نڤیسین: أپیر محسن الهاشمی
وه‌رگێران: سه‌رحان ئه‌حمه‌د سه‌رحان

(شانۆ چه‌په‌ره‌كا جه‌نكییه‌، تویرێن ئاخێ ل دورماندور هاتینه‌ دانان)

دیمه‌نێ ئێكێ
زه‌ڵام: (جلوبه‌رگێن سه‌ربازی ل به‌رن .. پرچێ وی یێ درێژه‌ .. وه‌سا دیار دكه‌ت هه‌ر وه‌كو یێ وه‌ستیایه‌) ئه‌ڤه‌ چ سپیهن؟ (سه‌رێ خۆ ب توندی دخورینیت) ژ كیڤه‌ هاتینه‌؟ .. د سه‌رێ مندا به‌لاڤه‌ دبن .. ئاهـ .. نه‌فره‌ت ل ته‌ بن ده‌ما من دگه‌زینی، د هه‌ر خوله‌كه‌كێدا سه‌دان گه‌زا ل من ده‌ی (ساته‌ك ژ بێده‌نگیێ، قێژییا ڤه‌ده‌ت) سپیه .. سپیه (دووباره‌ سه‌رێ خۆ دخۆرینیت) سه‌ر سپیهه‌ و گه‌ردوون سپیهه‌ و ئه‌ز بومه‌ سپیهه‌ك، سپیه یێ گه‌زا ل من ده‌ن! (دروینیت) به‌لێ پا .. ئه‌ڤ سپیهێن نه‌فره‌تی ژ كیڤه‌ هاتینه‌؟ (پێكۆلێ دكه‌ت هزرێن خۆ بكه‌ت) به‌لكی .. به‌لكی (بێده‌نگ دبیت، هه‌ر وه‌كو ئه‌و به‌رسڤا پرسیارێ دزانیت) جه‌نگ .. به‌لێ .. جه‌نگ (كه‌نیه‌كا هیستیری) جه‌نگ هه‌ڤپشكێ مه‌یه‌ دژیانیدا (پێكولێ دكه‌ت جل و به‌رگێن خۆ ب درینیت) به‌لێ جه‌نگه‌، جه‌نگێ ئه‌م ئێناینه‌ سه‌ر دونیایێ و وی شیر یێ دایە مه‌ .. هنده‌ ئه‌و به‌رفره‌هتر لێ دهێت ئه‌م بن سیبه‌را وێ بچویكتر دبین (ساته‌ك) ئاخ ژ ته‌ ئه‌ی جه‌نگ .. تۆ دینا دبه‌ی، دین (بۆ ترانه‌ دكه‌ته‌ كه‌نی) ئه‌م دینێن جه‌نگینه‌ (هشیار دبیت) به‌لێ پا مه‌ حه‌ز نه‌دكر ڕۆیبده‌ت .. هم، به‌لێ، هم (پێكۆلێ دكه‌ت كه‌سه‌كێ ببینیت) نه‌فره‌ت ل وان هه‌میا بن ئێك ئێكه‌، جلكێن به‌رزه‌بوونێ ل به‌ر مه‌ كرین د چه‌رخه‌كێ تۆزگرتیدا، مه‌ فێردكه‌ن كا دێ چه‌وا شه‌ڕی كه‌ین و دێ چه‌وا مری (ساته‌ك) نوكه‌ جه‌نگی چ گرنگییا خۆ ل ده‌ف من نینه‌ .. یا گرنگ ئه‌ڤ سپیهێن نه‌فره‌تینه‌ (سه‌رێ خۆ دگریت) چه‌وا دێ خۆ ژێ خلاس كه‌م (ب زارڤه‌كرن دكه‌ته‌ گری) ڕزگاربوون ژ سپیها، ئانكو ڕزگار بوونه‌ ژ جه‌نگی، ڕزگار بوون ژ سپیها، ئانكو رزگار بوونه‌ ژ جه‌نگی .. نه‌خێر .. نه‌خێر .. نه‌خێر نه‌ ئه‌ز باوه‌ر ناكه‌م (ترانا ب خۆ دكه‌ت) ئه‌ڤی خه‌لكی هه‌میێ ئه‌ڤ كێشاهه‌ یا هه‌یه‌ (سه‌رێ خۆ ب توندی دخورینیت، وه‌ستیان، قێژییا ڤه‌ده‌ت) سپیه ، سپیه ، سپیه .. !
( تاری بوون )

دیمه‌نێ دووێ
زه‌ڵام: (ب ژۆر دكه‌ڤیت، ڕۆناهییا شانۆیێ ب ته‌مامی ڕۆن دبیت .. ب ده‌نگه‌كێ نزم د ئاخڤیت) به‌لكی، سپیه مری بكه‌ڤن و مێشكێن مه‌ ساخ بمینن! (ب هشیاری) نه‌خێر ، نه‌خێر (پرچا خۆ ب ده‌ستێ خۆ دلڤینیت ) نه‌ دێ خرابن .. مێشكێن مه‌ دێ خرابن! (پێكۆلێ دكه‌ت سه‌رێ خۆ ب دیواری بخورینیت) بۆچی ئه‌ز ل چاره‌كێ ناگه‌رم، بۆ ڤان سپیها به‌لكی ئه‌ز چارێ ببینم ( هزرێن خۆ دكه‌ت، قێژییا ل خۆ ڤه‌دده‌ت) به‌س ئاخفتنێت بێ رامان بێژه‌؟ ئه‌ڤه‌ رۆژانێن مه‌یێن دویماهیێنه‌ (ژ نیشكه‌كێڤه‌ د ڕاوه‌ستیت و كه‌یفخۆش دبیت) من چاره‌سه‌ری دیت، من چاره‌سه‌ری دیت، ئـــــــــــاڤ، ئاڤ ئانكو ئاڤ، ئه‌ز دێ ئاڤێ ئینم و ل سه‌رێ خۆ ده‌م و دێ سپیه شه‌ق بن (به‌ره‌ف چه‌په‌ری غاردده‌ت داكو مه‌سینه‌كێ ئاڤێ بینیت، دهێت و مه‌سین یێ ده‌ستاندا، ب توندی دهاڤێت) كه‌ربێن من ژ ئاڤێ ڤه‌دبن، به‌لێ، كه‌ربێن من ژ ئاڤێ ڤه‌دبن (خۆ مه‌زن دكه‌ت، وه‌سا خۆ دیار دكه‌ت هه‌روه‌كو كه‌ربێن وی ژ ئاڤێ ڤه‌دبن پشتی كۆ بوتل ڤالا دیتی) كه‌ربێن من ژ ئاڤێ ڤه‌دبن (بێهیڤی) كه‌ربێن من ژ ئاڤێ ڤه‌دبن (ده‌ردكه‌ڤیت).
(موزیكه‌كا خه‌مگین)





دیمه‌نێ سیێ
زه‌لام: ( ژۆر دكه‌ڤیت، سه‌رێ خۆ یێ تراشیى، وه‌ستیای) مه‌ ب تنێ دیناتییا دینا هه‌یه‌ و ئه‌م خه‌ما ب ئاشتیێڤه‌ گرێده‌ین و ئه‌م ل سه‌ر بانێن كه‌سێن مری دكه‌ڤن، ژیانێ وه‌ك برسقینا خه‌ونه‌كێ دبینین، دئاماده‌ینه‌ بۆ خلێلبوونێ, ئاخ بۆ ته‌ ئه‌ی هه‌یڤا دینا (به‌رێ خۆ ده‌ته‌ سه‌ری) تۆ وه‌كی ڤی سه‌رێ من یێ كه‌چه‌لی (ده‌ستێ خۆ دكه‌ته‌ سه‌رێ خۆ) ئێدی چ تشتا بۆ مه‌ رون نه‌كه‌ (دگه‌ل خۆ دئاخڤیت) چونكی ب تنێ شه‌ڤ هه‌ژار دپارێزیت ( ده‌ست ب ئێخستنا جلكێن خۆ دكه‌ت، دڕینیت، وه‌كی ریسه‌كێ لێ دهێت) نه‌فره‌ت ل جلكێن جه‌نگی بن .. ئه‌م گوڕی كرین وه‌كی خۆ (ل تشته‌كێ دگه‌ریت، ل رادیۆه‌كا كه‌ڤن دگه‌ریت، دبینیت، یپێكۆلێ دكه‌ت ڤه‌كه‌ت، ب هویری گوهداریا وی دكه‌ت)
ده‌نگێ بێژه‌ڕی: گوهدارێن هێژا ئه‌م ده‌نگوباسێ دویماهیك هاتنا جه‌نگی دگه‌هینه‌ هه‌وه‌، مه‌ ب رێكا راپۆرتا زانی كۆ جه‌نگ نه‌ ژبه‌ر چ تشتا بوو، ژبه‌ر ڤێ چه‌ندی سه‌رۆكێن ده‌وله‌تێن شه‌ڕكه‌ر لێبورینێ ژ جه‌نگاوه‌رێن خۆ یێن دلێر دخوازن ژبه‌ر ڤێ چه‌ندا رویدای …
زه‌لام: (دكه‌ته‌ كه‌نی، ب ترانه‌) نه‌ ژبه‌ر چ تشتی بوو .. جه‌نگ نه‌ ژبه‌ره‌ چ تشتی بوو .. گوهداریێ بكه‌ن گه‌لی تێگه‌هشتیا ، سال بورین و ئه‌م یێ شه‌ری دكه‌ین و نه‌ ژبه‌ر چ تشتی! نه‌ ژبه‌ر چ تشتی .. نه‌فره‌ت ل هه‌وه‌بن زۆردارێن جه‌نگی .. جه‌نگێ هه‌وه‌ نه‌ ژبه‌ر چ تشتی بوو .. لێبۆرینێ ژ جه‌نگاوه‌رێن خۆ یێن دلێر دخوازن .. ل كیڤه‌نه‌؟ جه‌نگاوه‌رێن دلێر؟ (دكه‌ته‌ كه‌نی ب ترانه‌) هه‌می مرن (ده‌ستێ خۆ دكه‌ته‌ خۆ) ژبلی و زۆردارێن جه‌نگی من چ كه‌س نه‌مایه‌ (به‌رێ خۆ دده‌ته‌ لایێ رست و چه‌پێ) نه‌فره‌ت ل هه‌وه‌بن ئێك ئێكه‌، ئه‌ز ب تنێ دین مایمه‌ دڤی چه‌په‌ریڤه‌ (ده‌ستێ خۆ ب خه‌مگینی دكه‌ته‌ خۆ) به‌لێ ب تنێ ئه‌ز دین بووم، زانا مرن .. ئاه ئه‌ی جه‌نگێ بێ ئه‌گه‌ر، ده‌م بۆری، ده‌م بۆری .. گه‌لی دینا.


دیمه‌نێ چوارێ
زه‌لام: (شانۆ رون دبیت ، رویس ب ژوور دكه‌ڤیت، ئالایێ جه‌نگی دده‌ستێ وی دایه‌، دكه‌ڤیته‌ سه‌ چوكا، ده‌ستێ خۆ بۆ ئه‌سمانا بلند دكه‌ت، گاوندا دكه‌ت) ئه‌ی خودا، ئه‌ڤه‌ چ ل مه‌ هاتیه‌ مه‌ ژیێ خۆ جه‌نگ ب جه‌نگ بوراند، ده‌سپێكا وێ پیستاتی و دویماهییا وێ دیناتی .. ئه‌م پتر شكه‌ستین ژ سه‌ركه‌فتنێ .. سوپاس بۆ ته‌ ئه‌ی ئه‌قل ژبه‌ر كۆ تۆ دچاخه‌كێ دا راوه‌ستیای یا پێدڤییه‌ ئه‌قل لێ ب راوه‌ستیت! دا ئه‌م پیچه‌ك تام كه‌ینه‌ دیناتیێ، دا ئه‌م ببنه‌ ئه‌قلێن ڤالا دڤێ رێكا به‌رزه‌به‌، دویر ژ هه‌می جیهانێ، داكۆ ئه‌م خۆ ل پشت دره‌وه‌كا نه‌دروست ڤه‌شێرین، دچاخه‌كێدا كۆ مه‌ ئاڤه‌كا سه‌روچاڤا ژێ ستاندی و وی ئاڤێ ژی سه‌روچاڤا ژ مه‌ دزین، ئێدی مه‌ حه‌زا ژیانێ نه‌مایه‌ .. بۆ وان رۆژێن ب له‌ز دبه‌زن بۆ وان رۆژێن ڤه‌كیای، گۆڕا دجاده‌ و بان و كوژییا كه‌ڤل دكه‌ن، سه‌ركه‌فتنێن خۆ نیشا مه‌دده‌ن ده‌ما ژ ده‌راڤێن به‌رته‌نگ ده‌ردكه‌ڤن، نیشا دده‌ن، نیشا وه‌لاتێن مه‌ دده‌ن، وه‌لاتێن شه‌رم ژ مرنێ دكه‌ن (ساته‌ك) ئێشا چه‌ندین سالا وه‌كو دارقه‌سپه‌كێیه‌ هه‌ر و هه‌ر یا هه‌ی، ئه‌و داره‌ ژی هاته‌ هه‌ژاندن هه‌تا تایێ جه‌نگی بشه‌رمیی ژێ كه‌فتی و ل شه‌رمینا ژی گه‌رییا (ب مخابنی) هه‌می ده‌رگه‌ه گرتینه‌ ب تنێ ده‌رگه‌هێ نڤستنێ تێنه‌بیت، نڤستن بۆ هه‌ر كه‌سێ بڤێت، خه‌ون ژی یێن هه‌ین، چونكی هه‌می دسه‌رخۆشن! (رویس ل سه‌ر ئه‌ردی دنڤیت .. ئالایێ جه‌نگی دانته‌ سه‌ر له‌شێ خۆ و دنڤیت .. تاری بوون)
(موزیكه‌كا خه‌مگین)

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *