نڤێسین: اواز صباح

د مژویلن…
کاروبارێ خوە دکەن، هەر ئێک تاکە دەستێ جلێن خوە یێ مێهڤانیێ لبەر خوە دکەت.
دگەل خوە لێکدانێ و پرچ شەکرنا ب ئاڤێ، نازێ و ژینێ بۆ ئێک و دوو د ئاخڤن و کەیفا خوە بۆ ئێک و دوو شڕۆڤە دکەن. نازێ دبێژیت: نە ب گوتنێن من بایە، وە نە ددیت ئەم ژمال چووین. ژینێ گوتێ: وەنەبێژە من ژی هاری تە کر بۆ ڕازیکرنا ئودایێ.
دیکوی ل بەر دەرگەهێ ژۆرێ ب دەنگێ بلند گازی وان کر و گوتێ: دێ بەس باخڤن و کارێ خوە زیکا بکەن، ما ئەڤە لێکدانا وە بیە چی؟ ما چل پرچا وە یا قژ هات؟
کارێ خوە کرن و گوتنە دایکا خۆ ئەم د ئامادەینە دا بچین.
دایکا وان گوت: دای گوری هەوە ل ڕێکێ جڕەبڕێ و ئاخڤتنا زێدە نەکەن، چنکو ڕێکا دڕێژە و ئەم ب پیان د وەستین، ئەم نەشێن گوهداری گوتنێن وە یێن بێ ڕاوەستیان بین.
ئەوان گوتە دایکا خوە: نە ئودا ئەم ئەڤ جارە وەناکەین.
بچیکا مالێ گوتە دایکا خوە: ئودا ما چێدبیت ئەم دبەر خانیێن بلند و خۆش ڕا ببورین و ئەم نە بێژین “ئودا خوەزیکا ئەڤ خانیە یێ مەبایە!! ما چێدبیت ئەم ترۆمبێلێن جوان ببینین و نەبێژین دێ کەنگی ب ترۆمبێلان هاتن و چوونێ کەین!”
دایکا وان ئاخینکەکا کویر د ڕۆحا خۆدا ڕاهێلات و خەمەکا مەزن ل پشت دێمێ خوە ڤەشارت، لێ نزانی چ بەرسڤێ بددەتە وێ ڕاستیا کچا وێ د بێژیت… پاشی گوتە ئەوان: “بەرخێن دایێ، نا چێبیت ژیانا مە هەمیان وەکی ئێک بیت، وەکی هووین دبینن ژۆرا مە یا بتنێ بۆ مە خانیەکێ گەلەک خۆشە، هەروەسا هاتن چوونا ب شمک و پێلاڤێن مە، گەلەک خۆشتڕە ژ هاتن و چوون ب ترۆمبێلان.
ب ئەڤان پەیڤێن دایکێ، کەیفا وان گەلەک هات و ئەوان سەرێ خوە بلند کر و بەرێخودانە دایکا خوە، دەستێن ئێک گرتن و ب گرنژین سەحکرنە شمکێن خوە و ژدل و جانێ خوە پێکڤە کرنە کەنی… تەق تەقا شمکێن وان تێکەلی کەنیا وان بوو و بوویە خوشترین موزیکا جیهانێ و ئەو ب ڕێ کەڤتن بۆ مێهڤانیێن خۆ.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *