دهۆك، له‌زگین جۆقى:
نۆشداره‌كێ دهۆكێ ل سه‌نته‌رێ ئازادى یێ نشته‌رگه‌ریێن دلى دیاردكه‌ت بۆ جارا نشته‌رگه‌ریه‌كا (صه‌مامێن نه‌سیجى) بۆ نه‌خۆشه‌كى هاته ئه‌نجامدان و پشتى نشته‌رگه‌ریێ ئێدى نه‌خۆش ده‌رمانان ناخۆت وچاره‌سه‌ردبیت.
د. ئاشور یوحه‌نا ئیسحاق، تایبه‌تمه‌ندێ نه‌خۆشیێن دل وسینگى ل دهۆكێ دیاركر كو دو جۆر هه‌نه ئه‌وژى جۆرى كاربوون و جۆرێ نه‌سیجى و ڤان هه‌ردو صه‌ماما ژى جۆداهى ئه‌وه نه‌ساخێ جۆره‌كێ ده‌رمانى دخۆت داكو خوینا وى روهن بكه‌ت لێ ئه‌و كه‌سین ژیێ وان سه‌ر 50 سالیێ دا ئاریشه هنده‌ك جاران بۆ وان دروست دبوون ب تایبه‌تى ژى خوین به‌ربوون و نابیت ئه‌و نه‌خۆش ده‌رمانێن روهنكرنا خوینێ ب كاربینن، له‌ورا مه ده‌ست دایه چێكرنا صه‌مامێ نه‌سیجى بۆ وان نه‌خۆشان و نوكه بۆ جارا ئێكێ ل دهۆكێ مه دانا و ئه‌ڤه گه‌له‌ك باشتره بۆ نه‌خۆشى، چونكو هه‌تا 25 سالان خوه دگریت و ئه‌و نه‌خۆشێ ڤى صه‌مامى ددانیت ژى پشتى چه‌ند هه‌یڤان ئێدى چاره‌سه‌ریێ وه‌رناگریت و ده‌رمانان ناخۆت، ئه‌ڤه‌ژى بۆ ساخله‌میا نه‌خۆشى گه‌له‌ك باشتره ژ صه‌مامێ كاربوونى، چونكو سه‌مامێ كه‌ڤن هه‌تا 10 سالان یان 15 سالان نه‌دما و جاره‌كا دى نه‌خۆش پێدڤى ب دانانا صه‌مامى د بو ڤه و نوكه ل جیهانێ هه‌موویێ ب تایبه‌تى ژى ده‌وله‌تێن ئۆروپى ده‌ست ب دانانا صه‌مامێ نه‌سیجى هاتیه كرن و گۆت: ئه‌ڤ زانستێ نوو گه‌هشتیه دهۆكێ و ئه‌م شیاین بۆ نه‌خۆشه‌كى ب سه‌ركه‌فتیانه بدانین و پشتى چار ده‌مژمێران مایه دنشته‌رگه‌ریێ دا نوكه ره‌وشا وى گه‌له‌كا باشه و دشێت هه‌موو كاران ژى بكه‌ت پشتى چه‌ند هه‌یڤان.
ئاشكه‌را كر كو ئه‌و نه‌ساخێ ژیێ وى سه‌رى 70 سالیێ دا ئه‌ڤ صه‌مامێ نه‌سیجى دهێته دانان پشتى دانانا ڤێ صه‌مامى ژى نه‌خۆش ژ خوارنا ده‌رمانان ب دووماهى دهێت و گه‌له‌ك باش كارێ خوه دكه‌ت و رهێن دلى هه‌موو كار دكه‌ن، به‌لێ هه‌كه نه‌هێته دان رهێن دلى ب شوولێ خوه رانابن و ئاریشێن ساخله‌مێ گه‌له‌ك بۆ نه‌خۆشى دروست د بن و نشته‌گه‌رى ژى پشتى هینگێ بێ مفایه، له‌ورا هندى زووتر بهێته دانان باشتره و گۆتژى: ل سه‌نته‌رێ دلى ل دهۆكێ ئه‌م شیاین دگه‌ل تیمه‌كێ نۆشدارێن دهۆكێ ڤێ نتشه‌گه‌ریا مه‌زن یا گوهورینا صه‌مامێن نه‌خۆشى ئه‌نجام بده‌ین.
د. ئاشور یوحه‌نا ئه‌وژى دیاركر كو ژ نوكه و پێڤه هه‌ر نه‌ساخه‌كێ پێدڤى بیت ئه‌م دگه‌ل كومپانیه‌كێ دشێین ڤى جۆرێ صه‌مامى بۆ نه‌خۆشى دابین بكه‌ین و ل سه‌نته‌رێ نشته‌گه‌ریێن دلى ل دهۆكێ بۆ نه‌خۆشى بهێته دانان و هه‌موو شیان هه‌نه و ئێكه‌م حاله‌ت ل دهۆكێ هاتیه ئه‌نجامدان .
ناڤهاتى ئه‌وژى دیاركر كو صه‌مامێن دلى ژبه‌ر دو ئه‌گه‌ران ژكاردكه‌ڤن، یێ ئێكى ده‌مێ ژیێ مرۆڤێ مه‌زن دبیت مادێ صه‌مامى خراب دبیت و كارناكه‌ت، ل ده‌ڤه‌را مه ژى پتر روماتیزما دلى بۆ خه‌لكى دروست دبیت له‌ورا صه‌مام كارناكه‌ن و گۆت: ل دهۆكێ پتر گه‌نج تووشى ڤان حاله‌تان دبن.
ديدار ب سوپاسيڤه ژ ڕۆپه‌لێ (نووش نيوز) هاتييه وه‌رگرتن.