خالد عەلی سلێڤانەیی

پێناسەیا داهێنانێ: ئەو زێدەكرنا مفادارە، كو بەری هینگێ ئەو زێدەكرنە نەبوو. جارا پرۆسسێسا داهێنانێ راستڤەكرن و ژێبرن و لادانێ ژی ڤەدگرت. بۆ نمۆنە؛  بەرهەمەك ـ هزر یان ماددی ـ پێش وەخت هەبت، پێخەمەت پێشخستنا وی بەرهەمی، كارێ لادان یان ژێبرن یان راستڤەكرنا هندەك ژ وی بەرهەمی و ب سەرڤە زێدەكرن، دبت داهێنان. هەر تشتەك ژ ڤی چارچووڤەیی دەركەڤت، ب داهێنان ناهێت ل قەلەمدان، بەلكو بتنێ ڤەگۆهازتن و لاسایكرنە نە زیدەتر.
ئەگەر تو د ئامیرەتێ كۆمپیۆتەریدا شارەزابی، هەمی هوور و گرێیێ وی بزانی، ژ هاردویر هەتا سوفت ویری، ئانكو تو وەكی داهێنەرێ وی بزانی، ئەڤە تو نە داهێنەری، تو ب تنێ د عەقلێ كەسەكی دیدا شارەزایی و تە ئەو پێزانین هەر ژ هەمان ژێدەری یێن وەرگرتین، لێ ئەگەر تو بۆ من ئێك (دۆگمێ) ل كوپیۆتەری زێدەكی، كو خزمەتا كاری بكت، وی دەمی تو داهێنەری. ئەڤ پیڤەرە، بۆ هەمی بوارێن داهینانێ و هەمی زانستانە.
ل دووماهیكێ ژی ب تنێ بەرهەمێ مرۆڤی د ئاخڤت و داهێنەر و نە داهێنەریا مرۆڤی د سەلمینت. نە ب گڕگر و دەنگێ بلندە.
دەرباەری چاند و ئەدبیاتا، ئەم گەلەك جاران هندەك مرۆڤان دبینین، گەلەك خوە دئینن ل پێش و ناڤێن فیلۆسۆفێن مەزن و پرتووكێن شاكار و تەیۆرێن جیهانی یێن كەڤن و سەردەم، ب شەڤ و رۆژ یێن ل سەر ئەزمانێ وانا و جارا ب پەیڤێن تێر ستاتیك و تەنتەنە، (هالەكا) مەزن ل دۆر كەسایەتیا خوە بۆ خەلكی چێ دكن، لێ ئەگەر تو ل دۆر وی بزڤری و ڤەكۆلی، دێ بینی ئێك بەرهەمێ ئەدەبی نینە، ب تنێ پارزینكێ پێزانینایە، ئانكو ئەڤ كەسە ب چ پیڤەر و رێكێن زانستی و مەعریفی نابت وەك داهینەر بهێت هژمار، ئەم دشێن بێژین، مرۆڤەكی تێر پێزانینە و خودان بیردانەكا ب هێز و ئەم د شێن بێژن رەشەنبیرە ژی، لێ ب چ روویان نابیت داهێنەر و گەل و مللەت چ جارا ب یێن وەسا پێش نە‌كەتینە و داهێنەر نەبووینە، ژ بەركو ئەوا ئەو دبێژن یا هاتی گۆتن، ئەگەر تو ب خوازی دێ ژ گۆگلی ئەوا ئەو دبێژت زانی، ئەز وەك تاكە كەسەك نە پێدڤی مرۆڤێن بڤی رەنگی مە، ژبەركو چ گاڤا من ڤیا دێ ژ گۆگلی ئینم دەر، هەلبەت رۆلێ ڤان كەسا خراب نینە و بەلكو گەلەك جارا پێزانین و مەعریفێ د گەهینن مللەتی و مرۆڤێن سادە، لێ ل سەر كۆرسیكا داهێنەرا ب روونن و گۆلشەلیلا وانا ل سەر سەرێ خوە دانن و خوە ب فیلوسۆف و نڤیسەر دانن، ئاها ئەو نۆ.
ب كورتی:  ئەم پێدڤی هزرێن نوو نە، نەك عەمبارێن هزرێن كەڤن.
  

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *