نڤێسین: د. فازل عومەر

كوردان گۆتىیه‌: زكبرسى تێر دبت، به‌س چاڤبرسى تێرنابت.
ئه‌ڤه‌ دو رۆژن من تشته‌ك لدۆر چله‌كىیێ (چڕووكى، چكووسى، چاڤته‌نگى، زكینى یان ته‌ماهىیێ) دخواند. ئێك ژ بڕگه‌یێن سه‌رنجا من راكێشاى و من ڤێیاى بۆ هه‌وه‌ وه‌رگێڕم ئه‌ڤا ل خوارێ بوو. به‌س به‌رى وه‌رگێڕم، من دڤێت دو سێ گۆتنان ده‌رهه‌قى ئه‌ڤێ ره‌فتار/ خوه‌ڕسكا مرۆڤى باخڤم.
هه‌مى دین و هه‌مى جڤاك، ته‌ماهىیێ و چله‌كىیێ (خواستن و كۆمكرن و خوارن و كرنا زێده‌) وه‌كو گونه‌هـ یان ره‌وشته‌كێ خراب به‌رچاڤ دكه‌ن، لێ ئه‌ڤ حه‌زه‌ یان وه‌كو هنده‌ك ب خوه‌ڕسك دزانن، ل نك هه‌مى مرۆڤان هند دژواره‌، كه‌س ژێ بێبه‌هر نینه‌: مرۆڤى، ژ هه‌وجه‌ییێ دڤێت تێر ببت، وه‌ختێ تێر ببت دڤێت یه‌ده‌ك هه‌بت، ژ یه‌ده‌كى دڤێت پتر هه‌بت نه‌كو (؟؟) رۆژه‌ك ره‌ش بهێت یان وه‌كو هه‌ڤڕكى.. تاكو دگه‌هته‌ ره‌وشا چاڤبرسیاتىیێ، كو قه‌ت ژ كۆمكرنێ و پترێ تێر نه‌بت.
((ته‌ماهى، بێگومان ڤه‌دگه‌ڕته‌ ره‌وشتێن مه‌ ژ سه‌رده‌مێ شكه‌فتێ گرتین. ل وه‌ختێ قه‌تلازىیێ، شكه‌فتنشینێ چڕووك ئه‌وێ نه‌ڤێیاى پاشمالێ خوه‌ ژ زادى بده‌ته‌ دۆرماندۆرى، چ ل سه‌رده‌مێ قه‌ڕیسێ جیهان گرتى یان ل ده‌مێ زڤستانێ، به‌هرا پتر، چڕووك یێ رزگاربووى و خوه‌شىیا ب پشتى هینگێ یا دیتى. به‌ره‌ڤاژى، یێ مه‌ردانه‌ كو ده‌رامه‌تێ خوه‌ دایه‌ دۆرماندۆرى و ده‌لیڤه‌یا مانێ و ده‌ربازبوونێ ژ ته‌نگاڤىیێ بۆ خوه‌ لاوازكرىیه‌. ئه‌ڤه‌ وه‌كو سه‌ربۆرا مرۆڤان، ل ره‌خێ دى، ڤاڤارتنا سروشتانى مرۆڤ ب خوه‌په‌رێسى یێ به‌رنامه‌كریه‌ داكو بمینت. ئه‌ڤجا چڕووكى بوویه‌ خوه‌ڕسكه‌كا سروشتىیا مرۆڤى.. ئه‌م هه‌مى د ناخێ خوه‌ دا خوه‌په‌رێس و چڕووكن، و ئه‌ڤه‌ خوه‌ڕوو ڤه‌دگه‌ڕته‌ ئه‌گه‌رێن وه‌رارا مرۆڤى لسه‌ر ئه‌ردی. دبت چاڤى ل ئه‌ڤێ بنقینین چونكى گرێدایى خوه‌ڕسكا مانێیه‌. لێ دگه‌ل وه‌ختى مرۆڤى هنده‌ك تشت چێكرینه‌ و هه‌مان سیسته‌مێ زادى و شكه‌فتێ دگه‌ل بكار ئینایه‌. بۆ نموونه‌؛ مرۆڤى پاره‌ چێكرینه‌ و سازیه‌كا چڕووكاتى و چاڤبرسیتىیێ ڤێڕا چێكرییه‌.. دێ بینى، گه‌له‌ك مرۆڤ نه‌دارن و هنده‌ك ملیاردێرن! و تێرا وه‌لاته‌كى ب سالان كۆمكرینه‌، پرسیار ئه‌وه‌؛ ئه‌رێ مرۆڤ دێ چ ل ئه‌وا زێده‌ ژ هه‌وجه‌ییا خوه‌ كه‌ت؟)).
وه‌ دیاره‌ خوه‌ڕسكا چڕووكاتى یێ كو گومان لسه‌ره‌ خوه‌ڕسك بت، ژ خوه‌ڕسكا مانێ ژى بهێزتره‌.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *