكێ و ئه‌ز ئه‌ندامێ ليژا بلندا ڤێستيڤالێ بووم، من پێشنياز كر ب ڤێ هه‌لكه‌فتێ ڤێ په‌رتووكێ چاپكه‌ينه‌ڤه، ئه‌و بوو چاپا سێ يا (ELFEBEYA KURDÎ)يا مير كاميران به‌درخان ل دهۆكێ هاته‌چاپكرن و د رۆژێن ڤيستيڤالێدا 21 – 23/4/2005ێ هاته‌به‌لاڤكرن.