سه‌رپێچيكرنا ڕێنمايێن كارگێرى و ساخله‌مى

نڤێسين: سيپان عه‌بدولا

سه‌رپێچیكرنا رێنمایێن كارگێرى و ساخله‌میێ وه‌ك ره‌ڤین ژ كه‌ره‌نتیره‌كرنێ، بابه‌ته‌كێ گه‌له‌ك مه‌زنه‌ و پێدڤى ب موجامه‌له‌ و نه‌رمینواندنێ و ئینانا به‌هانه‌یان ناكه‌ت، چونكه‌ ریفلێكشنا وێ ل سه‌ر به‌رژه‌وه‌ندییا گشتى و ئاساییشا ساخله‌مى و نیشتیمانییه‌ و ئێدى نامینیت بابه‌ته‌كێ كه‌سۆكی. ل گۆر پره‌نسیپێن یاسایا كارگێرى ژى، سیسته‌مێ گشتى ژ سێ ئه‌له‌منتێن ئێمناهییا گشتى، ساخله‌مییا گشتى و ره‌حه‌تییا گشتى پێكدهێت و په‌یوه‌ندییه‌كا هه‌ڤته‌مامكه‌ر دناڤبه‌را ڤان هه‌ر سێ تێگه‌هان دا هه‌یه‌ و هه‌ڕفینا هه‌ریه‌كێ، باندۆرێ دكه‌ته‌ ل سه‌ر یێن دى. سه‌رپێچییا رێنمایێن كارگێرى یێن تایبه‌ت ب كه‌ره‌نتینه‌كرنا ب كوته‌كى و رێكخوه‌شكرن بۆ به‌لاڤبوونا په‌تایه‌كێ ژ ئه‌گه‌رێ نه‌پێگیركرنێ ب وان رێنمایان یان كه‌مته‌رخه‌میێ، هه‌روه‌سا شكاندنا قه‌ده‌غه‌كرنا هاتنووچوونێ (curfew) د ناڤبه‌را پارێزگه‌هان دا و دناڤ دا، گه‌له‌ك پرسان ل سه‌ر سرۆشت و میكانیزمێن ده‌ستنیشاكرنا هنده‌ك به‌رپرسان بۆ هنده‌ك پۆستان دئینیته‌ قادێ، ژ بوونا كو به‌رپرس ئانكۆ به‌رپرسیارى و چوونا د بن بارێ وێڤه‌ كو پێدڤییه‌ ئه‌و ئێكه‌م ته‌خ بن هه‌ست ب حه‌ساسییه‌تا بارودۆخى بكه‌ن و ئیستیهتارێ ب سه‌رباركێن كریارێن ژ ڤى ته‌رزى نه‌كه‌ن. هه‌روه‌سا ئه‌و به‌رپرسێن ژ وان مه‌زنتر ژى یێن رێك بۆ وان ڤه‌كرین و هاریكارییا وان كرین بۆ ڤان سه‌رپێچییان، ئه‌و ژى دكه‌ڤنه‌ د بن هه‌مان سه‌بتایتلى دا. روودانێن هۆسا قه‌باره‌یێ زیانێن گه‌نده‌لیێ به‌رچاڤ دكه‌ن كا چه‌وا ڤه‌رێژێن وێ د ده‌زگه‌هێن حكومى دا وه‌ك به‌لاڤبوونا ئاگرى د دناڤ پویشى دا، د ناڤبه‌را سازییان دا ب زنجیره‌یێن ستوونى و ئاسۆیی دا ده‌ربازدبن و سیسته‌مێ رێڤه‌برنێ له‌نگ دكه‌ن. هیڤیدارین خه‌لك یێ به‌رده‌وام بیت د خۆڕاگرى و خۆپاراستنا خۆ و یێن دى دا.