رۆمانا کۆشک(القلعة/ castle) ئێک ژ بەرھەمێن فرانتس کافکایە، ل سالا ١٩٢٢ نڤیساندیە و ل سالا ١٩٢٦ ماکس برۆدی بەلاڤکریە.
ئەڤ رۆمانە ژ ٢٠ چاپتەران و ٤٨١ بەرپەران (ل دویڤ وەرگێرانا کوردی) پێکدھێت. ب تەکنیکەکا گرێدای موسیقەکا تژی دەربڕینێن سیمبۆلی کو وەکریە گەلەک خواندن و راڤەیێن جوودا ب خو ڤە ببینت و ھەر ئێک ل دور بۆچوونا خو نرخەکی بدەتێ و ب ھەلسەنگینت.
گەلەک نڤیسکارێن مەزن گرنگی ب ڤی بەرھەمێ تژی فەلسەفە و تژی روودانێن سەیر و بالکێش دایە و ھەر ئێک ژ وان ژ لایێ خو پەنایێ بۆ نھێنی و کۆدێن رۆمانێ دبەت. تایبەت فەیلەسۆفێن نیھێلیستی و ئەگزیستانسیالیستیی گەلەک گرنگی ب ڤی بەرھەمی دایە، دەستپێکێ راڤەیێن ئایینی بخو ڤە دبینت و ماکس برۆد بخو ھێما و سیمبۆلێن کۆشک ب گۆمانێن ئایینی کو گونجاو دگەل سەردەمی دزانیت.

روبێر رۆشفۆر د بەرھەمێن خو دا دەربارەی ڤێ رۆمانێ دبێژیت (تاقیکرنا نەفییا رەھا) کو مرۆڤ بەردەوام د ھەڤرکیا دا یە.

ھەروەسا والتر زوکەل ب سەرنجدانا دەروون شیکاریا فرۆیدی، ب تێر و تەسەلی دەربارەی ڤێ کێشێ گۆتیە و د ئەنجامدا کۆشک ل سەر بنیاتێ ھەلومەرجێن پەھلەوان و کەسایەتی راڤە کرییە، وەک نمونەکا پەیوەندیا بنەمالەکا بورجوازی ناڤکرییە.

ئەلبێر کامو دبێژیت رۆمانا کۆشک قەیرانا مرۆڤێ ھەڤچەرخ وێنە دکەت. پاشی بەردەوام دبیت و دیار دکەت کو پێدڤییە بەرھەمێن کافکای ژ جارەکێ زێدەتر بھێنە خواندن.

کارەکتەرێ سەرەکی ب پیتا (ک) ناسیارە کو ھندەک ڤەکولەر وەسا دیاردکەن ئەڤە جێناڤە ل جھێ (من- ئەز) جھێ خو دبینت.

دەستپێکێ (ک) دچیتە ئاوای ب مەبەستا ببیتە (رووپێو- مساح) ل کۆشک. کلام نامەکێ ب رێیا بارانباسی بۆ دھنێریت کو تێدا دیاردکەت (ک) بۆ خزمەتکرنا کۆشکێ وەرگرتیە. بەلێ تا رۆمان ب داوی دھێت (ک) ناگەھیتە کۆشکێ و روودانێن رۆمانێ ھەمی ل ئاوای بەردەوام دبن و ئەڤ رۆمانە ژی وەکو (دادگەھی) بێ داوی دمینت. ماکس برۆد دبێژت کافکای چ ناڤ نەدانابونە سەر ڤێ رۆمانێ، بەلێ دەما دەربارەی وێ د ئاخڤت ھەر د گۆت رۆمانا کۆشک. دەربارەی داویا وێ ژی گۆتبوو کو پشتی پێکولێن بەردەوام (ک) گەلەک بێھێز دبیت و پاشی دمریت. خەلکێ ئاوایێ ل دور تەرمێ وی کۆمدبن و دھەمان دەمدا خەبەرەک ژ کۆشک دھێت ب مەستا کارکرنا وی.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *