نڤێسين: جوان عزه‌ت


پیرۆزكرنا من ژ بۆ هه‌وه‌ گشت ژنان ئه‌ڤه‌ یه‌، هه‌تا كو ژن بگه‌هیته‌ شوره‌شا هزرى، دڤێت ئەو خودان باوەری و ئیدراکا خوە یا سەربەخۆ بیت و هه‌رده‌م سیبه‌را خوە ل ژێر پیروزی و پراكتیكا (ژن،ژیان و ئازادى) ببینیت و نەراوه‌ستیت و نە وه‌ستیت، به‌لێ گرنگە هه‌رده‌م وەرارێ بکەت و تێبکوشیت.
ب تایبەتی مافێن ژنێن كورد ل ژنێن هه‌ر وه‌لاته‌كێ دى پتر هاتینه‌ پێشیلكرن، جاره‌كێ وه‌كو كورد و جاره‌كێ ژى وه‌كو ژن.
واته‌ دڤێت هه‌مى ژن بۆ دوو شوره‌شان خه‌باتێ بكه‌ن، مینا (خه‌باتا نه‌ته‌وه‌یى، جڤاکی و خه‌باتا چێندەری )چونكو گه‌لێ كورد و كوردستانى، ئێكه‌م جه و ئێكه‌م هێزبوو توشى په‌له‌ماریا‌ داگیركاریێ هاتى و ل سه‌ر بیروباوه‌را وێ داگیركاریێ ب درێژاهیا دیرۆكێ ژ ماف و ئازادیا خوه‌ هاتیه‌ بێ به‌شكرن، سه‌ره‌راى وێ چه‌ندێ د ڤێ خوه‌ په‌رستنێ دا ئەڤ گەلێن ئەقل هەژار به‌رده‌وام دژى ماف و ئازادیا ژنێ راوه‌ستیان و سۆكایه‌تیى ب مه‌قامێ ئینسانیێ ژنێ وه‌كو فاكته‌ره‌كێ سه‌ره‌كى دكرن.
له‌ورا د روژه‌كا هوسان زورى و زه‌حمه‌ت دا ئه‌ز ڤێ روژێ ل خوه‌ و ته‌ڤایا ژنێن كورد ب گەلەک مەزن و پیروز نابینم، ژبه‌ركو ئه‌و خه‌بات و كه‌دا ژنێ ب سالایه‌ دایى دیاركرن هه‌تا ئه‌ڤرۆ ژى جهێ خوه‌ نه‌گرتییه‌ و نه‌ بوویه‌ شوره‌شه‌كا به‌رهه‌مدار كو ژن بۆ ڤێ روژێ خوه‌ به‌رهه‌ڤ بكه‌ت و هه‌بوونا خوه‌ تێدا سه‌لمینیت، كو مرۆڤە و وێ ژى جیهانه‌ك هه‌یه‌ ئه‌و جیهان ژ ره‌گه‌ز بوونا وێ یا جودایه‌، به‌لكو جیهانه‌كه‌ چ په‌یوه‌ندى ب هێز، ئه‌رك، ماف و مرۆڤبوونا وێ ڤه‌ نینە، سه‌ره‌راى وێ چه‌ندێ ئه‌گه‌ر ب هزره‌ك كویر ئه‌م ل سه‌ر پرۆژه‌ێن ڤێ روژێ راوه‌ستین دێ بینن كو روژه‌كه‌ مێر بۆ ژنێ ئیسپات بكه‌ت ئه‌و هه‌یه‌ و مینا وى ئورگانه‌كه‌ ژ جڤاكى، روژه‌كه‌ برا ل مافێ خوشكا خوه‌ خودان ده‌ركه‌فیت روژه‌كه‌ دایك ده‌ستێ كچا خوه‌ بگریت بۆ دیار بكه‌ت كو وێ ژى مافێ ژنبوون و ژنناسیێ هه‌یه‌، هه‌روه‌سان روژه‌كه‌ ژنا ئازاد ل كێشه‌یێن ژنا نه‌ئازاد ده‌ربكه‌ڤیت، به‌لێ دراستیێ دا هه‌رتشت به‌رۆڤاژیه‌.
ب مخابنى ڤه‌، ئه‌گه‌ر ب واقعینانه‌ دیتنێ بۆ ڤێ پرسێ بكه‌ین، كو هه‌تا نها مه‌ پرسا ژنێ دناڤ جڤاكى دا نه‌ دایه‌ ئازراندن ئه‌رێ كا ژن چیه‌؟ بوچی هەیە؟ چ دخوازیت یان فکر و رامان و پێناسەیا وێ چیە؟
ل جهێ ڤا پرسان مخابن، د پرانیا هزرێن مە دا ئه‌ڤ روژه‌ روژه‌كه‌ ل جهێ نیاسین، پێشكێشكرنا ئه‌رك و مافێن ژنێ تێدا دیارببن ئێش، ئازار، زولم و زوریا وێ پتر تێدا دیاردبیت هه‌تا وى راده‌یى، كو ئه‌م شین بێژین روژه‌كا درۆشمى و بێ چارەسەر و چارەنڤیس و بێ ئه‌نجامه‌، ژ به‌ركو هه‌تا نها دناڤ جڤاكى دا مه‌ ژن ب پله‌یا دوویێ و ره‌گه‌زه‌كا كێم ئه‌قل، بێ په‌راوێز،ئالاڤ و ئامراز هاتیە‌ پێناسه‌كرن و سه‌لماندن.
ژ لایه‌ك دى ڤه‌، ئه‌ڤه‌ ب هزران ساله‌ یه‌ یاسایه‌ك ل سه‌ر جڤاكێ كوردی دا زال بووى، كو ئه‌وێ یاسایێ باوه‌رى ب ژن و مافێن وێ نه‌بوویه‌، ره‌نگه‌ ئه‌ڤه‌ ژى بوویه‌ به‌ربه‌سته‌كا هه‌ره‌ مه‌زن درێكا ژنێ دا كو نه‌شیایه‌ بگه‌هیته‌ هیڤى، ئارمانج و فه‌زیله‌تا خوه‌.
ئینکار ناکەم دبیت هه‌تا ئاسته‌كێ ژنا كورد، ژ قوناغا رابردووى بۆ قوناغا ئه‌ڤرو گوهه‌رین په‌یداكربیت، به‌لێ نه‌ ب حوكمێ وێ ئه‌جندا‌یێ یا كو ب ئاسته‌كێ بلند دیار و ب باندور، بەلێ هەرچاوان بیت نابیت ژن هنده‌ بێ ئومید ژى ببیت، به‌لكو پێدڤییه‌ باشتر كاربكه‌ین ژ بۆ وێ چه‌ندێ، كو پرسا ژنێ وەک مرۆڤ و بابه‌تێ ڤیان و یه‌كسانیا وێ و ره‌گه‌زێ به‌رامبه‌ر بۆ جڤاكى رونتر بهێته‌ نیاسین.
له‌ورا ل جهێ ئه‌م بهین به‌رده‌وام به‌حسێ ماف و درۆشمێن ژنێ بكه‌ین، ب دیتنا من پێدڤییه‌ ئه‌م ده‌ستپێكێ به‌حسێ مرۆڤبوون و ره‌وشنبیركرنا ژنێ بكه‌ین و زانستێ وێ یێ هه‌بوونێ دبوارێ هزرى، جڤاكى، ئابوورى و سیاسى و كومه‌لاتى دا دابمه‌زرینن، پاشى ڤان درۆشمان ل سه‌ر بده‌ین خواندن و پراكیتزه‌كرن، ئه‌ز باوه‌رم هینگێ دێ یه‌كسانیا ره‌گه‌زى و مافێن وێ ژى هنه‌ جه، چونكو كێشا ژنا كورد نه‌كێشه‌یا ئه‌ڤرو یه‌، به‌لكو ڤه‌رێژه‌كه‌ ژ ناڤ نیشانێن کەلتوری، دیسان کێشەیێن رابردوویى و داگیركرنا جوگرافى و هێزێن سه‌رده‌ستیێ هاتییه‌ و نه‌بوویه‌ به‌گراوه‌نده‌ك بوو زانه‌بوون و ئاستێ خوێنده‌واریا وێ، ژ به‌رهندێ هه‌تا ئه‌م ئاستێ هوشیاریا ژنان به‌ره‌ڤ شارستانیه‌ته‌كا نۆیخواز ببه‌ین، گرنگه‌ ئه‌م هه‌مى پێكڤه‌ بجدى ل ڤێ روژێ خودان ده‌ركه‌ڤین زه‌مینه‌یێ هه‌لویست و بریاردانێ بۆ هزرا ژنێ خوه‌شبكه‌ین، هه‌تا بگه‌هیته‌ یاسایا خوە یا حه‌قیقه‌قى و ل سیسته‌مێ خوە یێ ته‌ندروست و یه‌كسانى ب شێوه‌كێ جه‌وهه‌رى و پیشه‌نگ ده‌ربكه‌ڤیت هەروەها ل بەرامبەر مرۆڤبوون و روژبوونا خوه‌ ببیته‌ خودان كارێكته‌ره‌كا ب باندور، سه‌ربه‌خو و ئه‌كیتیڤ و ئازاد. بوویە روژا هەشتی مارسێ ئەو روژە یە، کو ژن پرسیارێ ل خوە بکەت کا چ پێویستیا ژیانێ ب من هەیە؟ ئەرکێ من چیە و چاوان من شیانێن سەنتەربوونا خوە هەنە؟ هەولبدەت لڤین و گەشەسەندنا خوە بەفرەوانتر بکەت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *