نه‌جمه‌ددین نێروه‌یی

هه‌ر لسه‌ر زیاره‌تان، دوو روویاتی و جیاوازی دیاره‌، بۆ هه‌ژاره‌كێ ب تلێن ده‌ستانه‌ و بۆ به‌رپرسه‌ك، خۆلامه‌ ئاغایه‌ك و زه‌نگینه‌كێ ب هزارانه‌، ئه‌ڤه‌ ژ بلی ل هولا تازیێ ژی كورسیكێن پێشیێ داگیركری نه‌، ئه‌زبه‌نی نه‌، سه‌یدانه‌، خۆدان به‌رگیز و شاشك به‌ستی نه‌، ئه‌ز هه‌ر شه‌رم دكه‌م وێ بێژم و باسێ وێ دیاردا كرێت و یا ب جیاوازی بكه‌م، بۆ ئه‌ڤێن من ل پێشیێ گۆتین دێ سه‌د ده‌ست و ب به‌ژن و بالڤه‌ رابنه‌ڤه‌ و ب ده‌نگه‌كێ بلند (ئه‌زبه‌نی تو ب خێر هاتی، سه‌یدایێ فلان كه‌س تو خێر هاتی، و…هتد) و بۆ هه‌ژاره‌كێ ژی ب زۆری لێڤێن وان لسه‌ر ئێك رادبن و نم نمه‌كێ دكه‌ن و خۆ ده‌ستێ وانژی بتنێ ب تبلان بخێرهاتنێ دكه‌ن، هه‌ر خۆ فاتیحه‌ و دوعا دگه‌ل فه‌قیره‌كێ ناخۆینن و نابێژن. ئه‌ڤه‌ ژ بلی وێ زێده‌ رووییا د خۆارن و ڤه‌خۆارن و گه‌له‌ك تشتێن دی دا دهێته‌ كرن. وه‌ره‌ ژ بلی كۆ خه‌ما خۆدانێ تازیێ كه‌سه‌ك ژ ده‌ست دا، خه‌ما ده‌ینێن تازیێ ژی بكه‌ڤنه‌ سه‌ر (هنده‌ك جار بۆ روومه‌تی و هنده‌ك جار ژی ژ نه‌چاری كۆ خه‌لكه‌كێ رازی بكه‌ت و یا بوویه‌ دیارده‌).
مه‌ به‌ریا نها دگۆت، ل تازییان دبیته‌ هولكا ژنان و وێجا ده‌ست ب غه‌یبه‌تێ دكرن، ئه‌ڤێ كراس و زێرێن خۆ نیشان ددان و یا دی كچا فلانی دخۆاست، ئه‌ڤێ برنج و ئاڤك نه‌ڤێن و یا دی ترشك و ئیپراخ دڤێن و ….هتد. لێ نها زه‌لام ژ وان خرابتر لێ هاتینه‌، هه‌ر سێ چاره‌ك دێ سه‌رێن خۆ پێكڤه‌نن و پسه‌ پس و ده‌نگێ كه‌نی بسه‌ر هولا تازیێ ڤه‌ دچیت، ئه‌و كیسكێ خۆ یێ تووتنێ دهاڤێژیته‌ به‌ر یێ دی و یێ دی تزبیێن خۆ با دده‌ت و خۆ دێ بێژی یێ گۆڤه‌ندێ و لسه‌رێ به‌رچه‌مكێ.، یانكۆ ب ده‌هان دیاردێن دی یێن كرێت و ب جیاوازی هه‌نه‌ كۆ كارتێكرنه‌كا خراب ژ لایێ جڤاكی، ده‌روونی، ئابۆری، ساخله‌می و…هتد. دكره‌ سه‌ر كومه‌لگه‌هێ ب گشتی. بۆ نموونه‌ ژی، ب دوو رۆژان كومه‌كا مرۆڤان دهێلنه‌ به‌تال و گرێدایی، ژ بلی په‌یداكرنا قه‌ره‌بالغیا هاتن و چوونێ و شه‌رم كرن ل ئێكدۆ.
ب نێرینا من، هه‌ر چه‌وا كۆرۆنایێ بۆ مه‌ گه‌له‌ك تشت دیار كرن كۆ د زێده‌نه‌ و زیانێن هه‌بوونا وان ژ مفایێن وان پترن، یانكۆ هه‌بن یان نه‌بن، چ ناهێته‌ گوهرین، هه‌ر ره‌نگه‌ نه‌بوونا وان گه‌له‌ك باشتر بیت. بۆ نموونه‌ ژی هه‌بوونا تازییان كۆ چ تام و قالبێ تازییان نه‌هێلایه‌ و هه‌ر وه‌كۆ به‌رێ ب زڤریته‌ڤه‌ و هه‌ر لسه‌ر زیاره‌تان ب داوی بهێت گه‌له‌ك باشتره‌، ئه‌و بارگرانیا لسه‌ر خۆدانێ تازیێ و كومه‌لگه‌هێ گشتی ژی نامینیت. ئه‌ز باوه‌رم كۆ خۆدا ژی ل ڤێ روومه‌تیا تازیان رازی نینه‌ و پتر خۆ نیشاندانه‌ ژ خۆدانێ تازیێ و ئه‌و كه‌سێن دچنه‌ تازیێ ژی.
ل دوماهیێ ژی، ئه‌ز بناڤێ خۆدانێ مری سۆپاسیا هه‌وه‌ دكه‌م كۆ هه‌وه‌ خه‌ما مه‌ سڤك كری و ل تازیا مه‌دا به‌شدار بووی و ل هه‌ر جهه‌كێ لسه‌ر سه‌ر و چاڤان هاتن، خۆدێ خێرا هه‌موو لایه‌كێ بنڤیسیت (چ پێ نه‌ڤێت دێ كارێ مه‌لای ژی هه‌ر لسه‌ر زیاره‌تان ب ڤی ره‌نگی ب داوی هێت، حه‌وجه‌ ناكه‌ت دوباره‌ خوتبه‌كا دی ل هولا تازیێ ڤه‌ ببێژیت).

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *