ئه‌م بۆچى په‌رتووكان بخوينن؟
ئاماده‌كرن: دلێر كه‌مال
نڤيسكار و فيلۆسوفێ جيهانى (كافكا) ده‌رباره‌يى خواندنێ ب ئاوايه‌كێ گشتى دبێژيت: مرۆڤ ژبه‌ر ئه‌وێ چه‌ندێ په‌رتووكان دخوينن، هه‌تا فێرببن و پرسياران بكن.
پرسياركرن ده‌سپێكا هوشياريێيه:
برێيا خواندنێ هزرا مرۆڤان نوى دبيت و ژ چوارچووڤه‌يه‌كێ كلاسيك و رۆتين ده‌ربازى ئاسوويێن ئازاد و به‌رفره‌هـ دبيت، هه‌ر ئه‌ڤ يه‌كه‌يه يا كو هزر و ديتنه‌ك ئازاد لده‌ڤ مرۆڤان په‌يدادكه‌ت.
ئه‌رێ خواندن بوويه كه‌لتوور؟
ب ره‌نگه‌كێ گشتى خواندن ل هه‌موو جيهانێ كه‌لتووره و تاكێن وه‌لاتان ب تايبه‌ت ل رۆژئاڤايێ دونيايێ گرنگييه‌ك تايبه‌ت ب پرۆسێسا خواندنێ ددن، ژبه‌ركو خواندن بوويه به‌شه‌كێ سه‌ره‌كى ژ ژيانا وان و ب رێيا خواندنێ ژيانا خۆ ده‌وله‌مه‌ند دكن و دزانن چاوان باكگراوه‌ندێ هزرى بۆ خۆ دروست بكه‌ن و سه‌ره‌ده‌ريێ دگه‌ل ژيانێ و پرسگرێكان بكه‌ن.
جيهانا په‌رتووكان چ پێشكێشى مه دكت؟
هه‌لبه‌ت جيهانا په‌رتووكان ده‌رگه‌هێن نوى د ژيانا مه دا ڤه‌دكه‌ت و مه ژ مرۆڤێن نۆرمال و رۆبۆتى به‌ره‌ڤ مرۆڤێن هوشيار، كارا و ئازاد دبيت.
خواندن ناڤونيشانێن شارستانيێيه:
چو ملله‌ت نه‌شێن ل گه‌مييا شارستانى و پێشكه‌ڤتێ سويار ببن، ئه‌گه‌ر نه‌خوينن. ئه‌و ملله‌تێن دخوينن پێشدكه‌ڤن و ملله‌تێن نه‌خوينن د نهال و چالا پاشكه‌ڤتنێدا جهێ خۆ دگرن.
بۆ نموونه هه‌ر وه‌لاتييه‌كێ عه‌ره‌ب (6) خوله‌كان د رۆژێ دا دخوينت و بۆ هه‌ر (250000) هزار كه‌سان .په‌رتووكه‌ك چاپ دبيت
به‌لێ ل ئه‌ورۆپايێ بۆ هه‌ر (15000) هزار كه‌سان په‌رتووكه‌ك چاپ دبيت، هه‌روه‌سا هه‌مى ده‌زگه‌هێن چاپ و به‌لاڤه‌كرنێ يێن وه‌لاتێن عه‌ره‌بى بتنێ هندى ئێك ده‌زگه‌هێ فه‌ره‌نسى (باليمار) كاغه‌زان دمه‌زێخن!
مه‌به‌ست ژ خواندنێ:
1ـ خۆشيبرن ب پرۆسێسا خواندنێ: دروستكرنا كه‌ش و هه‌وايه‌كێ ئارام و خۆش ب مه‌به‌ستا خۆشى وه‌رگرتنێ ژ ئه‌وێ په‌رتووكا دخوينى. نه‌كو شه‌ر و هه‌ڤركييێ دگه‌ل بكه‌يى و بێژى كه‌نگى دێ ب دووماهيك هێت.
2ـ فێربوون: پێدڤييه كه‌لتوورێ خواندنا په‌رتووكان لده‌ڤ خۆ په‌يدابكه‌يى و ده‌مه‌كێ رۆژێ بۆ خواندنا په‌رتووكێ ئه‌گه‌ر ئێك لاپه‌ر ژى بيت ته‌رخان بكه‌يى.
3ـ ده‌م: پتريا جاران ل ئه‌وى ده‌مى بخوينه يێ تو حه‌ز ژێ دكه‌يى و هزرا ته كارا بيت.
4ـ ئارمانج: پێدڤييه ئارمانجێ ژبۆ خواندنا خۆ ده‌ستنيشان بكه‌يى و بزانى ژ بۆ چ دخوينى. (فێربوون)
5ـ نه‌رمايه‌تى: پێدڤييه د خواندنێدا يێ نه‌رم بى، ژبه‌ركو برێكا نه‌رمايه‌تيێ دێ ب ته‌مامى بابه‌تى وه‌رگرى و دێ گه‌هييه ئارمانجا خۆ (هێدى هێدى).
6ـ تێگه‌هشتن: تێگه‌هشتن ئێك ژ بنه‌مايێن سه‌ره‌كى يێن خواندنێيه و برێكا تێگه‌هشتنێ كه‌سايه‌تييا مرۆڤان دهێته گوهۆرين.
7ـ هاندان و پشته‌ڤانى: ده‌مێ تو ب ئارمانجا خۆ د پرۆسێسا خواندنێدا شاد دبى، گرنگه تو بخۆ به‌رى هه‌ر كه‌سى پشته‌ڤانييا خۆ بكه‌يى و هه‌ر چ نه‌بيت كه‌يفا ته ب ته بهێت.