د ده‌مێ نها دا ژبه‌ركو ڕه‌وشا دونیایێ ئاوارته و جودایه، مرۆڤ ب ته‌مامى كه‌تینه د مال و قولاچێن خوه یێن ڕاسته‌قینه دا؛ هه‌روه‌سا ده‌م ژى وه‌ك جاران نینه، لێ به‌لێ ده‌م پڕ و زێده. له‌ورا ده‌رفه‌ته‌ك گرینگ و گونجاییه ژبۆ مرۆڤێن حه‌زا خواندن و كریارا نڤێسینێ هه‌ین، كو ئه‌ڤى ده‌مى ب كێلیكێن قورتالكه‌ر بزانبن و ته‌ڤایا كارێن خوه یێن هه‌لاویستى و پلانكرى جێبجێ بكه‌ن. ئه‌ز بخوه وه‌ك كه‌سه‌ك زێده‌تر خوانده‌ڤان، د ده‌مێ نها دا مژویلى پرۆسێسا خواندنێ مه. هه‌روه‌سا كورته‌باسه‌ك د ده‌ستێن من دایه؛ ب هێڤیمه د ئه‌ڤان ڕۆژاندا ب داویى بهینم. لڤێرێ ئه‌ز دخوازم تشته‌كێ ژبۆ خوینه‌رێن مالپه‌رێ (خه‌ده‌نگ) ببێژم، كو دگه‌ل من بخوه د په‌رتووكخانه‌یا من یا تایبه‌تدا ڕویدایه. ئه‌و ژى ل ده‌مێ لێگه‌ریانێ ل هنده‌ك ناڤونیشانێن په‌رتووكان ئه‌ز ڕووبڕوویى چه‌ندین په‌رتووك و لێكولینان بووم، كو من چه‌نده‌ك ژێ خواندینه و ماینه نیڤه‌روو یان من ژبۆ خواندنێ ده‌ستنیشانكرینه و ده‌مێ وان نه‌بوویه بخوینم. ب خۆشحالى ب سایا سه‌رێ ئه‌ڤى ده‌مى و نه‌بوونا ده‌واما فه‌رمى؛ جارده‌ك دیتر به‌رێ من ب ئه‌وان په‌رتووكان كه‌ڤت و د هزرا خوه دا من پلانه‌ك ژ دلكارانه ژبۆ ئه‌وان په‌رتووكان دارشت. لڤێرێ بانگ ل خوانده‌ڤانێن (خه‌ده‌نگ) دكه‌م، كو قه‌ستا په‌رتووكخانه‌یێن خوه بكه‌ن، ژبه‌ركو هنده‌ك په‌رتووك ل به‌ندا ده‌ستڤه‌دان و ڕۆنییا چاڤێن هه‌وه‌نه.
ئەرێ هەوە ئاگەهـ ژ هاوارێن پەرتووکان هەنە !
