نڤێسین: تەحسین ناڤشکى

دەمێ ل دوماهییا سالێن هەشتییان ژ سەدێ بۆری، ئەز کەتیمە د دەستپێکا قووناغا گەنجینیێ دا، هێدی هێدی من دەست ب ئازادبوونا خوە یا هزری کر و ب کلیلا لێگەڕیان ل نووخوازیێ من دەرگەهێن نوو یێن مەعریفی و هزری ڤەکرن و من ئارمانجێن راست و دروست کرنە بەرنامەیێ وێ قووناغا ل خوە گەڕیانێ، وەک دەروونناسێ جڤاکی ئەریکسۆن دبێژت. رۆهنترین دەرگەهـ د وی دەمی دا من ڤەکری پرتووکا ناڤدارا هەردو نڤیسەرێن جیهانی ((مالکلم برادری)) و ((جیمس ماکفارلن)) بوو، ب ناڤێ نووخوازی، ژ دو بەرگان پێهاتبوو و ژ ئەرەبیکرنا مۆئەید حەسەن فەوزی بوو.
سەرەڕایی باگراوەندەکێ هەژارێ رەوشەنبیری، هینگێ من ب زەوقەک بلند دەست ب خواندنا وێ پرتووکا کۆمەکا شارەزایان و رەخنەگرێن ئەدەبێ جیهانی پشکداری تێدا کری کر. هەر ل پێشەکییا پرتووکێ ئەز ب خواندنا وێڤە نووسیام، دەمێ من خواندی کو هەردو نڤیسەران بەحسێ پرۆسێسا نووخوازیێ و جۆرێن وێ کری و وەسا ئاماژە دایێ هندی کو بیڤەلەرزێن شارستانینە یێن کو ب شێوەیەک رێکخستی د دیرۆکا ئەدەبی، هونەری و هزرێ دا چێ دبن نێزیکە وەک وان بیڤەلەرزانە د سرۆشتی دا رووددن و گوهۆڕینێن جۆرا و جۆر ل دووڤ خوە دهێلن.. ئەڤ جۆرە بیڤەلەرزە ب دیتنا هەردو نڤیسەرێن پرتووکە دبنە سێ جۆرێن سەرەکی: جۆرێ ئێکێ ب بیڤەلەرزێن ساناهی دهێتە ناڤکرن ب گوهۆڕینا مۆدێلان دهێتە نیاسین و ژ 10 سالان نابۆرت. یێ دووێ: ب بیڤەلەرزێن مەزتر دهێتە نیاسین و سەدان سالان ڤەدکێشت. یێ دوماهیێ بیڤەلەرزێن وێرانکارێن سەرانسەری و گەلەک درێژ دهێتە نیاسین، پاشمایەکێ زەبەلاحێ گلێشێ هلوەشیانێن کلاسیکی ل پەی خوە دهێلت و گوهۆڕینێن کوور دوور یێن رەوەشەنبیری، ئەدەبی، هونەری، هزری، مەعریفی، پیشەسازی، ئابۆری، سیاسی …هتد پەیدا دکەت. هۆسا گوهۆڕین و نووخوازی د سیرۆرە و لڤینەک بەردەوام دانە و راناوەستن.
هەر هینگێ ئەز ل خانەیا وەلاتێ خوە ل سەر وی نەخشەیێ جیهانی یێ بیڤەلەرزێن شارستانی و معریفی گەڕیام، لێ من چو تشتێ خۆمالی د وێ نەخشەیێ دا نەدیت، ژبلی قووناغا ئێکێ یا دووڤچۆنا مۆدێلان و چاڤلێکرنێ پێڤە کو ژ جزیری و ئەحمەدێ خانی بگرە، هەتا بگەهتە مەلا مەحموودێ بازیدی و عبدالرحیم رەحمی هەکاری، عەرەبێ شەمۆی و قەدری جانی و بگەهتە چاند و هونەرێ کوردستانێ ل سالێن هەشتییان ژ سەدێ بۆری، من تشتەک نەدیت تایبەت ژ داهێنان و هزرا خۆمالییا کوردان بت کو خەلکەکی چاڤ ل مە کربت، نە مە چاڤ ل خەلکەکی کربت.
من زمان و ئەدەب کرە نموونە بۆ ڤی بابەتی، هەلبەت بیاڤێن دی د وێ خەریتا بیڤەلەرزێن دیرۆکی و شارستانی دا گەلەک کامباخترە، هەکە مرۆڤ وژدانا خوە تەنا بکەت و خوە ژ دەمارگیرییا نفشی و هۆزێ رزگار بکەت، هەما مرۆڤ شەرم دکەت باسێ گەلەک بیاڤان ژ وان بکەت، ژ بەر کو پڕانییا وان شەرمزاری و جهێ ئەنیشۆڕکرێنەنە.
ب گۆرەی ڤی نەخشەی، ئەڤە نێزیکی30 سالانە بیڤەلەرزکا سیاسی ب حوکمێ فاکتەرێن دەرانی و خویانی ل ئیراقێ، وەک داگیرکەرەک ژ چار داگیرکەران پەیدابوویە. ئەز دبێژم نفشەک گەلەکە هەکە مرۆڤ ب کێر خوە بهێت، مفای ژ خەلەتیێن خوە یێن دیرۆکی ببینت و چاڤ ل خەلکەکێ دی بکەت. لێ دیمەنێن بەرهەمێ ڤێ بیڤەلەرزێ هەتا نوکە، ژ بەری 30 سالان ژ گەلەک ئالیانڤە کامباخترە، پێشگەڤتنا ل هەرێما کوردستانێ هاتییە کرن ژی تنێ مفا ژ تیڤلێن خەلکەکی هاتییە دیتن و کاکل هاتییە هاڤێژتن و سەرەدەری ب بەرەڤاژی دگەل رەوشێ هاتییە کرن. ئانکو ئەو وەلاتێ پتر ژ جارەکێ هاتییە پارچە کرن، دەستهەلاتا خۆمالی ژی ل سەر شەنگستەیێ بەرتەنگێ دەڤەرکی، ل ناڤبەرا خوە پارچە کرییە و هەمان رەفتار دوبارە کرییە.
ئها هۆسا بێهیڤیاتییەک بۆ وی کەسێ مەنتقی هزر بکەت چێ دبت کو ب ڤی دەستوداری ناڤێ دیرۆکا شارستانییا مە چو جاران ل سەر نەخشەیێ دیرۆکا نووخوازییا و شارستانییا جیهانی جهێ خوە نەبینت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *