شانۆگه‌رییا:
ڤالاهی
نڤیسین: یوجێن یونسكو
وه‌رگێران: سه‌رحان ئه‌حمه‌د سه‌رحان
“ئه‌ڤ شانۆگه‌رییه ل سالا (7/4/1966) ل سه‌ر ستێجێ (ئودیون دوفرانس) هاتیه نمایشكرن، ژ ده‌رهێنانا (ژان لوی بارو)”
كه‌سایه‌تی
هه‌ڤال
ئه‌ندامێ كومه‌لگه‌هێ (هه‌ڤژین)
هه‌ڤژینا ئه‌ندامێ كومه‌لگه‌هێ
خزمه‌تكار
(ژۆرا پێشوازیایه .. مالا كه‌سه‌كێ خودان پله‌یه، ژ چینا بلنده .. قه‌نه‌په‌كا درێژ یان چه‌ند قه‌نه‌په‌ك و ژماره‌كا كورسیان ل ره‌خێن شانۆیێ هاتینه دانن .. ئێك ژ وان ڕه‌نگێ وێ یێ كه‌سكه، ستایلێ وێ یێ كلاسیكییه ل نیڤا ژورێیه .. چه‌ندین باوه‌رنامه ب دیواریڤه دهه‌لاویستینه .. ب فونته‌كێ مه‌زن دناڤدا نڤیسایه (دكتورا شانازیێ) ئه‌وا ل بن وێ ژی ب هویری نڤیسایه .. هنده‌ك باوه‌رنامێن دی ژی هه‌نه لێ قه‌بارێ وان بچوكتره ل سه‌ر نڤیسایه (دكتورا) ئه‌و ژی ل ده‌وروبه‌رێن باوه‌رنامێن دی دهه‌لاویستینه .. ده‌رگه‌ه ل ده‌ستێ راستێیه)
(رۆناهی هه‌لدبیت (هه‌ڤال) ل هیڤیا هه‌ڤژینا ئه‌ندامێ كومه‌لگه‌هێیه .. ژ جل و به‌رگێن وی دیار دبیت كۆ كه‌سه‌كێ مه‌زنه، چاكیته‌كێ قاتی یێ خه‌ت خه‌ت لبه‌ره، كۆلاڤ و سیروانا خۆ یێ هلگرتی .. هه‌ڤژینا ئه‌ندامێ كومه‌لگه‌هێ ب ژۆر دكه‌ڤیت، ژ سه‌روبه‌رێ وێ دیار دبیت ژنو یا ژ خه‌و هشیاربووی .. روبه‌ك و نه‌عاله‌كا مالێ ل به‌ره)
هه‌ڤژین: چییه .. هه‌ڤالێ من .. دێ زوی بێژه
هه‌ڤال: ئه‌ز نزانم دێ چه‌وا ڤب تشتی بۆته بێژم؟
هه‌ڤژین: ئه‌ز تێگه‌هشتم
هه‌ڤال: من دوهی ب شه‌ڤ ده‌نگوباس زانین .. من نه‌دڤیا ئه‌ز تله‌فونا ته بكه‌م، لێ باوه‌ربكه من نه‌شیا ئه‌ز خۆ زێده‌تر بگرم، ل من ببوره چونكی من تۆ هشیاركر دا كۆ ئه‌ز ڤی ده‌نگوباسیهه بگه‌هینمه ته.
هه‌ڤژین: نه‌شیا ب سلامه‌تی خۆ ژ ڤێ ئاریشێ ده‌ربێخت! ئاه ئه‌ڤه چ ئاریشه‌یه، هه‌تا دووماهیك چركه ژی ئه‌زیا بهیڤی بووم.
هه‌ڤال: ره‌وشیا خرابه، ل ته دگه‌هم .. ل سه‌ر هندێرا وی هنده‌ك ده‌لیڤێن سه‌ركه‌فتنێ هه‌بوون .. ئه‌گه‌ر ته راستی بڤێت ئه‌و ده‌لیڤه دكێم بوون ، پێدڤی بوو مه پێشبینیا هندێ كربا.
هه‌ڤژین: من ئه‌ڤ هزره نه‌دكر، هه‌ر یێ سه‌ركه‌فتنی بوو، وی هه‌رده‌م خۆ ژ ئاریشا قورتال دكر.
هه‌ڤال: پێدڤی بوو ته ره‌وشێن خراب دا نه‌هێلابا.
هه‌ڤژین: ته چ دڤێت .. ته چ دڤێت! ئه‌ڤ چه‌نده گه‌له‌كا ب ئێشه.
هه‌ڤال: خۆ بهێز بێخه .. هه‌ڤالا من یا هێژا .. ژیان یا هوسایه …
هه‌ڤژین: ئه‌ز نه‌یا باشم .. ترسم دلێ من بهێته گرتن (دكه‌فیته سه‌ر ئیك ژ وان كورسیكا)
هه‌ڤال: (هاریارییا وێ دكه‌ت و ده‌ستێ خو ل ئاله‌ك و ده‌ستێن وێ دده‌ت) من ئه‌ڤ ده‌نگوباسه ب شێوه‌یه‌كێ ره‌ق گه‌هانده ته .. لمن ببوره!
هه‌ڤژین: ته‌یا درستكر .. یا پێدڤی بوو ئه‌ز بزانم.
هه‌ڤال: ته په‌رداغه‌كا ئاڤێ دڤێت (گازی دكه‌ت) په‌رداغه‌كا ئاڤێ (بۆ هه‌ڤژینێ) پێدڤی بوو من ب شێوه‌یه‌كێ سڤكتر گه‌هاندباته.
هه‌ڤژین: باوه‌ربكه چ نه‌دهاته گوهۆڕین.
(خزمه‌تكار ب ژۆر دكه‌ڤیت و په‌رداغه‌كا ئاڤێ ده‌ستێ وێ دایه)
خزمه‌تكار: چ چێبوویه .. بوچی ره‌وشا خانما من یا خرابه؟
هه‌ڤال: (په‌رداغا ئاڤێ ژ ده‌ستێ وێ وه‌ردگریت) مه ب هێله ب تنێ .. ئه‌ز دێ ئاڤێ ده‌مێ .. دێ ره‌وشا وێ ژی باشتر بیت .. من ده‌نگوباسه‌كێ نه‌خۆش گه‌هاندنێ ..
خزمه‌تكار: ئه‌رێ؟ .. مامۆستا؟
هه‌ڤال: (ئاخفتنا وێ دبریت) ته ژی دزانی؟
خزمه‌تكار: من نه دزانی .. به‌س ژ سه‌روچاڤێن ته دیاره!
هه‌ڤال: مه بهیله ب تنێ
(خزمه‌تكار دچیت و دگه‌ل چوونا خۆ دبێژیت)
خزمه‌تكار : هه‌ی هه‌ژارو …
هه‌ڤال: (بۆ هه‌ڤژینێ) ئه‌رێ تو باشتر لێهاتی؟
هه‌ڤژین: پێدڤییه ئه‌ز بهێزبم .. ئه‌ز هزرا وی دكه‌م .. هه‌ژاری .. من نه‌ڤیت ئه‌ڤ ده‌نگوباسه درۆژنامادا به‌لاڤه‌بیت .. ئه‌رێ تو دشێی ڤێ چه‌ندێ ژ وان ڤه‌شێری ..
هه‌ڤال: ده‌رگه‌هێ خۆ بگره و به‌رسڤا چ تله‌فونا نه‌ده ..
هه‌ڤژین: دێ هه‌ر ئه‌ڤ ده‌نگوباسه به‌لاڤه‌بن ..
هه‌ڤال: تۆ دشێی بچیه گوندی و پشتی چه‌ند هه‌یڤه‌كا ب زڤڕی، ل ده‌مێ ره‌وشا ته‌یا ده‌روونی باشتر لێدهێت و ل دویڤدا به‌رده‌وامیێ بده‌یه ژیانا خۆ یا ئاسای .. تشتێن هوسا زی دهێنه ژبیركرن.
هه‌ڤژین: هوسا بله‌ز ناهێته ژبیركرن .. ئه‌و ب خۆ ل هیڤیێ بوون ئه‌ڤ تشته روی بده‌ت .. دێ هنده‌ك ژ هه‌ڤالێن وی ب ڤی ده‌نگوباسی پێ نه‌خۆش بن .. به‌لێ یێن دی ئه‌ڤێن …
(ئه‌ندامێ كومه‌لگه‌هێ ب جلكێن خۆ یێن فه‌رمی ب ژۆر دكه‌ڤیت .. شیر یێ ب ره‌خێ ویڤه .. سینگێ وی هه‌تا نیڤێ ب خه‌لاتان یێ نخافتییه)
ئه‌ندامێ كومه‌لگه‌هێ: سه‌یره .. تو زوی یا ژ خه‌و هشیاربووی؟ تۆ ژی زوی یێ هاتی؟ چ چێبوویه .. ته ئه‌نجام دیتن؟
هه‌ڤژین: هه‌تكا مه چوو
هه‌ڤال: (بۆ هه‌ڤژینێ) ل وی گران نه‌كه هه‌ڤالا من یا به‌رێز (بۆ ئه‌ندامێ كومه‌لگه‌هێ) تۆ دئه‌زموونێدا ڤه‌مایی.
ئه‌ندامێ كومه‌لگه‌هێ: ئه‌ز ددوانافنجی یا گشتی ڤه‌مام! وان بێخێرا ئه‌ڤه دگه‌ل من كر.
هه‌ڤال: دره‌نگی شه‌ڤ به‌لاڤكرن.
ئه‌ندامێ كومه‌لگه‌هێ: ئانكو وانان دتاریێ دا ئێخستێ .. و كه‌سێ نه‌دشیا بخوینیت .. پا ته چه‌وا شیا ب خوینی؟
هه‌ڤال: هنده‌ك شه‌مالك هه‌بوون، ئه‌ز ئه‌ڤرۆ سپێدێ ژی ل وێرێ بووم، من لیسته ب وێرێ ڤه دیت .. هیشتا ژێڤه‌نه كربوون.
ئه‌ندامێ كومه‌لگه‌هێ: بلا ته به‌رتیل دابا ده‌رگه‌هڤانی .. ئه‌وی دشیا ژێڤه بكه‌ت.
هه‌ڤال: ئه‌ز ژی دا وه‌كه‌م .. به‌س مخابن .. پۆلیس ژی ل وێرێ بوون .. ناڤێ ته ژی یێ ل سه‌رێ لیستا ڤه‌مایا، ل وێرێ گه‌له‌ك قه‌ره‌بالغ بوو، هه‌میا دڤیا ئه‌نجاما بزانن.
ئه‌ندامێ كومه‌لگه‌هێ: كێ؟ به‌رپرسێن قوتابییا؟
هه‌ڤال: ئه‌و ب تنێ نینن …
هه‌ڤژین: وه‌دیاره كۆ هه‌می هه‌ڤرك و هه‌ڤكارێن ته ل وێرێنه .. هه‌ر كه‌سه‌كێ ته ب روژنامێ هێرش كریێ، قوتابێن ته یێن كه‌ڤن و نوی و هه‌ر كه‌سه‌كێ بۆ ماموستایێ پێشكێشكری و ژبه‌ر ته نه‌هاتیه وه‌رگرتن، ده‌مێ تۆ ئێك ژ ده‌ستایه‌یاهه‌لسه‌نگاندنێ بووی.
ئه‌ندامێ كومه‌لگه‌هێ: هه‌تكا مه چوو .. لێ ئه‌ز بێهیڤی نابم .. به‌لكی خه‌له‌تییه‌ك هه‌بیت!
هه‌ڤال: من هه‌می به‌ژدار دیتن و من دگه‌ل وان ئاخفت، نمرێن ته دانه من .. سفر ب بیركاریێ!
ئه‌ندامێ كومه‌لگه‌هێ: ئه‌ز ب كومكرن و ژێبرنێ یێ لاوازم ..
هه‌ڤال: سفر ب زمانێ گریكی و سفر ب زمانێ لاتینی!
هه‌ڤژین: (بۆ هه‌ڤژینێ خۆ) تۆ یێ شاره‌زای ب زانستێن مرۆڤایه‌تیێ و به‌ره‌ڤانیێ ژێ دكه‌ی و نڤیسه‌رێ په‌رتووكا “به‌ره‌ڤانی ژ مروڤایه‌تیێ و بهێز كرنا وێ”!
ئه‌ندامێ كومه‌لگه‌هێ: ببوره .. ئه‌ڤ په‌رتووكه ژ مروڤایه‌تییا نوییه (بۆ هه‌ڤالی) و زمانێ فه‌ره‌نسی .. نمرا من چه‌نده ب دارشتنا فه‌ره‌نسی؟
هه‌ڤال: نه‌ه سه‌د دانه‌ته .. نه‌ه سه‌د نمره.
ئه‌ندامێ كومه‌لگه‌هێ: به‌س ئه‌ڤه نمره‌یه‌كا بلنده و جهێ یێن دی ژی دگریت!
هه‌ڤال: ب مخابنیڤه نه‌خێر .. نمرا بلند دوو هزاره .. تو پێدڤی ب هزارێ دا نمریه‌كا نافنجی بینی.
ئه‌ندامێ كومه‌لگه‌هێ: وان لیسته گوهۆڕین!
هه‌ڤژین: وانا ژبه‌ر ته نه‌گوهۆڕینه .. تۆ هزر دكه‌ی كۆ كه‌ربێن وانا ژته ڤه‌دبن!
ئه‌ندامێ كومه‌لگه‌هێ: به‌لێ .. وانا گهۆڕین.
هه‌ڤال: وانا لیستا كه‌ڤن زڤڕاند .. ئه‌وا ل سه‌ر ده‌مێ ناپلیونی هاتیه چێكرن.
ئه‌ندامێ كومه‌لگه‌هێ: ئه‌ڤ لیستا تۆ ژێ دبێژی ده‌مێ وێ یێ ب سه‌رڤه چووی .. كه‌نگی هاتیه گوهۆڕین؟ ئه‌ڤ كریاره نه‌یا ئاساییه .. ئه‌ز به‌رپرسه‌كێ ده‌سته‌یا ئه‌زموونێن نافنجییا گشتی مه ل وه‌زاره‌تا په‌روه‌ردێ و كه‌سێ نه گۆتیه من, ئڤجا نه‌شێن بگوهۆڕن بێ ده‌ستویریا من .. ئه‌ز دێ سكاله‌یه‌كێ ل سه‌ر وان تۆماركه‌م .. ل جڤاتا ده‌وله‌تێ.
هه‌ڤژین: چییه؟ ته هشێن خۆ ژده‌ستدان؟ خوشتڤیێ من تۆ یێ پیربووی .. زوی تشتا ژبیردكه‌ی .. ته ده‌ست ژكاری به‌ردا ژبه‌ری تو پێشكێشی ئه‌زموونێ بكه‌ی .. دا كه‌س گومانان ژته نه‌به‌ت.
ئه‌ندامێ كومه‌لگه‌هێ: ئه‌ز دێ خۆ زڤرینمه‌ڤه.
هه‌ڤال: ئاخفتنێن ته چنینن .. تو دزانی كۆ زڤڕینا ته قه‌ت و قه‌ت نابیت!
هه‌ڤژین: تۆ بوچی ب ڤه‌مانا خۆ یێ مه‌نده‌هۆشی؟ ل ده‌مێ مرۆڤ یێ نه‌زان بیت نابیت پێشكێشی چ ئه‌زموونان بكه‌ت، ڤێجا ئه‌زموونه‌كا وه‌كی ڤێ .. هه‌ما نابیت نێزیك ژیك بیت، هه‌تا كۆ نه‌بیته خودان مێشكه‌كێ به‌رفره‌ه.
ئه‌ندامێ كومه‌لگه‌هێ: یا سه‌یر ئه‌وه .. من دگه‌ل دووسه‌دێن دی پێشكێشكر .. چێدبیت هه‌می زاروكێن من بن.
هه‌ڤال: زێده‌هیێ نه‌كه .. چونكی ته شیانێت چێكرنا دووسه‌د زاروكان نینه!
ئه‌ندامێ كومه‌لگه‌هێ: (دگه‌ل خۆ) نه ئه‌ڤ مروڤه‌یه بشێت هه‌دارێ بده‌ته من ..
هه‌ڤژین: پێدڤی بوو ته پێشكێش نه‌كربا .. به‌ری هنگێ من گۆت بوو ته پێدڤی ب ڤێ چه‌ندێ ناكه‌ت .. به‌س ته دڤیا هێش ناڤێن مه‌زن بهه‌لگری و بێ مفا .. نه تو فێردبووی نه تۆ دروینشتی .. ما تۆ ژ كیڤه پێدڤی ب ڤێ باوه‌رنامێ بووی؟ هه‌می تشت به‌رزه بوون .. ئه‌ڤ ئاریشه یا مه‌زن، ره‌وشه‌كا خرابه .. ته باوه‌رناما دكتورایێ هه‌یه و ته ده‌ستویرناما زانكۆیێ هه‌یه و ته باوه‌رناما ته‌مامكرنا خواندنا بنه‌ره‌ت ژی هه‌یه و دئه‌زموونا به‌شێ ئێكێ یێ به‌كه‌لوریوسێ ژی ده‌رچووی …
ئه‌ندامێ كومه‌لگه‌هێ: كێشه‌كا، ڤالاهیه‌كا هه‌ی!
هه‌ڤژین: ئه‌ڤه ل هزرا كه‌سێ نه‌بوو.
ئه‌ندامێ كومه‌لگه‌هێ: من ئه‌ڤ چه‌نده دزانی و هه‌ر كه‌سی ژی دشیا بزانیت .. چونكی ل ده‌مێ ئه‌ز چویمه رێڤه‌به‌ریا زانكویێ و من داخوازا وێنه‌یه‌كێ ژ باوه‌رناما زانكویێ كری .. به‌رپرسا ب كه‌یف و خۆشی گۆته من: هێژایێ مه .. ئه‌ندامێ كومه‌لگه‌ها زانایان .. ره‌وشه‌نبیرێ مه .. ماموستایێ مه، من ژی گوتێ به‌سه .. ئه‌و ژی چوون لێبگه‌رن .. به‌لێ ل ده‌مێ به‌رپرسێ گشتی زڤڕیه‌ڤه، ژ سه‌ر و سیمایێ وی دیار بوو كۆ شه‌رمه‌ك یا دچاڤێن ویدا .. ب شه‌رمه‌كا مه‌زن گۆته من: تشته‌كێ سه‌یر هه‌یه .. گه‌له‌ك سه‌یره .. هین هه‌می یێن ده‌رچووین لێ باوه‌رنامه .. باوه‌رنامه ئێدی بكێر ناهێن .. من ژی پرسیارا وی كر چ ئه‌گه‌ره .. گۆتی ڤالاهیه‌كا كه‌فتیه دسیسته‌مێ په‌روه‌رده و فێكرنێدا ئه‌ز نزانم چه‌وا ئه‌ڤ چه‌نده رویدایه، ته ناڤێ خۆ یێ تۆماركری دكولیژا ئادابێ دا، به‌لێ پا تۆ ژ ئه‌زموونا به‌شێ دووێ یێ به‌كه‌لوریوسێ ده‌رنه‌چوویی!؟
هه‌ڤال: ڤێجا چ؟
هه‌ڤژین: ئانكو باوه‌رناما زانكۆیێ ژكار ئێخستن؟
ئه‌ندامێ كومه‌لگه‌هێ: نه‌خێر .. ئانكو نه هۆسایه .. ب تنێ هاته راوه‌ستاندن .. ل دویڤدا گۆتنه من: ئه‌م دێ باوه‌رنامێ ده‌نه ته، ئه‌گه‌ر هات و ته پێشكێشكی ئه‌زموونا به‌كه‌لوریوسێ كر .. نۆرماله تۆ دێ هه‌ر ده‌رچی، ژبه‌ر هندێ یا پێدڤی بوو ئه‌ز ڤێ ئه‌زموونێ بكه‌م.
هه‌ڤژین: تۆ یێ پێدڤی نه‌بووی .. لێ ته دڤیا تشته‌كێ بكه‌ی .. تو نه‌شیایه خۆ .. هه‌ر چ كه‌سێ ل جهێ ته با، پێدڤی ب باوه‌رنامێ نه‌دبوو و كه‌سێ باوه‌رنامه ژ ته نه‌خوازتینه.
ئه‌ندامێ كومه‌لگه‌هێ: راستی ل ده‌مێ رێڤه‌به‌رێ زانكۆیێ گۆتییه من ته باوه‌رنامه نه‌وه‌رگرتیه من گۆتێ .. نه چێنابیت .. من راستی نه‌دزانی و من گه‌له‌ك خۆ وه‌ستاند هه‌تا كۆ بهێته بیرا من .. ئه‌رێ من پێشكێشكربوو ئه‌زموونێ یان نه؟ و ل دویماهیێ هاته بیرا من .. من پێشكێشكر نه‌كریه .. باش دهێته بیرا من، وێ روژێ په‌رسیڤ ل من بوو.
هه‌ڤژین: وه‌كی هه‌رجار تۆ یێ سه‌رخۆش بووی …
هه‌ڤال: هه‌ڤالا من یا به‌رێز .. هه‌ڤژینێ ته .. نه‌دڤیا ڤالاهیه‌كێ بێخته بابه‌تی .. مانێ هێشتا وژدانا وی یا ساخه.
هه‌ڤژین: تۆ هێشتا وی نانیاسی .. ئه‌و نه‌یێ هوسایه .. وی ب تنێ مه‌زنی و بها دڤێت .. نمرێن بلند دڤێت .. چ جارا تێرنابیت .. وی دڤیا ڤێ باوه‌رنامێ ژی ب دیواری ڤه‌كه‌ت دگه‌ل یێن دی .. ما ئه‌ڤه دێ چ زێده و كێم كه‌ت؟ كه‌س به‌رێ خۆ ناده‌ته باوه‌رنامێ .. ب شه‌ڤێ ب تنێ دهێت و هزرێن خۆ تێدا دكه‌ت .. من گه‌له‌ك جاران دیتییه ب دزیكیڤه دهێته دناڤ ڤێ ژۆرێڤه یان دێ وان دهه‌ژمێریت یان هزرێن خۆ تێدا دكه‌ت.
ئه‌ندامێ كومه‌لگه‌ه: پا ئه‌ز چ بكه‌م ئه‌گه‌ر خه‌وا من نه‌هێت؟
هه‌ڤال: بابه‌تێن زانكۆیێ گه‌له‌ك جاران دهێنه زانین .. ژبه‌ر پلا ته‌یا بلند دشیان دابوو بزانی .. پێدڤی بوو ته ماموستایه‌ك یان ژی ئێك ژ قوتابێن خۆ فرێكربا دا ل شینا ته ئه‌زموونێ بكه‌ن و ئه‌گه‌ر ته ڤیا تۆ ب خۆ ئه‌زمونێ بكه‌ی لێ بێ كۆ بزانن كۆ ته بابه‌ت به‌ری هینگێ یێ زانی، تۆ دا خزمه‌تكارێ فرێكه‌ی بۆ ته ژ سویكا ڕه‌ش بكڕیت یان ل هه‌ر جهێ لێ بهێنه فرۆتن.
ئه‌ندامێ كومه‌لگه‌هێ: ئه‌ز تێناگه‌هم چه‌وا ئه‌ز ب زمانێ فه‌ره‌نسی ڤه‌مام؟ من بابه‌ت ب سێ لاپه‌ران چاره‌سه‌ركر و من بهویری باسی ل هزرێ كر .. من باسی په‌یوه‌ندیێن مێژووی كر و ب درێژی و ب دروستی .. هه‌ر چه‌وا بیت شڕۆڤه‌كرنه‌كا باش بوو ئه‌ز نه ژ هه‌ژی نمره‌كا نزمم.
هه‌ڤال: بیرا ته ب بابه‌تی دهێت؟
ئه‌ندامێ كومه‌لگه‌هێ: (هزرێن خۆ دكه‌ت)
هه‌ڤال: هه‌تا بیرا وی ل بابه‌تی ژی ناهێت!
ئه‌ندامێ كومه‌لگه‌هێ: به‌لێ (هزرێن خۆ دكه‌ت) نه‌خێر.
هه‌ڤال: بابه‌ت كارتێكرنا وێنگرێن چه‌رخێ رێنساس ل سه‌ر رۆمان نڤیسێن فه‌ره‌نسی ل ده‌مێ كۆمارا سیێ .. لاپه‌رێ بابه‌تێ ته یێ ل ده‌ف من .. ها بۆ ته دارشتنێا خۆ بگره.
ئه‌ندامێ كومه‌لگه‌هێ: (لاپه‌ری دگریت و دخوینت) دۆزا بنیه‌مین .. پشتی كۆ بنیه‌مین ژ دادگه‌هێ ب خلاسی ده‌ركه‌فتی، هاریكارێ دادوه‌ری به‌رامبه‌ر سه‌رۆكی رابوو ل سه‌ر خۆ.. چونكی دگه‌ل بووچونا وی نه‌بوو، كوشتن و حوكمكرن و مافێن وی یێن شارستانی راوستاندن و ب كۆژمه‌كێ پارا هاته سزادان ئه‌و ژی نه‌ه سه‌د فرانك.
هه‌ڤال: و پاش ته نه‌ه سه‌د نمره وه‌رگرتن ..
ئه‌ندامێ كومه‌لگه‌هێ: (به‌رده‌وامیێ دده‌ته خواندنا خۆ) سزایێ بنیه‌مینی ده‌سپێكر .. بنیه‌مینی سزایێ خۆ ده‌سپێكر؟ ئه‌ز ئه‌ڤا مایی تێناگه‌هم .. ده‌ستخه‌تێ من هه‌رێ كرێته خۆ ژ ده‌مێ ئه‌ز بچویك و هه‌تا نوكه .. پێدڤی بوو وان بۆ من ئامیرێ نڤیسینێ ئینابا ..
هه‌ڤژین: (لاپه‌را ژ ده‌ستێ وی دكێشیت) ده‌ستخه‌ت نه‌یێ كرێته .. خیچكێن ته و ئه‌ڤ پنیێن حبرێ یێن ل سه‌ر لاپه‌ری ..خۆ ته چ كربا نمره‌ك ژی زێده نه‌دبوو.
ئه‌ندامێ كومه‌لگه‌هێ: (ده‌قی دبه‌ت و به‌ردوامیێ دده‌ته خواندنێ) ده‌ستهه‌لاتا بنیه‌مینی ده‌سپێكر .. پۆلیسا ئه‌و دورپێچكر و جلكێن سه‌یر ل به‌ر بوون .. ژیان تارییه .. نزانم یا مایی چییه؟ به‌رچاڤكێن من ژی دگه‌ل من نینن.
هه‌ڤژین: چ په‌یوه‌ندی دناڤ ئه‌وا ته نڤیسی و بابه‌تی نینن!
هه‌ڤال: هه‌ڤژینا ته راست دبێژیت، به‌رێز .. ئه‌ڤا ته نڤیسای چ په‌یوه‌ندی دگه‌ل بابه‌تی نینه.
ئه‌ندامێ كومه‌لگه‌هێ: به‌لێ، به‌س ب شێوه‌یه‌كێ ڤه‌شارتی.
هه‌ڤال: ڤه‌شارتی ژی نینه.
ئه‌ندامێ كومه‌لگه‌هێ: دبیت من بابه‌ته‌كێ دی نڤیسابیت.
هه‌ڤال: ژبلی وی چ بابه‌تێن دی نه‌بوون.
ئه‌ندامێ كومه‌لگه‌هێ: خۆ ئه‌گه‌ر ئێك بابه‌ت بیت .. من بابه‌ته‌كێ دی ب شێوه‌یه‌كێ باشتر نڤیسی، ئه‌ز دكویراتییا مێژووی دا چووم ، دڤێ چیرۆكێ دا، من بهایێ هه‌ر تشته‌كێ دایێ، من ره‌فتارێن هه‌ر تشته‌كێ نیشا دا، من ره‌وشا وان دیاركر، من په‌ردا ڕه‌ش راكر و هه‌می مه‌به‌ست دیاركرن و من دویماهی ژی بوو دانات .. (به‌رێ خو ده‌تێ) ئه‌ز یامای تێناگه‌هم .. (بۆ هه‌ڤالی) نه‌شێم بخوینم.
هه‌ڤال: (به‌رێ خۆ ده‌تێ) یا ب زه‌حمه‌ته بخوینم، من به‌رچاڤكێن خۆ نه‌راكرینه.
هه‌ڤژین: (لاپه‌را ژ ده‌ستی دكێشیت) خاندنا وێ یا ب زه‌حمه‌ته .. هه‌ر چه‌نده چاڤێن من گه‌له‌گ دباشن .. ته خۆ وه‌سا نیشادایه كۆ تۆیێ دنڤیسی .. خیچ ڤیچن.
ئه‌ندامێ كومه‌لگه‌هێ: به‌لێ ، هه‌تا من دویماهیك یا نڤیسای و ئه‌ها ئه‌ڤه یا ل ڤێرێ .. هه‌ر وه‌كو تۆ دبینی ب پیتێن مه‌زن “دویماهی یان سزا” .. هۆسا نابیت ئه‌ز دێ پێكۆلێ كه‌م ڤێ ئه‌زموونێ نه‌هێلم.
هه‌ڤژین: ژبه‌ر كۆ ته بابه‌ته‌كێ دی یێ نڤیسی و ته ب شێوه‌یه‌كێ لاواز چێكر و ته ب تنێ ناڤ و نیشان نڤیسی .. ئه‌ڤ نمره ب مخابنی ڤه .. ژ ته زێده‌یه، ئه‌ڤجا تو دێ ب ڤێ دۆزێ ژی یێ كه‌فتیبی.
هڤال: دێ كه‌ڤی، هه‌ما به‌رێ خۆ ژڤی بابه‌تی بكێشه، بێهن ڤه‌دانه‌كێ وه‌ربگره.
ئه‌ندامێ كومه‌لگه‌هێ: تۆ هه‌می ده‌ما پشته‌ڤانییا وانا دكه‌ی.
هه‌ڤژین: ئه‌ڤه مامۆستانه دزانن چ دكه‌ن، كه‌س ژ گوڤێ نه‌ئیناینه‌ده‌ر و گۆتینێ دێ بیه مامۆستا .. وانان گه‌له‌ك باوه‌رنامه و خه‌لات وه‌رگرتینه و ئه‌و یاسایێن رێزمانێ دزانن.
ئه‌ندامێ كومه‌لگه‌هێ: و كێ یێ به‌ژدار بۆ دده‌سته‌كا زمانی؟
هه‌ڤال : بۆ بیركاریێ “خانم بینوم” و زمانێ گریكی مامۆستا “كاكوس” و زمانێ لاتینی مامۆستا “نیرون ” و هنده‌كێن دی.
ئه‌ندامێ كومه‌لگه‌هێ: ئه‌ڤه ژمن زاناتر نینن! .. ب زمانێ فه‌ره‌نسی كی دهات؟
هه‌ڤال: خاتینه‌كه وه‌ك سكرتێرا نڤیسینێ دگۆڤارا دوهیدا كار دكه‌ت.. ده‌سپێكا دوهی و ئه‌ڤرۆیه.
ئه‌ندامێ كومه‌لگه‌هێ: ئاهــا .. نوكه ئه‌ز تێگه‌هشتم .. ئه‌ز ڤێ باش دنیاسم .. ئه‌ڤ خۆلیسه‌ره نمره‌كا هۆسا دامن داكۆ تولێن خۆ ژمن ڤه‌كه‌ت .. چونكی ئه‌ز رازی نه‌بوم خۆ دپارتا وێ دا به‌ژدار بكه‌م .. وێ ژبه‌ر تولڤه‌كرنێ وه‌كر .. من شیان هه‌نه ئه‌ز ڤێ ئه‌زموونێ نه‌هێلم .. دێ ته‌له‌فونه‌كێ بۆ سه‌رۆكی كه‌م.
هه‌ڤژین: وه‌نه‌كه دێ هێشتا خۆ كه‌یه پێترانكێ خه‌لكی (بۆ هه‌ڤالی) رێكێ لێ بگره نه‌هێله ڤێ كریارێ ئه‌نجام بده‌ت .. ته ژمن پتر ده‌ستهه‌لات ل سه‌ر وی هه‌یه.
( هه‌ڤال هه‌ردوو ملێن خۆ بلند دكه‌ت ب رامانا نه‌بوونا ده‌ستهه‌لاتێ)
هه‌ڤژین: ته‌له‌فونێ نه‌كه.
ئه‌ندامێ كومه‌لگه‌هێ: دزانم ئه‌ز چ دكه‌م! (دگه‌ل ته‌له‌فونێ) ئه‌لو! سه‌رۆك .. سه‌رۆكێ من .. سپێده باش خاتین من دڤێت دگه‌ل سه‌رۆكی باخڤم .. ئه‌و ب خۆ، بابه‌ته‌كێ كه‌سایه‌تییه .. ئه‌لو .. “كۆل” ! ئه‌ڤه ئه‌زم گوهێ خو بده من .. ئه‌لوو!
هه‌ڤژین: هاا چ گۆت؟
ئه‌ندامێ كومه‌لگه‌هێ: (بۆ هه‌ڤژینا خۆ) بێده‌نگبه! (دگه‌ل ته‌له‌فونێ) تو ترانا دكه‌ی هه‌ڤالێ منێ به‌رێز .. تو ترانا دكه‌ی مانه؟
(ته‌له‌فونێ دانیت)
هه‌ڤال: چ گۆت؟
ئه‌ندامێ كومه‌لگه‌هێ: گۆت .. گۆت .. من ئێدی نه‌ڤێت ئه‌ز دگه‌ل ته باخڤم .. ده‌یكا من ناهێلیت ئه‌ز تێكه‌لیا قوتابیێن دووماهیكا پولێ بكه‌م و ته‌له‌فون دانات.
هه‌ڤژین: پێدڤی بوو ته ئه‌ڤ چه‌نده زانیبا! هه‌می تشت به‌رزه‌بوون .. ته چ كر؟ ته چ كر؟
ئه‌ندامێ كومه‌لگه‌هێ: ڤێجا چییه؟ من سه‌د وانه یێ ل زانكویا “سوربون” و “اكسفورد” و یا”ئه‌مریكی” یێن گۆتین و نڤیسینێن من ژی پتر ژ ده‌ه هزار دانه یێن ژێ هاتنه فرۆتن و سه‌دان ڤه‌كۆله‌را گرنگی دایه شڕۆڤه‌كرنا كارێن من و من دكتورا بلند ژ زانكویا “ئه‌مستردام” برییه و ل گه‌له‌گ په‌یمانگه‌هێن “لوكسمبروگ” .. من سێ جاران خه‌لاتێ نوبل وه‌رگرت .. و شاهێ سویدیێ مه‌نده‌هۆش بوو ژبه‌ر شاره‌زاییا من .. ئه‌و هه‌می سوپاسنامه و باوه‌رنامه و ل دویماهیێ ب ئه‌زموونا به‌كه‌لوریوسێ ب كه‌ڤم!
هه‌ڤژین: دێ بینه پێترانكێن خه‌لكی.
( ئه‌ندامێ كومه‌لگه‌هێ شیرێ خۆ ب قایشڤه دئێخیت و دهاڤێژته به‌ر پێیا ،ئه‌و ژی دكه‌ڤیته سه‌ر چوكێن خۆ)
هه‌ڤال: (ل ده‌مێ قایش و شیری رادكه‌ت) ئه‌ز دێ ڤان باش هه‌لگرم بیرهاتنن بۆ بهایێ جهێ ته.
(ئه‌ندامێ كومه‌لگه‌هێ ب تۆره‌ی و دیناتی هه‌می خه‌لاتێن لسه‌ر مل و سنگێ خۆ ژێڤه دكه‌ت و هنده‌كا ژی پێلێ دانیت)
هه‌ڤژین: (پێكۆلێ دكه‌ت وی ب راوستینیت و هه‌ر تشتێ بشێت دگریت) نه نه .. وه‌نه‌كه .. ئه‌ز دبێژمه ته ب راوسته، مه ب تنێ ئه‌ڤه یێن ماین.
“دویماهی”
شانۆگەرییا (ڤالاهی)
