نڤێسين: ديان جه‌ميل/ ماموستا ل زانكۆيا دهوك
مەرەم ژ ڤێ چەندێ چیە؟
ل ڕۆژا چوارشەمبی ڕێکەفتى ١١ ئادارا ٢٠٢٠ێ، ڕێڤەبەرێ گشتى یێ ڕێکخراوا ساخلەمیا جیهانى “تيدروس ئادهانوم”، نەخوشیا کوڤید-١٩ یا ژ ئەنجامێ ڤایروسێ کۆرۆنا پەیدادبیت وەک پەژیکەکا جیهانى (وباء عالمي Pandemic) ڕاگەهاند.
پەژیک ئەو نەخوشیە یا ب ئاوایەکێ ب لەز ل جهەکێ دەستنیشانکری بەلاڤ دبیت و ژ کەسەکی بۆ ئێکێ دی دهێتە ڤەگوهاستن و دبیتە ئەگەرێ کوشتنا هژمارەکا مەزن یا مرۆڤان. بۆ نموونە، نەخوشیێن دلى و شەکرێ و پەنجەشێرێ ناهێنە هەژمارتن پەژیک ژبەرکو ژ کەسەکى بۆ ئێکێ دی ناهێنە ڤەگوهاستن. لێ دەمێ ئەڤ پەژیکە ل پتریا وەلاتێن جیهانێ بەربەلاڤ دبیت و هژمارەکا مەزن یا مرۆڤان تووش دکەت، ل وى دەمى زەنگا مەتڕسیێ دهێتە لێدان و وەک پەژیکەکا جیهانی دهێتە ل قەلەمدان.
نەخوشیا کوڤید ١٩ پشتى کو ل پتریا وەلاتێن جیهانێ بەلاڤبووی هاتە ڕێزا نەخوشیێن پەژیکێن جیهانى. ل دویڤ دوماهیک ئامارێن ڕێکخراوا ساخلەمیا جیهانی (هەتا نڤێسینا ڤێ پوستى)، نێزیکی ١١٨ هزار حالەت ل پتر ژ ١٠٠ وەلاتێن جیهانێ هاتینە تومارکرن.
پتریا حالەتێن ڤێ پەژیکێ ل وەلاتێن چین و کوریا باشور و ئیران و ئیتالیا هاتینە تومارکرن، لێ ل وەلاتێن چین و کوریا باشور هژمارەکا مەزن یا تووشبوویان هاتینە چارەسەرکرن، ئەڤ چەندە ژى هندێ دگەهینیت کو د شیانێن هەمى وەلاتێن دى دایە ڕێکێ ل هەمبەر گرتنا ڤێ نەخوشیێ بگرن کو زێدەتر بەلاڤ نەبیت و تووشبوویێن خۆ ژى چارەسەر بکەن ئەوژى ب ڕێکا خۆ ڤەدەرکرن وکێمکرنا تێکەلبوونێ دگەل کەسانێن دەوروبەر و جهێن قەرەبالغ و پیس.