نڤێسين: سيپان عه‌بدۆلا
پڕانییا کۆڤارێن زانستی یێن جیهانی، هەروەسا رێکخراوا ساخلەمیێ یا نێڤدەولەتی و پزیشکێن تایبەتمەند، بۆ هندێ دچن کو ئەڤە ڤایرۆسەکێ سرۆشتییە وەک گەلەک ڤایرۆسێن ژبەری نها و ژ گیاندارەکێ بۆ یەکێ دی و پاشی بۆ مرۆڤی هاتییە ڤەگوهاستن، لێ چ ل تیۆرا پیلانگێڕیێ بکەین کو د لەپێن دووڤکەفتیێن وێ ژی دا روهن بوویە.
1. ل دەستپێکێ، دەمێ چین تووش بووی، دگۆتن؛ ئەڤە ڤایرۆسەکێ ژێدەر-ئەمریکییە، پشتی رێژەیا تووشبوونێ ل ئەمریکا ژ هەمی وەلاتان بۆراندی و چینێ مەزنترین کەرەنتینەکرنا ب کوتەکی د مێژوویێ دا سەپاندی، کاسێتا خۆ ب ١٨٠ پلەیان بەروڤاژیکرن و رۆژهەلات و چین ب ژێدەرێ دروستکەرێ ڤایرۆسی دان زانین.
تو تشتەکێ و هەڤدژێ وی تشتی د ئێک دەم دا تەبەنی بکەی، شاشییەکا لوژیکییە.
2. ل دەستپێکێ، دەمێ ل چینێ بەلاڤبووی، دگۆتن؛ ئەڤە سزایێ خوداییە -ئانکۆ ژێدەرێ وی ئەسمانە- ژ ڤەرێژا زۆردارییا چینییان ل ئیگۆران، پشتی گەهشتییە وەلاتێن وان، گۆتن ئەڤ ڤایرۆسە یێ دەستکردە و بەرهەمێ سەرمایەداریێ (شەیتان)ییە و پیلانە ل دژی عەرەب و بوسرمانان. نە هەر بوویەرەکا د دەمەکێ سنووردار دا و ب ئاوایەکێ نەئێکسەر کەفتە د بەرژەوەندییا لایەکێ دا، ئانکۆ ئەو ئالی دروستکەرێ وێ یە ب تایبەت پشتی پاشی دچیتە د بەرژەوەندییا ئالییەکێ هەڤدژ دا.
تو تشتەکێ و هەڤدژێ وی تشتی د ئێک دەم دا تەبەنی بکەی، شاشییەکا لوژیکییە.
3. دگۆتن کو کەسێن بلند د سیاسەتا وەلاتێن سەرمایەداری دا ناگریت و باندۆرێ ل ئابوورێ وان ناکەت و ب تنێ ئەڤ ڤایرۆس بۆ هەڤدژێن وانە، لێ سەرۆک وەزیرێ بریتانیا و وەزیرێ ساخلەمییا وی وەلاتی و چەندین سیاسەتمەدارێن رۆژئاڤایی ب خۆ گرت، ئانکۆ ئەو دیتنا هندەک ژ ئۆلدار و چەپان بەلاڤدکری شاش دەرکەفت، ئەگەر دێ چاوا سەرۆک وەزیرێ ژ یەمینیێن نەتەوەیی و سەرمایەدار و دژی کۆچبەرییا خەلکێ رۆژهەلاتا ناڤین گریت ژبەری رایەدارێن پارتێن چەپ یێن کو دگەل کۆچبەرییا وان و دژی سەرمایەدارییا جیهانی. هەروەسا دڤێت زیانێن زەبەلاح یێن مەزنە کۆمپانیێن جیهانێ ژبیرنەکەین.
4. دگۆتن کو دانعەمر بارگڕانینە ل سەر ئابوورێ وان، لێ ژ دوهی وەرە چەند گەنجێن ساخلەم ژی ب ڤی ڤایرۆسی ل ئەورۆپا مرن و نووچەیێن وان بەلاڤبوون، چەوا بۆ دانعەمرایە و گەنج ژی و خودانێن نەخۆشیێن دومدرێژ ژی د مەترسیێ دانە و سەرکردە و بەرپرسێن وان وەلاتان ب خۆ ژی ژ وێ مەترسیێ د ڤەدەر نینن، ما بەرئاقلە ئەو تشتەکێ دژی ساخلەمییا خۆ ب خۆ و ئابوورێ خۆ و وەلاتێن خۆ داهێنن ل دەمەکێ زەنگا مەترسیێ ل سەر ئابوور و ساخلەمییا گشتییا ئەمریکا و پرانییا وەلاتێن ئەورۆپی هات لێدان و بوونە مەترسیترین جهێن بەلاڤبوونا ڤایرۆسی ل نها، ما کی د وەلاتێن پێشکەفتی دا، سەرپێچییا رێسایان دکەت و گۆڕێ خۆ ب دەستێن خۆ دکۆلیت؟!