نڤێسین: دلێر کەمال ئەحمەد

دبیت کێمەک ژ مە گۆهـ ل ناڤێ ئێکەمین ڕۆمانا کوردى یا لژێر ناڤونیشانێ (شڤانێ کورمانجا) یا نڤیسکارێ کورد (عەرەبێ شەمۆ ـ شامیلۆڤ) نەبیت، لێ بەلێ چەند ژ مە ئەڤ ڕۆمان خواندییە؛ ئەها ئەڤە پرسا پرسانە!
هەلبەت ب درێژاهییا دیرۆکا ئەدەبییاتا کوردى و پەیدابوونا ژانرێ ڕۆمانێ، گەلەک گۆتوبێژ و دیتنێن جودا دەربارەیى ئێکەمین ڕۆمانا کوردى هاتینە پێشکێشکرن. لێ بەلێ ب بەلگە و دیکیۆمێنتەیشن ڕۆمانا (شڤانێ کورمانجا) ژ ئالییێ ئەکادیمیست و ڤەکۆلەرێن ئەدەبى ل ناڤخوە و دەرڤەیى کوردستانێ؛ هاتییە سەلماندن کو ڕۆمانا ناڤهینایى ئێکەمین ڕۆمانا کوردییە.
ل سالا 1929 بۆ ئێکەمیجار ب ئەلف و بێیا (لاتینى) هاتییە نڤێسین. پاشان ل سالا 1931 ل چاپخانەیا (مۆلۆدایا گڤاردیا) بتنێ بەشێ ئێکێ هاتییە چاپکرن و ل سالا 1935 چاپا دوویێ ل (وەشانخانەیا دەولەتێ یا پشتکافکاسیایێ ـ تیفلیس) هاتییە وەشاندن. د چاپا دوویێدا هاتییە نڤێسین، کو ئەڤ پەرتووکە ژ زمانێ کوردى هاتییە وەرگێران، بەلێ ناڤێ وەرگێرى یان وەرگێرێ لسەر نەهاتییە دانان؛ ژبەرکو نێرینەک هەیە کو رەحمەتى (عەرەبێ شەمۆ) بخوە و ب هەڤکارییا چەندین کەسان بەرهەمێ خوە بۆ زمانێ ڕۆسى وەرگێرایە.
ئەو تشتێ ئەز دخوازم لڤێرێ ببێژم ئەڤ چەندەیە، کو ب دیتنا من هینا ب تەمامى و ب تێر و تەسەلى، ئەڤ ڕۆمانە ژ ئالییێ جڤاکێ کوردى ب تایبەت ل باشوورێ کوردستانێ نەهاتییە خواندن و بوهایێ ڕۆمانێ وەک ئاستێ (هونەرى و تەکنیکى) و ل گورەیى ئەدەبییاتا ئەوێ قوناغێ، یا کو ئەڤ ڕۆمانە تێدا هاتییە نڤێسین ب باشى نەهاتییە فامکرن. لەورا لڤێرێ بانگ ل تەڤایا خواندەڤان و حەزکرییێن وێژە و چاندا کوردى دکم، کو ل دیرۆکا (فولکلۆر، چاند، کەلتوورێ، هونەرێ …هتدد) بڤەگەرن، ژبەرکو تشتێ عەجێب بالکێش و ڕند دناڤدا هەیە.
ئەڤ یەکە و خواندنا دیرۆکا کەڤنار دێ وەها بکت، کو گەلەک تشتێن نها دقەومن ب باشى تێبگەهن! هەروەسا دێ پاشخانەیەکا مەعریفى یا باش ژبۆ خوە بەرهەم هینن، ژبەرکو ئەگەر ئەم هێزا خوە ژ دیرۆکێ وەربگرن، بێگۆمان دێ ب زەلالى ئەڤرۆ و سوبەهییا خوە ببینن.
ڕۆمانا (شڤانێ کورمانجا) لگەل ڤەکۆلینەکێ ب باشترین چاپ و دیزاین، ژلایێ ڕێزدار (مستەفا ئایدۆگان) هاتییە بەرهەڤکرن، هەروەسا هەڤالێ هێژا (زنارێ مەلێ) ب ڕێک و پێکى و خەمخوەرى تیپگوهۆرینا ڕۆمانێ ژبۆ ئەلف و بێیا (ئارامى ـ عەرەبى) ئەنجامدایە و دەزگەهێ (سپیرێز) ل سالا 2017 چاپکرییە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *