شانۆگەرییا ئاشۆپ

شانۆگه‌رییا: ئاشۆپ
نڤیسین: فێدریكو غارسیا لوركا
وه‌رگێران: سه‌رحان ئه‌حمه‌د سه‌رحان

كه‌سایه‌تی:
ئێنریكی
هه‌ڤژین
ڕیه سپی
زاڕۆكه‌كا كچ
ژماره‌كا ده‌نگ

ئێنریكی: ب خاترا هه‌وه‌.
شه‌ش: ده‌نگ: (ژ ژۆر) بخێربچی.
ئێنریكی: ئه‌ز دێ بۆ ده‌مه‌كێ درێژ ل چیای بم.
ده‌نگه‌ك: من سڤۆره‌ك دڤێت.
ئێنریكی: به‌لێ، دێ سڤۆره‌كێ بۆ ته‌ ئینم و دێ پێنج چویچكێن وه‌سا ژی ئینم كۆ چ زاڕۆكا به‌ری هینگێ نه‌بن.
ده‌نگه‌ك: من چه‌پچه‌پیسكه‌ك دڤێت.
ده‌نگه‌ك: من ژی خولده‌ك دڤێت.
ئێنریكی: هین گه‌له‌ك د جیاوازن گه‌لی زاڕۆكا، لێ ئه‌ز دێ هه‌می داخوازیێن هه‌وه‌ بجه ئینم.
ڕیه سپی: گه‌له‌ك جیاوازن.
ئێنریكی: ته‌ چ گۆت؟
ڕیه سپی: بلا ئه‌ز ل شینا ته‌ چه‌نتا ب هەلگرم؟
ئێنریكی: نه‌خێر.
(ده‌نگێ كه‌نیا زاڕۆكا دهێت)
ڕیه سپی: ئه‌رێ ئه‌و زارۆكێن ته‌نه‌؟
ئێنریكی: به‌لێ .. هه‌ر شه‌ش یێت منن.
ڕیه سپی: ژمێژه‌ بۆ ده‌مێ من ده‌یكا وان نیاسی، مه‌ره‌ما من هه‌ڤژینا ته‌. من وه‌ك عه‌ره‌بانچی د مالا وێدا كاردكر .. لێ ب ڕاستی، نوكه‌، ره‌وشا من باشتریا لێ هاتی، چونكی ئه‌ز بۆ مه‌ خازخازۆك. (دكه‌نیت) خوزی تۆ بزانی كا ئه‌ز چه‌ند ژ هه‌سپا د ترسم. ڕۆناهییه‌كا ب ترس ژ چاڤێن ڤان هه‌سپا دهێت. چه‌ند یا ب زه‌حمه‌ته‌، هاژۆتنا عه‌ره‌بانێ گه‌له‌ك یا ب زه‌حمه‌ته‌! ئاه، گه‌له‌ك و گه‌له‌ك یا ب زه‌حمه‌ته‌. ئه‌گه‌ر تۆ ژێ ب ترسی تۆ به‌رێ خۆ ناده‌یێ و ئه‌گه‌ر ته‌ به‌رێ خۆ دایێ تۆ ناترسی .. هه‌سپ د نه‌فره‌تكرینه‌.
ئێنریكی: (چه‌نته‌ یێن هلگریتن) من بهێله‌.
ڕیه سپی: نه‌ .. نه‌ .. ب تنێ ب چه‌ند پارچێن كێمێن پاره‌ی ئه‌ز دێ ل شینا ته‌ هلگرم، هه‌ڤژینا ته‌ دێ یا مه‌منون بیت .. ئه‌و ژ هاژۆتنا هه‌سپا ناترسیت. ئه‌و یا كه‌یف خۆشه‌.
ئێنریكی: دێ زوی پێدڤییه‌ ئه‌ز ل شه‌مه‌نده‌فرا ده‌مژمێر شه‌ش سوارببم.
ڕیه سپی: ئاه، شه‌مه‌نده‌فر گه‌مژاتییه‌، ئه‌گه‌ر سه‌د سالا بژیم ئه‌ز هه‌ر ژ شه‌مه‌نده‌فرێ ناترسم، چونكی نه‌بوونه‌وه‌ره‌كێ ساخه‌ .. دهێت و دچیت .. لێ هه‌سپ …
هه‌ڤژین: (ژ په‌نجه‌رێ) ئێنریكی خۆشتڤیێ من، نامێن به‌رده‌وام فرێكه‌، من ژبیر نه‌كه‌.
ڕیه سپی: ئاه، كچێ (دكه‌نیت) بیرا ته‌ دهێت چه‌وا خۆ ل سه‌ر دیوارا دهاڤێت و داچیته‌ سه‌ر دارا به‌س دا ته‌ ببینیت.
هه‌ڤژین: دێ هه‌ر ل هزرا من بی هه‌تا ئه‌ز دمرم.
ئێنریكی: تۆ ژی.
هه‌ڤژین: ئه‌ز دێ ل به‌ندا ته‌بم .. بخێربچی.
ئێنریكی: بخاترا ته‌.
ڕیه سپی: ب خه‌م نه‌كه‌ڤه‌، ئه‌و هه‌ڤژینا ته‌یه‌ و حه‌ز ژته‌ دكه‌ت و تۆ ژی حه‌ز ژێ دكه‌ی، ب خه‌م نه‌كه‌ڤه‌.
ئێنریكی: ڕاسته‌، لێ ئه‌ڤ دویربوونه‌ من خه‌مگین دكه‌ت.
ڕیه سپی: یا ژ وێ خراپتر ژی هه‌یه‌، یا خراپتر ئه‌وه‌ مرۆڤ بچیت و روویبار ده‌نگڤه‌دانا وی ب هلگریت، یێ خراپتر ئه‌وه‌ یێ وێ باهۆزا مه‌زن چێدكه‌ت.
ئێنریكی: من گێولێ یارییا نینه‌.
ڕیه سپی: ها .. ها .. ها .. د جیهانێ هه‌میێدا تۆ ئێكه‌م كه‌سی، وه‌سا هزر دكه‌ی كۆ تشتێ گرنگ ل ده‌ڤ باهۆزا ڕۆخاندنه‌، ئه‌و ڕۆخاندنا ژ ئه‌نجامێ وێ په‌یدا بیت، لێ ئه‌ز به‌روڤاژی ته‌ هزر دكه‌م، یا گرنگ ل ده‌ڤ باهۆزێ ئه‌وه‌ …
ئێنریكی: (تۆره‌) دێ، ته‌ هند دیت بۆ ده‌مژمێر شه‌ش.
ڕیه سپی: ئه‌گه‌ر هۆسا بیت، ئه‌ز ده‌ریامه‌، د ده‌ریایدا.
ئێنریكی: (ئاریای) من گۆت دێ.
ڕیه سپی: ته‌ چ ژبیر نه‌كرییه‌؟
ئێنریكی: من هه‌می تشت ب شێوه‌یه‌كێ گه‌له‌ك باش یێت ڕێكخستین، به‌س كا بێژه‌ من ته‌ شۆله‌ ژێیه‌؟ نه‌خۆشترین تشت د ئەڤێ جیهانێدا پیره‌مێره‌كێ خازخازۆك و مایتێكه‌ره‌.
ده‌نگێ 1: باب.
ده‌نگێ 2: باب.
ده‌نگێ 3: باب.
ده‌نگێ 4: باب.
ده‌نگێ 5: باب.
ده‌نگێ 6: باب.
ڕیه سپی: زاڕۆكێن ته‌؟
ئێنریكی: زاڕۆكێن منن.
زاڕۆك: (ل به‌ر ده‌رگه‌هی) من سڤۆره‌ نه‌ڤێت .. ئه‌گه‌ر ته‌ بۆ من سڤۆره‌ ئینات ئه‌ز حه‌ز ژته‌ ناكه‌م .. بۆ من سڤۆرێ نه‌ئینه‌، من نه‌ڤێت.
ده‌نگ: من ژی چه‌پچه‌پیسك نه‌ڤێت.
ده‌نگ: من خولد دڤێت.
زاڕۆك: ته‌ دڤێت تۆ كانا دگه‌ل خۆ بۆ مه‌ بینی.
ده‌نگ: نه‌، من خولد نه‌ڤێت.
ده‌نگ: نه‌، خولد بۆ منه‌.
(لێكدكه‌ڤن)
زارۆك: (ده‌ما دچیته‌ ژۆر) ئێپا، نوكه‌ دێ خولد بۆ من بیت.
ئێنریكی: به‌سه‌! بمینن وه‌كی خۆ، كه‌یف خۆش.
ڕیه سپی: گه‌له‌ك جیاوازن.
ئێنریكی: به‌لێ، هین گه‌له‌ك دجیاوازن و هین گه‌له‌ك ب شه‌نسن ژبۆ ڤێ چه‌ندێ.
ڕیه سپی: چه‌وا؟
ئێنریكی: (ب هێز) گه‌له‌ك ب شه‌نسن!
ریه سپی: (ب خه‌م) گه‌له‌ك ب شه‌نسن!
(ده‌ردكه‌ڤن)
هه‌ڤژین: (ل به‌ر چه‌نجه‌رێ) بخێربچی.
ده‌نگ: بخێربچی.
هه‌ڤژین: كه‌یف خۆش بزڤڕه‌.
ده‌نگ: (ژ دویر) زوی.
هه‌ڤژین: دێ خۆ گه‌له‌ك باش نخێفیت، چوار به‌ته‌نی دگه‌ل خۆ برن، ئه‌ز ژی دێ ب تنێ بم ل سه‌ر ته‌ختی. دێ هه‌ست ب سه‌رمایێ كه‌م. وی دوو چاڤێن گه‌له‌ك جوان هه‌نه‌ .. چه‌ند حه‌ز ژ هێزا وی دكه‌م، گه‌له‌ك یێ بهێزه‌ (ده‌ست ب خۆ رویسكرنێ دكه‌ت، رویس دبیت) پشتا من پیچه‌ك یا دئێشیت. ئاه، خوزی ئه‌ز بشێم كه‌ربێن خۆ ژێ ڤه‌كه‌م، من دڤێت ئه‌و ژی كه‌ربێن خۆ ژمن ڤه‌كه‌ت و حه‌ز ژمن بكه‌ت .. من دڤێت ب ڕه‌ڤم و ئه‌و ژی دویڤ من بكه‌ڤیت، من دڤێت ئه‌و من ب سۆژیت، من ب سۆژیت. (ده‌نگێ خۆ بلند دكه‌ت) بخاترا ته‌ ئێنریكی .. بخاترا ته‌ ئێنریكی .. ئه‌ز حه‌ز ژته‌ دكه‌م، ئه‌ز ته‌ وه‌كی بچویكه‌كێ دبینم و تۆ یێ غارده‌ی. خۆ ژ به‌ره‌كێ بۆ به‌ره‌كێ دی دهاڤێژی .. نوكه‌ ژی ئه‌ز دشێم ته‌ بداعویرم هه‌ر وه‌كو تۆ قولپكه‌كی .. ئه‌ز دشێم ته‌ ب داعویرم .. ئێنریكی.
زارۆك: دادێ.
هه‌ڤژین: نه‌ ده‌ركه‌ڤه‌، بایه‌كێ سار یێ دهێت .. من گۆت نه‌.
(ب ژۆر دكه‌ڤیت. ڕۆناهی نامینته‌ ل سه‌ر ده‌پێ شانۆیێ)
زاڕۆك: (ب له‌ز) بابو .. بابو .. من دڤێت تۆ بۆ من سڤۆره‌كێ بینی، من كان نه‌ڤێت، كان نینوكێن من دشكێنن .. بابو .. بابو ..
زاڕۆك: ( ل به‌ر ده‌رگه‌هی) م .. ن .. ه .. ا .. ی .. ژ .. ت .. ه‌ .. ن .. ی .. ن .. ه‌.
زارۆك: بابو، من سڤۆره‌ك دڤێت (ده‌ست ب گریێ دكه‌ت) وه‌ی خودێ، من سڤۆره‌ك دڤێت.

دویماهیك