نڤێسین: جیهاد مستەفا
سەردەمێ پاش کۆرۆنایێ (خەلەکا دویێ)
ڤان نڤیسەران دیتنا خۆ ل سەر پاشەرۆژێ هەیە، هەر سێ نڤیسەر ل گۆهرینێ دگەرن؛ چۆمسکی هیڤی هەنە کو رۆژەکێ گوهرین چێبن. بەلێ ژیژەک وێڤەتر دچیت و نە تنێ باوەری هەیە دێ گۆهرین چێبن، بەلکو پێشبینیێ دکەت دێ گۆهرین چێبن. بەلێ کلاین رەوشێ شروڤەدکەت و بریارێ بۆ خەلکی دهێلیت، ژبەر کو ب دیتنا وێ دو رێك ل بەر سینگێ مە هەنە و دڤێت خەلك بریارێ بدەت کا دێ بەرەڤ کیڤە چین؟
چۆمسکی تەکەزێ ل سەر گۆهرینێ دکەت، هەرچەندە چ بەدیلان پێشکێش ناکەت لێ ئەو دبینیت کو ئەڤە دەمەکێ گرنگ و هەستیارە، و دڤێت دوبارە هزر د کەم و کورتیێن ڤی سیستەمی دا بهێتەکرن، ب تایبەت سیستەمێ ئابووری. ئەو بەرێ گۆتنا خۆ ددەتە رەوشەنبیران و گازی وان دکەت دا خۆ رێك بێخن و وان ئاگەهـ ژ دەنگێ ئێكودو هەبیت، ژبەر کو د ڤی سەردەمی دا، کەسێ ئاگەهـ ژ کەسێ نەمایە، سۆشیال میدیایێ خەلك یێ ژ ئێك دویرکری، جڤاک یێ پرت و بەلاڤ دبیت.
ژیژەك ژ چۆمسکی وێڤەتر دچیت، وی نە تنێ گۆهرین دڤێت، بەلکو پێشبینی دکەت دێ گوهرین ریدەن، ژبەر کو ب دیتنا وی دڤێت خەلک تێبگەهیت کو ئێدی نابیت جیهان ب ڤی تەرزی برێڤە بچیت، بەلکی دڤێت گۆهرینێن ریشەیی بهێنەکرن. بەلێ پرسیار ئەوە: ئەڤ گۆهرینە دێ چ بن و دێ د چاوا بن؟ ژیژەك دبێژیت: ”ئەم دێ چاوا شەرێ ڤی ڤایرۆسی کەین؟ هەلبەت خۆ ڤەدەرکرن و کەرەنتینکرن ب تنێ فایدە ناکەت، بەلکو دڤێت هەماهەنگی و هەڤکاریەك دناڤبەرا دەولەتان دا هەبیت، هەڤکارییەکا جیهانی وەک ئەڤا مە د بەرێ دا دگوتێ کۆمۆنیزم/ شیۆعیەت بەلێ نە ب تەرزێ کەڤن، بەلکو ب تەرزەکێ نوی”.
كلاینێ وەک ژیژەکی هیڤی نینن کو دوبارە شیۆعیەت ڤەگەریت، ئەو ژ گۆشەیەکا دی ل بابەتێ دنێریت، ئەو دبینیت کو قەیران دەلیڤەکە بۆ گۆهرینێ، مومکنە ئەو گۆهرین د بەرژەوەندییا خەلکی دا بیت، ئەگەر خەلکی گڤاشتن ل سەر دەستهەلاتێ کرن، ئەو بیرا مە ب وان گۆهرینان دئینیت یێن پشتی قەیرانا 1929ێ چێبووین، هینگێ بەهرا پتر ژ گۆهرینان د بەرژەوەندییا خەلکی دابوون. ئەو دبێژیت: “ئەڤە دەلیڤەیە، یان دێ دەستهەلات ب تنێ کەرتێ تایبەت پارێزیت، دێ موچەیان بریت، دێ گۆهرینان ب سەر سیستەمێ گەرەنتییا جڤاکی و ساخلەمیێ دا ئینن، یان ژی هێدی هێدی دێ دەستان ژ وێ پێشەسازیێ بەردەین، ئەڤا کو ژیان و ژینگەهێ پیس دکەت و دەست ب پیشەسازیەکا پاقژ کەین دا کو ل چەرخێ بهێت مرۆڤ ب سلامەتی بژیت”.
ل دوماهییێ، گەشبینم کو خواندەڤان ب ژیرمەندییا خۆ تێگەهشت بن کو خالا هەڤپشك دناڤبەرا هەر سێ دیتنان دا رەخنە بوو ل سیستەمێ سیاسی و ئابۆری یێ جیهانێ. ژبەر کو هەر سێ نڤیسەر ب شێوەکی ژ شێوەیان د چەپەرێ دژی سەرمایەداریێ دا شەری دکەن. رەنگە ئەڤ گۆتن ل رۆژەکێ ژ رۆژان جهێ خۆ بگرن و ببن دیفاکتۆ/ واقع، رەنگە ژی ئەڤە ب تنێ کۆمەکا هیڤی و مرادان بن د دلێ هندەك نڤیسەران دا کو
خەونێ ب جیهانەکا دادوەرانەتر دبینن.