سوپاسنامەیەک ژ مالپەرێ خەدەنگ بۆ حکومەتا هەرێما کوردستانێ

بناڤێ مالپەر خەدەنگ یێ ڕەوشەنبیرى ل زانکۆیا زاخۆ و لسەر ناڤێ ڕێزدار پرۆفیسۆرێ هاریکار دکتۆر (کاروان فەهمى سامى) سەرپەرشتێ گشتى یێ مالپەرى و ستافێ کارى، ڕێز و سوپاسیێن تایبەت ئاراستەیى حکومەتا هەرێما کوردستانێ ب تایبەت لیژنەیا ڕویبرویبوونا ڤایرۆسێ کورۆنا Covid-19 و تەڤایا کەرتێ ساخلەمى و هێزێن ئێمناهییێ (پۆلیس، ئاسایش، هاتوچوو، پاراستن ..هتدد) ل هەرێما کوردستانێ و ب تایبەت ل پارێزگەها دهۆکێ دکەن، ژبەرکو ل پارێزگەها مە ب سایا سەرێ وان هیچ قۆربانییەک نەهاتە تۆمارکرن و ڕێزا ئێکێ یا کێمترین تووشبوویان و چارەسەرکرنا وان ب شێوەیەکێ سەرکەڤتییانە بدەستڤەهینا.
هەلبەت هەر ژ دەستپێکا پەیدابوونا دەنگۆباسێ ڤایرۆسێ کورۆنا ل وەلاتێ چینێ و بەلاڤەبوونا ڤایرۆسى ل سەرتاسەرى وەلاتێن جیهانێ، حکومەتا هەرێما کوردستانێ هەست ب بەرپرسیاریێ ژبۆ پاراستنا هەڤوەلاتى و ئاخا وەلاتى کر و هەر زویى ڕێکار و لیژنەیێن تایبەت ژبۆ ڕێگریکرن ژ تەشەنە و سینورداکرنا ڤایرۆسى ل پارێزگەهان پێکهینان. ب ئەڤێ چەندێ حکومەتێ ب لیژنە و تیمێن کارى؛ شیان هەڤوەلاتیێن هەرێمێ ژ ڤایرۆسێ ناڤهینایى بپارێزن و ب کێمترین قۆربانى دوماهییێ ب هێرشێن دژوار یێن ڤایرۆسى بۆ سەر ساخلەمییان هەڤوەلاتییان بهینن.
بێگۆمان ئەڤ چەندە جهێ شانازى و بەختەوەرییا مە هەمى خەلکێ کوردستانێیە، کو مە حکومەتەک وەها خەمخوەر و ڕژد د کار و پرۆسێسێن ساخلەمى و پاراستنا هەڤوەلاتییاندا هەبیت، لەورا داخوازا سەرکەڤتن و بەردەوامییێ بۆ حکومەتا هەرێما کوردستانێ د هەمى کاروباراندا دکەن.
ژبۆ ئەڤێ مەرەمێ ئەم دخوازن هەڤوەلاتییێن هێژا، لسەر ڕێنمایێن خۆپاراستن و کەڕەتوونکرنێ بەردەوام بن و گرنگترین تشت د دەمێ نوکە دا تەندورستییا وان بیت. ژبەرکو ئەگەر تەندورستییا وان ساخلەم بیت، بێگۆمان دێ ب زویترین دەم ئەڤ نەخۆشییا کۆژەک ژ وارێ مە بارکەت و دیسان وەک جاران دێ ژیان ل وەلاتێ مە ب باشترین شێوە ڤەگەریت و دەرگەهـ و سازیێن حکومى و کەرتێ تایبەت و زانکۆ قوتابخانەیان هێنە ڤەکرن.
لدوماهییا سوپاسنامەیا خۆ دبێژن، ب هاریکاریى و پشتەڤانییا هەمى ئالییەکێ ب زویترین دەمێ دێ ژیانا ئاسایى دەستپێکەت و هەڤوەلاتى دێ قەستا کارێن خۆ بکەن، هەروەسا قوتابى ژى دێ ب ڕێکوپێکى چو ب ڕەنگێ ئونلاین یان ئامادەبوون ل زانکۆیێ دێ بەردەوامیێ ب خواندنا خۆ بدەن، لەورا داخوازا سەرکەڤتن و بەختەوەریێ بۆ هەمى لایەکێ دخوازن.