نڤێسين: عيسا تاهر ئيسماعيل

فلمێ ناڤئینایی، ژ ڕۆژا دویێ ژ ڤەگرتنا ڤیرۆسەکی، دەست پێ دکت و ب ڕۆژا ئێکێ ژ بەلاڤبوونا وی، ب دووماهی دئێت.
ڕۆژا ئێکێ، کۆمپانییەکا داربڕین و دارستانبراندنێ، هندەک داران دقڕینت، هندەک چەکچەکوولە ژێ دفڕن و ئێک ژ وان چەکچەکوولان دادتە سەر ئووشییەکێ مۆزان، لەقەکێ ل مۆزەکێ ددت و دچتە جهەکێ خودانکرنا بەرازان، هندەک ژ مۆزێ ژ دەڤی وی دکەڤت، بەرازەک دخوت، ئەو بەراز و هندەک بەرازێن دی بۆ خوارنگەهەکێ دئێنە هنارتن، ل وێ دەرێ ڤیرۆسەکێ تێکەل، ژ ڤیرۆسێ بەرازی و ڤیرۆسێ چەکچەکوولەی بەلاڤە دبت و مرۆڤان ب مەلیۆنان دکوژت.
من پرسەک ژ نۆژدارەکی کر، من گۆتێ، چێبوویە کو ڤیرۆسەکێ تایبەتێ گلوگیا و داروباران گەهشتبتە مرۆڤان و مرۆڤ دکوژتبن; گۆت هندی ئەز دزانم وەسا چێنەبوویە، تنێ هەکەر جوونە خوەراندنەکێ ل دەڤ مرۆڤان چێکت، هەروەسا ئەز ب خوە ژی ل ڤێ چەندێ گەڕیام دا پتر خوە پشتڕاست بکم، وەسا دیاربوو کو ئەو ڤەگوهازتنە، وەک زانست چێنابت، چونکی وەکی زانایێن ڤیرۆسان دبێژن، ڤیرۆسێ گلوگیا ئەو کلیلا کیمیائییا فەر نینە کو پێ بچتە د شانەیا مرۆڤاندە.
وانە چ نە:
١. لەشێ مرۆڤان و یێ گیانەوەران پتر نێزیکی ئێکە هەرچەندە جینێن هەموو گیانداران ئێکن.
٢.دڤێت ئەم جارەکا دی، پێدەچوونێ د پەیوەندییا خوە و گیانەوەراندە بکن، ئەم بزانن کو ئەو ب کێر خوارنێ نائێن، خوارنا وان پتر زیان هەنە هندی کو مفا هەبن، ب کورتی، ئەم گیاندارێن گیایینە.
٣.جوونە هەڤسەنگییەک د خوەزایێدە هەیە، هەر تێکدانەکا وێ هەڤسەنگییێ، دێ کارەسات و ئاتافێن مەزن پەیدا کت. خرابکرنا ژینگەها چەکچەکوولەی بۆ نموونە، دێ وە لێ بکت بێت و د گەل مە بژیت، ئەو ڤیرۆسێن د لەشێ ویدە، ئەڤێن ئەڤە ب مەلیۆنەها سالان خوە ل گەلێک گونجاندین، نەدوورە لەشێ مرۆڤان ببینت وەک ژینگەهەکا گونجای و ئێرشێ بکتە سەر.
٤.فەرە پێدەچوونەک د وان هزروبیر و فەلسەفەیاندە بێتە کرن، ئەوێن بەرێ مرۆڤان ددنە وێ یەکێ کو کونترۆلێ ل سەر خوەزایێ بکن، ئەوێن پەیوەندییا مرۆڤان د گەل خوەزایێ ل سەر بنواشەیێ هەڤڕکییێ دادنن و هزر دکن ڕۆژەک دێ ئێت، مرۆڤ دێ یارییا ب خوەزایێ کت.
٥.مرۆڤ پشکەکە ژ خوەزایێ، نەنەیارێ خوەزایێیە، گیاندارێن دی ژی، هەڤال و هەڤپشکێن مەنە د ڤێ خوەزایێدە، هندی ژ مە بێت، دڤێت ئەم زیانێ نەگەهیننێ.
٦.هەکەر مرۆڤ ل سەر ئەڤا دکت بەردەوام بت، نەدوورە نێزیک و نەدوور، ڤیرۆسەک ئان پیساتییا ژینگەهێ، دووماهییێ ب ژیانا مرۆڤان ئان ژیانا هەموو گیانداران بینت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *