نڤێسين: محسن عه‌بدولره‌حمان

پشتی بڕیارا راگرتنا به‌روه‌خت بو نڤێژا ئه‌ینی و قه‌ده‌خه‌كرنا كومبوونا خه‌لكی ل جهێن گشتی بتایبه‌ت ئه‌گه‌ر ئه‌و جه دگرتیبن، راسته‌وخۆ ده‌نگێن نه‌رازیبوون و مانده‌لكرنا ڤێ‌ بڕیارێ‌ بلندبوون، تا گه‌هشته‌یه‌ زمانێ‌ زڤری و په‌یڤێن نه‌شایسته‌ و تاوانباركرنێ‌. ئه‌ری كێشه‌ چییه‌، ما چ چێبوویه‌؟ دا حوكمه‌تا كوردی ده‌رگه‌هێن مزكه‌فتان (مالێن خودێ‌) بگریت، گاوران ژی ئه‌ڤه‌ دگه‌ل موسلمانان نه‌كرییه‌ و رێگری ل په‌رستنا خودێ‌ نه‌كرییه‌، ما كه‌سه‌ك رێگریێ‌ ل نڤێژكرنێ‌ دكه‌ت!؟
و چاوا.. ب به‌هانه‌یا ڤایرۆسه‌كێ‌ ل چینێ‌ دیاربووی، براستی گۆتنه‌كا لوژیكییه‌!

لێ‌ ئه‌ڤه‌ ڤایروس؛ ئه‌و بوونه‌وه‌رێن هویرێن دبنه‌ ئه‌گه‌رێ‌ په‌یدابوون و ڤه‌گۆهاستنا په‌ژیێ‌ و ئه‌ڤه‌ نه‌یا نوی یه‌، بو نموونه‌ (كولاره‌ش – تاعون) په‌ژییه‌كا كه‌ڤنه‌ و لده‌مێ‌ په‌یدادبوو گیانێن مرۆڤان ددروین، دهێته‌ ڤه‌گێران كو دووماهیك جار ل ئیراقا عه‌ره‌بی به‌لاڤبووی، ل چه‌رخێ‌ هه‌ژدێ‌ بوو، ئینا جوهی ژ مه‌علمێن خۆ پرسین، ئه‌وان گۆتێ‌ (خۆ بپارێزن). لێ‌ موسلمان ژ مه‌لا پرسین ئه‌وێن گۆتینێ‌ ( قل لن یصیبنا الا ماكتب الله لنا) هوسا جوهی هاتنه‌ پاراستن، و موسلمان ب هه‌لگرتنا ته‌رمێن ل كۆلانان را نه‌دگه‌هشتن! ئانكو جۆهییان ( ولاتلقوا بایدیكم الی التهلكه‌ و احسنوا ان الله یحب المحسنین) ئایه‌تا 195ێ‌ ژ سوره‌تا بقره‌. بجهئینا. كو ژ لایێ‌ زمانی (ولاتلقوا) لڤێره‌ (لا) نافیه‌ جازمه‌ یه‌.
دیسان مه‌به‌ست ژ نڤێژا ئه‌ینی خواندنا گۆتارێ‌ یه‌، ب مه‌به‌ستا رۆهنكرنا و شرۆڤه‌كرنا كاروبارێن دین و دونیایی یێن جڤاكێ‌ موسلمانان (واذا نودي للصلاة من يوم الجمعة فاسعوا الي ذكر الله و ذروا البيع ذلكم خير لكم) ئايةتا 9 سورةتا الجمعة. ذلاييَ‌ زماني ( اذا – ظرفية شرطية غير جازمة) یه‌. لێ‌ بۆچی موسلمان گه‌له‌ك داكوكیێ‌ ل سه‌ر ئاییرده‌یان دكه‌ن و ده‌ست ژ گیانێ‌ دینی كو دادوه‌ری و یه‌كسانییه‌ به‌ردده‌ن، سه‌رباری كو ئێكه‌م په‌یڤا قورئانێ‌ (اقرأ) بخوینه‌یه‌، لێ‌ ده‌نگێن نه‌رازیبوونێ‌ لدور گرتنا ده‌رگه‌هێن خواندنگه‌ه و زانكۆیێ‌ نه‌هاتنه‌ بهیستن، و زانایه‌ كو بێی خواندنگه‌ه پرۆسه‌یا فێربوون و زانینێ‌ بئێكجاری ژ كاردكه‌ڤیت، لێ‌ لپه‌ی فه‌رمووده‌یا پیرۆز (وجعلت الارض مسجدا و طهورا و أيما رجل من أمتي أدركتة الصلاة فيلصي) ئانكو نڤێژ لهه‌ر جهه‌كی دهێته‌كرن!
بدیتنا من ئاریشه‌یا جڤاكێ‌ كوردی سه‌ره‌ده‌ریكرنا دلینییه‌ دگه‌ل دین و دونیا، و ئه‌ڤه‌ ژ بوها و پله‌یا دینی د دیتنا خه‌لكی دا كێمدكه‌ت و ژ قه‌بارێ‌ شریعه‌تی گڕژدكه‌ت، مخابن مه‌زنیا دینی بكورتكرنا دوو ركه‌عه‌تان و گۆهداریكرنا گۆتاره‌كا نه‌زۆك و ڤه‌چووی بچویكدكه‌ن، به‌لكو ئاییرده‌یان پتر موركه‌كا نه‌ریتی و چاڤلێكرنێ‌ ب خۆڤه‌ دگریت! ئه‌ڤه‌ به‌لگه‌یه‌ ل سه‌ر نه‌خواندن و دویڤچوونا مه‌ بو دینێ‌ مه‌ ژ لایێ‌ شه‌رعی و فیقهی و مێژوویی كو ئه‌م هه‌میا تێكه‌ل دكه‌ین، وه‌كو سلاڤكرنێ‌ (تحیه‌) كو لجه‌م عه‌ره‌با (صباح الخير و مسا‌ء الخير) لكاره‌، لێ‌ لده‌ڤ براده‌رێن مه‌ (سپێده‌باش، ئێڤارباش) سلاڤا گاورانه‌ و گۆننه‌هه‌! تاگه‌هشتییه‌ وێ‌ راددێ‌ بچاڤێ‌ كێم لوی كه‌سی بنێرن یێ‌ زاراڤه‌كێ‌ دینی نه‌ئاخڤیت!
دا لڤان هه‌ردوو هه‌لویستان وه‌كو نموونه‌ بنێرین، ل سالا /317ك/ ده‌وله‌تا قورمتی هێرش كره‌ سه‌ر مه‌كه‌هێ‌ و 300 هزار حه‌جی كوشتن و به‌رێ‌ ره‌ش برنه‌ لایێ‌ به‌حرین، هوسا بو ماوه‌یێ‌(22) سالان حه‌ج نه‌دهاته‌كرن!
دیسان ناهێته‌ زانین كو ژ (36) سولتانێن ئوسمانی و میرێن ده‌وله‌تا وان ئێكی حه‌ج ئه‌داكربیت!
نها دبینین (كه‌عبه‌) رووگه‌ها موسلمانان ژبو پاراستنا گیانێ‌ موسلمانان ب بڕیاره‌كێ‌ هاته‌ جولكرن، و نڤێژا ئه‌ینی ل كومارا ئیران یا ئیسلامی هاته‌ راگرتن و ل نه‌جه‌ف نڤێژ و سه‌ره‌دان ئارامگه‌هی هاتنه‌ قه‌ده‌خه‌كرن!
سه‌رباری ڤێ‌ هه‌میێ‌ هێش هنده‌ك و ژ وان / خۆدان باوه‌رنامه‌/ ژ بریارا ئه‌وقافێ‌ لدوور نڤێژا ئه‌ینیێ‌ دنه‌رازینه‌ و دبێژن ئه‌ڤه‌ پیلانه‌كه‌ لدژی ملله‌تێ‌ مه‌یێ‌ موسلمان و شه‌ره‌ لدژی دینێ‌ مه‌، حوكمه‌تێ‌ باوه‌رنه‌كر به‌هانه‌ك هه‌بیت دا زوی بڕیارا گرتنا مزكه‌فتان ده‌ربێخن، ئه‌رێ‌ نڤێژكه‌ران ئه‌گه‌ر ڤایرۆس به‌لاڤبوو هینگێ‌ گرتنا مزگه‌فتان بۆچییه‌!؟
ئه‌ڤ روودانه‌ په‌ككه‌فتیبوونا جڤاكێ‌ كوردی و كێم هشیاری و تێگه‌هشتنا مه‌ یا دینی به‌رچاڤدكه‌ت، ده‌سته‌واژه‌یا /ژین بو مرنێ‌/ یا زاله‌ ل سه‌ر عه‌قل و زهنییه‌تا جڤاكێ‌ كوردی، كو بدیتنا من ژ ڤایرۆسێ‌ كورۆنا زیانبه‌خشتره‌، ئه‌ڤ عه‌قلییه‌تا ژ سالۆخه‌تێن خۆدێ‌ تنێ‌ لایه‌نێ‌ دژواریێ‌ (شدید العقاب، القهار، الجبار) دبینن، و ژ قورئانێ‌ خواندنا توتیكانه‌یا بێ تێگه‌هشتن و نڤێژا نڤێژكه‌ری ژ / الفحشا‌ء و المنكر /دوورنه‌ئێخیت!
لداویێ‌ چاوا مافێ‌ ئۆلدارانه‌ حوكمه‌تێ‌ تاوانبار بكه‌ن، تاكو هنده‌ك ل جولی نڤێژی بكه‌ن، خه‌لكه‌كێ‌ سكۆلار ژی هه‌یه‌ و دپرسیت: ڤایرۆس یان نه‌زانین زیانبه‌خشتره‌!؟

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *