نڤیسین: محمد ره‌شید
كه‌سایه‌تى:
ئێك: شه‌ڤیار
دوو: پێنووس
(شه‌ڤه‌كا دره‌نگه شانۆ ژۆره‌كا نورمالا خواندنێیه، ده‌رگه‌هـ ل لایێ راستێیه .. شه‌ڤیار ب ژۆر دكه‌ڤیت، ژ نوى ژ كارى ڤه‌گه‌ریایه، گه‌له‌ك وه‌ستیایی دیار دكه‌ت، ل سه‌ر كورسیكا خۆ دڕۆینیت، هێدى هێدى سه‌رێ وى دكه‌ڤیته سه‌ر مێزێ، دچیته جیهانه‌ك بێده‌نگ و تژى ژ ئارامیێ، د ده‌مه‌كێدا ده‌نگێ كه‌تنه‌كێ دهێت و شه‌ڤیار پێ هشیار دبیت).
شه‌ڤیار: (ب ترس، ل ده‌وروبه‌رێن خۆ دنێریت چاڤێن وى ب پێنووسى دكه‌ڤن) توكى؟ دزیكه‌ر!
پێنووس: (ل كوژیه‌كێ شانۆیێ یه) ئه‌ز نه دزیكه‌رم ئه‌ز پێنووسم.
شه‌ڤیار: پێنووس! ته چ دڤێت؟
پێنووس: یێ هاتیم هاریكاریا ته بكه‌م
شه‌ڤیار: هاریكاریا من بكه‌ى؟
پێنووس: وه‌كى یێن به‌رى ته
شه‌ڤیار: ئه‌رێ هه‌ر تۆ بووى ته هاریكاریا وان كه‌سێن به‌رى من كرى د نڤیسینێدا، هه‌تا كۆ وه‌سا هزرێن من ل ئێك دویر كرین دجهه‌كێ به‌رته‌نگدا
پێنووس: به‌رته‌نگ؟ مه‌ره‌ما ته سه‌رێ ته‌یه؟
شه‌ڤیار: ما جهه‌كێ دى هه‌یه هزرێن خو لێ بدانم و ئه‌ڤ سه‌ر ئێشانه بداوى بهێت؟
پێنووس: بێگومان یێ هه‌ى، به‌لێ تۆ نابینى، ئه‌ڤێن به‌رى ته لاپه‌رێن سپى هه‌بوون، وان هزرێن خو بو من دگۆتن په‌یڤ په‌یڤ، من ژى ب جوانترین شێوه بۆ وان سه‌ر ل خۆ د بڕى،
(دچیته لایێ مێزێ لاپه‌ره‌كێ سپى هەلدگریت)
ئه‌ڤه كاغه‌زا سپیە، هزربكه دا ئه‌ز ژى ڕه‌شكه‌م.
شه‌ڤیار: كاغه‌زه‌ك تێرا هزرێن من ناكه‌ت، كۆمه‌ك ژى تێرا من ناكه‌ن به‌لكو بوشاهیا ئه‌سمانى هه‌میێ بۆ من بكه‌ن لاپه‌ر لاپه‌ر ئه‌ز دێ ب ئێك په‌یڤ تژیكه‌م، ئه‌و ژى ناڤێ “دایـــــــــكێ”یه، دبیت هزرێن من نه دروست بن لێ بهایێ حه‌وایێ ددلێ مندا هه‌ى چ تشتێن دى نینه.
پێنووس: ئه‌گه‌ر هزرا ته ئه‌ڤه بیت وه‌ره و ده‌ستێ خۆ بده‌فمن دا هه‌مى جها ڕه‌ش بكه‌ین.
شه‌ڤیار: نه‌خێر، ب تنێ گوهداریا من بكه من نه‌ڤێت ته دگه‌ل په‌یڤێن خۆ بداوى بینم، ئه‌گه‌ر نڤیسین ب داوى هات تۆ ژى دێ بداوى هێى، ئه‌ڤجا بمینه.
پێنووس: سه‌یره! تو ئێكه‌م كه‌سى خودان هزر و دلۆڤانى ب من برى، خوزییا منه ڤێ هزرا ته بكه‌مه نڤیسینه‌ك داكو هه‌مى بونه‌وه‌رێن خودان ئه‌قلێ بێ هزر ببینن و فێرببن من ژقه‌ستا نه ئێشینن، ئه‌ز چه‌كم، ده‌ما ده‌ستێ بێ ئه‌قله‌كێ بم دێ زیانێن مه‌زن هه‌بن،
شه‌ڤیار: نزانم! دا هنده‌كێ ژ هزرێن خو بۆ ته بێژم.
پێنووس: ئه‌ز بخه‌مم!
شه‌ڤیار: خه‌ما ته ژبیرا ته ببه‌م؟
پێنووس: به‌لێ.
شه‌ڤیار: گۆت جاره‌كێ زه‌ڵامه‌كێ گوهدرێژه‌ك ژ سویكا گوهدرێژا كڕى، ئینا چ كر وه‌ریسێ كه‌رى ب ستوینه‌كێ ڤه گرێدا، بریاردا وى وه‌ریسى ببڕیت هه‌ر ده‌ما گوهدرێژ ب ده‌نگه‌كێ بلند بزڕیت. ئینا گوهدرێژ ژى زڕى، وى ژى وه‌ریس بڕى و هۆسا هزركر هه‌ر زڕینه‌ك بلند ئازادیه!
پێنووس: (دكه‌نیت)
شه‌ڤیار: تو ب چ دكه‌نى؟
پێنووس: (بكه‌نى) گوهدرێژه! چ پێنه‌ڤێت دێ هزركه‌ت زڕینا وى مه‌قه‌سه… ڕاستى یا ب كه‌نى بوو.
شه‌ڤیار: نه یا ب كه‌نى بوو، به‌لكو ب لێبورینڤه تۆ ژى وه‌كی هه‌میا تێنه‌گه‌هشتى
پێنووس: ما دێ بۆ تێگه‌هم؟ دێ هه‌ر ژبیركه‌م، ته چ ل سه‌ر حه‌زژێكرنێ هه‌یه؟
شه‌ڤیار: من چ هزر سه‌ر نینن به‌لكو ئه‌ز بخو هه‌مى حه‌زژێكرن و ڤیانم.
پێنووس: تو!
شه‌ڤیار: ئه‌ز وه‌كو نڤیسه‌ره‌كێ دبینم، دبێژیت “ب تنێ د عه‌شقێدا ته‌مه‌ن درێژى یا هه‌ى، مرۆڤێ بێ عه‌شق چه‌ند ڕۆژه‌كێن كێم دژیت و پاش دمریت” ناڤێ وى بۆ ته نا بێژم! دبیت وى ژى تۆ ڕۆژه‌كێ ئێشاندبى به‌لێ پا ئه‌وى بهایێ ته یێ دروست دابوته.
پێنووس: دبیت
شه‌ڤیار: دبیت
پێنووس: (دوو دل) من دڤێت كاره‌كێ بۆ ته بكه‌م به‌لێ پا نزانم چاوا….
شه‌ڤیار: من ژى دڤێت به‌لێ نزانم چ بۆ ته بكه‌م؟
پێنووس: من دڤێت ئه‌ڤ تشتێن ته بۆ من گوتین بكه‌ینه نڤیسینه‌ك داكو بهێنه خواندن، ده‌ست بده من و ده‌ست بنڤیسینێ بكه!
شه‌ڤیار: لێ تۆ دێ بداوى هێى!
پێنووس: مه‌كسیم گوركى دبێژیت: “ئه‌زێ بوویم دا نه‌رازیبوونا خۆ دیاربكه‌م” ….. (ئه‌لبێرت كاراكو) دبێژیت: “كارێ من نه‌ڤیانا خه‌لكى یه”..
(گوته‌ى) دژیێ حه‌فتی سالیێدا گۆت: ” ئه‌زێ بوویم دا مه‌نده‌هوشبن”…
(نیچه‌ى) ژى دبێژیت: ” سه‌ربۆر و به‌رسڤ، ژیانا من هه‌مى ب هندێڤه بۆرى”.. ئه‌ز ژى یێ بویم دا بۆ هندێ ب داوى بهێم.
شه‌ڤیار: پا ئه‌ز بو چ بویمه؟ دا هزركه‌م؟
پێنووس: نه‌خێر دا نه‌مرى، هه‌ر ئێك بۆ هندێ بویه.
شه‌ڤیار: به‌لێ پا؟!!
پێنووس: مه چ ده‌م نه‌مایه ده‌ست ب نڤیسینێ بكه.
شه‌ڤیار: د ده‌مه‌كێ كورتدا ته جهه‌كێ مه‌زن د دلێ مندا گرت، لێ داویا ته دده‌ستێ مندایه…
پێنووس: ئه‌ڤه سروشتێ هه‌بوونێیه، زوى عه‌شق په‌یدا دبیت و ل داویێ قۆربانى دهێنه دان، ئه‌ز ژى قوربانیێ هزرا ته‌مه، ل یاسایێ بوریم، هیڤیا من ئه‌وه هین ژى ل ئێك و دوو ببورن.
شه‌ڤیار: خه‌له‌تیا مه ئه‌وه ئه‌م ئه‌زمانێ خۆ ژ پێنووسێ خۆ درێژتر لێ دكه‌ین ئه‌گه‌ر ئه‌ڤه نه دبو دوماهیك.
پێنووس: له‌زێ بكه ده‌ست ب نڤیسینێ بكه، ده‌م گه‌له‌كێ دڕنده‌یه دلوڤانیێ ب كه‌سێ نابه‌ت، ب نڤیسه به‌رى پیرببى و ژیێ ته ب داوى دهێت.
(ئه‌ڤ په‌یڤه دووباره دبن بۆ چه‌ند ساته‌كا، شانۆ تارى دبیت، ڕۆناهى هه‌لدبیت شه‌ڤیار ل سه‌ر مێزێیه ژوێ خه‌وێ هشیار دبیت و ده‌ست ب نڤیسینێ دكه‌ت).
(دویماهى)
کورتە شانۆگەرییا “خەونەکا بێ خەو”
