نڤێسين: ته‌حسين ناڤشكى

دڤێ گێلەشۆکا ڤەگرتنا پەژیێ ڤەیرۆسێ کۆرونا دا یا کو هەتا نها چو تووشبووی ل دەڤەرا دهۆکێ نەهاتینە تۆمارکرن، وەسا دیارە خەلکەک باوەریەک رەهایی ب قەزا و قەدەرێ هەیی مایە یان مسیبەتێ دهێلتە ب هێڤیا خودێڤە کو ئەوا وی لسەر ئەنیا بەندێ خوە نڤیسی دێ هەر ئێت و پێدڤی ناکەت مرۆڤ خوە بپارێزت. هندەک ژی هەنە ب گیانەک بەترانی و دفنبلندی خوە دکەنە سۆپەرمان کو ئەو قەبخوازتنێ ژ کۆرۆنایا چاڤنەبین دکەن و سڤکاتیێ ب خوە پاراستنێ و رێنومایێن حوکمەتێ دکەن.
ب هەر رەنگێ هەی، ژ مێژە کوردان گۆتییە: (( یاری ب ئاگری ناهێنە کرن.))، یان ((ب بەر بلایێڤە نەچە دا قەدا نەهێتە رێکا تە)) یان ((دەستێ خوە نەکەیە دناڤ ئاگری دا دا سۆژت.)).. هتد. هەر وەسا کیتابێن پیرۆزێن ئەسمانی ژی پتر د تێکستەکێ دا تەکەز ل خوە پاراستنێ کرییە، تایبەت قورئانا پیرۆز، راستە گۆتیە:{قُل لَّن يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ}، لێ بەرامبەر خودایێ مەزن هەر وەسا گۆتییە: {ولَا تُلْقُوا بِأَيْدِيكُمْ إِلَى التَّهْلُكَةِ وأَحْسِنُوا إِنَّ اللَّهَ يُحِبُّ الْمُحْسِنِينَ.} .{وَلَا تَقْتُلُوا أَنْفُسَكُمْ} زێدە باری د گەلەک سۆرەتان دا فەرمانکریە لاتقربوا تجنبوا لا تقتلو … هتد. واتە خوە بپارێزە و خودێ روودانێن پاشەرۆژێ بۆ تە دیار نەکرینە، وەکی دی بهێلە ب هیڤیا خودێڤە.
ئەڤجا خووشک و برایێن هێژا هەکە دلێ تە ب تەڤە نەبت خوە بپارزی، بلا دلێ تە ب خێزانێ تە و کەسوکار و خەلکێ تە ڤەبت کو ب گیانەک وەلاتپارێزی و مرۆڤایەتی سەرەدەریێ دگەل رێنومایێن وەزارەتا ساخلەمییێ بکەن، هەتا کو ئەڤ مسیبەتە ژی دسەر مە دا دچت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *